MATYOO 15

Nyoey yi lɛ rì Ɓɛ̀fàrìzyɛŋ rì Yeesus ɓi ɓìsyɔ̀ɔ̀ ɓi ɓɛseŋi ɓaa

(Mk. 7:1-13; Lk. 11:37-41)

1Nni Ɓɛ̀fàrìzyɛŋ rì ɓɛ̀rèsàg-ɓìdɔ̀gsɛna ɓɛ pɛsɛ̀ngày a Yorisalɛm ɓɛ yu yɛ̀ɛ Yeesus ɓɛ kpaa nyi lɛ: 2Ɓisuucɛ nnɛ ɓɛ̀yilàg ɓɔɔ ɓɛ ti ɓɛ̀ kɛɛ̀ nɔ̀ɔ̀ti ɓìsyɔ̀ɔ̀ ɓi ɓumɓɛ abɛ̀y; lɛ ɓɛ ti ɓɛ̀ kɛɛ̀ sòò ɓyàg di ɓɛ ti ɓiì ɗiì ɓìɗilàg? 3Nni à ɓàkà ɓɔ lɛ: Mìni yòg? Ɓì ti kɛ̀ ɓi yooyogsàg ɓìdɔ̀gsɛna ɓi Bɛ̀ll lɛ ɓi nɔ̀ɔnɔɔ̀tì lɔŋ ɓisyɔ̀ɔ̀ ɓin? 4Lɛ Bɛ̀ll a kalag lɛ: Nyaasi soŋi ɓɛɛ̀ gaa, nni ŋwaànɛ à rì ɓiì cɛ̀mi seŋi nsoò lɛ jɛɛ, à ghɛ̀ɛ̀sɛɛ lɛ ɓɛ wey nyi. 5Kìɓan kifog mìnii ti ɓì kpaaghì lɛ: I ŋwaà kalii seŋi, nsoò lɛ jɛɛ lɛ, gàɓ ì com ìnɛ màa rì lɛ ǹghɛɓsì wɔ̀ rì yɔ̀, yɛɛ̀nnɛ ǹghɛ̀ɛ̀sɛɛ kì ɓɔgsii Bɛ̀ll miì, kɛ̀ kɛɛ̀ ɓa ti nyi kìɓan ki ǹkaŋdɛ̀n lɛ a nyaàsi seŋi nsoò lɛ jɛɛ. 6Rìkì ɗiǹ ɗi resii lɛ, ɓì ti ɓì tùùzàg jɛ̀ɛ̀ ì Bɛ̀ll lɛ ɓi nɔɔ̀ti ɓìsyɔ̀ɔ̀ ɓin. 7Mìni ɓum ɓɛ fyɛɛ̀fyɛɛ̀ ɓi ŋwɔm ìghèy ɓi ɗùm, Ezayii à konàkà lɔŋ ki rèsii kiɓan kin, yɛ̀ɛ à kpaaghà lɛ:

8Kìlɔ̀ŋ ki kɛɛ̀ ɓɔɔɓɔgsì mɛ̀ ɓi ɓɛ̀ɓeeɓee ɓɛ ŋwɔ̀m, kìɓan kìfog mɛ̀rem maa mɛ ɓa mɛ̀ fìràɓ lɛɛ̀gwey. 9Rìɓɔgsì ɗi ɓɛɛ̀ ɓɔɔɓɔgsì mɛ̀, ɗi ri kɛ̀ɛ̀ ìsu, ɓisuulɛ dɔgtɛ̀n yi ɓɛɛ̀ rèresi ɓum, yi ri lɔŋ ɓisyɔ̀ɔ̀ ɓi ɓum. 10Yeesus à reŋìghà gwìy ì ɓum lɛ yɛ̀ɛ yu nyi a nyòò, à kpaa yɔ̀ lɛ: 11Ramina mɛ̀reè, ɓi wog; àa com ki ki kɛɛ̀ mum ɓi ŋwɔm kɛɛ ri lɛ ki foŋ nyi kìsyeg ɓi nyoo, lɔŋ jɛ̀ɛ̀ ìnɛ ì kpaŋiì nyi ɓi ŋwɔm yɛ̀ɛri lɛ ì foŋ nyi kìsyeg ɓi nyòò.

12Fɔɔnnɛ ɓɛ̀yilàg ɓii ɓɛ yughà nyi jàŋbog, ɓɛ kpaa nyi lɛ: Ù yii ɓi lɛ kìɓan ki ù kpaa yì kiǹ ki kɛɓtii Ɓɛ̀fàrìzyɛŋ fìɓàg yɛ̀ɛ ɓaa woogh kɔ? 13Yeesus à ɓàg lɛ: Ɓɛ rì ɓiì rùɓi kite kicèm ki Seŋi wɛ̀m ànɛ à rì aɗyoo à ɓɛ̀là ɓi. 14Càrina ɓɔ; ɓɛ ri ɓɛ̀ɗyaŋɗyàŋ ɓɛ ɓɛɛ̀ ɓanɓan ɓɛro ɓɛ̀ɗyaŋɗyàŋ ɓi kìgeŋ; i ɗyaŋɗyàŋ à ɓanɓani roɗyaŋɗyàŋ ɓi kìgeŋ ɓɛ ri ɓiì kpìi ɓi rìɓee ɓɛsɛ̀ɛ̀ ɓɛ̀cèm.

15Nni Pyɛɛri à pɛ̀sìghà jɛ̀ɛ̀ à kpaa Yeesus lɛ: Rèsi ɓìsi yɛ̀ɛ dàɗkì ìnɛn, ìrì azi. 16Yeesus à kpaa nyi lɛ: Mìnii ri girig kɛ̀ɛ̀ ɗyomzɛ̀n? 17Ɓi woogh ɓi lɛ i com ki ɗiŋii mum ɓi ŋwɔm, ki kɛǹ ɓi ɗùm, ki ki kpaŋ ɓi dan? 18Wɔ̀lɛ com ki ki kpaŋiì ɓi ŋwɔm wu mum, ki pɛsɛɛ yì nyi ɓi ǹɗem, com kiǹ kɛɛ ti ki fogì mum kìsyeg ɓi nyòò. 19Ɓisuulɛ, ɓìɓeɓtàg ɓi mɛyitì, ri fèg à rìwey ɗi mum, rì tìsɔ̀mɔ̀g, rì cɛɓ ki sààsaa, ri wii, rì rìsasààgh ɗi ɓum ɓìɓan ɓi nyoo, rì tìfena ti Bɛ̀ll, ɓi ti ɓi pɛsàg yì ɓi nɗem wu mum. 20Ɓyom ɓi ɓyɛɛ̀ foŋfoŋ mum kìsyeg ɓi nyoo ɓyɛɛ ri lɔ̀ɔ̀; wɔ̀lɛ rìɗi ɗi mum a ɗii ɓìɗilàg kɛ̀ɛ sòò ɓyàg, ɗi yin nyi ɓiì foŋfoŋi kisyeg ɓi nyòò.

Giɓ anɛ a Kanaaŋ

(Mk. 7:24-30)

21Yeesus à pɛ̀sɛ̀ngà ɓi jàŋ inɛ̀n, à kɛ̀n ɓi kìlànà ki zi ki jàŋbog ri bàn yi lɛ, rì Tiir rì Sidɔŋ. 22Fɔɔnnɛ giɓ adɛŋ ànɛ a Kanaaŋ ànɛ ɓi kòdò ànɛn, à yughày, à kpaa Yeesus jɛ̀ɛ̀ aɗyoo lɛ: Kan, wogha mɛ̀ nyìighnyìg, wɔ̀ Man à Davit; kìɓeɓtàg ki nghay kɛɛ̀ yeeyeèsì gɔ̀n yɛ̀m rì ìtèɗ. 23Wɔ̀lɛ Yeesus à mìnɛ̀n giɓ anɛ̀n; ɓɛ̀yilàg ɓii ɓɛ tyoŋdɛ̀n nyi a nyoo, ɓɛ kpaa nyi lɛ: Nàɓa giɓ anɛ, ɓisuulɛ a nɔ̀ɔnɔɔ̀tìì ɓìsi ajɛ̀m rì kìyoòyòò. 24Yeesus à ɓàg lɛ: A ɓɔni jɔ̀ɔ̀ ɓɛ Isirayɛl ɓɛ ɓɛ ɗimgà ɓɔ rì ɓɔ, nnɛ ɓɛ romgày mɛ̀. 25Kìɓan kìfog giɓ anɛ̀n à yùghà nyi kì ɓaàgh mɛ̀ɗu asu di a kpaakpaa lɛ: Kan, yu ɓà mɛ kì ghɛɓsii. 26Yeesus à ɓàg lɛ: Ki rɔɔtɛɛ ɓi lɛ, ŋwaa teɗ ɓìɗilàg ɓi ɓɔɓti, a fa ɓyɔ rì ɓɔni bu. 27Giɓ anɛ̀n à kpaa lɛ: Ki ri lɔŋ fɔlɔɔ Kan, wɔ̀lɛ ɓɔni bu ɓɛ ti ɓɛ ɗilàg bubùɓ yi yɛɛ̀ rààraa a teɓèrè à ɓum ɓaa zi. 28Fɔɔnnɛ Yeesus à kpaaghà min giɓ anɛ̀n lɛ: Wɔ̀ giɓ anɛ, rìgherɛ̀n ɗyɔɔ ɗi teghɛɛ lɛɛ̀gwey, nni kɛɛ kilɛn lɔŋ yɛ̀ɛ rìkɔ̀n ɗyɔɔ ɗi ri. Ɓi cààmɛ̀n kɔm̀ kiǹ gɔ̀n yìì i ghàskà kì wɔ̀ni.

29Nni Yeesus à pɛ̀sɛ̀ngà ɓi jàŋ inɛ̀n, à nàrì bèn ì rìɓày ànɛ a Galile, à ɓɔg ɓi dòn aɗyoo, à kɔ̀rì ɓi zi. 30Fɔɔnnɛ ɓìtuu ɓi ɓum ɓi yughày nyi a nyoo, lɛ rì ɓɛ̀lɛnlɛ̀m, rì ɓɛ̀ɗyaŋɗyàŋ, rì ɓɛ̀mùm-mùm, rì ɓìsɛkɛ̀rɛ̀, rì ɓɛ̀roroɓ ɓɛdɛŋ lɛɛ̀gwey; ɓɛ foŋ nyi ɓumɓɛ̀n asu, à ki wɔ̀ɔ̀zag ɓɔ. 31Gwìy ì ɓum ìnɛ̀n ì kuuràkà lɛɛ̀gwey yɛ̀ɛ ɓɛ ghɛngà di ki ti lɛ, ɓɛ̀mùm-mùm ɓɛ totòg, ɓìsɛkɛ̀rɛ̀ ɓi wɔnwɔ̀n ɓɛ̀lɛnlɛm ɓɛ kɛɛ̀kɛ̀ɛ̀ mɛ̀rɛy, ɓɛ̀ɗyaŋɗyàŋ ɓɛ ghɛɛ̀ghɛ̀nɛ̀n. Nni ɓɛ tumɛ̀ngà rìkeèkèmzì ɗi Bɛ̀ll à Isirayɛl.

Yeesus à faa ɓum ɓɛ ceeyɛn ɓɛtɔɔsìm ɓɛnin ɓìɗilàg

(Mk. 8:1-10)

32Nni Yeesus à reŋighà ɓɛ̀yilàg ɓii, à kpaa ɓɔ lɛ: Nyìighnyìg ì kìi mɛ̀ rì gwìy ì ɓum ìnɛ, ɓisuulɛ mɛ̀ru mɛɛ ti lɛ mɛraa, yɛ̀ɛ ɓɛ rì fɛ rì mɛ̀. Kɛ̀ɛ̀ com ki lɛ ɓɛɛ ɗi. Ki kɔni ɓi mɛ lɛ ncaɗ ɓɔ lɛ ɓɛɛ kɛǹ zày, lɛ àdɛŋ à rì ɓiì ki kpìi ɓi bee. 33Ɓɛ̀yilàg ɓɛ kpaa Yeesus lɛ: Lannɛ tì rì lɛ tì kì lɛ ti tanɛn bìrɛs fɛ, ɓi kìlɛŋ ki jàŋ ki, lèg ànɛ gɛmum ànɛ à tèghɛɛ ànɛ, à rì lɛ à ɗi à wurì? 34Yeesus à tɔg ɓɔ lɛ: Ɓì rì foo ri bìrɛs yaŋ? Ɓɛ ɓàg nyi lɛ: Ɓìrɛs taàɓɛ̀ɛ̀ rì ɓɔɔ ɓìzɛn. 35Yeesus à kalì min gwìy ìnɛ̀n lɛ yɛ̀ɛ kɔri ɓi zi. 36Fɔɔnnɛ à tekà bìrɛs yi kìtaàɓɛ̀ɛ̀, rì ɓìzɛn ɓìn, à fa Bɛ̀ll ɓìtògsɛ̀n, à ɓɛkì yɔ, à fa rì ɓɛ̀yilàg ɓii, ɓɛ̀yilàg ɓɛ kaɓsì yɔ rì gwìy ì ɓum ìnɛ̀n. 37Ɓum ɓɛ̀cèm ɓɛ ɗighà ɓɛ wuràg, fɔɔnnɛ ɓɛ tɛkà ɓìɓɛghà ɓi ɓi rɔ̀ɓtàkà ɓi ɓìkàɗ taàɓɛ̀ɛ̀ lɛ pisa. 38Ɓumɓɛ ɓɛ ɗighà ɓyom ɓìn, ɓɛ ɓaghà ɓum ɓɛ̀tɔɔsìm ɓɛnin, kɔ̀ɔ ɓày lɛ rì ɓɛ̀yiɓ rì ɓɔɓtì.

39Yɛ̀ɛ Yeesus à ghesɛ̀ngà ɓum lɛ ɓɛɛ suki, fɔɔnnɛ nyii ɓɔkà ɓi kìkɔ̀m, à kɛ̀n ɓi kìlànà ki zi ki a Magadaŋ.

Currently Selected:

MATYOO 15: BAFNT

Highlight

Copy