Jâŋ Yààr Kìn Nyɔ̧ɔ̧́ Jâŋ yi tɨnndé
Yààr Kìn Nyɔ̧ɔ̧́ Jâŋ yi tɨnndé
Kìn nyɔ̧ɔ̧́ Jâŋ yi tɨin ndè ŋgə́ yi tɨnna mɨ̀kwìn nùb ə́mní yi dukom Sìríì á, duceé u̧ ɗàà nùb yi dukom Àsî mɨ̀ténèé kùb ducɨ ɗàrò ɓénɨ Tùùrkî rè. Káàtà Jáàŋ ndè no, nyɨnyaŋhȩ́ ɓe sɨ̀ɨ̀ŋ nyindíí ɨ́ tɨtɨnné á bɨ lâs nyin ɓe káàtààb kìn nyɔ̧né bɨ kù rè. Nyindɨ́b ya Yésùù ɓe nɨ́ɨ́b ŋgə́ ya ndɨŋndé lâs, Jâŋ góomɓa nɨ cei njàb bɨ du bɨ́ yo̧né á.
Yàrénɨ gɔ̀ 1 há̧á̧ gɔ̀ 12: Gbɨ́ktèìn yàyɨ̀rí káàtà kíì á kí. Gbɨ́ktèìn kɨ́ no, Jâŋ á átɨ̀nɨ nɨ́ɨ́b sɨ̀sɨ̀rí tɨ́ɓaám Yésù yi ndɨŋndé. Nɨ́ɨ́b sɨ̀sɨ̀rí kɨ́ du bɨ lìím á, ɓetí nɨ́ɨ́b kɨ́ ɨ́ du túùmnɨ ɨnayâna Yésù du mwin Mèèín á ru. Gbɨ́ktèìn yàyɨ̀rí kɨ́ no Jâŋ á átɨ̀ɓwênɨ hȩ Yésù ya tu sà̧à̧ ɓe nɨ̀vɨ́tɨ̀bì, hȩ kɨ́ yi ŋgə́ ɓe kɨ̀jíri ə́mní Jwîf kù rɨ u̧ (Gɔ̀ 3), kɨ́ yi ŋgə́ ɓe nɨ̀gwi Sàmàríì rɨ (Gɔ̀ 4), kɨ́ ŋgə́ ɓe nɨ̀yáàb kèè (Gɔ̀ 5 há̧á̧ gɔ̀ 9). Tɔ̀ɔ́ Yésù yi nakomndé no, ŋgə́ yaá tànɨ ní du bɨ̀rê du nànɨ mèè á, ní ɨ́ du gèènɨ nɨ̀vɨ́tɨ̀b yɨ́ Mèín nò du táà hȩ nò ge jírɨ́bí gece jírɨ́b rɨ u̧, ní mwa̧ du ɓə̀ə̀nɨ ɗɔ̀bɨ́nné á. U̧nè á Yésù du túùmnànɨ nùb lâs na á ní du.
Yàréndóŋnɨ gɔ̀ 13 há̧á̧ 21: Gbɨ́ktèìn bɨrɨ́bí kɨ́ no, Jâŋ á átɨ̀nɨ nyààŋkîí gùr Yésù ɓa éíkɨ́nɨ ɗɔ̀bín gìnɨ yɨ́ tá noò, ŋgə́ á nɨ́m átɨ̀nàɓwênɨ mvókín nɨ́m kɨ́ ɓa nó ndɨ̀ŋniì. Yésù á nyìnnànɨ nɨ̀fuùb noò. Ŋgə́ á ŋgáb nànɨ sóóŋ hȩ ŋgáb ɓa dùnɨ ɓwâ ní tɨ̀ ducɨ ɓe ŋgáb ɗàwáá (Gɔ̀ 13 há̧á̧ 16). Yésù yóŋgií tá noò Mèín, ɗà ŋgə́ ɨ́ nàrékɨ́sò ŋgə́ nɨ̀fuùb noò ŋgáré (Gɔ̀ 17).
Sà̧à̧ du ŋgèènɨ cwá Yésùù (Gɔ̀ 18 há̧á̧ 19), nɨ́ɨ́b ví̧i̧ sà̧à̧ kɨ́ noò á gè nɨ́m mwi̧ ɓe kɨ́ Màtíyò, Máàrk ɓe Lúkàs.
Ye Páskàà, Yésù túumnaá nɨ̀fuùb noò síí jáŋ (Gɔ̀ 20 há̧á̧ 21). Nò tɨin káàtà rèè tagií ɨnayâna ní tɨin káàtà rè ɓe àm nùb ya du bɨ́ Yésù ə́ə̀mwáá a ə́ə̀mɓwê ŋgéé á yáá (Gɔ̀ 20.29-31).
Kìn nyɔ̧ɔ̧́ Jâŋ yi tɨnndé no, nyindí nóò ví̧i̧ á há nɨ ɓe mvènnɨ́b Jwîf bɨ. Mvènnɨ́b Jwîf bɨ kɨ́ du bɨ nùb Yésùù ɓi̧ní á, kí duɓa nɨ ɓe kɨ̀jííb ə́mní lâs du àm Yésùù ə́ə̀mnɨ ɗàà rɨ á. Yésù nɨ̀mɨr Jwîf á, dugɨ nɨ̀fuùb yàyɨ̀rí noò. Ɓwâ Jâŋ ɓé Jwîf lɨ, nɨ tàwá àm gbɨ̧̀ɨ̧́, duɓa nɨ nò lâs du nɨ́ àm Yésùù ə́ə̀mnɨ ɗàà rɨ á.
Káàtà Jâŋ no ŋgə́ nɨ àm fin Yésùù átɨ̀wá, dugɨ ɓwâ Yésù yi yaré ju mɨ̀kùnɨ́nné. Ɨ́dù yààr káàtà ŋgéé kɨ́ no, ŋgə́ á tànyàŋnɨ ɨnayâna Yésù du kìn Mèèín á, kìn kɨ́ á cè nɨ́ ɓe Mèín tɨ́k kɨ̀ tɨ́k yàá yàllì (Gɔ̀ 1.1-18). Yésù no? du Kìn Mèèín yi goó dùnɨ ɓe nɨ̀vɨ́tɨ̀b. Hȩ dùnɨ u̧nèé, á sàmàìn nɨ̀vɨ́tɨ̀b sei munɨ́b Mèèín. Ju Yésù ya du ɗɔ̀bɨ́nné no, ŋgə́ yaá ɓà ɓaín ɓe Tá. Ŋgə́ nò Tá tómwo ɗɔ̀bɨ́nné á. Nò lâs du mánɨ Mèín ɓe ɗûnɨ́mí á sàmàìn kwa ŋgə́ ɓè ŋgáb ɗəŋhȩ Yésùù.
Currently Selected:
Jâŋ Yààr Kìn Nyɔ̧ɔ̧́ Jâŋ yi tɨnndé: NTV
Highlight
Share
Copy
Want to have your highlights saved across all your devices? Sign up or sign in
© 2007 Alliance Biblique du Cameroun, B.P. 1133, Cameroon