O AIA-NÚ 5
5
Aia-nú ha̧ Sɔ̧ wen deako
1GASA WAN, tɛ‘nɛ́'ɛ mbaŋ ɗoŋ mɔ nɛ kpaa yɛ,
ɛ̀nɛ̀ zɔ́k hee mɔ'ɔ nɛ wa da̧ nɛ yɛ ga.
2O gɔni bíí kaia mɔɔ-oi#5.2 mɔɔ-oi: usi nɛ́ nù nɛ̀ Sɔ̧ ha̧a̧ só ha̧ wa. k’ɛɛ lɛŋ,
o bíí n’ɛɛ iŋ na baa tua k’ɛɛ.
3Ɛɛ ya nɛ o be-oi, nɛ̀ dáà bo na;
o nàà k’ɛɛ ya hee o ko-gera ga.
4Ɛɛ gɔn zu yi k’ɛɛ sɛk’ɛɛ nɔa;
gua k’ɛɛ, ɛɛ hi̧fi hi̧fi mbɛt sɛ.
5O wan-nasi-ɛɛ dita zu yɛ, bo nɛ bɔnɛ ɛ̀ɛ̀ zɔk ɓɔna;
hiɗi yɛ bo ɓɔna, ɛɛ kpa gee be ɔma-tɛ na.
6Ɛɛ nyɛi̧ nɛ er yɛ si Egiptɛ
in Asirii wen kpaa be mɔɔ-nyɔŋ.
7O dáà k’ɛɛ nɛ dee so ɗaŋmɔ‘i, wa bo ɓɔna, wa fee lɛŋ;
ɓɛɛ nɛ́ ɛɛ a̧ zɔk bɔnɛ oi ɗaŋmɔ kɔ-wa.
8O bara ɔ nɛ wan zu yɛ;
wi-kai-ɛɛ er wa yinɛ, bo na.
9Mɛ̀ nɛ́ biro ɛ̀ɛ̀ de in o kpɔ̧i̧-gba̧a̧-nin ŋga-gbárà mɛ,
hee ɛɛ tɛ fe fee ga kaɗi, sɛk’ɛɛ kpaa nyɔŋmɔ.
10Gee wɔ nɛ gbɛ yɛ nyɛmna,
ɓɛɛ tɛ yɛ ba nɛ wee fatiti gee.
11Wa ba nɛ o okoo Siɔŋ nɛ ŋgai,
in o be-zɔŋa nù Juda mbɛt.
12Wa ga̧i̧a o be-wan tɛ te;
wen kɔ-wa bó nɛ̀ o sɔkawi na.
13Wa kaia o ŋgaiwi mɛ gbur ta-hɔ̧n-mɔ;
o daŋa ŋgaiwi tika nu ɗɔɔ dita hɛra gua.
14O sɔkawi mɔi̧ tɛ baa keta ɓɔna;
o ŋgaiwi bíí gima ɓɔna mbɛt.
15See yɛ de ɓɔna,
yɔyɛ gbaŋa k’ɛɛ kifa nɛ hi̧a̧-fio.
16Mɔɔ-wan k’ɛɛ tika nu er yɛ;
bɔnɛ a̧a̧ zu yɛ wen ɛɛ dee ɗaŋmɔ!
17-18Kaya Siɔŋ ɗaŋa,
kifi nɛ fara-yar ko o gba-toyo!
Nɛ́ hegɔ s’ɛɛ ɔ zɛɛ,
sa yí-ɛɛ to ɓurɛ.
19Ɓɛɛ k’ɛ́nɛ́ GASA WAN, ɛnɛ nɛ wan ɓɔnsɛnɛ;
wan k’ɛ́nɛ́ duk kpoo nɛ kpoo!
20Ɛnɛ tɛ er yɛ hegɔ yaknɛ sɔ̧i̧i̧ wen ge?
Wen ge tɛ‘nɛ́ tɛ bi ɗoŋ yɛ wese lɛŋ ge?
21Ɛ̀nɛ̀ sá ɛɛ pii nɛ ɗoŋ pii tɛ‘nɛ́,
GASA WAN, ɓɛɛ h’ɛ́ɛ́ pii ɗoŋ.
Ɛ̀nɛ̀ dé ha̧ yuwar mɔ k’ɛɛ mɛ de,
hee mɔ'ɔ nɛ duka so nɛti ga.
22Kóó ɛnɛ siŋa nɛ ɛɛ a taŋ war kpɔk nde?
See'nɛ́ busa tɛ yɛ lɛŋ nde?
Currently Selected:
O AIA-NÚ 5: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.
