MATTHIEU 10

O ŋgaiwi ko Jesu ɓu-zua-yiitoo

(Zɔk Mk 3.13-19; Lk 6.12-26)

1Jesu saa o ŋgaiwi kɔ‘i ɓu-zua-yiitoo, ɓɛɛ sur wa mɛ ndak o ɗaŋ-sɔ̧ yinɛ tɛ bíí in ha̧ wa mɛ kpasi o wi-zɛɛ lɛŋ in o wi nɛ̀ a̧a̧ nɛ̀ nyimmɔ nɛtɛ nɛtɛ. 2Nin o betom nɔ‘i ɓu-zua-yiitoo'i nɛ́ mɔ'ɔ: kuti-a nɛ́ Simɔŋ (nɛ̀ wa sa'e Pierre), in Andre nya-a̧; hɔ-ɗoŋ-aa nɛ́ Jak bem ko Zebedee, in Jean nya-a̧; 3ká bá nɛ̀ Filip, Bartelemi, Tomas in Matthieu wi-ba-garama; Jak bem ko Alfe, in Tadee; 4sɛka Simɔŋ nɛ̀ wa sa'e mgbák kpasa be-nù in Iskariot wi nɛ̀ ee ɗɔra tɛ Jesu.

Jesu toma o ŋgaiwi kɔ‘i ɓu-zua-yiitoo

(Zɔk Mk 6.7-13; Lk 9.1-6)

5Jesu toma o ŋgaiwi kɔ‘i ɓu-zua-yiitoo nɔ‘i yaknɛ ɓɛɛ tɔ̧ ha̧ wa: «K’ɛ́nɛ́ ye tɛ nù ko o gɔni-dùk na, in ŋma ye nú Samarii na mbɛt, 6ɓɛɛ ɛ̀nɛ̀ nɛ́ nutua ko o be Israɛl nɛ̀ ya hee o sami nɛ̀ yɔa ga. 7Ɛ̀nɛ̀ tɔ̧́ wen nɛ̀ yuwar nɛnɛ ha̧ wa'e: ‹Wan mɛ yiwese hɛɗa kaɗi!›#Lk 10.4-12 8Ɛ̀nɛ̀ kpásí o wi-zɛɛ, ɛ̀nɛ̀ tún o fio, ɛ̀nɛ̀ dé ha̧ tɛ o wi-doko mɛ sa̧, ɛ̀nɛ̀ ndák o ɗaŋ-sɔ̧ yinɛ tɛ bíí. Ɛ́nɛ́ kpàá mɔ géè, ɛ̀nɛ̀ há̧ mɔ géè mbɛt. 9K’ɛ́nɛ́ ba lɔr kóó bu-sede, kóó be kɔya sede kpo pi̧ kɔ̧ zibaa k’ɛ́nɛ́ na. 10K’ɛ́nɛ́ ba ŋgoɓo nɛnɛ na, k’ɛ́nɛ́ ba ŋma laa gbam nɛ̀ i̧i̧ tɛ‘nɛ́‘i na, kà bó nɛ̀ ndárà in dɔra na mbɛt, wen wi-de-tom tɛ kpa kànà mɔɔ-nyɔŋ oi tom kɔ‘i.#1 Kɔr 9.14; 1 Tim 5.18

11«Ŋgimbi n’ɛ̀nɛ̀ tɛ ye ŋma gasa ye, kóó geɗek ye, ɛ̀nɛ̀ ák mɔ ha̧ wa mɛ usi fara ko ŋma bíí nɛ̀ nyɛma mɛ kpɛk'nɛ́, ɓɛɛ ɛ̀nɛ̀ zír tɛ̀ kɔ̧-a̧ hɔ ŋgimbi n’ɛ̀nɛ̀ tɛ yak. 12Ɓɛɛ k’ɛ̀nɛ̀ nɛ́ yee kɔ̧́ tua ko ŋma bíí, ɛ̀nɛ̀ tɔ̧́‘e, ga̧a̧mɔ a̧ dúk in wi’ɛi. 13Kà o wan-tua'i nɛ́ duka nɛ́ wi-de-demɔ mɛ kpɛk'nɛ́, ɓɛɛ ga̧a̧mɔ k’ɛ́nɛ́ a̧ dúk zu wa; ɓɛɛ kà wa nɛ́ kpɛka'nɛ́ na, ɓɛɛ nɛ̀ ga̧a̧mɔ k’ɛ́nɛ́ a̧ píí ɗoŋ tɛ‘nɛ́. 14Kà wa nɛ́ bɛ̧ɛ̧ kpɛka'nɛ́, kà wa nɛ́ bɛ̧ɛ̧ zia wen k’ɛ́nɛ́ mbɛt, ɓɛɛ ɛ̀nɛ̀ gbó kɔ̧́ tua'i, kóó saaye'i yak, ɓɛɛ tɛ̀ yaka-a k’ɛ́nɛ́, ɛ̀nɛ̀ mgbɔ́ fuunu naŋ‘nɛ́ a nù fara'i.#Tom 13.51 15Nɛ́ kpasawen a̧‘m tɔ̧ h’ɛ́nɛ́: sɛn wese-kita, kita tɛ ŋgai zu ye'i gan ko o bíí Sɔdɔm in Gɔmɔr.»#Mt 11.24; Ku̧u̧ 19.24-28

Ŋgamɔ nɛ̀ tɛ hɔ

(Zɔk Mk 13.9-13; Lk 21.12-17)

16«Ɛ̀nɛ̀ zii, mi tom ɛ́nɛ́ nɛnɛ hee o sami mgbara o gbóò ga. Kɔ̧́ zaŋ‘nɛ́ a̧ gɔ́n hee gɔ́k ga, ɛ̀nɛ̀ yá nɛ̀ ga̧a̧-a̧ hee o gbaku̧i̧ ga.#Lk 10.3 17Ɛ̀nɛ̀ dé hakilo, wen o bíí tɛ e'nɛ́ ti o gasa fara-gɔn-kita. Wa tɛ gusi'nɛ́ kɔ̧ tua-mɔi̧a-a kɔ-wa.#Mk 13.9-11; Lk 12.11-12; 21.12-15 18Wa tɛ kai'nɛ́ nɛnɛ ti o wi-duk-zu zika-nù in o wannu wen zu'm; mɔ‘i tɛ duk nɛ́ mɔɔ-sedaako yí-wa in o gɔni-dùk. 19Ŋgimbi n’ɛnɛ tɛ yor fara-kita, k’ɛ́nɛ́ ta mɔ wen wen n’ɛnɛ tɛ tɔ̧ in yuwar tɔ̧a̧-a̧ na mbɛt, wen ɛnɛ tɛ kpa mɔ n’ɛnɛ tɛ tɔ̧ tɛ ŋgimbi-a. 20Wen bó nɛ́ ɛnɛ'ɛ tɛ tɔ̧ wen na, ɓɛɛ nɛ́ Sa̧a̧ Ɔmi ko Dáà k’ɛ́nɛ́ nɛ̀ duk tɛ‘nɛ́ a tɔ̧ wen.

21«O nya-wi tɛ e ɗɔra tɛ ŋmaa ha̧ bíí mɛ gbɛ wa yinɛ, dáa-wan-bem tɛ e ɗɔra tɛ bem kɔ‘i mbɛt. O bem tɛ kur zu dáà in nàà de nɛnɛ ha̧ wa mɛ fe.#Mk 13.12; Lk 21.16 22O bíí lɛŋ tɛ sɛn'nɛ́ wen zu'm, ɓɛɛ wi nɛ̀ tɛ nɔ ŋgiɗi hɔ sɔŋkur-aa tɛ kpasi.#Mt 24.9,13; Mk 13.13; Lk 21.17 23Kà o bíí ŋma ye nɛ́ ndaka'nɛ́, ɓɛɛ ɛ̀nɛ̀ yú mɔ si ŋma mbe ye. Nɛ́ kpasawen a̧‘m tɔ̧ h’ɛ́nɛ́: ɛ́nɛ́ beka yar dam tɛ o ye Israɛl nɛti ha̧ Bem ko bíí mɛ pii ɗoŋ na.»

24«Wi-yambi-mɔ gan wan-usi-mɔ kɔ‘i na, ɓɛɛ wi-de-tom gan wan-tom kɔ‘i na mbɛt.#Lk 6.40; Jn 13.16; 15.20 25Nyɛma so ha̧ wi-yambi-mɔ mɛ duk hee wan-usi-mɔ kɔ‘i ga, in ha̧ wi-de-tom mɛ duk hee wan-tom kɔ‘i ga mbɛt. Kà wa nɛ́ saa wan-tua'e Bɛlzebul, wanye ko o ɗaŋ-sɔ̧ wó, ɓɛɛ bó nɛ́ wa tɛ tɔ̧ ɗaŋ wen zu o bíí ko wi’ɛi gan na nde?»#Mt 9.34; 12.24; Mk 3.22; Lk 11.15

Mɔ nɛ̀‘i tɛ yu

(Zɔk Lk 12.2-7)

26«Hegɔ, k’ɛ́nɛ́ de kíì bíí na. Ŋma mɔ nɛ̀‘i te kpe zu-a nɛ̀ beka gbo zan na, bo na; ŋma mɔ nɛ̀ tɛ hu̧si nɛ̀ bíí beka iŋ na, bo na mbɛt.#Mk 4.22; Lk 8.17 27Mɔ n'am tɔ̧ h’ɛ́nɛ́ nɛ̀ ti tum, ɛ̀nɛ̀ tɔ̧́ k’ɛ́nɛ́ tɛ wese. Mɔ nɛ̀ wa fu̧i̧ kɔ̧́ zer'nɛ́, ɛ̀nɛ̀ híɗí k’ɛ́nɛ́ hiɗi nɛ̀ ŋgɔn ha̧ bíí mɛ zii. 28O wi nɛ̀ gbɛ kiitɛ-wi, ɓɛɛ nɛ̀ bó nɛ̀ ŋgai mɛ gbɛ sɔ̧-tɛ-wi na, k’ɛ́nɛ́ yu wa na. Ɓɛɛ ɛ̀nɛ̀ yú nɛ́ wi nɛ̀ a̧a̧ nɛ̀ ŋgai mɛ pi̧ kiitɛ-wi in sɔ̧-tɛ-wi mbɛt kɔ̧ wee Gehɛn. 29Bó nɛ wa ɗɔr sosor yiitoo tɛ dálà na nde? Ɓɛɛ ŋma kpɔk nɛ̀ tɛ tik nù yambali, ɓɛɛ ka Dáà k’ɛ́nɛ́ iŋ na, bo na. 30Kóó nɛ́ buma-zu'nɛ́, a̧ tɔra dam lɛŋ! 31Wen hegɔ, k’ɛ́nɛ́ de kíì na. Ɛ́nɛ́ gana gan o sosor nyɛmna.»

Dee sedaako wen Krist

(Zɔk Lk 12.8-9)

32«Kóó o ndé nɛ̀ tɔ̧ ti o bíí‘e, wi nɛ́ bíí kɔ‘m, mi mbɛt mi tɛ tɔ̧ ti Dáà kɔ‘m nɛ̀ a̧a̧ yiwese'e, a̧ nɛ́ bíí kɔ‘m. 33Ɓɛɛ kóó o ndé nɛ̀ tɛ kaf'am ti o bíí, mi tɛ kaf'a ti Dáà kɔ‘m nɛ̀ a̧a̧ yiwese mbɛt.»#2 Tim 2.12

Bó nɛ́ ga̧a̧mɔ na, nɛ́ biro

(Zɔk Lk 12.51-53; 14.26-27)

34«K’ɛ́nɛ́ ta k’ɛ́nɛ́‘e ndé, mi baa nɛ́ ga̧a̧mɔ tɛnɛ zaŋnu na. Bó nɛ́ mi baa nɛ́ ga̧a̧mɔ tɛnɛ na, mi baa nɛ́ gba-paa tɛnɛ. 35Wen mi tɛɛ mɛ kɛ̧ mgbara bem in dáà kɔ‘i, mgbara boko-bem in nàà kɔ‘i, mgbara be-for mɛ kóò in for-wi mɛ kóò.#Mic 7.6 36Sɛnmɔ tɛ ye mgbara kóó-wi in o ŋmaa.

37«Wi nɛ̀ kɔ̧ɔ̧ dáà kɔ‘i, kóó nàà kɔ‘i gan am, nyɛm wen duka bíí kɔ‘m na. Wi nɛ̀ kɔ̧ɔ̧ bem kɔ‘i mɛ be wiwii-a kóó be-okoo-a gan am, nyɛm wen duka bíí kɔ‘m na mbɛt. 38Wi nɛ̀ tui te-diŋa kɔ‘i mɛ nɛ̀ ɗoŋ am na, nyɛm wen duka bíí kɔ‘m na.#Mt 16.24; Mk 8.34; Lk 9.23 39Wi nɛ̀ kɔ̧ɔ̧ mɛ duk kpasa tɛ fe, ɓɛɛ wi nɛ̀ fe wen zu'm tɛ kpasi.»#Mt 16.25; Mk 8.35; Lk 9.24; 17.33; Jn 12.25

Mɔɔ-oi-tom

(Zɔk Mk 9.41)

40«Wi nɛ̀ kpɛka'nɛ́ kpɛka nɛ̀‘m, ɓɛɛ wi nɛ̀ kpɛka'm kpɛka nɛ́ wi nɛ̀ toma'm tɛnɛ.#Mk 9.37; Lk 9.48; 10.16; Jn 13.20 41Wi nɛ̀ kpɛka ŋma wi-tɔ̧-wen oi nú Sɔ̧, wen n'aa iŋa'e nɛ́ wi-tɔ̧-wen oi nú Sɔ̧ a'i kpɛk wó, tɛ kpa mɔɔ-oi-tom ko wi-tɔ̧-wen oi nú Sɔ̧; ɓɛɛ wi nɛ̀ kpɛka ŋma wi-de-mɔ nɛ̀ yuwar-a, wen n'aa iŋa'e nɛ́ wi-de-mɔ nɛ yuwar-a a'i kpɛk wó, tɛ kpa mɔɔ-oi-tom ko wi-de-mɔ nɛ̀ yuwar-a. 42Nɛ́ kpasawen a̧‘m tɔ̧ h’ɛ́nɛ́: kóó o ndé nɛ̀ tɛ ha̧ be gɛ̧ɛ̧ yì ha̧ ŋma bem mgbara o ŋgaiwi kɔ‘m nɔ'ɔ, wen a̧ nɛ́ ŋgaiwi kɔ‘m wó, tɛ kpa mɔɔ-oi-tom kɔ‘i.»

Currently Selected:

MATTHIEU 10: GB11DC

Highlight

Copy