LUKA 17

1Yeesu raa walɛsɛrɛ ɔ̧ɔ̧ wɔ:

a hinwɔ gɔ hi mat dood a hinha̧a̧l du hí giro, hinza ɗɛɛ an gi ya̧a̧n gɛ. Yɛrɛ ya̧a̧rhant gis za̧a̧nyɔ mat dood a hinha̧a̧l du. 2An hi ha̧bs nɛ za̧a̧nɔ naal gbɔɔl durk du hi bisig a mɛmbal du yɔ bɛsig gi daarɔ, hi anyɔ gɔ gi mat ya̧a̧mwaa zaa gbun a hinha̧a̧l du. 3Oon zul nɛ! Yɛ̧ɛ̧ mɔ gi gɔ hinha̧a̧lɛ, biglumɔge, gid zɛmr kpoosɔ gi dɛmnaanɛ, bitsumɔg dɔglɔ. 4Wɛɛ gid gɔsum hinha̧a̧l dɔɔ nɔɔn-erɛ a ɔ̧t gbun bɔ gedu, gi wɛɛ gi zaak mɔɔge dɔɔ nɔɔn-er be gi naandɛŋko, gi raak a be zɛmr kpoos be, bitsumɔg dɔglɔ.

5Tɔmsya wɔ hi wɛɛ hi war Yeesu :

a goksiwi ɗɔbsig bɔ zaaɔ du.

6Waar Yeesu raa:

a an nɛ ɗɔbs kaasiwaanɔ an sitahi lɛŋksɛ, à nɛ raa yɔmntnɔɔ yɛrɛ a duyumɔ mɔ rek mɔ rɛɛy a mɛmbal gbɔɔl du, tɛ̧ɛ̧ bɔ yɔ lagsinɛ. 7Bɔ za̧a̧nɔ a nɛ teesdu gin woosɔya yɔ gisig hinbalko zaabe gi gisig tamɔ nɛɛko gi fu̧u̧z bako gi raage a zaam nɔɔko mɔ lehinɛ?

8Nɛ taa an gi raage: a gɛmtsibe leesɛ, loom woos gbandil mɔ mɔ hegɔ mɔ wonsib woosɛ gɔ be le gi da̧a̧, kuuɗu mɔɔ mɔ zaa mɔ le, mɔ yɔ̧ be ya? 9Za̧a̧nɔ yɔ baan woosɔya bɔ anyɔ woo hinyɔ raag ya? 10Yɔ anbɔ, nɛɛ be, gɔ nɛ woo hinyɔ Bɛt raanɛ sɛw gi da̧a̧, dɔginɛ: a be gi woosya hɛ̧ɛ̧ryɔ, be woo hinyɔ gi nɛ an be woo gii kpɔd.

11Yɔ Yeesu gi rek a Urusalima, daa a Samariya teesdu hi Galile. 12Anyɔ gi gulik a raat za du, ɗobtilyaadɛ kooblɛ hi zaa hi dagige. Hi er hɛmltɔnɔ, 13hi ɓooya̧a̧ hi raage:

a Yeesu , Hingokya , mɛɛsiwi ya̧a̧rɛ!

14Yɔ Yeesu gbɛnihi raahi:

a rekin nɛ zuun muul nɛ a Bɛtmaakwookya wɔ hi.

Wɛɛ yɔ hi gi reko, ɗobtilya̧ bɔ da̧a̧ gɔ. 15Zaaya̧ gbun bɔ bɛɛ gbɛnik ɗobtilɔ bɔ gi da̧a̧, wɛɛ wɛɛz a Yeesu ge gi baanik Bɛt nɔɔha hi ya̧a̧ɓooki. 16Zaa zagl a Yeesu dɔŋdi baanige. Walɔ gi doo Samariyayayɔ. 17Yeesu warɔ:

a nɛ dood koobl hi za̧a̧ ma mi, yɛrɛ zaadɛ wɔ naanza hi gaay ma nɔ? 18Záá mɔ̄kɔ̄ an gi wɛɛz gi baan Bɛt gɛ, gɛ rɔ̀b yɛrɛ kpɔdi?

19Kuudu wɛɛ raa wal bɔ:

a ɗukumɔ mɔ rekɔ, ɗɔbsig mɔ za̧a̧sumza̧a̧sɔ.

20Farisaya wɔ hi war Yeesu :

a Bɛt wáátɔ gi zaak bil nɔ?

Gii ta̧a̧:

a zaakɔ bɔ taa an hi gbɛnige; 21wɛɛ taa an hi dɔgɔ: a Bɛt wáátɔ gi hɛdi, zaabe a gi hɔ. Yɛrɛ Bɛt wáátɔ gigi ma a nɛ tees du.

22Yeesu wɛɛ raa walɛsɛrɛ ɔ̧ɔ̧ wɔ:

a ɔ̧t zaadɛ hi tuurɔ, a ɔ̧tya̧ gedu, gi ha̧a̧nɛ an nɛ gbɛn Za̧a̧n Waa bɔ ɔ̧tɔ wɔrɔ zaaɔ, wɛɛ taa an nɛ gbɛn be. 23À ɔ̧tɔge hí raanɛ: a gi hɔ, zaabe gi hɛ. Gɔ hi raan anbɔ, bɔnɛ rekɔ, bɔnɛ fɔhi. 24Ya̧a̧nɛ, bɛl ya̧bsɔ gɔ gi ya̧ko, gi wɛɛ gi gaak dɔŋdu an ɔ̧ti gi tuur a dɔŋg zaa, Za̧a̧n Waa bɔ gi gi anbɔ be a ɔ̧tyɔ gɔ gi zaak gedu.

25Yɛrɛ gi an gi ha̧a̧ya̧a̧r gbɔɔltɔnɔ kete, dood wɔ hi gi ɔ̧ti gi zulɛ hi wɛɛ hi inige. 26Hinyɔ tuur nɛ a Nɔwe waabilɔ bɔ gedu, hinɔ gii gi tuur a Za̧a̧n Waa bɔ ɔ̧tɔge be. 27Dood hi hinleko, hi yɔ̧ko, hi wɛɛ hi lootingo, tuur a ɔ̧t yɔ Nɔwe gul a lɛmb duge. Mɛm gbɔɔl tuu hi̧i̧s hɛbto, gbɔm dood sɛw.

28Hinyɔ tuur a Ludu waakɔ bɔ gedu, hinɔ gi tuur anbɔ be. Dood hi hinleko, hi yɔ̧ko, hi zek wɔdɛ, hi zebrik wɔdɛ, hi tɛ̧ɛ̧ rɛɛko, hi luk wɔŋko. 29Yɛrɛyɔ Ludu tuu a Sodɔma, a ɔ̧t gbun bɔ gedu laa hobbuu naŋg a bɛtha an bɛlɛ gbɔm dood sɛw. 30Hinɔ gi tuur anbɔ be a ɔ̧tyɔ Za̧a̧n Waa bɔ gɔ gi midz gedu. 31A ɔ̧tɔge za̧a̧nyɔ gɔ gi gi a luk zulha, bɔgi siz a luk du an gi loo wɔdɔ gi renɔ. Wɛɛ za̧a̧nyɔ gɔ gi gi a bako, bɔgi wɛɛz nɛ raa du zaŋ. 32Mɔkin nɛ mɛɛ Ludu nistɔ dɔglɔ.

33Za̧a̧nyɔ tɛb an gi za̧a̧s kolɔ, gi waksige. Za̧a̧nyɔ waks kolɔ be, gi za̧a̧sige. 34Be gisin dɔko: a gɔ gi gi a yɛmsɔ gedu, dood wɔ hi kusig a sil ha hi eerɛ, hi loo gbunu, hi ɔɔ gbunu. 35Gid nɛɛd eerɛ hi tot naŋk a naal ha lɛlgbunu hi eerɛ hi loo gbunu hi ɔɔ gbunu. [ 36Gid walɛ eerɛ hi hinbalik a bako, hi loo gbunu hi ɔɔ gbunu. ]

37Walɛsɛrɛ ɔ̧ɔ̧ wɔ hi warige:

a Waar i, hin wɔrɔ hi wooy lɛlɔ ay?

Yeesu wɛɛ ta̧a̧hi:

a lɛlyɔ hin wɔl gi ge, dukumnɔɔ hi mɔks lɛlɔge be.

Currently Selected:

LUKA 17: NTD

Highlight

Copy