LUK 17
17
Mbaŋa tɛ o ŋgaiwi
(Zɔk Mt 18.6-7,21-22; Mk 9.42)
1Ɓɛɛ Jesu tɔ̧ ha̧ o ŋgaiwi kɔ‘i: «O mɔ nɛ̀ tɛ de ha̧ bíí mɛ tik a̧a̧ kànà sɛnɛ, ɓɛɛ bɔnɛ a̧a̧ zu wi nɛ̀ de ha'i mɛ tik. 2Gana so a'i kun ta-hɔ̧n-mɔ ger-a pi̧ a̧ ɗɔɔ ɗuka dir gba-tɔp ká̧ a̧ tɛɛ ɔr ŋma kpɔk mgbara o geɗek bem nɔ'ɔ pi̧ tɛ ɗaŋmɔ. 3Ɛ̀nɛ̀ zɔ́k tɛ‘nɛ́!
«Kà nya-mɛ de ɗaŋmɔ in mɛɛ, mɛ̀ gáí a̧, ɓɛɛ kà see-aa ɗaŋ zu mɔ n'aa dea'i, ɓɛɛ mɛ̀ é ɗaŋmɔ kɔ̧-a̧ ha̧ a̧.#Mt 18.15 4Kà̧ a̧ de ɗaŋmɔ in mɛɛ kpɔk kale wese war mɔɔrɔ-ɗoŋ-yiitoo, ɓɛɛ ká̧ a̧ pii ɗoŋ dam ɗoŋ-aa mɛ́ tɔ̧ ha̧ mɛ: ‹See-am ɗaŋa zu mɔ n'am dee in mɛɛ!› ɓɛɛ mɛ tɛ e ɗaŋmɔ kɔ̧-a̧ ha̧ a̧.»
Kpasa kɔ̧ɔ̧ɗɔɔwen
5O betom ko Gasa Wan tɔ̧ɔ̧ ha̧ a̧: «Ɛ̀nɛ̀ dé h’ɛ́ɛ́ mɛ duk nɛ̀ kɔ̧ɔ̧ɗɔɔwen gan kuti-a.» 6Ɓɛɛ Gasa Wan tɔ̧: «Kɔ̧ɔ̧ɗɔɔwen k’ɛ́nɛ́ a̧ bó so benaŋ kɛ̧́ɛ̧́ hee gba̧a̧ sunu#17.6 gba̧a̧ sunu: texte tɔ̧ɔ̧ nɛ́ grain de moutarde. ga, ɛnɛ nyɛma mɛ tɔ̧ ha̧ gasa te mɛ̧‘i: ‹Mɛ̀ kúr fara’ɛ nɛ́ɛ̀ yor ɗɔɔ tɔp mɛ!› Ɓɛɛ te'i mboo zu h’ɛ́nɛ́.»
Wi nɛ̀ de nɛ́ tom kɔ‘i
7«Nɛ́ o mgbara'nɛ́ o nɛ̀ a̧a̧ nɛ̀ ŋma wi-de-tom kɔ‘i nɛ̀ wa nɛ́ fɔ, kóó nɛ̀ dai nɛ́ o mɔ-dai, ɓɛɛ nɛ̀ tɛ tɔ̧ ha̧ wi-de-tom'i: ‹Mɛ̀ tɛ́ bee mɛ̀ nyɔ́ŋ mɔ,› ŋgimbi nɛ̀ wi-de-tom pii nɛ́ ɗoŋ nɛ̀ kpɛɛfɔ o nde? 8Bó nɛ́ wi’ɛi tɛ tɔ̧ ha̧ wi-de-tom kɔ‘i'e, a̧ a̧ pí̧ nɛ́ laa-de-tom, a̧ a̧ ɗáfí nyɔŋmɔ ha'i nyɔŋ, nɔ nɛ̀ mɔ kaɗi, sɛka wi-de-tom'i nyɔŋa war kɔ‘i, nɔ nɛ̀ mɔ mbɛt, na nde? 9A̧ tɛ de so osoko ha̧ wi-de-tom'i wen mɔ n'aa tɔ̧ ha̧ a̧ mɛ de n'aa dea'i nde? 10Hegɔ, ɛ́nɛ́ mbɛt, k’ɛ̀nɛ̀ dé mɔ nɛ̀ wa usa h’ɛ́nɛ́ mɛ de lɛŋ kaɗi, ɓɛɛ ɛ̀nɛ̀ tɔ̧́‘e: ‹Ɛ́ɛ́ bó nɛ́ kpasa o wi-de-tom na, ɛɛ dee nɛ́ mɔ nɛ̀ wa usa h’ɛ́ɛ́ mɛ de ɓɛɛ.› »
O wi-doko ɓu
11Hee mɔ'ɔ nɛ̀ Jesu nɛ́ si Jerusalɛm ga, a̧ ɓira nɛ̀ nú Samarii in nú Galilee. 12Nɛ́ mɔ'ɔ n'aa yee ŋma saaye, ɓɛɛ o ŋma wi-doko ɓu we ti a̧ tɛnɛ, yor nɛ̀ nyɛi̧a-a, 13ɓɛɛ hiɗi mɔ: «Jesu, Wan-usi-mɔ, ɛ̀nɛ̀ dé ko h’ɛ́ɛ́.» 14Zɔka wa nɛ̀ Jesu zɔka hegɔ, ɓɛɛ a̧ tɔ̧ ha̧ wa: «Ɛ̀nɛ̀ nɛ́, ɛ̀nɛ̀ úsí tɛ‘nɛ́ ha̧ o wi-ɗafi-sɔ̧.» Wa biti nɛa-a, ɓɛɛ tɛ-wa sa̧.#Lev 14.1-32 15Ŋma mgbara wa zɔka'e doko kaɗa tɛ-wi, ɓɛɛ pii ɗoŋ gasi nɛ̀ Sɔ̧ nɛ̀ hee-ger. 16Nɛ́ mɔ'ɔ n'aa gbɛɛ zugur-aa nù, ba yí gu nù ti-bee Jesu de nɛ̀ osoko ha̧ a̧. Zuduk ko wi’ɛi so nɛ́ be Samarii. 17Ɓɛɛ Jesu ak mɔ: «Bó nɛ́ tɛ̀ o wi nɔ'ɔ ɓu’ɛ lɛŋ a̧ sa̧a̧ na nde? Ɓɛɛ oi o bíí mɔɔrɔ-ɗoŋ-naar a̧a̧ bɔɔ déè? 18Ŋma bíí kpɔk mgbara wa pii ɗoŋ mɛ gasi Sɔ̧ na; kànà nɛ́ gɛnɛ'ɛ a̧ pia ɗoŋ ɓɛɛ nde?» 19Ɓɛɛ Jesu tɔ̧ ha̧ wi’ɛi: «Mɛ̀ kúr, mɛ̀ yák, kɔ̧ɔ̧ɗɔɔwen kɔ-mɛ kpasa mɛ.»
Ŋgimbi nɛ̀ Sɔ̧ tɛ ɔ wan
(Zɔk Mt 24.23-28,37-41)
20Nɛ́ mɔ'ɔ nɛ̀ o Fariziɛn aka Jesu'e: «Wan ko Sɔ̧ tɛ hɔ bɔɔ mɛ gese ge?» Ɓɛɛ Jesu kifi nú ha̧ wa: «Bó nɛ́ Wan ko Sɔ̧ tɛ hɔ ha̧ bíí mɛ zɔk na. 21Bíí beka tɔ̧‘e: ‹Zɔ́k a̧ hɛ̧ɛ̧,› kóó: ‹Zɔ́k a̧ mɛ̧‘i,› na, ɓɛɛ ɛ̀nɛ̀ íŋ ndé Wan ko Sɔ̧ a̧a̧ mgbara'nɛ́ kinii.»
22Ɓɛɛ Jesu tɔ̧ ha̧ o ŋgaiwi kɔ‘i woyo: «Ŋgimbi tɛ hɔ n’ɛnɛ tɛ kɔ̧ mɛ zɔk géé wese kó Bem ko bíí kpɔk, ɓɛɛ ɛ́nɛ́ beka zɔk na. 23Wa tɛ tɔ̧ h’ɛ́nɛ́‘e: ‹A̧ a̧a̧ hɛ̧ɛ̧! A̧ a̧a̧ mɛ̧‘i!› Ɓɛɛ k’ɛ́nɛ́ nɛ na, k’ɛ́nɛ́ ma yì si hi̧i̧ na mbɛt. 24Hee mɔ'ɔ nɛ̀ pi̧i̧-kórò pi̧ nɛnɛ nɛ̀ zu-zan gɔm ndaa-zan mɛ ga, nɛ́ hegɔ a'i tɛ zɔk nɛ̀ Bem ko bíí wese pia-ɗoŋ kɔ̧-a̧. 25Ɓɛɛ nɛti ha̧ mɔ‘i mɛ hɔ, a̧ tɛ zɔk kànà bɔnɛ nɛ̀ dɔka-a, ɓɛɛ tugun bíí tɛ ŋgimbi’ɛ tɛ bɛ̧ a̧. 26Mɔ nɛ̀ dee ŋgimbi ko Nɔe tɛ de ŋgimbi ko Bem ko bíí mbɛt.#Ku̧u̧ 6.5-8 27O bíí yaa so nyɔŋ nɛ̀ mɔ, nɔ nɛ̀ dɔ̧ɔ̧, ba nɛ̀ kóò, ba nɛ̀ wíì hɔ wese nɛ̀ Nɔe yee nɛ̀ kombon, ɓɛɛ ndiɓa kórò hɔ gbɛ wa lɛŋ.#Ku̧u̧ 7.6-24 28Dee so hegɔ ŋgimbi ko Lot mbɛt. O bíí yaa so nyɔŋ nɛ̀ mɔ, nɔ nɛ̀ mɔ, hi̧fi̧ nɛ̀ mɔ, gun nɛ̀ mɔ, mbo nɛ̀ tua mbɛt;#Ku̧u̧ 18.20—19.25 29ɓɛɛ wese nɛ̀ Lot gboo saaye Sɔdɔm yak, Sɔ̧ toma wee in baraadu hee kórò ga nɛ̀ yiwese gbɛ wa lɛŋ. 30Kànà nɛ́ kpɔk mɔ‘i a̧ tɛ de wese nɛ̀ Bem ko bíí tɛ usi tɛ.
31«Wese'i, wi nɛ̀ tɛ duk zu tua, ɓɛɛ nɛ̀ a̧a̧ nɛ̀ mɔ kɔ‘i kɔ̧́ tua, a̧ ká‘i zir mɛ kai mɔɔ nɔ‘i na; wi nɛ̀ tɛ duk kpɛɛfɔ mbɛt, a̧ ká‘i pii ɗoŋ na.#Mt 24.17-18; Mk 13.15-16 32Tɛ‘nɛ́ a̧ mbáŋ ɗoŋ kóò ko Lot.#Ku̧u̧ 19.26 33Wi nɛ̀ kii mɛ duk kpasa, tɛ fe, ɓɛɛ wi nɛ̀ tɛ fe tɛ kpasi.#Mt 10.39; 16.25; Mk 8.35; Lk 9.24; Jn 12.25 34Mi tɔ̧ h’ɛ́nɛ́, wese'i, mɛ zɛ, bíí yiitoo tɛ ɔ gɔn gado kpɔk, wa tɛ ba kpɔk, e ɓii-aa duk. 35Okoo yiitoo tɛ ya hɔ̧n nɛ̀ mɔ, wa tɛ ba kpɔk, e ɓii-aa duk. [ 36Wiwii yiitoo tɛ ya kpɛɛfɔ, wa tɛ ba kpɔk, e ɓii-aa duk mbɛt.]» 37Ɓɛɛ o ŋgaiwi kɔ̧-a̧ ak a̧: «Gasa Wan, mɔ‘i tɛ de sɛn déè?» Ɓɛɛ Jesu kifi nú ha̧ wa: «Fara nɛ̀ wɔr saɗi a̧a̧ sɛnɛ, a̧ tama mɔi̧ sɛnɛ.»
Currently Selected:
LUK 17: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.
