LUKAS 20

Ɓɛ tɔɔgh Yeesus jàŋ inɛ ìtèɗ wu a kìki ɓiɓan miì wu riì nyi

(Mt. 21:23-27; Mk. 11:27-33)

1Ŋwos adɛŋ, di Yeesus à rì ɓi rìrèsàg ɗi kilɔ̀ŋ, à ki kpaakpaa Syeesyee à Ɓɔlɛ ɓi naà-Bɛ̀ll, nni ɓɛ̀pìrɛɛtìrɛ̀ ɓɛgwey rì ɓɛ̀rèsàg-ɓìdɔ̀gsɛna, rì ɓɛ̀sɛ̀ɛ̀mɛn ɓɛ peeghày, 2ɓɛ tɔg nyi lɛ: Kali ɓìsi! Ɓi-tèɗ aɗi nnɛ u kìki ɓiɓan, nsoò lɛ ghɛn yɛɛ faa wɔ̀ rìkuu ɗi itèɗ ɗiǹ? 3Nni à ɓàkà ɓɔ lɛ: Mɛ̀ girig ǹtɔg mìni ǹtɔɔ̀tɔɔgh. 4Kaliina mɛ̀, bàɓtis ì Zyaŋ ì ɓaghày nya yɛ̀ɛ Bɛ̀ll gìn, a ɓum? 5Fɔɔnnɛ Ɓɛ̀fàrìzyɛŋ ɓɛ fiɓìghà ǹtɔɔ̀tɔɔgh wiǹ wɔɔ ɓɔ rì ɓɔ, ɓɛ kpaa lɛ: I tì ɓàagh nyi lɛ bàɓtis ì Zyaŋ ì ɓaghày yɛ̀ɛ Bɛ̀ll, à rì ɓìsi ɓiì tɔɔ̀gh lɛ, nni ɓisuucɛ nnɛ ɓì gherɛ̀ngà ɓi yɔ̀? 6I tì ɓàagh nyi lɛ, ì ɓaghày a ɓum, kìlɔ̀ŋ kìcèm ki ri ɓìsi ɓiì rogii gɔ̀g lɛ, ki gherɛ̀ngà rì nɗem wùcèm lɛ, Zyaŋ à ɓaghà ǹkpaŋzì-ɓìɓan. 7Fɔɔnnɛ ɓɛ ɓakà nyi lɛ ɓɔɔ yii ɓi fe nnɛ bàɓtis ì Zyaŋ ì ɓaghày. 8Nni Yeesus à kpaaghà min ɓɔ lɛ: Mɛ̀ girig, mɛ̀ ǹkpaa ɓi mini ɓi-tèɗ aɗi nnɛ nkìki ɓiɓan ɓi.

Dàɗkì ì ŋwaànɛ à faghà dɛm yiì rì ɓum

(Mt. 21:33-46; Mk. 12:1-12)

9Ajɛ̀m ìnɛn, nni à teetìghà ɓum dàɗkì lɛ, ŋwaàdɛŋ yɛɛ salà dɛm i viìnyɛ̀, à foŋ yɔ̀ ɓi rɛntì, à fa yɔ̀ ri ɓum ɓɛdɛŋ ɓɛ ɓɛɛ sasay miì, nyii kɛǹ ɓi kìlɔ̀ŋ kidɛŋ à finɛ̀n yì wɔɔ. 10Yɛ̀ɛ cààmɛ̀n ki mɛ̀saŋ ki kpagà, nni à romgày ǹkìì-kìsay adɛŋ a ɓumɓɛ à fogà ɓi dɛm, lɛ ɓɛɛ rom̀ nyi gàɓ yìì i ɓyom. Ɓumɓɛ ɓɛ reɓsɛ̀ngà dɛm ri ɓɔ, ɓɛ kulà ŋwaànɛ ɓɛ romgày ànɛn, ɓɛ pɛɛ̀zì nyi rì jɛ̀m ɓyàg zɛy, yɛ̀ɛ ŋwaàdɛm. 11Fɔɔnnɛ ŋwaàdɛm a romdìghà ǹkìì-kìsay adɛŋ, ɓɛ kuutì nyi, ɓɛ ki sɛmgi nyi, ɓɛ pɛɛ̀zì tì nyi rì jɛ̀m ɓyàg zɛy. 12Ŋwaàdɛm a romdì tìì ǹkìì-kìsay ɓi gɛ̀n i kìraa; ɓɛ̀salì ɓi dɛm ɓɛ kpɛɛghì tì ǹkìì-kìsay anɛ̀n ɓɛ ki nàɓ nyi. 13Fɔɔnnɛ ŋwaàdɛm a tɔkà min lɛ: Ǹghay ɓà la? Ǹɗì ɓiì romì man wɛm̀ à ǹɗem, ɓaà yi ɓi, nyi nnɛ ɓɛ ri nya ɓiì risii. 14Kìɓan kifog, yɛ̀ɛ ɓɛ̀salì ɓi dɛm ɓɛ ghɛngày man ànɛ̀n, ɓɛ ghɛn ɓi ɗyomzɛ̀n ɗyaa lɛ: Ŋwaànɛ à ghɛ̀ɛ̀sɛɛ kì rɔ̀ɓi ri dɛm inɛ yɛɛ ri lɛ, nni ti wolina nyi di dɛm yɛ̀ɛ woòghrɛn ɗì ɓìsi. 15Nni ɓɛ kpaŋzìghà nyi ɓi dɛm, ɓɛ ki wey nyi. Ɓigomìnɛ̀n, cɛ kɛɛ̀ ki ŋwaànɛ̀n à ɓiì ghalì rì ɓumɓɛ à faghà dɛm ri ɓɔ? 16Ŋwaàdɛm a rì ɓiì yùu, à cuusì ɓumɓɛ̀n ɓɛ̀cèm, à ki fa dɛm inɛ̀n rì ɓum ɓɛdɛŋ.

Yɛ̀ɛ kìlɔ̀ŋ kìcèm ki wokà rìkpaa ɗi Yeesus ɗiǹ, ki kpaa lɛ: Kɛ̀ kɛɛ̀ ɓa ɓaà fɔlɔɔ. 17Fɔɔnnɛ Yeesus à pɛɓsɛ̀ngà ɓɔ à kpaa lɛ: Jɛ̀ɛ̀ ìnɛ ì rì ǹkànɛn ɓi kaàtà à Bɛ̀ll ì rì azi lɛ cɛ? Gɔ̀g ìnɛ ɓɛ̀toŋì-mɛɛ ɓɛ makà, yɛ̀ɛ ki ti gɔ̀g ìnɛ ì lènlemi ǹtɔn à mɛɛ.

18Nni mum ǹcèm ànɛ à kpìi ɓi gɔ̀g ìnɛn, à ɓiì ɓumɓuni, fɔɔnnɛ gɔ̀g ìnɛn ì ɓiì turii mum bimiɗ ànɛ ì rì ɓiì kpìi ɓi nyòò. 19Ɓɛ̀pìrɛɛtìrɛ̀ ɓɛgwey rì ɓɛ̀rèsàg-ɓìdɔ̀gsɛna ɓɛ kaakààghà bee inɛ lɛ ɓɛɛ ɓaǹ nyi, ɓi cààmɛ̀n kɔm̀ kiǹ, wɔ̀lɛ ɓɛ risìghà ɓum ɓɛ kilɔ̀ŋ lɛ, ɓɛ yighà lɛ ɓisu waa nnɛ Yeesus à tekà dàɗkì ìnɛn.

Ɓɛ tɔɔgh Yeesus ǹtɔɔ̀tɔɔgh ɓi kìɓan ki làmpoŋ̀

(Mt. 22:15-22; Mk. 12:13-17)

20Fɔɔnnɛ ɓɛ tumɛ̀ngà rìfifìɓì ɗi Yeesus lɛ tintɔ̀ɔ̀ŋ, ɓɛ ki rom yi nyi ɓum ɓɛ mɛwooghrag, ɓɛ̀roɓɛ̀n ɓɛ ki lɔŋ yɛ̀ɛ ɓɛ yuù nyi kì tɔɔ̀gh saaɗ à kìɓan lɛ ɓɛɛ wog ǹkòo à nɛ̀si jɛ̀ɛ̀, di ɓɛɛ ɓan nyi, ɓɛɛ fa nyi rì ɓɛ̀yɔ̀mì-ɓum, rì gɔmìnà. 21Nni ɓumɓɛ̀n ɓɛ tɔkà Yeesus ǹtɔɔ̀tɔɔgh lɛ: Ǹɗèsàz ɓìsii yii lɔŋ lɛ, ù rì roànɛ a kìki lɛ, à kpaakpàà saaɗ, à ki rèresi ɓum saaɗ, kɛ̀ɛ fiɓi riɓa ɗi mum; u ki rèresi ɓum bee inɛ yɛ̀ɛ Bɛ̀ll lɔŋ yɛ̀ɛ ki ghɛɛ̀sɛɛ ɓi saaɗ. 22Ɓìdɔ̀gsɛna ɓis ɓi gherɛɛ nya lɛ ti peèghi làmpoŋ̀ rì Kaaza gìn, tyɛ̀ ki peeghi? 23Wɔ̀lɛ Yeesus à ghɛngà lɛ ɓɛ purii nyi càg ɓi ɗùm yɛɛri, nni à ɓàkà ɓɔ lɛ: 24Rèsiina mɛ̀ fìraŋ̀; kìfèèghrɛnà ki ghɛn, rì ɗii ɗi ghɛn, ɓyɛɛ ri lɛ miì? Ɓumɓɛ̀n ɓɛ ɓaàg nyi lɛ: Ɓi ri yɛɛ lɔɔ lɛ, rì kìfèèghrɛnà ki Kaaza, rì ɗii ɗiì. 25Nni Yeesus à kpaaghà min ɓɔ lɛ: Pɛ̀ɛ̀ziina ɓyom ɓi Kaaza rì Kaaza, ɓì fa Bɛ̀ll ɓinkìì. 26Ɓɛ ɓaghà ɓi lɛ ɓɛ wɔɔsì nyi ɓi ɓìtòkì ɓii ɓi à tòtòkà ɓi nyìinyìm à ɓum ɓɛ kilɔ̀ŋ; wɔ̀lɛ ɓɛ kuuràkà rìɓàg ɗi à ɓàkà ɓɔ, ɓɛ mam.

Ɓɛ̀sàdùsyɛŋ ɓɛ tɔɔgh Yeesus ǹtɔɔ̀tɔɔgh ɓi kìɓan ki righèmɓɛ̀n ɗi ɓilòŋ

(Mt. 22:23-33; Mk. 12:18-27)

27Fɔɔnnɛ ɓum ɓɛdɛŋ ɓɛ ɓi nɗaŋ wu Ɓɛ̀sàdùsyɛŋ ɓɛ ɓɛɛ̀ kpaaghi lɛ, ɓìloŋ ɓi yin lɛ ɓi ghemɓɛ̀n, ɓɛ yughà Yeesus a nyoo ɓɛ tɔg nyi lɛ: 28Ǹɗèsàg, kìɓan ki Moyis à kàngà lɛ ti kilag ki ri lɛ i gèni mum à wii, à càɗ giɓ kɛ̀ɛ̀ man, ŋwaànɛ̀n à rì ɓiì wɔlì giɓ anɛ̀n, à yay ɓɔn rì nyi ɓisuu geni ànɛ àa ŋwii. 29Wɔ̀lɛ ɓum ɓɛdɛŋ ɓɛ ɓaghà ɓi rìgeni ɗyaa ɓɛsɛ̀ɛ̀ taàɓɛ̀ɛ̀; roàntonto à wɛy giɓ, à ki wu di ɓɛ ka yin ɗi man. 30Geni à kìɓɛ̀ɛ̀, rì roàkìraa ɓɛ wɛy ǹkpɔɓ wiǹ. 31Nni ki kilɛ̀ngà fɔlɔɔ ɓi kìtaàɓɛ̀ɛ̀ ki ɓum; ɓɛ̀sɛ̀ɛ̀ ɓɛ̀cèm ɓɛ cuu, kɛ̀ɛ̀ ànɛ à càri man. 32Ajɛ̀m ì ɓumɓɛ̀n ɓɛ̀sɛ̀ɛ̀ ɓɛ̀cèm nnɛ giɓ anɛ̀n à wughà girig. 33Nni ŋwosi righèmɓɛ̀n ɗi ɓiloŋ giɓ anɛ̀n à ɓaa gɛ ɓà gili ghɛn anɛ ɓi ɓumɓɛ kitaàɓɛ̀ɛ̀ ɓɛǹ, yɛ̀ɛ ɓɛ̀sɛ̀ɛ̀ ɓɛ̀cèm ɓɛ ɓaghà ɓɛ̀yii ɓii? 34Yeesus à ɓàg ɓɔ lɛ: Ɓumɓɛ ɓi cɛɓ ki tì kaka miì ki, ɓɛ ti ɓɛ wɔlàg, 35kìɓan kifog, ɓɛ̀roɓɛ ki ghɛnɛɛ gɛ lɛ, ɓɛ ghɛɛ̀sɛɛ kì terì gàɓ ɓi nyɔɔnyɔn à cɛɓ ajɛ̀m ì rìghèmɓɛ̀n ɗi ɓiloŋ, ɓaa wɔlɛn ti ɓi, 36ɓɛ̀ kɛɛ̀ ki wu ti, lɛ ɓɛ ri ɓaa gɛ yɛ̀ɛ ɓum ɓɛ titom, ɓɛ ki ɓa ɓɔn ɓɛ Bɛ̀ll lɛ, ɓɛ mɛ ghèmɓɛn yi a ɓìloŋ. 37Kìɓan ki righèmɓɛ̀n ɗi ɓiloŋ kɛɛ̀ki Moyis à ɓùŋi ɓi jàŋ inɛ yɛɛ̀ kpaakpaa kitwìɗ ki ki ɓaghà rì ǹɗòò wu ɗuu; wɔɔ nnɛ à reŋii Kan lɛ: Bɛ̀ll à Abiraham, Bɛ̀ll à Isag, Bɛ̀ll à Yakɔɓ. 38Bɛ̀ll à yin Bɛ̀ll à ɓìloŋ, à rì lɔŋ Bɛ̀ll à ɓumɓɛ ɓɛ ri cem, lɛ ɓɛ̀sɛ̀ɛ̀ ɓɛ̀cèm ɓɛ ri cem lɛ nyi. 39Fɔɔnnɛ ɓɛ̀rèsàg-ɓìdɔ̀gsɛna ɓɛdɛŋ ɓɛ ɓakà nyi lɛ: Ǹɗèsàg, ù konaagh kì kpaà. 40Nni ɓɛ ghɛɛsìghà tì ɓi lɛ ɓɛɛ tɔg ti nyi ǹtɔɔ̀tɔɔgh.

Kiris à yin lɛ à ɓa man à Davit

(Mt. 22:41-46; Mk. 12:35-37)

41Yeesus à tɔkà ɓɔ lɛ: Lannɛ ɓì rì lɛ ɓì kpaa lɛ, Kiris à rì Man à Davit? 42Davit nyimiɗ a kalag ɓi kaàtà à Bɛ̀sam̀ lɛ: Kan à kalìghà Kan wɛ̀m lɛ, kɔ̀ri mɛ̀ fɛ ɓi weèlem, 43à kɛ̀n kì kpaŋì yɛ̀ɛ ǹɗì ɓiì ghaasii ɓɛ̀bènàbena ɓɔɔ kìɓoŋ ki u rɛsag mɛ̀kòò miì. 44Nni i Davit à mɛ reŋi nyi lɛ Kan, lannɛ nyii ri lɛ à ɓa tì man wiì?

Yeesus à rèsii ɓɛ̀rèsàg-ɓìdɔ̀gsɛna lɛ, ɓìɓan ɓi ɓɛɛ̀ kìkì ɓi rɔɔtɛɛ ɓi

(Mt. 23:1-36; Mk. 12:38-40)

45Yɛ̀ɛ kìtuu ki ɓum ki wowòkà ɓìɓan ɓi Yeesus à kpaakpààghà, nni à kpaaghà ɓɛ̀yilàg ɓii lɛ: 46Ɓì konàg rì ɓɛ̀rèsàg-ɓìdɔ̀gsɛna ɓɛ ɓɛ ti ɓɛ keesàg rìrerènì ɗi zi ri ɓyoo ɓɛ̀kàɓà, ki kɔngì ɓɔ lɛ, ɓɛɛ toòtògsì ɓɔ rì coo nnyaasɛ̀n ɓi gwìy, ɓɛ ki keesag mɛkɔ̀ɔ̀ mɛ asu ɓi naa yi bɔ̀ŋzɛ̀n, rì a ɓìsɛ̀nɛ̀. 47Ɓɛ ti ɓɛ pumzàg naa yi mɛkpɔɓ mɛ ɓɛ̀yiɓ, di ɓɛɛ̀ kìki ɓyoo bɔ̀ŋzɛ̀n lɛ, ɓum ɓɛɛ ghɛǹ lɛ ɓɛ ri ɓìsyeesyee ɓi ɓum; ɓɛ ɓiì terì rìkuu ɗi pɔnɔsì ɗi ɗi teèsɛɛ lɛɛ̀gwey.

Currently Selected:

LUKAS 20: BAFNT

Highlight

Copy