Levitikosy 26

Fitahiana sy ozona.

1AZA manao andriamani-tsi-izy; ary aza manangana sarin-javatra voasokitra, na manao tsangambaton-tsampy na manorina vato soratana hiankohofana eo amin’ny taninareo: fa Izaho no Jehovah Andriamanitrareo.

2Tandremo ny Sabatako, ary hajao ny fitoerako masina: Izaho no Jehovah.

3Raha manaraka ny lalàko sy mitandrina ny didiko hianareo ka mankatò izany, 4dia hanome anareo ranonorana amin’ny fotoany Aho, ka hahavoka-javatra ny tany, ary hamoa ny hazo any an-tsaha. 5Ary ny taom-pivelezanareo dia ho tratry ny taom-piotazam-boaloboka, ary ny taom-piotazam-boaloboka dia ho tratry ny taom-pamafazana; dia hihinana hianareo ka ho voky; ary handry fahizay eo amin’ny taninareo. 6Ary homeko fiadanana eo amin’ny tany hianareo ka handry fahizay, ary tsy hisy hanaitaitra, fa hofongorako ny biby masiaka amin’ny tany, ary tsy hotetezin-tsabatra ny taninareo. 7Dia hanenjika ny fahavalonareo hianareo, ka ho lavon-tsabatra eo anoloanareo izy. 8Ary ny dimy aminareo hanenjika ny zato, ary ny zato aminareo hanenjika ny iray alina; ary ny fahavalonareo ho lavon-tsabatra eo anoloanareo.

9Ary hijery anareo Aho ka hahamaro ny taranakareo sy hampitombo anareo, ary hanorina ny fanekeko aminareo Aho. 10Ary hihinana ny tranainy hianareo, sady hamoaka ny tranainy hasiana ny vao. 11Ary ny tabernakeliko dia hataoko eo aminareo; ary tsy ho halan’ny fanahiko hianareo. 12Ary handeha eo aminareo Aho ka ho Andriamanitrareo; ary hianareo ho oloko.

13Izaho no Jehovah Andriamanitrareo, Izay nitondra anareo nivoaka avy tany amin’ny tany Egypta, mba tsy ho andevony hianareo; ary nanapaka ny zioga izay teo aminareo Aho ka nampandeha anareo mijoro.

14Fa raha tsy mihaino Ahy kosa hianareo ka tsy mankatò ireo didy rehetra ireo, 15ary hamavoinareo ny didiko, na halan’ny fanahinareo ny fitsipiko, ka tsy ankatoavinareo ny didiko rehetra, fa ivadihanareo ny fanekeko, 16Izaho kosa dia hanao izao aminareo: hanisy fampitahorana aminareo Aho, dia areti-maha-sahozanina sy tazo mahamay, izay manimba ny maso sy mandany ny aina; ary hafafinareo foana ny voan-javatrareo, fa ny fahavalonareo no hihinana azy. 17Dia hanandrina anareo ny Tavako, ka ho resy eo anoloan’ny fahavalonareo hianareo; ary izay mankahala anareo no hanapaka anareo; dia handositra hianareo, na dia tsy misy manenjika aza.

18Ary raha mbola tsy mihaino Ahy ihany hianareo amin’izany rehetra izany, dia mbola hampijaly anareo impito Aho noho ny fahotanareo. 19Ary horavako ny reharehan’ny herinareo, ka hataoko toy ny vy ny lanitrareo, ary toy ny varahina ny taninareo; ary ny herinareo ho lany foana; 20fa tsy hahavoka-javatra ny taninareo, ary tsy hamoa ny hazo amin’ny tany.

21Ary raha mbola manohitra Ahy ihany hianareo, ka tsy mety mihaino Ahy, dia hasiako kapoka impito koa hianareo araka ny fahotanareo. 22Ary hampandehaniko eo aminareo ny bibi-dia, ka handany ny zanakareo sy handringana ny biby fiompinareo ireny ka hahavitsy isa anareo; ary ny làlambenareo ho tonga efitra.

23Ary raha tsy mandray ny anatro amin’izany hianareo, fa mbola manohitra Ahy ihany, 24Izaho dia Izaho kosa no hamely anareo ka hampijaly anareo impito indray noho ny fahotanareo. 25Dia hampiditra sabatra aminareo Aho ho valin’ny nivadihanareo ny fanekena; ary rehefa tafangona eo anatin’ny tanànanareo hianareo, dia hanatitra areti-mandringana aminareo Aho; ary hatolotra eo an-tànan’ny fahavalo hianareo. 26Raha tapahiko ny vary, izay tohan’ainareo, dia fanendasa-mofo iray ihany no hanendasan’ny vehivavy folo ny mofonareo, ary an-danjany no hizarany azy, dia hihinana hianareo, fa tsy ho voky.

27Ary raha mbola tsy mihaino Ahy amin’izany indray hianareo, fa mbola manohitra Ahy ihany, 28dia hamely anareo amin’ny fahatezerana kosa Aho; ary Izaho dia Izaho no hampijaly anareo impito indray noho ny fahotanareo. 29Dia hihinana ny nofon’ny zanakareo-lahy sy ny zanakareo-vavy hianareo. 30Ary horavako ny fitoerana avonareo, sy hokapaiko ny tsangan-kazonareo#26.30 Na: tsangam-batonareo. ho an’ny masoandro, ary ny fatinareo dia hariako eo ambonin’ny fatin’ny sampinareo, ary ho halan’ny fanahiko hianareo. 31Ary horavako ny tanànanareo, ka hatao lao ny fitoera-masinareo, ary tsy hamboloiko ny hanitrareo ankasitrahana. 32Ary hataoko lao ny tany, ka ho talanjona amin’izany ny fahavalonareo izay monina eo. 33Ary hianareo dia haeliko any amin’ny jentilisa, ary hanatsoaka sabatra ho enti-manenjika anareo Aho; ary ny taninareo ho lao, ary ny tanànanareo ho rava.

34Ary amin’izany ny tany dia hanonitra#26.34 Na: hifaly amin’. ny sabatany amin’ny andro rehetra izay hahafoanany, raha any amin’ny tanin’ny fahavalonareo hianareo; dia hitsahatra ny tany ka hanonitra#26.34 Na: hifaly amin’. ny sabatany; 35amin’ny andro hahafoanany rehetra no hitsaharany ho solon’izay tsy nitsaharany tamin’ny sabatanareo, raha mbola nonina teo hianareo.

36Ary ny amin’ny sisa aminareo any amin’ny tanin’ny fahavalony, dia hampiditra faharerahana ao am-pony Aho, ka na dia ny feon’ny ravin-kazo voapaoka aza dia hampandositra azy; ary handositra tahaka ny mandosi-tsabatra izy ka ho lavo, na dia tsy misy manenjika aza. 37Ary ho lavo mifanindry toy ny mandosi-tsabatra izy, na dia tsy misy manenjika aza; ka dia tsy hahajanona eo anoloan’ny fahavalonareo hianareo. 38Ary dia ho lany ringana any amin’ny jentilisa hianareo, ary ho lanin’ny tanin’ny fahavalonareo hianareo. 39Ary ny sisa eo aminareo dia ho levona any amin’ny tanin’ny fahavalonareo noho ny helony sy ny heloky ny razany koa.

40Fa raha hiaiky ny helony sy ny heloky ny razany izy–dia ny fahadisoany izay nandisoany tamiko tamin’ny nanoherany Ahy, 41ary Izaho kosa namely azy ka nitondra azy ho any amin’ny tanin’ny fahavalony–raha hietry amin’izany ny fony tsy voafora, ary hanonitra ny amin’ny helony izy, 42dia hotsarovako ny fanekeko tamin’i Jakoba sy ny fanekeko tamin’Isaka ary ny fanekeko tamin’i Abrahama; ary hotsarovako koa ny tany. 43Ary ny tany hilaozan’ny olona ka hanonitra#26.43 Na: tsangam-batonareo. ny sabatany, raha mitoetra foana tsy misy olona izy; ary ny olona hanonitra ny amin’#26.43 Na: ary ny olona kosa hifaly hiaiky. ny helony, satria nandà ny fitsipiko izy, ary halan’ny fanahiny ny didiko.

44Ary na dia izany rehetra izany aza, raha any amin’ny tanin’ny fahavalony izy, dia tsy holaviko ary tsy ho halako, fandrao lany ringana izy rehetra, ka rava ny fanekeko taminy; fa Izaho no Jehovah Andriamaniny. 45Fa ny hitahiako azy no hahatsiarovako ny fanekena tamin’ny razany, izay nentiko nivoaka avy tany amin’ny tany Egypta teo imason’ny jentilisa, mba ho Andriamaniny Aho: Izaho no Jehovah.

46Ireo no didy sy fitsipika ary lalàna izay nataon’i Jehovah ho aminy sy amin’ny Zanak Isiraely, teo an-tendrombohitra Sinay ka nampilazainy an’i Mosesy.

Currently Selected:

Levitikosy 26: MBP

Highlight

Copy