JOB 40
40
Job tɛ kifi nú ha̧ Sɔ̧
1GASA WAN saa Job, ɓɛɛ ak a̧:
2Wi nɛ̀ si kafɛ in Wan nɛ a̧a̧ nɛ ŋgayamɔ lɛŋ'ɛ
a̧a̧ nɛ ŋma wen mɛ tɔ̧ zu'm nde?
Wi nɛ̀ kpɛr in Sɔ̧'ɛ a̧ kífí nú!
Kuti kifa-nú ko Job ha̧ Sɔ̧
3Ɓɛɛ Job kifi nú ha̧ GASA WAN:
4Mi só nɛ́ ò mɛ kifi nú h’ɛ́nɛ́ o?
Mi mana nú‘m.
5Mi tɔ̧ɔ̧ so wen nɛti,
ɓɛɛ mi beka tɔ̧ mbe-a ɓɔna;
mi tɔ̧ɔ̧ so wen nɛ dɔka-a,
ɓɛɛ mi nyɛm mɛ tɔ̧ siti na.
Job ta kɔ‘i'e wi nɛ Sɔ̧?
6Ɓɛɛ GASA WAN kifi nú ha̧ Job nɛ ti gba búk-kórò mɛ hee mɔ'ɔ ga:
7Mɛ̀ yór nɛ̀ wiwii;
mi tɛ ak mɛ, ɓɛɛ mɛ̀ kífí nú ha̧‘m.
8Mɛ kɔ̧ɔ̧ mɛ e gɔna kita kɔ‘m hee geemɔ ga,
ha̧ mɛ mɛ ba wen zu'm ha̧ wen kɔ-mɛ yor nde?
9Te er-mɛ a̧a̧ nɛ̀ ŋgai hee kɔ‘m ga nde?
Ger-mɛ mgbimgbi mgbimgbi hee kɔ‘m ga nde?
10Mɛ̀ gáɓí tɛ-mɛ nɛ tu̧u̧-tɛ-mɔ in gásì;
mɛ̀ pí̧ gasamɔ in zɔnamɔ tɛ-mɛ.
11Nyimsea kɔ-mɛ à̧ kúr,
mɛ̀ zɔ́k yí o wi-ŋmaŋ-tɛ ha̧ gba̧a̧ tɛ-wa gbin;
12mɛ̀ mbáɗí o wi-ŋmaŋ-tɛ ha̧ foe ba wa;
mɛ̀ mbɔ́lí o wi-ɗaŋ ɓɔ́n bɛɗɛ.
13Mɛ̀ á wa lɛŋ ɗɔɔ fuunu war kpɔk,
mɛ̀ kár wa nɛ dere.
14Hegɔ mi nɛ tɛ‘m tɛ zɔn mɛ,
wen mɛ gana wa nɛ ŋgai te er-mɛ.
Gba saɗi-ŋgai
15Mɛ̀ zɔ́k ŋgùɓú:#40.15 ŋgùɓú: texte tɔ̧ɔ̧ nɛ́ Béhémoth; ŋmafara nɛ́ ŋma saɗi hee dila-yì ga.
Mi dee a̧ hee mɔ'ɔ n'am dee nɛ mɛ ga;
a̧ nyɔŋ nɛ zɔ̧ hee ndai ga.
16Mɛ̀ zɔ́k ŋgai nɛ a̧a̧ zu goto-a,
in wan nɛ duk kpiikisi-a!
17Dom-aa ɔ hee ŋga te gbatui ga,
ku-a lɛŋ nɛ́ gee ɗaɗi a̧ mbali zu ŋmaa.
18O gba̧a̧-tɛ-a, mɛ̀ zɔ́k kànà nɛ́ ndɛrɛ,
ɓɛɛ o gba̧a̧-ŋgazi-a kànà nɛ́ ŋga boi.
19A̧ duk nɛ̀ gasa tom kɔ‘m;
nɛ́ a̧#40.19 a̧: texte nú hébreu sa̧ na. O ŋma wi-kpai-kalata tɔ̧a: wan-de-a ha̧a̧ gba-paa kɔ‘i ha̧ a̧. Mɔ‘i usi nɛ́ gake nin-a. a̧ ɔ wan zu o dɔka saɗi lɛŋ.
20A̧ nyɔŋ mɔ zu o zu-tɔ̧́,
o saɗi zaŋbɛɛ de saa nɛ katɛ a̧.
21A̧ ɔ nu ti o kɔŋgɔvale;
ɓɛɛ o toro-yí-mbuu kpee zu a̧.
22O kɔŋgɔvale de nɛ gi̧ɔ̧ ha̧ a̧,
ɓɛɛ o gasa te ká̧ zaŋ yì ya zik a̧.#40.21-22 kɔŋgɔvale, toro-yi-mbuu, in gasa te: texte tɔ̧ɔ̧ nɛ́ jujubiers, roseaux in peupliers.
23Kin-yì de kíì pi̧ tɛ-a na;
kóó yí Jurdɛn ŋmai̧a nɔ nú-a,
kɔ̧-a̧ nɛ́ duka-a.
24Nɛ́ o a̧ tɛ ba zu duk nɛ̀ a̧,
ɓɛɛ gboo zɔ̧ɔ̧-a̧a̧ pi̧ nyak sɛnɛ o?#40.24 texte nú hébreu sa̧ na.
Ndiɓa
25Mɛ nyɛma mɛ tui gɛ̧i̧-ŋgando ba nɛ ndiɓa#40.25 ndiɓa: texte tɔ̧ɔ̧ nɛ́ Léviathan. nde?
Mɛ tɛ pi̧ gba-paa leɓ‘a nde?#Gima 74.14; 104.26; Es 27.1
26Kóó ɗɔia zɔ̧ɔ̧-a̧a̧ pi̧ ga̧u̧ sɛnɛ,
kóó toka yaŋgara-a sar nde?
27A̧ tɛ ai nú ha̧ mɛ,
kóó tɔ̧ɔ̧ de ga̧a̧ wen ha̧ mɛ nde?
28A̧ tɛ nɔ tɔk in mɛɛ,
mɛ duk nɛ bara kɔ-mɛ ɓɔnsɛnɛ nde?
29Mɛ tɛ de saa nɛ̀ a̧ hee nɔ̧́í̧ ga nde?
Mɛ tɛ pi̧ nyak naŋ-a ha̧ o bem kɔ-mɛ mɛ be-okoo-a
mɛ de nɛ saa nde?
30O wi-gbɛ-zoro tɛ pɛr gɛnɛ-a nde?
O wi-ɗɔr-mɔ tɛ a̧k a̧ wen ɗɔra-a nde?
31Mɛ tɛ ŋgasi góò tɛ-a,
ɓɛɛ mɛ toka zu-a nɛ̀ sɛ́ɛ̀ nde?
32Mɛ̀ wé géé tama tɛ-a;
tɛ-mɛ beka bi ɗoŋ-aa kà mɛ dé nɛnɛ woyo na.
Currently Selected:
JOB 40: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.
