Ə́rɨ́b nùb tómé yi ə́llé 4

Kùb bɨgetɨ́ Píyéèr ɓe Jâŋ ŋgwìn jírií

1Píyéèr ɓe Jâŋ yaáyè nyìnnànɨ nɨ̀vɨ́tɨ̀b á nùb na satɨgàà, mvènnɨ́b sójààb Dúú Jíri Mèèín ɨ́ Sàdúsààb yi féínwo. 2Ŋgáb yi ókɓatɨ́ ɓáŋhîn àm nùb tómé bɨrɨ́b lè ya tɔɔkom nɨ̀vɨ́tɨ̀b, ŋgáb a tanace nùb kɨ́ Yésù səəmcuhó̧tɨ́ sèrìn na rè. Nùb tómé kɨ́ ya wáana nɨ̀vɨ́tɨ̀b u̧ tànànɨ ŋgáb ɨnayâna nɨ̀kwííb kwá səəmcuhó̧ɓwée sèrìn yáá na á. 3Kí á ŋgáb bɨ ŋgə́ ɓe kùùŋ, ɗèìnndésònɨ ŋgáb dúú nìrì, há̧á̧ yekɨ́rɨ̀b, ɓetí mvii ya gɨcií nɨ́. 4Ɨ́dù nɨ́, nùb ví̧i̧ ya ók nyindí kíì ɨ́ ə́mnè bɨ́, ɗà nùb ə́mní ɨ́ kpɔ̀ɔ̀rékwà, ɨ́ féíncì sàmàìn nɨ̀vɨ́tɨ̀b tɔ́sìn ŋgiì.

5Kpíí nó kwe, mvènnɨ́b Jwîf bɨ, kɨ̀jííb ɓe nɨ̀gááŋ káàtàbì ɨ́ ɓáhè Yèrúsàlèm. 6Ánà nɨ̀gáŋ satɨgàà yaá ɓè ɓe nùb no gbàŋné. Kàyîf, Jâŋ, ɓe Álèksândɨ̀rə̀ yaáɓwê ɓè. 7Á ŋgáb ya ta kùb gèwò nùb tómé bɨrɨ́b lè ŋgábè tíí, ɗà ŋgáb ɨ́ fɔ̂ nùb kɨ́ ɨnè: «Nyí rè, ɓe nyòm ŋge á nyí wáaŋɓacéye yáb lè, kèè ɓe ɨ́r naà ɓàcéyè?» 8Kí á Píyéèr, yúklîn ɓe nyòm Nyéhè Sarɨ́nne, yi piina ŋgáb ɨnè: «Mvènnɨ́b gbàŋné ɓe kɨ̀jííb, 9hȩ mwáín kùb fɔ́ nɨ́m fɔ́ ɓe ɨ́r nyɔ̧ɔ̧́ nɨ́m tɨ ndɨŋna nò ɗə́əm, nɨ́m a tàkwà hȩ tɨ ndɨŋ ŋgə́ ɨ́ wáŋhȩ̀ȩ́ rèé, 10Á ɗúnɨ nyí lâs, dùɓwêgɨ̀ gbàŋ Ísràyéèl lâs, ɗəəŋnáɓam ɨnayâna nɨ̀ŋgwá rè ə́əŋɓa nyínè tíí hò̧ síí wááŋ ɨnè ɓe nyòm ɨ́r Yésù Krístù nò Nàsàréèt á, nò nyí tɨ kpáaŋkwíiwúkɨ́ bɨ̧̀ɨ̧́, ɗà Mèín ɨ́ sə̀ə̀mcùhô̧ ŋgə́ mvókín nɨ̀kwíbí rɨ. 11Ɓe ɨ́r Yésù kíì, káàtà Mèèín taá ɨnè:

‹Sɨ̀ìn nyí nùb óŋ dúhéé ya leehó̧kɨ́ gə́nȩ̀ȩ́ rɨ

ɨ́ sei jù̧ú̧ dúhéé ru.›

12Jɔ̀sé ɓe ɨ́r noò á ɓə́r du sə̀mnɨ ru ɓetí ŋgɨ̀ŋgɨ́ŋ ɗɔ̀ɔ́b lèè no lâs, Mèín ya nɨ́ nɨ̀vɨ́tɨ̀b nò nɨ́m fɨ́tɨ ɓáínɨ ɓe kíí nàkɨ́yèwá.»

13Tɨ́ŋgù̧ú̧ bɨ ɨ́ gbɨ̀ɨ̀ŋɓà bɨ́ cei, ɓetí ŋgáb ya péé hȩ Píyéèr ɓe Jâŋ ya du nyìnɓànɨ, ŋgáb vùù kù ókɓànɨ ɗàwáá. Ŋgáb yi ɗəəŋcuɓwéetɨ́ ɨnayâna, ŋgə́ ɓe kùùŋ bɨrɨ́b ya bɨ́ nùb cutɨ́b saai, sùkúrù kù ŋgwȩ́ȩ́ ɗàwá, ya háateekom Yésùù á. 14Ɨ́dù ŋgáb ya pə́cutɨ́ nɨ̀ŋgwá tɨ wáŋhɨ rè ə́ə̀ŋkɨ́nɨ ŋgábè tíí, ŋgáb yɨrɨ́b. 15Kí á ŋgáb ta ŋgə́ ɓe kùùŋ fó̧kɨ́yè lúu yáá. Ɓwâ kɨ́ á ŋgáb me ŋgáb kɨ́ ŋgáb, cábnɨ nɨ́m vúm ɓa ndɨ̀ŋniì. 16Ŋgáb ɨ́ tà ɨnè: «Ní á nɨ́m ɓaná ndɨ̀ŋnɨ ɓe nɨ̀ŋgwáàb lè? Ɓetí nùb Yèrúsàlèèm ɗəəŋɓatɨ́ wááŋ ɨnayâna sɨ̀sɨ̀r kàm lìmí rè ŋgáb ɨ́ ndɨŋ ndu, cè nɨ́ sàmàìn nɨ́m sə́ndɨré ɗàwá. 17Nɨ́m duré á, ndɨ̀ŋnɨ àm kɨ́ tɨ̀ gɨndóŋ tíí tíí, á ɗúnɨ nɨ́m kààŋná ŋgáb ɓe ɓéín cúk, ŋgáb nò kù ɨ́r Yésùù kɨ́ nyìnnàkwàwá.»

18Á ŋgáb ya ɓécurógi Píyéèr ɓe kùùŋ nànɨ ŋgáb ɓíì. Ŋgáb ɨ́ tà kpáb, ŋgáb ɓékwàwá ɨ́r Yésùù, dugɨ tɔ̀ɔ́ ɓe ɨ́r ŋgéé yáá. 19Nɨ́m kɨ́ á Píyéèr ɓe Jâŋ ya tacuna ŋgáb ɨnè: «Nyí nɨ̀miib canáɓaye, á ɓàhá Mèèín tíí ɗɨ́ɗɨ̧́ nɨ́m jə̀ŋbɨ̂ŋ nyí nɨ́m á mbɨ̂ Mèín à? 20Du nɨ́ kɨ́ nɨ́mè, nɨ́m nɨ sàmàìn nɨ́m mbɨ́kce nɨ́ nyìnnɨ ɓe ɨ́r nɨ́m nɨ́m tɨ pə́ré ɓe kɨ́ nɨ́m tɨ ókceré nɨ ɗàà.» 21Kí á tɨ́ŋgù̧ú̧ bɨ ya mgbɨɨrékwa ŋgáb ya u̧u̧, ŋgáb ɨ́ mbɨ́khô̧ Píyéèr ɓe Jâŋ àm ŋgáb yi du bɨ́ kɨ̀cáàb jóktɨ ŋgə́ ɓe kùùŋ ɓe kíí kwàwáá, ɓetí nùb lâs yaá bɨ́ mgbíìnɨ Mèín ɓe nɨ́m tɨ ndɨŋ kɨ́. 22Nɨ̀ŋgwá yi wáŋhɨ ɓe nɨ́m sɨ̀sɨ̀rí rè, dáín no sóò yi aaŋcií nɨ́ vii bɨrɨ́b.

Mɨ̀yú̧ nùb ə́mní ya yóŋndé

23Hȩ kùb mbɨ́kcùhó̧nɨ Píyéèr ɓe Jáàŋ, á ŋgáb ya gaincu kpáín ɓwàjììb ɓoò. Ŋgáb ɨ́ átɨ̀nà nùb kɨ́ nɨ́ɨ́b lâs nɨ̀gááŋ nùb na satɨgàà ɓe kɨ̀jííb tɨ nyinndé. 24Ɓwâ nùb ə́mní yi ók àm kíì, á ŋgáb ya ɓáhe, ɓe sum mwi̧, ŋgáb ɨ́ yôŋ Mèín ɨnè: «Kéké, wu ya nyaŋhȩ ɓɨɨr ɓe ɗɔ̀ɔ́b, mɨ̀kwehɨ̀r ɓe nɨ́ɨ́b duré lâs lu. 25Ɓe nyòm Nyéhè Sarɨ́nne, wu ɨ́ du nò ya tandóŋwo tákɨ̀r nɨ́mè Dàvît, nò ə́ré woò ɓɔ̧ɔ̧ ɨnè ru:

‹Àm níì á gbààŋ bɨ jɨŋteekɨ́ɓa ɓe túmnèé síhé?

Àm níì á ŋgáb lə́teece kúúr ŋgwé kɨ́kle?

26Mvènnɨ́b jííb ə́əŋtɨ́ ə́ə́ŋ suu,

ɗà mvènnɨ́b mɨ̀tâín ɨ́ bɨ̀cê kúu

ɓe ɨ́r Kéké ɓe Mèsî noò.›

27Á mè àmɨrì, Hèrôdə̀ ɓe Póŋsə́ Pìlât, ɓáhîn ɓe nɨ̀gwííb ɨ́ gbàŋ Ísràyéèl lâs, ŋgáb ya bɨréé Yésù nò wo ə́ré járkɨ́ták wu ya ca dù Mèsî rɨ ɓɔ̧ ya. 28U̧ á ŋgáb ya ndɨŋ nɨ́ɨ́b lâs wu ya takɨ́yaye tíí ɓe nyòm woò hȩ wu ya ɗúré rɨ fó̧ hàrák. 29Ɗàrò, yée Kéké, pə́woye ɓéín kùb du nɨ́m ɓánniì, ɗà wu a nà nɨ́m nyòm nɨ́m ɓéeɓa nyindí wóò ɓe kɨ̀ɓá̧á̧ cúú. 30Túumye nyòm woò, ɗà nɨ́ɨ́b kàtɨ́b sɨ̀sɨ̀rí a ndɨ̀ŋɓà ɓe nyòm ɨ́r Yésù nò wo ə́ré du járkɨ́táá.» 31Ɓwâ ŋgáb yi cáŋhȩ mɨ̀yú̧ú̧, yɨ́ ŋgáb yi ɓáhe kɨ́ ɨ́ jɨ̀ɨ̀ɓà cei. Hȩ ŋgáb yi du yúklîn ɓe nyòm Nyéhè Sarɨ́nne, ŋgáb ɨ́ yàrê tàtèènɨ Kìn Mèèín ɓe kɨ̀ɓá̧á̧ cúk.

Nùb ə́mní ɓáagɔktɨ́ nyɔ̧ɔ̧́ ŋgábè

32Kpáín nùb ə́mní yaá ɓaín sum mwi̧, dùgɨ̀ kɨ̀cáàb ŋgábè lâs no. Nò ta nyɔ̧ɔ̧́ rè duɓa nɨ kɨ́ ní mwi̧í̧ á na yi nɨ́ ɗàà, ŋgáb ya ɓáakíí bɨ́ nyɔ̧ɔ̧́ ŋgábè lâs yá mwi̧ kpɔ́knɨ ŋgáb lâs. 33Ɓe nyòm kàm jíri Mèèín á nùb tómé yi ə́əŋkom mɨ̀námé sə̀ə̀mcùhô̧ sèrɨ̀nnè Yésù nò du Kékéé ru, Mèín yaá cè nànɨ vùùm ŋgábè lâs faám cei. 34Ŋgábè kpánȩ́ȩ́, nò kù yi nɨ́ tùŋnɨ nɨ́m ɗàà. Ɓàcéyè, nùb yi du ɓe mwaai, kɨ́ kù dúhɨ́b kè yaá sə́rɨ̀kɨ́nɨ, ŋgáb a gèwò mwèìn sə̀m kíì, 35gònɨ nàrénɨ nùb tómé ŋgáré, kùb a gɔ̀kcù mwèìn kɨ́ vùùm ŋgábè lâs, nɨ̀mwi̧ ɗóhîn ɓe mɨ̀yísum nóò. 36Hȩ nɨ̀ŋgwá Lèvît kù kùb ya fein Cîpɨ̀rə̀ ya ndɨŋndé, ɨ́r noò yaá Yòsə̂b. Nùb tómé ya ɓékom ŋgə́ Bàrnàbâs, (kí ta «nò tamɨ kùb njɔ̧̀» na á), 37ŋgə́ ya sə́rɨkíí mwai nóò, ŋgə́ ɨ́ gò nàrénɨ mwèìn kɨ́ nùb tómé ŋgáré.

Currently Selected:

Ə́rɨ́b nùb tómé yi ə́llé 4: NTV

Highlight

Copy