Ə́rɨ́b nùb tómé yi ə́llé 7
7
Étèn á nyìnnànɨ nɨ̀vɨ́tɨ̀b
1Ɓwâ kɨ́ á nɨ̀gáŋ satɨgàà yi fɔ́ Étèn ɨnè: «Nyindí mɨ du óknɨ rè lâs, àmɨɨr á à?» 2Étèn ɨ́ pìhè ɨnè: «Mwin yàá bɨ, tá bɨ ná, óknáye mɨ. Mèín mwahí yi túumnatɨ́ Ábɨ̀ràhâm tákɨ̀r nɨ́mè ndùtì ndútí síí ɓwâ ŋgə́ yi du ti Mèsòpòtàmíì, ŋgə́ gɨ̀yèwá dùnɨ Hàrâŋ.» 3Ŋgə́ ɨ́ tànà ŋgə́ ɨnè: «Éímbɨ́kkɨ́som ti wóò ɓe gbàŋ woò, wu a gì ti mɨ ɓa wu túùmsònàniì no. 4Àm kɨ́ á Ábɨ̀ràhâm yi éíkɨ́ ti Kàldéè no, ŋgə́ ɨ́ gì dùnɨ Hàrâŋ. Á cùr cwá tá noò, Mèín yi áhó̧ ŋgə́ Hàrâŋ gèndóŋwònɨ ti nyí dukɨ́ nó mwáín ndè no. 5Mèín yi nɨ́ ŋgə́ nɨ́m ti mwi̧ ɓa rɨ ɓè nàwá, dugɨ gbɨ́ktèìn ti ɗɔ̀bí ɗóhîn ɓe yárèé gurubi ɓà rɨ; ɨ́dù Mèín yi ɓwáttɨ́ ŋgə́ nànɨ ti há̧á̧ nyȩrɨ́b noò a dùɓwéhè no ɓwâ íí noò kwá ducɨ ɗàwáá. U̧ rɨ ɓwâ kɨ́ Ábɨ̀ràhâm yi nɨ́ ɓe mwin ɗàwá. 6Nɨ́m Mèín yi wáana ŋgéé á rè: ‹Munɨ́b woò kwá du ti kù no, yɨ́ ŋgáb kwá lə́ nìrì kùb a ɓáìn ŋgáb há̧á̧ dáín təmərì nààsɨ̀b. 7Ɨ́dù mɨ ɓa ténnɨ ti kwá gə́te ŋgáb nìrì àm ŋgwéé á. Cùr kɨ́ no, ŋgáb a éíwòkî ku, ŋgáb a gò mɨ ɗómnɨ hò̧.› 8Ɗà Mèín ɓe Ábɨ̀ràhâm ɨ́ â lê ndɨ̀ɨ́ dù túúm jin nyàáŋ mvókín ŋgábè. U̧ á yi ndɨŋ jíì sə́rì cùr fin Ìsáàk, tá noò Ábɨ̀ràhâm ɨ́ lə́nà ŋgə́ ndɨ̀; Ìsâk ɨ́ ndɨ̀ŋɓwê ɓe mwin nóò Yákòb u̧; Yákòb ɨ́ ndɨ̀ŋndóŋcè ɓe nùb cóóŋ ɨ́ bɨrɨ́b yi du ŋgób gbɨ̧̀ɨ̧́.
9«Ŋgób gbɨ̧̀ɨ̧́ kɨ́ yaá ɓə̀ndɨ̀nɨ Yòsə̂b á ŋgáb ya sə́rɨsokɨ́ ŋgə́ nìrì ti Èjíìbtə̀ no. Ɨ́dù Mèín yaá kpɔ́knɨ Yòsə̂b. 10Ŋgə́ ɨ́ ɓátɨ̀hô̧ ŋgə́ jábɨ́r lâs no. Ŋgə́ ɨ́ nà ŋgə́ kɨ̀cáàb, ŋgə́ ɨ́ ndɨ̀ŋ Yòsə̂b kɨ́ nyàŋɓà Fàràwôŋ yi du mvèìn jíri Èjíìbtə̀ sumí. Mvèìn kɨ́ ɨ́ bɨ̀wû Yòsə̂b dù gómnà nò kɨ́kna ŋgə́ dúhɨ́b hamnɨnne ɓe ti nóò ɓwê. 11Ŋgàk ɨ́ gù ti Èjíìbtə̀ bɨ̂ŋ ɓe ti Kànàâŋ ɓwê. Jábɨ́r yi ndóoŋɓatɨ́, tákɨ̀rɨ́b nɨ́mè yi bɨ́ kwàɓàcɨ̀nɨ nɨ́m ŋgáb taŋndé ɗàwá. 12Ɓwâ Yákòb yi ók ɨnayâna cɔŋ á ti Èjíìbtə̀ noò, ŋgə́ ɨ́ tómsò tákɨ̀rɨ́b nɨ́mè kɨ́ yàyɨ̀rí. 13Gùr gwì bɨrɨ́bí ŋgáb yi gɨré, Yòsə̂b ɨ́ túùmnà mwin yàá bɨ noò síí, á Fàràwôŋ ɗəəŋgi ɓè ŋgáb du gbàŋ Yòsə́ə̀b. 14Á Yòsə̂b yi tóm kùb gèwònà ní tá níì Yákòb ɓe gbàŋ noò, nùb kɨ́ yaá lâs nɨ̀vɨ́tɨ̀b vii taarɨ́b ɨ́ yɔ̀k cóóŋ ɨ́ ŋgiì. 15Yákòb ɓe gbàŋ noò ɨ́ gɨ̀gì ti Èjíìbtə̀ no. Ku á ŋgə́ ɓe tákɨ̀rɨ́b nɨ́mè lâs yi kú. 16Kùb ɨ́ gècù fɨ́nɨ́b ŋgábè vɨ́rɨ̀nɨ Sìkêm, sèè Ábɨ̀ràhâm yi gwɨi munɨ́b Hèmóòr ŋgáréè no.
17«Jíìb Mèín yi ɓa ndɨ̀ŋnɨ ɓwáár ŋgə́ yi ɓwáína Ábɨ̀ràháàm a fô̧ hàráá yi ŋgóobtɨ́. Ɓwâ kɨ́ á gbàŋ nɨ́mè yi víndóŋgi tíí tíí ti Èjíìbtə̀ no. 18Á mvèìn jíri heé kù wúícu ŋgáŋnɨ ti Èjíìbtə̀ no, ŋgə́ yi nɨ́ Yòsə̂b ɗə̀ə̀ŋnɨ ɗàà. 19Mvèìn jíri kɨ́ yi mbáaŋtɨ́ nɨ̀vɨ́tɨ̀b há̧á̧ ŋgə́ ɨ́ ɓáìn tákɨ̀rɨ́b nɨ́mè ŋgə́ a kpɔ́ɔce ŋgáb mbɨ́klèèsòkɨ́ munɨ́b ɓoò lúu àm ŋgáb a kûú. 20Ɓwâ yi kɨ́ kùb yi feintɨ́ nyààŋ kàm muní kù ɨ́r yi du Mòyîs. Tá noò ɨ́ gə́tè ŋgə́ há̧á̧ njumi taarɨ́b. 21Ɓwâ kùb yi mbɨ́klehe ŋgéé, á nɨ̀gwi kù yi du mwin Fàràwóòŋ ɨ́ â ŋgə́ hàmɨ̀nɨ hȩ mwin ŋgə́ nɨ̀mɨrí. 22U̧ á Mòyîs yi kwa kɨ̀cáàb ɗɨ́m ti̧né lâs nùb Èjíìbtə̀ ya há̧á̧ ŋgə́ ɨ́ sèì nɨ̀ŋgwá tamnì nyindí nó ɓɔ̧ne ɓe nɨ́m ndɨ̧ɨ̧́ noò ya cúk. 23Ɓwâ Mòyîs yi féín dáín vii bɨrɨ́bí á ŋgə́ ta ní gɨ̀yè pénɨ mwin yàá bɨ níì nùb Ísràyéèl yáá. 24Ŋgə́ ɨ́ pê nò Èjíìbtə̀ kù á ɓáínnɨ kùŋ noò; ŋgə́ ɨ́ tà ní á lɔ̧̀nɨ nò kùb du ɓáínnɨ kɨ́, ŋgə́ ɨ́ kwíìkî nò mwi̧ rè. 25Ŋgə́ yi lə́mne mwin yàá bɨ níì nùb Ísràyéèl yi ɓa ɗə̀ə̀ŋnɨ ɨnayâna, Mèín yi ɓa vúm céínndóŋnɨ ní ya ku á na, ɨ́dù ŋgáb ɨ́ dù bɨ́ ókwa. 26Kpíí nó kwe, Mòyîs ɨ́ kwà nùb Ísràyéèl bɨrɨ́b lɨŋni, ŋgə́ ɨ́ ɗû ŋgáb gàmɨ̀kɨ́nɨ ŋgə́ a nyàŋcù ŋgáb, ŋgə́ ɨ́ tà: ‹Ɓwàjììb moò, nyí mwin yàá ɓe kùùŋ á, nyí a lɨ̀ŋcùkwàcì nɨ́ lɨɨŋ à?› 27Ɨ́dù nò yi du kùùŋ hààŋniì ɨ́ pàhè Mòyîs, ŋgə́ ɨ́ tà ɨnè: ‹Na ɨ́ bɨ wu mvèìn ɨ́ tà wu kɨ́k nɨ́m, kèè tɨ́ŋgù̧ú̧ bɨ̂ŋ yɨ́ wu ŋgwin nɨ́mè? 28Kèè wu ɗú wú mɨ kwíìɓwênɨ hȩ wu kwíhe nò Èjíìbtə̀ yáya rè á à?› 29Ô Mòyîs yi ók nyindí kíì, á ŋgə́ luge nɨ́ ti Màdíyàŋ dùnɨ; ŋgə́ ɨ́ fèìncè nɨ́ munɨ́b bɨrɨ́b ku.
30«Cùr dáín vii bɨrɨ́bí, á dùgal Mèèín yi túumna Mòyîs síí tɨfuru̧ú̧ mvɨ́njè yɔ̀ ti kù ya, yúum waá no. 31Mòyîs yi gbɨɨŋɓatɨ́ cei ɓe nɨ́m ŋgə́ yi pə́ kɨ́, ɨ́dù hȩ ŋgə́ yi du ŋgɨ̀ɨ̀résònɨ góòmnyààŋniì, á ŋgə́ ók kúu Kékéé tànɨ ɨnè: 32‹Mɨ du Mèín tákɨ̀rɨ́b woò ya yóŋkomndé á, Mèín Ábɨ̀ràháàm ɓwê, dùgɨ̀ Ìsâk ɓe Yákòb›. Mòyîs ɨ́ yà bɨ́ndɨ̀nɨ ɓe vùù há̧á̧ jɨ̀r ŋgə́ góomsoré ɨ́ yɔ̂ ŋgə́. 33Á Kéké tanagi ŋgə́ ɨnè: ‹Njeikɨ́ɨm tə́b woò, ɓetí yɨ́ wu ə́əŋkɨ́ kɨ́ du nɨ ɗɔ̀ɔ́b ók ɓe Mèèín á. 34Mɨ yi ɗəəŋcutɨ́ jábɨ́r gbàŋ moò yi pə́ ti Èjíìbtə̀ noò, mɨ ɨ́ ókɓwéhè dú̧ noò á mɨ sówo ŋgə́ ɓátɨ̀nɨ. Gom! Ɗàrò mɨ á wu tómnɨ ti Èjíìbtə̀.› »
35Étèn ɨ́ gɨ̀ndôŋ tíí ɓe nyindí, ŋgə́ ɨ́ tà: «Mòyîs mwi̧ nùb Ísràyéèl ya mvú ɓwâ ŋgáb ya ta: ‹Na ɨ́ bɨ wu mvèìn kèè tɨ́ŋgù̧ú̧?› rɨ. Mèín yi tómwotɨ́ ŋgə́ hȩ mvèìn ɓe tɨ́céín. Ŋgə́ yi ndɨŋ nɨ́m kɨ́ ɓe nyòm dùgal yi túumna ŋgə́ síí mvɨ́njè yɔ̀ɔ̀ no rɨ á. 36Mòyîs kɨ́ ɨ́ ndɨŋ nùb Ísràyéèl fó̧ ti Èjíìbtə̀ no ru, ɓe nɨ́ɨ́b sɨ̀sɨ̀rí ɓe lìím bɨ ŋgə́ yi ndɨŋ ti kɨ́ noò, hȩ kɨ́ ya mɨ̀kwehɨ̀r jandɨ́nne rɨ, dùgɨ̀ kɨ́b ya tɨfuru̧ú̧ há̧á̧ dáín vii bɨrɨ́b lɨ. 37Mòyîs kɨ́ ɨ́ tanakwa nùb Ísràyéèl ɨnè ru: ‹Mèín ɓa nyí tómwònànɨ tɨ́kìn kù hȩ mɨ ɓwê á, ŋgə́ kwá du nò nyínè gbàŋné.› 38Nò ya du ɓe gbàŋ Ísràyéèl tɨfuru̧ú̧ rè Mòyîs á. Ŋgə́ yaá ɓe tákɨ̀rɨ́b nɨ́mè ɓe dùgal Mèèín yi du ŋgə́ nyìnnànɨ ɓe Sìnàyî yaà; ŋgə́ yi gamwonatɨ́ nɨ́m kìn Mèèín yi du cɔ̧́ɔ̧ cɔ̧́ré. 39Ɨ́dù tákɨ̀rɨ́b nɨ́mè yi bɨ́ ɗúwa Mòyîs jə̀ŋnɨ, ŋgáb ya mvúú bɨ́ ŋgə́, ŋgáb ɨ́ ɗû gɨ̀cùbɨ̂ŋnɨ ti Èjíìbtə̀ no. 40Ɗà ŋgáb ɨ́ tànà Àrɔ̂ŋ ɨnè: ‹Nyaaŋnam nɨ́m mèín nɨ́m fɨ́tɨ hàìntèènɨ nɨ́mè tíí, ɓetí nò yi ndɨŋ nɨ́m fó̧ ti Èjíìbtə̀ no nɨ́m ók Mòyîs na rè, nɨ́m ɗə̀ə̀ŋwá nɨ́m féínna ŋgéé.› 41Á ŋgáb ma mwin ti ndèèìn kù ma̧á̧, a dù mèín ŋgábè. Ŋgáb ɨ́ kwíhè nyèém nànɨ mèín kɨ́ satɨgà no, ɗà ŋgáb ɨ́ ókɓà mɨ̀tù ɓe nɨ́m ŋgáb nɨ̀miib yi maɓa kɨ́. 42Ɨ́dù Mèín ɨ́ ɗàm síí nóò ɓe ŋgáb, ŋgə́ ɨ́ mbɨ̂ ŋgáb yóŋnɨ káŋyerɨ̀b hȩ nɨ́m yi du tɨín káàtà tɨ́kɨ̀nɨ́bí no ɨnè rɨ:
‹Wu, gbàŋ Ísràyéèl,
nyèém wu kwíhe ndɨ̀ŋnɨ satɨgà no tɨfuru̧ú̧ há̧á̧ dáín vii bɨrɨ́b lè,
wu tà wu ndɨŋna mɨ á à?
43Ɗàɓàwá, ɨ́dù nyí yi haintɨ́ njáŋnè Mòlôk mèín nyínè yi du nóò,
ɓe mèín nyaŋhîn nyínè Rèfâŋ yi du hȩ káŋyerèè,
mèín nyaŋhɨ́b nyí yi ma àm yóŋndé rɨ ɓwê.
Àm kɨ́ á mɨ ɓa nyí hàìngèɓànɨ cóo a ndóŋɓàcéyè Bàbìlôn ndu.›
44«Kɨ́ tákɨ̀rɨ́b nɨ́mè, ŋgáb yaá ɓe njáŋnè kù tɨfuru̧ú̧ yi du túùmnɨ ɨnayâna Mèín á ku. Njáŋnè kɨ́ yaá ó̧o̧ hȩ Mèín yi ta Mòyîs óŋte, ɓetí ŋgə́ yi ta Mòyîs óŋhá nɨ njáŋnè kɨ́ ɗóhîn ɓe kɨ́ ŋgə́ yi pə́ré. 45Á tákɨ̀rɨ́b nɨ́mè yi turé rè ɨ́ gàmndóŋɓwéhè njáŋnè kɨ́; ŋgáb ɨ́ hàìngè bɨ́ ɓwâ Jòjuwê yi ge ŋgáb gànɨ ɗɔ̀ɔ́b gbàŋ bɨ kù Mèín yi ŋgɨ́íkɨ́ ŋgábè tíí rɨ. Njáŋnè kɨ́ ɨ́ jə̂b há̧á̧ ɓwâ Dàvíìt. 46Hȩ Dàvît ya kwa faám Mèèín, á ŋgə́ ya ɓwei nyààŋnànɨ ŋgə́ nò du Mèín Yákòb yɨ́ juu. 47Sàlòmôŋ ya óŋna nɨ́ Mèín dúhé ru. 48Ɨ́dù Mèín còmné nɨ dùtèènɨ dúhɨ́b nɨ̀vɨ́tɨ̀b óŋndé no ɗàà, ɓetí hȩ tɨ́kìn Mèèín ta ɨnayâna Mèín ta:
49‹Ɓɨɨr du kò mvènnì moò á,
ɗɔ̀ɔ́b cè yɨ́ kɨ́k gurubi.
Dúú nyí ɓa mɨ óŋnàniì macè kúúŋ kɨ́ ŋge?
Yɨ́ mɨ ɓace dùniì á ŋga?
50Nɨ́ɨ́b lè lâs mɨ ɨ́ nyaaŋha ru ye?›
51«Nyí nùb ɗèìntóo, nùb njɔ̧̀ du tamnì ɓe ɓə́r Mèín du nyí ɓéniì, ŋgúúŋ ndè nyí ə́əŋnaháye Nyéhè Sarîn á à! Nyí á nɨ hȩ tákɨ̀rɨ́b nyínè ye! Áí ɨ̀hɨ̧̀ɨ̧̀! 52Tɨ́kìn Mèèín tákɨ̀rɨ́b nyínè du jábɨ́r túùmwáá á kwàcɨ̀ tɨ́kìn ŋge? Ŋgáb yi kwíitɨ́ nùb yi takɨ́yaye gùr nò ɗɨ́ɗɨ̧́ ɓa gòniì; ɗàrò nò kɨ́ á nyí sə́rɨkwíikɨ́ ru. 53Nyí nùb Mèín yi nawo ɓíì noò dùgallɨb noò ɓɔ̧ne, nyí nɨ ɓíì kɨ́ jə̀ŋwá!»
Cwá Étèn yi kúré
54Kí á tɨ́ŋgù̧ú̧ bɨ ya ə́tɨɓa ɓe njù̧ ɓe nɨ́m Étèn ya nyin kɨ́. 55Ɨ́dù kɨ́ noò, yúklîn ɓe Nyéhè Sarîn, ŋgə́ ɨ́ ŋgèèwû ɓɨllin, ŋgə́ ɨ́ pê mwa Mèèín ɓe Yésù ŋgáár lam Mèèín no ə́ŋhîn. 56Ŋgə́ ɨ́ tà: «Mɨ á pénɨ ɓɨɨr kumnîn, Mwin Nɨ̀rì á cè ŋgáár lam Mèèín no ə́ŋhîn.» 57Á ŋgáb gbəm kɨ́ŋnɨ́b, ŋgáb ɨ́ ɗòònɨ̀kî tó. Ŋgáb ɨ́ ndɨ̀llê ŋgə́ ya, 58Ŋgáb ɨ́ njóòhô̧ ŋgə́ kúr gɨ́ní, ŋgáb ɨ́ yà ŋgə́ lóòŋkwíìkɨ́nɨ. Nùb ya du mɨ̀náméé ɨ́ nàrékɨ́sò júúb ŋgábè wàánjí kù ɨ́r ya du Sôl ŋgáré ŋgə́ gə́tɨ̀kɨ́nà vúm yáá. 59Ɓwâ kùb ya du Étèn lóòŋniì, ŋgə́ ɨ́ yà yóŋnɨ Mèín ɨnè: «Kéké móò Yésù, gam nyéhè moò!» 60Kí á ŋgə́ gucáamsé ɗàá, ŋgə́ ɨ́ kɨ̂ŋ kúu còóm: «Kéké, tɨ́í ŋgáb cum ndè!» Cáŋhȩ̀ȩ́ nyindí kíì, Étèn ɨ́ kû.
Currently Selected:
Ə́rɨ́b nùb tómé yi ə́llé 7: NTV
Highlight
Share
Copy
Want to have your highlights saved across all your devices? Sign up or sign in
© 2007 Alliance Biblique du Cameroun, B.P. 1133, Cameroon
