ZYAŊ 19

1Nni Pilat à yùghà min ɗi Yeesus à reɓsì lɛ ɓɛɛ nyi kìtòn.

2Fɔɔnnɛ ɓɛ̀sujàà ɓɛ togà min tàm à ɓìlɔ̀ɔ̀, ɓɛ saàgh Yeesus ɓi nto, ɓɛ waasì nyi kìlàà ki ɓàŋ. 3Ɓɛ tyɛɛ̀tɛ̀n nyi a nyoo di ɓɛɛ̀ kpaakpaa lɛ: Rìfòm ɗi Ɓɛ̀yudɛ̀n, tì tògsii wɔ̀, ɓɛ ɓoòɓòkì nyi mɛ̀ɓɛn.

4Nni Pilat à kpaŋdìghày, à kpaa Ɓɛ̀yudɛ̀n lɛ: Ghɛɛna, ǹti lɛ, nkpaŋziì mìni nyi; ɓì ghɛ̀ɛ̀sɛɛ kì yiì lɛ, ǹghɛɛ ɓi kiɓan ki ɓeɓtɛn ki à kìi, ki ki ri lɛ ɓɛ sɔmɛ̀n nyi miì. 5Nni Yeesus à kpagày min. À ɓaghà rì tàm à ɓìlɔ̀ɔ̀ ɓi nto, rì kìlàà ki ɓàŋ ɓi nyoo, Pilat à kpaa ɓɔ lɛ: Ghɛɛna! mum innɛ̀n. 6Wɔ̀lɛ yɛ̀ɛ ɓɛ̀pìrɛɛtìrɛ̀ ɓɛgwey ɓɛ ghɛngà nyi, ɓɛ kpaa jɛ̀ɛ̀ aɗyoo lɛ: Kpana nyi ɓi kɔrɔs, kpana nyi ɓi kɔrɔs. Pilat à kpaa ɓɔ lɛ: Mìniìɓɔmiɗ terina nyi, ɓi kpaǹ nyi ɓi kɔrɔs. Ɓi ɓɛg wɛ̀m, mɛ̀ ǹghɛɛ ɓi kiɓan ki ɓeɓtɛn ki à kìi, ki ki ri lɛ ɓɛ sɔmɛ̀n nyi miì. 7Ɓɛ̀yudɛ̀n ɓɛ ɓaàg Pilat lɛ: Tì rì rì kìdɔ̀gsɛna, nni kìdɔ̀gsɛna kiǹ kɛɛ̀ kpaaghi lɛ à ghɛ̀ɛ̀sɛɛ kì wiì ɓisuulɛ àa nɗɛ̀ŋii kì kpaà lɛ, à rì Man à Bɛ̀ll. 8Yɛ̀ɛ Pilat à wokà tì jɛɛ ìnɛn, à risì tì lɛɛ̀gwey, 9fɔɔnnɛ à ɗiŋìghà tì ɓi kìkpanà ki ɓɛyɔ̀m, à tɔg Yeesus lɛ: Wɔ̀ɔ̀ fuu yì fe? Wɔ̀lɛ Yeesus à ɓàkà ɓi nyi, Pilat à kpaa min nyi lɛ: 10Mɛ̀ nnɛ ù mìnɛɛ? Ù yii ɓi lɛ ǹɗì rì ìtèɗ wulɛ, ǹcàɗ wɔ̀, nsoò lɛ ǹkpaǹ wɔ̀ ɓi kɔrɔs? 11Yeesus à ɓàg lɛ: Ù ɓaghà ɓi lɛ, ù ɓa rì ìtèɗ wulɛ, ù kì mɛ̀ com di Bɛ̀ll à faghà ɓi wɔ wɔ. Kìɓan kiǹ kɛɛ̀ki mum ànɛ à kàɓi mɛ̀ rì wɔ̀, à kìi kìɓe ki ki cee.

12À tumɛ̀n ɓi cààmɛ̀n kiǹ, Pilat à kaakààghà bee inɛ lɛ a caɗ nyi, kìɓan kifog, Ɓɛ̀yudɛ̀n ɓɛ kpaakpààghà jɛ̀ɛ̀ aɗyoo lɛ: I ù càri ŋwaànɛ̀n di ù yin righan ɗi Kaaza, lɛ mum ǹcèm ànɛ à kalii lɛ à rì rìfòm, à rì ŋwaànɛ a ɗùùɗuu ri Kaaza. 13Yɛ̀ɛ Pilat à wokà fɔlɔɔ, nni à kpaŋzìghày Yeesus à kɔ̀rì ɓi-kɔ̀ɔ̀ wu riren ɗi ɓiɓan, ɓi jàŋ inɛ ɓɛ nɗegì lɛ pàveè, ɓi rì ebìreegh lɛ Gaɓata. 14Ŋwos anɛ̀n à ɓaghà ŋwos anɛ ɓɛ peèghpègsɛ̀ngà tìcàɓ ti Paskà di ki ti nunùg toroɓ, Pilat à kpaa Ɓɛ̀yudɛ̀n lɛ: Rìfòm ɗin ɗyɛɛ̀ɗi. 15Wɔ̀lɛ ɓɛ teŋzìghà jɛ̀ɛ̀ ɓɛ kpaa lɛ: A wu, a wu, kpana nyi ɓi kɔrɔs. Pilat à kpaa ɓɔ lɛ: Ɓi kɔ̀nkɔn lɛ, mɛ̀ɛ ǹkpaǹ rìfòm ɗin? Ɓɛ̀pìrɛɛtìrɛ̀ ɓɛgwey ɓɛ ɓàg nyi lɛ: Ɓìsii yin ɗi rìfòm ɗiɗɛŋ i ki yin lɛ Kaaza. 16Nni Pilat à faghà min ɓɔ Yeesus lɛ ɓɛɛ kpan ɓi kɔrɔs. Fɔɔnnɛ ɓɛ tekà nyi, ɓɛ kɛǹ ɗì nyi.

Ɓɛ kpani Yeesus ɓi kɔrɔs

(Mt. 27:32-44; Mk. 15:21-32; Lk. 23:26-43)

17Yeesus à tɛ̀tɛ̀kà kɔrɔs wìì nyimiɗ ɓi ɗi lɛ ɓɛɛ pɛsɛn ɓi bàn, ɓɛɛ kɛǹ ɗì nyi ɓi jàŋ inɛ ɓɛ nɗegì lɛ kìtɛtɛg ki nto, yɛ̀ɛ ri ɓi rì ebìreegh lɛ Gɔlgɔta. 18Wɔɔ nnɛ ɓɛ kpangà nyi ɓi Kɔrɔs ǹɗaŋ ri ɓum ɓɛdɛŋ ɓɛɓɛɛ̀, lɛ roànɛ nyi ɓi kìmɛŋ, roàmbog nyi ɓi weèlem, Yeesus ɓi nyìinyìm wàà.

19Pilat à kàngà girig ɓi kìɓoŋ, ɓɛ ɓaàtì kɔ ɓi kɔrɔs. Mɛ̀kànì mɛǹ mɛ ɓaghà lɛ: Yeesus ànɛ a Naazarɛt, rìfòm ɗi Ɓɛ̀yudɛ̀n. 20Ɓɛ̀yudɛ̀n lɛɛ̀gwey ɓɛ ɓalà kìɓoŋ kiǹ, lɛ jàŋ inɛ ɓɛ kpangà Yeesus ì ɓaghà jàŋbog rì bàn. Kìɓoŋ kiǹ ki ɓaghà kìkànɛn lɛ, rì ɓi rì ebìreegh, rì ɓi rìgìrɛg, rì ɓi rìlàtɛŋ. 21Ɓɛ̀pìrɛɛtìrɛ̀ ɓɛgwey ɓɛ Ɓɛ̀yudɛ̀n ɓɛ kpaaghà Pilat lɛ: Kɔ̀ɔ kàn lɛ rìfòm ɗi Ɓɛ̀yudɛ̀n, kàna lɛ, àa nkpaa lɛ, nyii ri rìfòm ɗi Ɓɛ̀yudɛ̀n. 22Nni Pilat à ɓàkà ɓɔ lɛ: Ki m̀mɛ kàn, ki ti kì kànɛn.

23Ɓɛ̀sujàà ɓɛ ɓaghà lɛ, ɓɛ mɛ kpan Yeesus ɓi kɔrɔs, ɓɛ teɗ ɓìlàà ɓii, ɓɛ kaɓsì ɓyɔ gàɓ yinin, sujàà bimiɗ à teɗ gàɓ bog; ɓɛ tekà girig jɔmpàs wìì, àncèm à ɓaghà kɛ̀ɛ̀ jàŋ i ǹɗàrɛn, à ɓa ǹtoŋɛn lɛ ɗyɔɔg, à tumɛ̀n aɗyoo, à kpaŋ azi. 24Ɓɛ̀sujàà ɓɛǹ ɓɛ kpaaghà wɔɔ ɓɔmiɗ lɛ: Tyɛ̀ ki ghàski jɔmpàs ànɛ, ti ɓog ǹtɔ̀ŋ, di ti ghɛǹ ŋwaànɛ à rì nyi ɓiì terì. Ki kilɛ̀ngà fɔlɔɔ lɛ kɛɛ ɓa lɔŋ yɛ̀ɛ ki ɓaghà kìkànɛn lɛ: Ɓɛ kaɓɓàkà ɓìlàà ɓyɛm̀, ɓɛ ki ɓog ntɔ̀ŋ ɓi jɔmpàs wɛ̀m. Com ki ɓɛ̀sujàà ɓɛ kighà kɛɛ̀kìn.

25Ɓɛ̀yiɓ ɓɛ lɛ: rì jɛɛ Yeesus, rì geni jɛɛ Yeesus, rì Marii à gili Kileyopas, rì Marii Madelɛn, ɓɛ rɛrɛ̀lìghà jàŋbog rì kɔrɔs à Yeesus. 26Yɛ̀ɛ Yeesus à ghɛngà jɛɛ, à ghɛɛ̀dì tì ǹ-yilàg ànɛ àa nkeesàg ǹɗɛrɛliyɛn jàŋbog rì jɛɛ wìì, nni à kpaaghà jɛɛ lɛ: Giɓ anɛ, man wɔɔ̀ nnɛ̀n lɔɔ. 27Fɔɔnnɛ à kpaaghà rì ǹ-yilàg ànɛ̀n lɛ: Gaa nnɛ̀n lɔɔ. À tumɛ̀n ɓi cààmɛ̀n kiǹ, ǹ-yilàg ànɛ̀n à tekà jɛɛ Yeesus a mɛɛ mii.

28Ajɛ̀m ìnɛn, yɛ̀ɛ Yeesus à yighà lɛ ɓìɓan ɓìcèm ɓi mɛ kpaŋzɛ̀n, nni à kpaaghà lɛ: Kìnɔli kɛɛ̀ kìki mɛ, lɛ di ɓìɓan ɓi ɓi ri ɓìkànɛn ɓyɛɛ roǹ. 29Fɔlɔɔ nnɛ ɓɛ̀sujàà ɓɛ tekày dɛ̀ɓ ɓɛ nɔg ɓi ɓìkpamà ɓi mɛrɔ̀g ɓi ɓi ɓaghà wɔɔ ɓi kìbɔkɔ̀ kidɛŋ, ɓɛ ɓam̀ yɔ̀ ɓi kìgeŋ, ɓɛ namzì nyi a ŋwɔm. 30Yɛ̀ɛ Yeesus à syògà ɓìkpamà ɓi mɛrɔ̀g ɓiǹ, nni à kpaaghà lɛ: Ɓìɓan ɓìcèm ɓi roni. Fɔɔnnɛ à tuŋzìghà nto à maasì.

31Ŋwos anɛ̀n à ɓaghà ŋwosi jumɓa, di Saɓàt à rì yɛ̀ɛ rìduri. Ɓɛ̀yudɛ̀n ɓɛ kɔngà ɓi lɛ ɓìloŋ ɓyɛɛ rɔɓ fɔlɔɔ ɓikpanɛn ɓi kɔrɔs à kpaŋ ɓi Saɓàt, lɛ Saɓàt ànɛn à ɓaghà coo gòn i kìcèlì. Fɔɔnnɛ ɓɛ tɔkà Pilat lɛ a fa ɓɔ ìtèɗ wulɛ ɓɛɛ ɓwingi ɓɔ mɛ̀kòò, ɓɛ ki kɔ̀sag yi ɓɔ ɓi ɓɛ̀kɔrɔs. 32Nni ɓɛsujàà ɓɛ yughà ɓɛ ɓungì mɛ̀kòò mɛ kibog ki ɓi ɓumɓɛ ɓɛ kpangà ǹɗaŋ ri Yeesus, ɓɛ ɓungì tì mɛ roàmbog. 33Yɛ̀ɛ ɓɛ kpagà ɓi Yeesus, ɓɛ tanɛ̀n lɛ à mɛ wu ɓɛ̀ kɛɛ̀ ɓwingi nyi mɛ̀kòò. 34Wɔ̀lɛ kìbog ki ɓi ɓɛ̀sujàà ki tuɓkà nyi bèn ɗì rìkɔ̀ŋ, mɛ̀nig rì bwaɓ ɓi ghas kì kpaŋì. 35Ŋwaànɛ a kpaakpaa ɓiɓan ɓi, à ghɛngà ɓyɔ (rì mis). Nni com ki a kpaakpàà ki ri saaɗ, nyimiɗ a yii lɛ, a kpaakpaa saaɗ lɛ, di mìni girig ɓi gherɛn. 36Ki kilɛ̀ngà fɔlɔɔ lɛ, kɛɛ ɓa yɛ̀ɛ ki ri kìkànɛn lɛ nsoò kìwoɓ kii kifog, ɓaa ɓun ɓi.

37Ki ri tì kìkànɛn ɓi jàŋ idɛŋ lɛ ɓɛ ri pɛ̀ɛ̀zii gɛ mis rì roànɛ ɓɛ tuɓkà bèn.

Ɓɛ ɓomi Yeesus

(Mt. 27:57-61; Mk. 15:42-47; Lk. 23:50-56)

38Ajɛ̀m ìnɛn, Yoosɛɓ, ŋwaànɛ a Arimate, à ɓaghà ǹ-yilàg à Yeesus a rìnyam lɛ à rirìsìghà Ɓɛ̀yudɛ̀n. Nni à tɔkà Pilat ìtèɗ wulɛ a teɗ kìloŋ ki Yeesus, Pilat à gherɛ̀n. Fɔɔnnɛ à yùghà, à teɗ kìloŋ ki Yeesus. 39Nikodɛm ànɛ à lokà kì kɛ̀ɛ yɛ̀ɛ Yeesus ɗì ìru, à yùghày gìrig; à ɓanɛ̀n yì bùtag i ɓyom ɓi ɓi ɓaghà lɛ ɓi kpaŋ ɓɛ̀kilò rìtin ɗì ǹtɛ̀ɗ, ɓi ɓaghà mɛ̀kuu mɛ tirààre mɛ lɛ: rì miìr, rì àlòwɛs. 40Nni kìɓɛ̀ɛ̀ ki ɓum kìn ki tekà min kiloŋ ki Yeesus, ɓɛ kagì kɔ rì ɓɛ̀ɓandas, di ɓɛɛ̀ mìmisi tirààre miì yɛ̀ɛ Ɓɛ̀yudɛ̀n ɓɛ nkìlàg di ɓɛ ti ɓiì ɓòmi mum. 41Dɛm idɛŋ ì ɓaghà jàŋ inɛ ɓɛ kpangà Yeesus ɓi kɔrɔs, nni zɔ̀ŋ ì nyɔn ìnɛ ɓɛ ɓaghà di ɓɛ ka ɓom̀ ɓi mum miì, ì ɓaghà ɓi dɛm inɛ̀n. 42Miì nnɛ ɓɛ ɓomgà Yeesus, ɓisuulɛ Ɓɛ̀yudɛ̀n ɓɛ ɓaghà di ɓɛ ti ɓiì ɓùuɓuŋɛ̀n Saɓàt, rì tì lɛ, zɔ̀ŋ ì ɓaghà wɔɔ jàŋbog.

Currently Selected:

ZYAŊ 19: BAFNT

Highlight

Copy