Nehemia 1

Ny nandrenesan’i Nehemia ny fahantran’ny Jiosy noho ny tsy mbola nanamboarana ny màndan’i Jerosalema, sy ny alahelony noho izany, ary ny vavaka nataony.

1NY tantaran’i Nehemia, zanak’i Hakalia.

Tamin’ny volana Kisleo tamin’ny taona faharoa-polo, raha tany an-dapa any Sosana aho, 2dia tonga Hanany, anankiray amin’ny rahalahiko, mbamin’ny lehilahy sasany avy tany Joda; ary nanontaniako azy ny amin’ny Jiosy efa afaka, izay sisa tamin’ny fahababoana, ary ny amin’i Jerosalema. 3Ka hoy no navaliny ahy: Ny sisa tamin’ny fahababoana izay any amin’ny tany any dia mitondra fahoriana be sy latsa; ary voarodana ny màndan’i Jerosalema sady nodoran’ny afo ny vavahadiny.

4Ary rehefa nandre izany teny izany aho, dia nipetraka nitomany sady niferinaina andro maro ary nifady hanina sy nivavaka teo anatrehan’Andriamanitry ny lanitra 5ka nanao hoe: Indrisy! ry Jehovah, Andriamanitry ny lanitra, Andriamanitra lehibe sy mahatahotra, Izay mitandrina fanekena sy famindrampo amin’izay tia Azy sy mitandrina ny didiny, 6aoka hihaino ny sofinao ary hihiratra ny masonao, mba hohenoinao ny vavaky ny mpanomponao, izay ataoko eto anatrehanao ankehitriny andro aman-alina ho an’ny Zanak’Isiraely mpanomponao sy izay anekeko ny fahotan’ny Zanak’Isiraely, izay efa nanotanay taminao; fa izaho sy ny mpianakavin-draiko dia samy efa nanota avokoa. 7Efa nanao izay ratsy indrindra taminao izahay ka tsy nitandrina ny didy, na ny lalàna, na ny fitsipika, izay nandidianao an’i Mosesy mpanomponao.

8Hotsarovanao anie ilay teny nandidianao an’i Mosesy mpanomponao hoe: Raha manao izay mahadiso hianareo, dia hampiely anareo any amin’ny firenena maro Aho; 9nefa raha miverina amiko kosa hianareo ka mitandrina ny didiko sy mankatò azy, na dia hisy voaroaka hatrany am-paravodilanitra aza hianareo, dia avy any no hanangonako azy, ka ho entiko ho ao amin’ny fitoerana izay nofidiko hampitoerako ny anarako izy. 10Ary ireo dia mpanomponao sy olonao, izay navotanao tamin’ny herinao lehibe sy ny tànanao mahery.

11Koa mitaraina aminao aho, ry Jehovah ô, mihainoa ny fivavaky ny mpanomponao sy ny fivavaky ny mpanomponao rehetra izay faly amin’ny fahatahorana ny anaranao; ary hambinina anie ny mpanomponao anio, ary aoka hahazo famindrampo eo imason’io lehilahy io aho.#1.11 Heb. izy. Fa mpitondra kapoaky ny mpanjaka aho.

Currently Selected:

Nehemia 1: MBP

Highlight

Copy