HEBREU 13
13
Dee mɔ nɛ̀ tɛ́ de tɛ́ Sɔ̧
1 Kɔ̧ɔ̧mɔ ko nya-wi a̧ dúk mgbara'nɛ́ siti. 2Ká tɛ‘nɛ́ bí ɗoŋ kpɛka o gɛnɛ na, wen nɛ́ tɛ̀ dea-a hegɔ a̧ o bíí kpɛka so nɛ̀ o betom mɛ́ yiwese, ɓɛɛ wa iŋ na.#Ku̧u̧ 18.1-8; 19.1-3 3Tɛ‘nɛ́'ɛ mbáŋ ɗoŋ o wi-zɔɓɔ hee ɛ́nɛ́ a̧a̧ kɔ̧ zɔɓɔ in wa ga; tɛ‘nɛ́'ɛ mbáŋ ɗoŋ o wi nɛ̀ bíí usi bɔnɛ ha̧ wa, wen ɛ́nɛ́ nɛ́ bíí hee wa ga mbɛt.
4Baa-ŋmaa ko wíì in kóò a̧ dúk nɛ́ tu̧u̧-tɛ-mɔ mgbara'nɛ́; wíì in kóò a̧ mbó zu ha̧ ŋmaa in o ŋmaa, wen Sɔ̧ tɛ́ gɔn kita zu o wi-de-mɔ nɛ̀ mbɔɗɔnu in o wi-de-dàlà.
5Ká wɔ-mbɔi bá ŋgai k’ɛ́nɛ́ na; ɛ̀nɛ̀ dúk nɛ̀ desee zu mɔ n’ɛ̀nɛ̀ a̧a̧ nɛnɛ, wen Gasa Wan nɛ̀ tɛ-wi tɔ̧a̧‘e:
«Mi beka e mɛ́ duk na,
mi beka siŋ mɛ́ pi̧ nù na mbɛt.»#Wee-ɗoŋ-he 31.6,8; Jos 1.5
6Hegɔ, ɛ́ɛ́ nyɛma mɛ́ e ta tɔ̧ nɛnɛ‘e:
«Gasa Wan a̧a̧ ɗoŋ-am;
ŋma mɔɔ-pi̧-kíì tɛ‘m bó na.
Ge a̧ bíí tɛ́ de nɛ̀‘m ge?»#Gima 118.6
7Tɛ‘nɛ́'ɛ mbáŋ ɗoŋ o wi nɛ̀ duk zu'nɛ́, nɛ̀ tɔ̧ɔ̧ so wen ko Sɔ̧ h’ɛ́nɛ́. Ɛ̀nɛ̀ zɔ́k hee mɔ'ɔ nɛ duka-a kɔ-wa kaɗa nɛnɛ ga, ɓɛɛ ɛ̀nɛ̀ zɔ́k ɗoŋ kɔ̧ɔ̧ɗɔɔwen kɔ-wa. 8Jesu Krist kpai na; a̧ dúk hee mɛ́ mboyɛɛ, koo sɔsɔɔ ga hegɔɔ yaknɛ kpoo nɛ kpoo. 9K’ɛ́nɛ́ é ha̧ o gɔni usamɔ nɛtɛ nɛtɛ mɛ́ de h’ɛ́nɛ́ mɛ́ a̧r na. Dee so gan ha̧ deemɔ nɛ̀ ta-tɛ ko Sɔ̧ mɛ́ ha̧ ŋgai h’ɛ́nɛ́, nɛ̀ bó nɛ́ géé zima-nú gee na, wen zima-nyɔŋmɔ nɛtɛ nɛtɛ‘i gbak o wi zima-a na kóó tikiɗi.
10Ɛ́ɛ́ a̧a̧ nɛ̀ fara-ɗafi-sɔ̧ nɛ̀ o wi-ɗafi-sɔ̧ wan mɛ́ kɔ̧ tua-laa bó nɛ̀ ŋgai mɛ́ kpa nyɔŋmɔ sɛnɛ na. 11Nɛ́ si ɗoŋ ye mɛ̀ a̧ wa dɔ so nɛ̀ kpoo saɗi nɛ̀ gasa wan-ɗafi-sɔ̧ ba tɔk-aa si kɔ̧ fara nɛ̀ ɔ sa̧a̧ nyɛmna wen gɔna zu ɗaŋmɔ.#Lev 16.27 12Mɛ̀ nɛ́ mɔ‘i a̧ dee ha̧ Jesu mɛ́ fe ɗoŋ ye mbɛt, wen ha̧ tɔk tɛ-a mɛ́ de ha̧ war-tɛ dukbíí mɛ́ sa̧. 13Hegɔ, ɛ̀ɛ̀ gbó sitɛ a̧ ɗoŋ ye mɛ, ha̧ ziimɔ nɛ̀ baa so a̧ mɛ́ ba yɛ mbɛt. 14Wen ɛ́ɛ́ bó nɛ̀ mgbák ye k’ɛ́ɛ́ zaŋnu hɛ̧ɛ̧ nɛ̀ tɛ́ duk ɓɔnsɛnɛ na, ɓɛɛ ɛ̀ɛ̀ kíí nɛ́ ye nɛ̀ tɛ́ hɔ nɛ̀ ɗoŋ. 15Ɛ̀ɛ̀ ɗáfí Sɔ̧ tɛ zɔna a̧ ɓɔnsɛnɛ nɛ̀ ɗoŋ Jesu; mɛ̀ nɛ́ wen nɛ̀ tɔ̧‘e, ɛ̀ɛ̀ dúk tɛ̀ dee sedaako wen nin-a. 16Ká tɛ‘nɛ́ bí ɗoŋ dee demɔ, gbak nɛ̀ ŋmaa in o ŋmaa na, wen deemɔ hegɔ, dúk nɛ́ pɛrti ɗafa-sɔ̧ nɛ̀ dee tɛ́ Sɔ̧.
17Ɛ̀nɛ̀ mbó zu ha̧ o wi nɛ̀ duk zu'nɛ́, ɓɛɛ ɛ̀nɛ̀ ɔ́ nù ha̧ wa; wen nɛ́ wa'i a̧ pɛm sɔ̧-tɛ‘nɛ́, in nɛ́ wa a̧ tɛ́ we ɗoŋ mɔ k’ɛ́nɛ́. Hegɔ, ɓɛɛ wa tɛ́ de nɛ̀ desee, nɛ̀ bó nɛ̀ tɛ̀ ku̧i̧amɔ nɛ̀ beka de ŋma demɔ h’ɛ́nɛ́ na, na.
18Ɛ̀nɛ̀ kɔ́fí Sɔ̧ wen yɛ, wen ɛ́ɛ́ taa'e taamɔ k’ɛ́ɛ́ ɔ sa̧a̧, wen n’ɛ̀ɛ́ kɔ̧ɔ̧ mɛ́ de nɛ́ mɔ nɛ̀ duk nɛ̀ de-a tɛ́ ŋgimbi lɛŋ. 19Mi ai nú ɛ̀nɛ̀ kɔ́fí Sɔ̧, wen ha̧ a̧ mɛ́ e war ha̧‘m mɛ́ si ɗoŋ tɛ‘nɛ́ nɛ̀ haya-a.
Sɔŋkur kɔfa-sɔ̧
20Sɔ̧ Wan-ga̧a̧mɔ nɛ̀ dee ha̧ Gasa Wan k’ɛ́ɛ́ Jesu, nɛ̀ dúk nɛ́ gasa wi-dai-sami, mɛ́ kur ŋgɔn tɛ fio wen zu tɔk nɔɔ-tɔk nɛ̀ duk kpoo nɛ kpoo, 21a̧ há̧ ŋgai h’ɛ́nɛ́ mɛ́ de mɔ lɛŋ nɛ̀ ɔ dee wen h’ɛ́nɛ́ mɛ́ de mɔ n'aa kɔ̧a̧, à̧ à̧ dé ha̧ mɔ nɛ̀ dee tɛ a̧ mɛ́ hɔ gba̧a̧ tɛ̀ yɛ nɛ̀ ɗoŋ Jesu Krist. Gasamɔ a̧ dúk nɛ́ ko Jesu Krist hegɔ kpoo nɛ̀ kpoo. Aamɛn!
Sɔŋkur tɔ̧́ɔ̧́-wen in fanamɔ
22Mi ai nú h’ɛ́nɛ́, o nya'm, ɛ̀nɛ̀ zíí wen n'am tɔ̧́ h’ɛ́nɛ́'ɛ! Nɛ́ be wen tikiɗi a̧‘m tom h’ɛ́nɛ́ ɓɛɛ. 23Mi kɔ̧ɔ̧ mɛ́ mbaŋ tɛ‘nɛ́‘e wa gboo nya k’ɛ́ɛ́ Timotee kɔ̧ zɔɓɔ pi̧ nù; kà a̧ nɛ́ tɛ̀ɛ́ nɛ̀ haya-a, ɓɛɛ ɛ́ɛ́ tɛ́ nɛ̀ in ŋmaa mɛ́ zɔk'nɛ́.
24Ɛ̀nɛ̀ fán o wi-duk-zu'nɛ́, in o sa̧a̧-bíí lɛŋ; o be Italii fana'nɛ́ mbɛt.
25Deemɔ nɛ̀ ta-tɛ ko Sɔ̧ a̧ dúk in'nɛ̀ɛ́ lɛŋ!
Currently Selected:
HEBREU 13: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.