Eksodosy 15

Ny fihirana nataon’i Mosesy sy ny Zanak’Isiraely, rehefa tafita ny Ranomasina Mena izy.

1ARY Mosesy sy ny Zanak’Isiraely dia nihira izao fihirana izao ho an’i Jehovah ka nanao hoe:

Hihira ho an’i Jehovah aho, fa avo indrindra Izy;

Ny soavaly sy ny mpitaingina azy efa nariany ao amin’ny ranomasina.

2Jehovah no heriko sy fidèrako, fa efa famonjena ahy Izy;

Izy no Andriamanitro, ka hankalaza Azy aho,

Dia Andriamanitry ny razako, ka hanandratra Azy aho.

3Jehovah dia mpiady mahery,#15.3 Heb. miaramila.

Jehovah no anarany.

4Ny kalesin’i Farao sy ny miaramilany natsipiny ao amin’ny ranomasina;

Ary ny kapiteny voafantina nasitrika ao amin’ny Ranomasina Mena.

5Ny lalina nanarona azy:

Nilentika tany ambany indrindra tahaka ny vato izy.

6Ny tànanao ankavanana, Jehovah ô, efa malaza amin’ny hery;

Ny tànanao ankavanana, Jehovah ô, manorotoro ny fahavalo.

7Amin’ny halehiben’ny voninahitrao no andringananao izay nitsangana hanohitra Anao;

Alefanao ny fahatezeranao mirehitra, izay mandevona azy toy ny mololo.

8Ary ny fofonain’ny vavoronao no nanangonanao ny rano;

Nivongovongo toy ny antontan-javatra ny rano maria;

Nandry teo afovoan’ny ranomasina ny lalina.

9Hoy ny fahavalo: Hanenjika aho, hahatratra aho,

Hizara babo aho ka hanao izay sitraky ny foko aminy,

Hotsoahako ny sabatro, ka hamongotra azy ny tànako.

10Ny fofonainao no nitsofanao, dia nanarona azy ny ranomasina:

Nilentika tahaka ny firaka ao amin’ny rano mahery izy.

11Jehovah ô, iza moa no tahaka Anao amin’izay andriamanitra?

Iza moa no tahaka Anao, Izay ankalazaina amin’ny fahamasinana,

Deraina amin’ny fahatahorana, Mpanao fahagagana?

12Nahinjitrao ny tànanao ankavanana,

Dia nitelina ireo ny tany.

13Tarihinao amin’ny famindramponao ny firenena izay navotanao,

Ka entinao amin’ny herinao ho any amin’ny fonenanao masina izy.

14Mandre ny firenena ka raiki-tahotra;

Hovitra no mahazo ny mponina any Filistia;

15Toran-kovitra ny loham-pirenen’i Edoma;

Azon-korohoro ny lehilahy maherin’i Moaba;

Reraka ny fon’izay rehetra monina any Kanana.

16Mahazo azy ny tahotra sy ny hovitra;

Noho ny halehiben’ny sandrinao dia mangina tahaka ny vato izy.

Mandra-pandalon’#15.16 Na: Mandra-pitan’. ny olonao, Jehovah ô,

Mandra-pandalon’#15.16 Na: Mandra-pitan’. ny olona izay navotanao.

17Dia hampiditra azy Hianao ka hamponina azy ao amin’ny tendrombohitra lovanao,

Ao amin’ny fitoerana nataonao hitoeranao, Jehovah ô,

Dia ao amin’ny fitoerana masina naorin’ny tànanao, Tompo ô.#15.17 Na: Efa nanao fitoerana hitoeranao Hianao, Jehovah ô; eny, fitoerana masina no naorin’ny tànanao, Tompo ô.

18Jehovah hanjaka mandrakizay doria.

19Fa niditra teo amin’ny ranomasina ny soavalin’i Farao sy ny kalesiny ary ny mpitaingin-tsoavaliny, ary Jehovah nampikatona ny ranomasina taminy; fa ny Zanak’Isiraely kosa nandeha tamin’ny tany maina teo afovoan’ny ranomasina.

20Ary Miriama mpaminanivavy, anabavin’i Arona, dia nitondra ny ampongatapaka teny an-tànany; ary nivoaka nanaraka azy ny vehivavy rehetra nitondra ampongatapaka sady nandihy. 21Ary Miriama namaly ireo lehilahy ireo ka nihira hoe:

Mihirà ho an’i Jehovah, fa avo indrindra Izy;

Ny soavaly sy ny mpitaingina azy nariany ao amin’ny ranomasina.

Ny nandehanan’ny Zanak’Isiraely tany amin’ny efitra Sora, sy ny nitobiany tao Mara.

22ARY Mosesy nitondra ny Isiraely nifindra avy teo amoron’ny Ranomasina Mena, dia nandroso ho any amin’ny efitra Sora izy; ary nandeha hateloana tany an-efitra izy fa tsy nahita rano.

23Dia tonga tao Mara izy, fa tsy nahasotro ny rano tao Mara, satria nangidy izany; koa izany no nanaovany ny anarany hoe Mara.#15.23 Mara = Mangidy. 24Dia nimonomonona tamin’i Mosesy ny olona ka nanao hoe: Inona no hosotroinay? 25Ary dia nitaraina tamin’i Jehovah izy, ka dia nanehoan’i Jehovah hazo anankiray, ary rehefa natsipiny tao anatin’ny rano izany, dia tonga mamy ny rano.

Tao no nanomezan’i Jehovah lalàna sy fitsipika ho azy, ary tao no nizahany toetra azy, 26ka hoy Izy: Raha hazoto hihaino ny feon’i Jehovah Andriamanitrao hianao ka hanao izay mahitsy eo imasony sy hihaino ny lalàny ary hitandrina ny didiny rehetra, dia tsy hisy hataoko aminao ireny aretina rehetra ireny, izay nataoko tamin’ny Egyptiana; fa Izaho no Jehovah Izay mahasitrana anao.

Ny nahatongavan’ny Zanak’Isiraely tao Elima, sy ny nimonomononany tany an-efitr’i Sinay noho ny tsi-fisian-kanina, ary ny nanomezan’Andriamanitia azy mana sy papelika hohaniny.

27ARY tonga tao Elima izy; ary tao nisy loharano roa ambin’ny folo sy hazo rofia#15.27 palma. fito-polo, dia nitoby teo anilan’ny rano izy.

Currently Selected:

Eksodosy 15: MBP

Highlight

Copy