Mika 4
4
Ny hampodian’i Jehovah ny voninahitr’i Ziona, rehefa avy nampahorina izy.
1ARY izao no ho tonga any am-parany:
Ny tendrombohitra misy ny tranon’i Jehovah dia haorina eo an-tampon’ny tendrombohitra
Ary hasandratra ho avo noho ny havoana;
Ary ny firenena hitanjozotra hankany.
2Eny, maro ny jentilisa no hiainga ka hanao hoe:
Andeha isika hiakatra any an-tendrombohitr’i Jehovah,
Ho any an-tranon’Andriamanitr’i Jakoba,
Mba hampianarany antsika ny amin’ny làlany,
Ka handehanantsika amin’ny atorony;
Fa avy any Ziona no hivoahan’ny lalàna,
Ary avy any Jerosalema ny tenin’i Jehovah.
3Ary hitsara ny adin’ny firenena maro Izy
Ka hampiaiky ny firenena mahery hatrany amin’ny lavitra;
Dia hanefy ny sabany ho fangady ireny
Ary ny lefony ho fanetezam-boaloboka;
Ny firenena tsy hanainga sabatra hifamely;
Na hianatra ady intsony.
4Fa samy hipetraka eny ambanin’ny voalobony sy ny aviaviny izy,
Ary tsy hisy hanaitaitra azy;
Fa ny vavan’i Jehovah, Tompon’ny maro, no efa niteny.
5Fa ny firenena rehetra samy mandeha amin’ny anaran’ny andriamaniny avy;
Fa isika kosa handeha amin’ny anaran’i Jehovah Andriamanitsika mandrakizay doria.
6Amin’izany andro izany, hoy Jehovah,
No hanangonako ny mandringa
Sy hamoriako izay noroahina
Mbamin’izay nampahoriko;
7Ary ny mandringa no hapetrako ho sisa,
Ary izay noroahina lavitra ho firenena mahery;
Ary Jehovah hanjaka aminy ao an-tendrombohitra Ziona
Hatramin’izany ka ho mandrakizay.
8Ary hianao, ry tilikambon’ny andiany.#4.8 Na: tilikambon’i Edera.
Tendrombohitr’i Ziona#4.8 Na: Ofelan’i Ziona. zanakavavy,
Aminao no ho tonga izany, eny, ho tonga ny fanapahana voalohany,
Dia ny fanjakan’#4.8 Na: hanjakana aminy. i Jerosalema zanakavavy.
9Koa nahoana no mitaraina mafy hianao?
Moa tsy misy mpanjaka va ao aminao,
Sa lany ringana avokoa ny mpanolo-tsainao,
No dia azon’ny fanaintainana hianao, toy ny vehivavy raha miteraka?
10Ry Ziona zanakavavy, mararia, ka manezaha,
Toy ny vehivavy raha miteraka!
Fa ankehitriny dia hivoaka avy any an-tanàna hianao
Ka hipetraka any an-tsaha,
Ary dia ho tonga hatrany Babylona aza;
Any no hamonjena anao,
Eny, any no hanavotan’i Jehovah anao ho afaka amin’ny tànan’ny fahavalonao.
11Ary ankehitriny dia tafangona hamely anao ny firenena maro,
Izay manao hoe: Aoka halam-baraka#4.11 Heb. holotoina. Ziona,
Ary aoka ny masontsika ho faly mijery azy.
12Kanjo tsy fantatr’ireny ny hevitr’i Jehovah,
Na azony ny fisainany;
Fa efa nanangona azy toy ny amboara ho ao am-pamoloana Izy.
13Mitsangàna, ka miveleza, ry Ziona zanakavavy,
Fa ny tandrokao hataoko vy,
Ary ny kitronao hataoko varahina,
Ka hanorotoro firenena maro hianao;
Dia hatolotrao#4.13 Heb. hataoko herema. ho an’i Jehovah ny hareny,
Ary ho an’ny Tompon’ny tany rehetra ny fananany.
14Koa mivory ho andiany hianao, ry zanakavavin’ny andiany!
Manao fahirano antsika izy,
Mamely tsorakazo ny takolaky ny mpitsaran’ny Isiraely izy.
Currently Selected:
Mika 4: MBP
Highlight
Share
Copy
Want to have your highlights saved across all your devices? Sign up or sign in
Baiboly Protestanta Malagasy © Malagasy Bible Society, 1965, 2019.
