LUKA 22
22
LUKA 22
1Naab yɔ kokɔ gɔ taan hɛ̧ɛ̧t gɛ gɔ hi el a Paskayɔ sɛ̧ɛ̧b gɔ. 2Bɛtmaakwookya gbɔlɛ wɔ hi Bɛtmaakdɔkya wɔ hoobha̧a̧hi doodɛ. Hinɔ gii hi tɛk gbɔnɔ an hi gbɔm Yeesu a luur lɛlɛ.
3Yɔ anbɔ, Saydanu zaa gul a Yahuda kpoos du, za̧a̧nyɔ nuŋgɔ a Iskaryudi yɔ gi nɛ Yeesu walɛsɛrɛ ɔ̧ɔ̧ koobl daa eer wɔ zaaɔ. 4Yahuda ɗundɔ rek watin hi Bɛtmaakwookya gbɔlɛ wɔ hi laya gbɔlɛ wɔ an gi gaahi Yeesu naan du. 5Wɔrɔ be hi dag hato, hi wɛɛ hi raa a hi gaage tusɛ. 6Yɔ Yahuda bɛɛ ta̧a̧ko, ɓɛɛ gbɔnɔ an gi rɛ̧ɛ̧ Yeesu gi gaahige naan du a yaatillɛlɛ.
7Ɔ̧t yɔ kok gɔ taan hɛ̧ɛ̧t gedu gɛ gɔ hi gbɛɛtir tam wɔ du tuur gɔ. 8Yeesu yaa Piyɛr hi Yohana raa:
a rekin nɛ gɛmtsɛ Paska naab leesɛ an wɛ le.
9Hi ɛrige:
a ha̧a̧mɔ an wi rek wi gɛms ay?
10Gii ta̧a̧hi:
a gɔ nɛ rek nɛ gul a waal gbɔɔl bɔ gedu, nɛ dagtin hi wal za gi pɛɛk mɛmruuko, nɛ fɔg a raa yɔ gɔ gi gul gedu, 11nɛ ɛr za̧a̧n raatya bɔ: a Hingokya bɔ ɛrumɔ: a luk yɔ gɔ be le Paska naab lees du hi walɛsɛrɛ be gi ay? 12Gi zunsin luk buu gbɔɔl bɔ gi a wɛɛha yɔ hi gɛms hi wɔd bɛttɔnɔ, nɛ gɛmtsɛ lees bɔ gedu.
13Wɔrɔ hi rekɔ hi zɛm hin sɛw anyɔ dɔksihi, hi gɛms Paska lees bɔ gɔ.
14Yɔ ɔ̧tɔ tuurɔ Yeesu gi rek gi ɗɔɔt hi tɔmsɔya wɔ an hi lehinɛ, 15raahi:
a gib nɛ ha̧a̧k hi tɛŋko an be le Paska naab lees yɛrɛ hi nɛɛ doosi an kuudu be ɔɔ ya̧a̧rha̧a̧ko. 16Ya̧a̧nɛ be gisin dɔko a be taa Paska naab lees za lek ma zaŋ, hinɔ gbɔnɔɔ lɛl gi gáa gi da̧a̧ a Bɛt wáát du kɛnɛ, ɓɔr be ɔɔ leko.
17Yɔ loo dakwaa bɔ bumhob gi du, baan Bɛto, dɔgɔ:
a loonɛ nɛ gɛ̧ɛ̧ nɛ tees du. 18Ya̧a̧nɛ be gisin raako: be taa bumhob za yɔ̧k zaŋ, gi tuur a Bɛt wáátɔ bɔ zaakɔ gedu.
19Wɛɛ loo koko, baan Bɛto, ɓɛɛlɔ, gaahi, raahi:
a yɛrɛ gi muul benɛ [yɔ gaay a nɛ dɔŋgo. Woon anbɔ an gɔ nɛ mɛksinbe.
20Yɔ hi lehin gi da̧a̧, wɛɛ loo dakwaa bɔ bumhob gidu anbɔ be, gaahi raahi:
a bumhob bɔ a dakwaa yɛrɛ gidu gi zuunik Bɛt ya̧a̧wɔk seg yɔ ɔks hi ga̧a̧m be yɔ gɔ hi gub a nɛ dɔŋgo. ] 21Yɛrɛ za̧a̧nyɔ gɔ gi rɛ̧ɛ̧be an gi gaa bee a dood naan du, naanɔ gi hi bee lɛlgbun a kokdak du. 22Za̧a̧n Waa bɔ gi wɔɔr ma an hinyɔ Bɛt mɔkɔ. Yɛrɛ ya̧a̧rhant gis za̧a̧nyɔ gɔ gi rɛ̧ɛ̧sig ya̧a̧.
23Walɛsɛrɛ ɔ̧ɔ̧ wɔ hi wɛɛ hi yɛɛl ɛtingo hi teesdu an hi mɛɛ za̧a̧nyɔ gɔ gi woo hin bɔrɔ. 24Hinfaltingo mɛɛ a walɛsɛrɛ wɔ hi teesdu hɛw, an hi see za̧a̧nyɔ gi gbɔɔl gi daar zaadɛ wɔ sɛw. 25Yeesu dɔksihi:
a dood wɔ hi mɛɛ Bɛt gɛ waar ɛya̧ hi wɛɛk waar ɛ a hi zulha. Wɛɛ ɗɛntɛya̧ gbɔlɛ wɔ hi gi zulya̧, hi gihi elik a hi hinrɔbɛ wookyayɔ. 26Yɛrɛ hin wɔrɔ lab retin hi nɛɛ gɛ. Za̧a̧nyɔ gi gbɔɔl a nɛ tees du gi daarlɛlɛ, wɛɛg wans gi daar zaadɛ wɔ sɛw; wɛɛ za̧a̧nyɔ gi zulɛ a nɛ teesdu, wɛɛg dood zaadɛ woosyaya̧. 27Yɛrɛ bɔ gi gbɔɔl nɔ? Za̧a̧nyɔ gi hinlek gii ya, nɛ rɛ, za̧a̧nyɔ gi lees gaak gii ya? Nɛ za̧a̧nyɔ gi hinlek gii ma mi? Bɛrɔ, bee be gi nɛ teesdu an za̧a̧nyɔ gi lees gaako.
28Nɛɛ gi dood wɔ nɛ waa hinmɔŋk hi bee a be ya̧a̧rhant du. 29Yɔ anbɔ, be gin gaak waar ums an Baa be yɔ gaab waar ums be. 30Nɛ lehinɛ, nɛ yɔ̧ a be dak du a be wáát du, nɛ wɛɛ nɛ ɗɔɔt a waar ums ɗɔɔtillɛl nɛ gbaas Israhilaya wɔ dɔ̧ɔ̧tya̧ koobl daa eer wɔ dɔglɛ.
31Waar Yeesu raa Piyɛr :
a Simɔŋ, Simɔŋ! Saydanu ɛr tɛŋk a Bɛt ge, Bɛt gaag gbɔnɔ an gi namsin nɛ sɛw, gi gbalin an hi gbalik tot hi gɛ̧ɛ̧k rɔbɔ hi zulɔ. 32Yɛrɛ be zɔ̧bsum Bɛt zɔ̧bsɔ an bɔmɔ ɔɔ ɗɔbsugɔ. Wɛɛ mɔya, gɔ mɔ zɛmr kpoos mɔ mɔ wɛɛzɔ, wɛɛm mɔ ɓats yɛ̧ɛ̧ mɔ hii kpoosɛ.
33Piyɛr wɛɛ raage:
a Waar i, be ta̧a̧ an be rek a luknɔ du, be wɛɛ be wɔr hɛw hi mɔya.
34Yeesu wɛɛ raage:
a Piyɛr , be raasumɔ, an kɔba gi kek nɛɛko, mɔɔ mɔ faab gi dor dɔɔ taarɛ mɔ raa a mɔ mɛɛb gɛ.
35Yeesu wɛɛ ɛr walɛsɛrɛ ɔ̧ɔ̧ wɔ:
a yɔ be yaanɛ tus gi taa ziba du gɛ, lees taa saa du gɛ, taal gi taa dɔɔ du gɛ, nɛ nɛ lɔɔ hinza ya?
Hii hi ta̧a̧:
a wi lɔɔ hinza gɛ.
36Wɛɛ raahi:
a yɛrɛ ɓɔryɔ, za̧a̧ni gin tus a ziba du, gi loo; za̧a̧ni gin lees a saa du, gi loo. Wɛɛ za̧a̧ni taan daŋbɛsim gɛ, gi zebr gbandilɔ gi zemnɔ. 37Ya̧a̧nɛ be gisin raako: a hinyɔ hi bi̧i̧ a Bɛt ɗɛɛrwol du a be zulha gi an gi da̧a̧da̧. Hi bi̧i̧ hinɔ: a hi ɓɛrige a dood ha̧a̧lɛ tees du. Yɛrɛ hinyɔ hi bi̧i̧ a be zulha rii an gi da̧a̧da̧ ma.
38Walɛsɛrɛ ɔ̧ɔ̧ wɔ hi raage:
a Waar i, daŋbɛsim gɛrɛ eerɛ.
Gii ta̧a̧ a riiri.
39Yeesu yɔ bɛɛ tuuko, rekɔ anyɔ rɔ̧ɔ̧s nɛ rékɔ a Kɔ̧ɔ̧b Ga̧a̧t ha. Walɛsɛrɛ ɔ̧ɔ̧ wɔ hi fɔge. 40Yɔ tuur a lɛlɔge, raahi:
a zɔ̧n Bɛto an bɔnɛ mat a maatil du.
41Kuudu wɛɛ rek hɛml kaasi, a bet gbalik du, yɔ tuur lɛlɔge zagl zɔ̧bɔ. 42Raa:
a Baa, gi ha̧a̧mɔ, hɛmlinmɔ dakwaa ya̧a̧rhantya yɛrɛ an bɔbe yɔ̧ hinɔ! Yɛrɛ taa anyɔ ha̧a̧ beya, gi anyɔ ha̧a̧ mɔya.
[ 43Wɛɛ Bɛtwalsɛr za midz bɛtha zaa ɓatsig muulɔ. 44Yɔ wɔrk gisig hurko, zɔ̧b Bɛt hi tɛŋko, lɛlsa̧a̧tigɔ wɔ hi wɛɛ an ga̧a̧mɛ hi zelik hɛbt di. ] 45Kuudu yɔ zɔ̧bz Bɛto, ɗunda zaa a walɛsɛrɛ ɔ̧ɔ̧ wɔ hi, zɛ̧hi hi yokyo, kpoosya̧ ɗɔb yɛ̧ltɔnɔ, ya̧a̧ɔ gii yoom gi wa̧a̧hi. 46Wɛɛ raahi:
a nɛ yok nɔ, ɗundinɛ nɛ zɔ̧b Bɛto an bɔnɛ mat a maatil du.
47Anyɔ gi ya̧a̧boosig te, dood saal hi tuurɔ. Wɛɛ za̧a̧n za bɔ nuŋgɔ a Yahuda yɔ gi walɛsɛrɛ koobl daa eer wɔ zaaɔ gi dork a saal wɔ hi muutdu, yɔ tuur Yeesu dɔŋdi an gi zɔŋg a ya̧a̧gbarɔ, 48Yeesu warige:
a Yahuda, mɔ rɛ̧ɛ̧k Za̧a̧n Waa bɔ gii mɔ zaa mɔ gig kɔtig gɛ ya?
49Dood wɔ hi gi nɛ hi Yeesu hi gbɛ̄n hinyɔ gɔ gi tuurɔ hi ɛrige:
a Waar i, wi lɛmnihi daŋbɛsim ya?
50Zaaya̧ gbun bɔ hɔ̧b daŋbɛsim hɛɛrin Bɛtmaakwookya gbɔɔl mɔɔt bɔ gbaarɔ tɔn bɔ naanrɔbo. 51Yeesu wɛɛ raahi:
a ɔɔnɛ, erinɛ.
Re ki̧i̧ wal bɔ tɔnɔ, tɔnɔ bɔ fa̧a̧y lɛlɔge. 52Kuudu Yeesu raa Bɛtmaakwookya gbɔlɛ wɔ hi dood gbɔlɛ Bɛtluk-ookya wɔ, hi Yahuduya ɗɛntɛ wɔ hi zaa an hi wa̧a̧ge:
a yɔ nɛ zaan daŋbɛsim hi sɔɔl rɛ, be luur ha̧a̧l wɔd wɔɔlikya ya? 53Be waak hi nɛɛ a Bɛtluk du ɔ̧t nuŋg be! Wɛɛ nɛ wa̧a̧be gɛ. Yɛrɛ ɔ̧t nɛɛn rii hi lɛlwil tɛŋko.
54Yɔ hi bɛɛ Yeesu wa̧a̧ko hi renig a Bɛtmaakwookya gbɔɔl mɔɔt bɔ gi raa du. Piyɛr gig fɔbzig kuudu hɛmltɔnɔ be. 55Hi sɔn laa a raa teesdu hi ɗɔɔt hi tɛɛko. Wɛɛ Piyɛr re ɗɔɔt hi teesdu be. 56Gbaarnɛɛ za yɔ gbɛnig gi ɗɔɔt a laa dɔŋdi, dōo lɔl gi muulɛ raa:
a wal yɛrɛ hɛw gi nɛ hi Yeesu ga.
57Hɔnɛ Piyɛr yɔ lag anbɔ faa, raa:
a nisyɔ! Be mɛɛg gɛ.
58Kuudu kaasi, doo za yɔ gbɛnig ɓɛ, dɔgɔ:
a mɔ gi dood wɛrɛ zaaɔ ga!
Gii wɛɛ dɔgɔ:
a ɛ̧-ɛ̧, walyɔ, be taa hi teesdu ro!
59Yɔ am kaasi doo za dɔɔm gbɛnig ɓɛ raa:
a hi rɔbo, wal yɛrɛ gi nɛ hi wal bɔ hi wa̧a̧zig giya. Nɛ gi doo Galileya ma mi!
60Piyɛr wɛɛ goo:
a walyɔ, be mɛɛ hinyɔ mɔ dɔk ma gɛ.
Ɓɔrbɔ yɔ gi ya̧a̧boosig te, kɔba kekɔ. 61Yeesu zɛmrɔ, see Piyɛr. Yɔ Piyɛr mɔk gi mɛɛ hinyɔ Waar Yeesu da raag nɛko:
a kɔba gɔ gi kekɔ, mɔɔ mɔ faab gi dor dɔɔ taarɛ, mɔ raa a mɔ mɛɛb gɛ,
62Piyɛr tuu kaa ha̧a̧ltɔnɔ.
63Dood wɔ hi wa̧a̧k nɛ Yeesu naan du hi gig kpɛ̧ɛ̧luko hi wɛɛ hi gig lɛko. 64Hi wɔb muutɔ hi gbandili, hi dɛŋge, hi ɛrige:
a bɔ ɗɛmɔ? Taamɔ!
65Hi niig hi dɔgl zaadɛ kittɔnɔ.
66Yɔ lɛl gaa, Bɛtmaakwookya gbɔlɛ wɔ hi Bɛtmaak-dɔkya wɔ hi gi Yahuduya ɗɛntɛ wɔ hi mɔksɔ hi kaŋg a dɔglya̧yɛ̧ɛ̧kya wɔ hi muutdu. 67Hi ɛrɔ:
a gid mɔ gi Masihu bɔ giya, dɔgsiwi.
Yeesu goo:
a an be dɔgsin si̧, yɔ nɛ ɗɔbs gɛ. 68Wɛɛ an be ɛrin hinɛ, yɔ nɛ ta̧a̧ gɛ. 69Yɛrɛ yɛɛl ɓɔryɔ, Za̧a̧n Waa bɔ gi ɗɔɔt a Bɛt tɛŋkya naanrɔbo.
70Hi sɛw hi warige:
a yɛrɛ ma mɔ gi Bɛt waa ya?
Gii ta̧a̧hi:
a anyɔ nɛ raa: be gi giya.
71Hi ɛr gɔ:
a yɛrɛ ha̧a̧wɛ segyaadɛ nɔ ma ɓɛ? Wɛ lag hinyɔ tuu gi ya̧a̧ du gɔrɔ be.
Currently Selected:
LUKA 22: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.