LUK 20

Tom ko Jesu in zuia bíí ko Jean

(Zɔk Mt 21.23-27; Mk 11.27-33)

1Ŋma wese nɛ̀ Jesu duka kɔ̧́ Tua ko Sɔ̧ usi nɛ̀ mɔ ha̧ o bíí, tɔ̧ nɛ̀ De Mbe Wen ko Sɔ̧ ha̧ wa, o gasa wan-ɗafi-sɔ̧, o wi-usi-heembea in o gasawi saaye hɔa, 2ɓɛɛ tɔ̧ ha̧ a̧: «Mɔ nɛ̀ mɛ de’ɛ, mɛ de tɛ ŋgai ko o? Nɛ́ o'o ha̧ ŋgai'i ha̧ mɛ o?» 3Nɛ́ mɔ'ɔ nɛ̀ Jesu kifa nú ha̧ wa: «Mi a̧a̧ nɛ̀ akamɔ kɔ‘m mɛ ak nɛ̀ ɛnɛ mbɛt; ɛ̀nɛ̀ kífí nú ha̧‘m: 4zuia bíí nɛ̀ Jean duka so mɛ zui’ɛ tɛ̀ɛ́ nɛ̀ tɛ́ Sɔ̧ náà, kóó tɛ̀ɛ́ nɛ̀ tɛ̀ bíí nde?» 5Ɓɛɛ wa tɔ̧ sitɛ ŋmaa: «K’ɛ̀ɛ̀ tɔ̧‘e, zuia bíí nɛ̀ Jean duka so zui’ɛ tɛ̀ɛ́ nɛ̀ tɛ́ Sɔ̧ wó, a̧ tɛ tɔ̧ h’ɛ́ɛ́‘e, wen ge s’ɛɛ kɔ̧ ɗɔɔ wen ko Jean na ge? 6A̧ k’ɛɛ tɔ̧‘e tɛ̀ɛ́ nɛ̀ tɛ̀ bíí wo, o bíí lɛŋ tɛ yo ɛɛ nɛ̀ ta wen wa iŋa nɛ̀ sa̧a̧-a̧ ‘e, Jean nɛ́ wi-tɔ̧-wen oi nú Sɔ̧.» 7Hegɔ, wa kifa nú‘e, wa iŋ fara nɛ̀ zuia bíí nɛ̀ Jean duka so mɛ zui'i tɛɛ nɛnɛ na. 8Ɓɛɛ Jesu tɔ̧ ha̧ wa: «Mi mbɛt, mi beka tɔ̧ ndaa ŋgai n'am de nɛ̀ mɔɔ nɔ'ɔ h’ɛ́nɛ́ na.»

Lizaŋ ko o ɗaŋ wi-zɔk-fɔ

(Zɔk Mt 21.33-46; Mk 12.1-12)

9Nɛ́ mɔ'ɔ nɛ̀ Jesu tɔ̧ɔ̧ lizaŋ'ɛ ha̧ o bíí: «Ŋma bíí waa fɔ-nyak-dɔ̧ɔ̧; nɛ́ mɔ'ɔ n'aa ee fɔ‘i er o wi-de-tom ɓɛɛ yak kɔ̧-a̧ gɛnɛ tɛ dɔka zɛ.#Es 5.1 10Ŋgimbi ɓi waya-nyak-dɔ̧ɔ̧ hɔa, ɓɛɛ a̧ tom ŋma wi-de-tom kɔ̧-a̧ sitɛ o wi-zɔk-fɔ mɛ ba war waya-nyak-dɔ̧ɔ̧ kɔ̧-a̧ piinɛ ha̧ a̧. Nɛ́ mɔ'ɔ nɛ̀ wa mbɛra wi-de-tom'i, fo a̧ siɗoŋ nɛ̀ géé er. 11Ɓɛɛ a̧ tom ŋma wi-de-tom kɔ̧-a̧ nɛnɛ woyo; wa mbɛra i̧i̧ mbɛt, wa da̧a̧ a̧, ɓɛɛ wa fo a̧ siɗoŋ nɛ̀ géé er mbɛt. 12A̧ toma taar wi-de-tom nɛnɛ woyo; wa ee da̧i̧ tɛ i̧i̧ mbɛt, ɓɛɛ wa ndak a̧. 13Ɓɛɛ wan-fɔ‘i tɔ̧: ‹A̧‘m dé hee ge? Mi tɛ tom nɛ́ bem kɔ‘m, dua-see-am nɛnɛ; war kɔ̧-a̧, wa tɛ tu̧ tɛ a̧.› 14Zɔka bem ko wan-fɔ nɛ̀ o wi-zɔk-fɔ zɔka hegɔ, ɓɛɛ wa tɔ̧ ha̧ o ŋmaa: ‹Zɔ́k wi-duk-oi-dáa kɔ‘i nɛ̀ tɛ mɛ‘i. Ɛ̀ɛ̀ gbɛ́ a̧ wen ha̧ mɔɔ-oi-dáà kɔ̧-a̧ mɛ duk nɛ́ k’ɛɛ.› 15Nɛ́ mɔ'ɔ nɛ̀ wa gbura a̧ si ká̧ nú fɔ, ɓɛɛ wa gbɛ a̧.

«Wan-fɔ nyak-dɔ̧ɔ̧‘i tɛ de nɛ́ ge in wa ge nde? 16A̧ tɛ nɛ̀ɛ́ gbɛ o wi-zɔk-fɔ‘i nɔ‘i lɛŋ, ɓɛɛ a̧ ee fɔ‘i er o ŋma mbe wi-zɔk-fɔ woyo.» Zia wen'i nɛ̀ wa zia hegɔ, ɓɛɛ wa tɔ̧: «Weyaa, ká pɛrti mɔ hegɔ de na ndó-ndó-ndó!» 17Jesu mbaɗa wa ɓɛɛ tɔ̧ ha̧ wa: «Gba̧a̧ Yɔramɔ'ɛ hee ge?

‹Nɛ́ ta nɛ̀ o wi-mbo-tua pi̧i̧ so taŋ‘i,

a̧ kifa duk nɛ́ de kina-ta-e mgbii-tua.›#Gima 118.22

18Wi nɛ̀ tɛ yo nù zu ta'i, tɛ gbin,

ɓɛɛ wi nɛ̀ ta'i tɛ tik zu a̧, ta'i tɛ mbɔl'a.»

Garama ko Sezar

(Zɔk Mt 22.15-22; Mk 12.13-17)

19Nɛ́ mɔ'ɔ nɛ̀ o wi-usi-heembea in o gasa wan-ɗafi-sɔ̧ kia war mɛ ba Jesu tɛ kale ŋgimbi'i, wen wa iŋa'e Jesu tɔ̧ lizaŋ‘i wen zu wi, ɓɛɛ wa yu nɛ́ o bíí. 20Nɛ́ mɔ'ɔ nɛ̀ wa ku̧u̧ naŋ pɛma Jesu, ɓɛɛ wa ye o ŋma bíí mɛ duk hee o wi-de-mɔ nɛ̀ yuwar-a ga mɛ ba wen zaŋ-aa, gbak na, wa pi̧i̧ a̧ er gasawi zu zika-nù‘i mɛ kpa ŋgai zu a̧. 21Wa aka Jesu: «Wan-usi-mɔ, ɛɛ iŋa ɛnɛ tɔ̧ wen, usi nɛ̀ mɔ nɛ̀ yuwar-a, ɛnɛ usi nɛ́ yuwar ko Sɔ̧ nyɛm nɛ̀ ɗoŋ kpasawen, ɛnɛ kɛ̧ mgbara bíí na. 22Heembea k’ɛɛ ee h’ɛ́ɛ́ mɛ gbo garama ha̧ Sezar náà, kóó weyaa nde?» 23Jesu iŋa mɔɔ-gɔn-zaŋ kɔ-wa'i, ɓɛɛ tɔ̧ ha̧ wa: 24«Ɛ̀nɛ̀ bá ŋma kɔya-sede tɛnɛ ha̧‘m zɔk. Zu bíí in yɔramɔ nɛ̀ duk sɛnɛ'ɛ nɛ́ ko o?» Wa kifa nú: «Nɛ́ ko Sezar.» 25Ɓɛɛ Jesu tɔ̧ ha̧ wa: «Hegɔ‘i, ɛ̀nɛ̀ há̧ mɔ ko Sezar ha̧ Sezar, ɓɛɛ ɛ̀nɛ̀ há̧ mɔ ko Sɔ̧ ha̧ Sɔ̧.» 26Ɓɛɛ wa nyɛm mɛ ba wen nú-a ti o bíí tɛ wen kɔ̧-a̧ na. Ɗɛɗɛ-wa gɔna tɛ kifa nú n'aa kifa ha̧ wa'i, ɓɛɛ wa ya nɛ̀ oi nú.

Kura-ŋgɔn ko o fio

(Zɔk Mt 22.23-33; Mk 12.18-27)

27O Saduseɛn sii kafɛ‘e kura ŋgɔn tɛ fio bo na; nɛ́ mɔ'ɔ nɛ̀ o ŋma ɗɔŋa si katɛ Jesu ɓɛɛ ak a̧:#Tom 23.8 28«Wan-usi-mɔ, Moisɛ bàá yɔr h’ɛ́ɛ́‘e: ‹Kà ŋma bíí nɛ̀ a̧a̧ nɛ̀ nya ɗoŋ fe, bem bo na, nya-a̧‘i a̧ bá ko-oi-aa mɛ ko nɛ̀ bem nɛ̀ tɛ ba nin wan-fio e ŋgɔn.›#Wee-ɗoŋ-he 25.5 29O ŋma nya-wi yaa so mɔɔrɔ-ɗoŋ-yiitoo, nɛ́ mɔ'ɔ nɛ̀ kaya-wi baa kóò, ko bem na, ɓɛɛ fe. 30Yiitoo-aa 31in taar-a baa kóò‘i, ko bem na mbɛt, ɓɛɛ wa fe. Wa mɔɔrɔ-ɗoŋ-yiitoo lɛŋ fea, wa ko bem na. 32Sɔŋkur-aa nɛ́ kóò‘i nɛ̀ zu á̧ fea. 33Wese-kura-ŋgɔn tɛ fio, kóò‘i tɛ duk nɛ́ ko o nde? Wen wa mɔɔrɔ-ɗoŋ-yiitoo lɛŋ baa so a̧ nɛ̀ kóò!»

34Ɓɛɛ Jesu kifi nú ha̧ wa: «O bíí zaŋnu’ɛ ba nɛ́ kóò in wíì, 35ɓɛɛ o bíí nɛ̀ nyɛma mɛ kur ŋgɔn tɛ fio in mɛ duk kpasa tɛ ŋgimbi wan mɛ siti beka ba kóò in wíì na. 36Wa beka fe ɓɔna wen wa tɛ duk hee o betom ko Sɔ̧ ga. Wa nɛ́ o bem ko Sɔ̧ wen wa kura ŋgɔn tɛ fio. 37O fio tɛ kur ŋgɔn, wen Moisɛ tɔ̧ɔ̧ so wen'i wese n'aa zɔka so nɛ̀ be te fara nyɛka-a, ŋgimbi n'aa saa nɛ̀ Gasa Wan'e: ‹Sɔ̧ ko Abraham, Sɔ̧ ko Izak, in Sɔ̧ ko Jakob.›#Gboa-a 3.6 38Wen Sɔ̧ bó nɛ́ Sɔ̧ ko o fio na, Sɔ̧ nɛ́ Sɔ̧ ko o bíí nɛ̀ duk kpasa; ɓɛɛ o bíí lɛŋ duk kpasa wen zu a̧.» 39Ɓɛɛ o ŋma wi-usi-heembea tɔ̧: «Wan-usi-mɔ, ɛ́nɛ́ tɔ̧ wen nɛ̀ de-a!» 40Ɓɛɛ kíì de wa tɛ aka mbe mɔ in a̧.

Mɛsii in David

(Zɔk Mt 22.41-46; Mk 12.35-37)

41Jesu tɔ̧ɔ̧ ha̧ wa: «Héé ge wi nyɛma mɛ tɔ̧‘e Mɛsii nɛ́ Bem ko David ge nde? 42Wen David nɛ̀ zu tɔ̧ɔ̧ so zaŋ Gima'e ndé:

‹Gasa Wan tɔ̧ɔ̧ ha̧ Gasa Wan kɔ‘m:

Mɛ̀ dúk nɛ̀ war wii-er-am,#Gima 110.1

43hɔ ŋgimbi n'am tɛ de

ha̧ mɛ mɛ gan o wisɛn kɔ-mɛ.›

44«David nɛ́ mɔ'ɔ nɛ̀ saa a̧‘e Gasa Wan, ɓɛɛ a̧ tɛ duk nɛ́ Bem ko David hee ge?»

Mbaŋa-tɛ-bíí zu o wi-usi-heembea

(Zɔk Mt 23.1-36; Mk 12.38-40)

45Hee mɔ'ɔ nɛ̀ gba gíí bíí zii nɛ́ wen kɔ̧-a̧ ga, a̧ tɔ̧ɔ̧ ha̧ o ŋgaiwi kɔ̧-a̧: 46«Ɛ̀nɛ̀ zɔ́k tɛ‘nɛ́ wen o wi-usi-heembea nɛ̀ kɔ̧ɔ̧ nɛ́ pi̧i̧ gasa laa yar nɛnɛ in nɛ̀ kɔ̧ɔ̧ ha̧ o bíí mɛ fan wa bee-gara; wa kɔ̧ɔ̧ nɛ́ yaa-a tɛ̀ o kuti fara sɛn kɔ̧́ tua-mɔi̧a-a in ká̧ nyɔŋmɔ. 47Wa nyɔŋ nɛ́ mbɔi ko o ko-gera, in wa kɔfi nɛ́ Sɔ̧ nɛ̀ ɗoŋ nyɛi̧a-a wen yí bíí. Kita nɛ̀ tɛ tik wa ɔ ŋgaya nyɛmna.»

Currently Selected:

LUK 20: GB11

Highlight

Copy