ROMA 10
10
ROMA 10
1Yɛ̧ɛ̧dɛ mi wɛ, hinyɔ ha̧a̧mi a mi kpoos du hi zɔ̧k mi a Bɛt ge, ha̧a̧mi an dɔ̧ɔ̧t mi Yahuduya wɔ hi za̧a̧. 2Mi ɗɛɛ an mi dɔgɔ a hi gin ha̧a̧tigi an hi fɔb Bɛto, wɛɛ hi mɛ̄ɛ̄ gbɔnɔ rɔb gɛ. 3Hi mɛ̄ɛ̄ gbɔnɔ yɔ gɔ hi fɔbɔ an Bɛt gi wɛɛnihi dood rɔbɛ gɛ, ha̧a̧hi an hi su̧u̧ gbɔnɔya̧ hi zulya̧. Yɔ anbɔ hí tā̧ā̧ Bɛt gbɔnɔ gɛ. 4Hinyɔ Bɛt gaa Muusa maakɔ, gaag an gi kamn dood a Kristu ge, an dood wɔ hi ɗɔ̄bsig sɛw hi wɛɛ dood riitɛ a Bɛt muutdu. 5Yɔ anbɔ hinyɔ Muusa bi̧i̧ gi wadilgo hinriit bɔ gi fu̧u̧k a maakɔ bɔ dɔglɔ fɔkigɔ gedu, raa:
a za̧a̧nyɔ gi fɔk hinyɔ maakdɔgl raa, gí za̧a̧.
6Yɛrɛ gbɔnɔ yɔ mɔ fɔb an Bɛt gi wɛɛnum doo rɔb anyɔ mɔ ɗɔbs Yeesu gi sɔm. Anyɔ hi bi̧i̧ a Bɛt ɗɛɛrwol du:
a bɔmɔ raa a mɔ kpoos du: a bɔ gi kar bɛtha an gi sidz Kristu gi zaa gi ɗaasɛ nɔ? 7Zaabe a bɔ gi sil a zɛŋk dubt ha̧a̧l bɔ gedu an gi kadz Kristu a wɔrkɛ teesdu nɔ?
8Lab gɛ! Bɛt ɗɛɛrwol raa a ri? Raa
a yɛrɛ Bɛtdɔgl bɔ gi mɔ dɔŋdi ro, hi a mɔ ya̧a̧ du, hi a mɔ kpoos du.
Dɔgl yɛrɛ wi dɔgsig doodɛ, wi gisihi dɔgl yɔ gɔ hi ɗɔbs gii dɔko: a ɗɔbsin Yeesu ga. 9Yɔ anbɔ gid mɔ ta̧a̧ gaattɔnɔ hi ya̧a̧ mɔ a dood muut du: a Yeesu giigi Waar Gbɔɔlɛ, mɔ wɛɛ mɔ ɗɔbs a mɔ kpoos du a Bɛt ɗunsig za̧a̧til a wɔrk du, yɔ anbɔ mɔ́ za̧a̧. 10Ya̧a̧nɛ, hi ɗɔbsig yɔ kpoos du giya, mɔ tuur doo rɔb a Bɛt muutdu, wɛɛ hi hinrɔb tuusigi ya̧a̧du ro, mɔ tuur an mɔ dag za̧a̧tigi. Hi bi̧i̧ a Bɛt ɗɛɛrwol du:
11a za̧a̧nyɔ gɔ gi ɗɔbsige, seem taag wa̧a̧ko.
12Yɔ anbɔ, Yahuduyaadɛ hi dɔ̧ɔ̧t zaadɛ, anyɔ hi gin Waar Bɛt gbunu, taa an hi gɛ̧ɛ̧hi a Bɛt muutdu, Waar Bɛt gbun bɔ gi dood sɛw Waar i, wɛɛ gis dood wɔ hi gi nuŋgɔ elik an hi zɔ̧g sɛw rɔbgɔko hi tɛŋko. 13Yɔ anbɔ,
za̧a̧nyɔ el Waar Yeesu nuŋgɔ gi zɔ̧g a za̧a̧sibe sɛw gi za̧a̧.
14Gi an hi el za̧a̧nyɔ hi ɗɔbsig gɛ nuŋgɔ ri? Gi an hi ɗɔbs za̧a̧nyɔ hi kɛmdir nuŋgɔ book gɛ ri? Bɛtdɔgl dɔkya gi taa gɛ, gi an hi kɛm dɔkɔ ri be? 15Gi an doo gi ɗɔg Bɛt dɔglɔ ri à hi yaazig nɛ an gi dɔg gɛ? Ya̧a̧nɛ, Bɛt ɗɛɛrwolɔ raa
a dood wɔ hi dɔk Bɛtdɔglɔ yɔ gi Dɔgl Rɔb sɛw zaakya̧ nag bɛrɔ!
16Wɛɛ dood sɛw hi tā̧ā̧ Dɔgl Rɔb bɔ gɛ, kaasi ro hi ta̧a̧. Bɛtya̧a̧kɛŋkya bɔ Esaya dɔg be:
a Waar i, bɔ ɗɔbs dɔgl yɔ wi dɔgɔ?
17Yɔ anbɔ, mɛɛn a ɗɔbsig gi fu̧u̧zig a hinyɔ dood hi kɛŋk duge, wɛɛ hinyɔ hi kɛŋko gi fu̧u̧zig a Kristu dɔglɔ yɔ hi dɔk gedu. 18Yɛrɛ mi warko: a dood Israhilaya wɔ hi kɛm ket gɛ ya? Dɔɔmɔ! Anyɔ Bɛt dɔglɔ raa:
a kɔlkya̧ ɛmb a waal du sɛw, wɛɛ dɔglya̧ ɛmb tuur a waal doorumlɛl sɛw.
19Yɛrɛ mi warko: Israhilaya wɔ hi mɛɛ gɛ ya? Hi mɛɛmɛ, wɛɛ hí tā̧ā̧ gɛ be. Yɛɛlɔ, Muusa yɛɛl da dɔgɔ:
a Bɛt raa a be ɗuks kubl nɛ a dood wɔ hi taa dɔ̧ɔ̧t rɔb gɛ hi zulha. Be tɛb nɔɔtig nɛ a dɔ̧ɔ̧t wɔ hi mɛɛhin gɛ hi zulha.
20Kuudu Esaya be, yɔ hoobhā̧a̧g hinza gɛ, dɔgɔ:
a Bɛt raa a dood wɔ ha̧a̧hi bee ɓɛɛk gɛ, hi zolibe, be mits dood wɔ hi taab ɛrk gɛ.
21Yɛrɛ Bɛt dɔg a Israhila zulha be:
a be yɔts dood zulɓaatilya hinfaakya wɔ naan be an be ɗaasihi ɔ̧t nuŋg sɛw.
Currently Selected:
ROMA 10: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.
