KU̧U̧NAŊMƆ 31

Yuu mɔ ko Jakob

1Jakob zia wen nɛ o bem ko Labaŋ tɔ̧a̧‘e ndé: «Jakob kaia mɔ ko dáà k’ɛɛ lɛŋ, a̧ kpaa mbɔi kɔ̧-a̧ lɛŋ nɛ̀ ɗoŋ dáà k’ɛɛ.» 2Jakob zɔka er deemɔ ko Labaŋ kpaia in a̧; bo hee mɔ'ɔ nɛ Labaŋ duka so mɛ de in a̧ nɛti ga na. 3GASA WAN tɔ̧ɔ̧ ha̧ Jakob: «Mɛ̀ sí ɗoŋ tɛ nù ko o dáà kɔ-mɛ, fara nɛ wa koo mɛ sɛnɛ, ɓɛɛ mi tɛ duk in mɛɛ.»

4Jakob toma sa Rachɛl in Lea pii kpɛɛfɔ, fara n'aa duk sɛnɛ in o mɔ-dai kɔ̧-a̧‘i, 5ɓɛɛ a̧ tɔ̧ ha̧ wa: «Mi zɔka er deemɔ ko dáà k’ɛ́nɛ́ kpaia in am, ɓɛɛ Sɔ̧ ko dáà kɔ‘m a̧a̧ kànà in am. 6Ɛ́nɛ́ iŋa nɛ sa̧a̧-a̧ mbɛt, mi dee tom ha̧ dáà k’ɛ́nɛ́ nɛ ŋgai tɛ‘m lɛŋ; 7dáà k’ɛ́nɛ́ ɔra'm, a̧ kpaia mɔɔ-oi-tom kɔ‘m war ɓu, ɓɛɛ Sɔ̧ e yuwar ha̧ a̧ mɛ de ɗaŋmɔ in am na. 8Ŋgimbi lɛŋ n'aa tɔ̧‘e: ‹O mɔ-dai nɛ̀ lop-lop dap a̧a̧ tɛ-wa ɔ dɔka nɛ́ mɔɔ-oi-tom kɔ-mɛ›, ɓɛɛ o mɔ-dai lɛŋ ko kànà nɛ́ o be-a nɛ̀ lop-lop dap; ŋgimbi lɛŋ n'aa tɔ̧‘e: ‹O mɔ-dai nɛ̀ tɛ-wa ɔ zɛrɛŋ-zɛrɛŋ nɛ́ mɔɔ-oi-tom kɔ-mɛ wó›, ɓɛɛ o mɔ-dai lɛŋ ko kànà nɛ́ o be-a nɛ̀ tɛ ɔ zɛrɛŋ-zɛrɛŋ. 9Sɔ̧ kaia o mɔ-dai ko dáà k’ɛ́nɛ́ lɛŋ ha̧‘m.

10«Ŋgimbi nɛ̀ o gbadua daŋ so nɛ ŋmaa, mɔ n'am zɔka tɛ ɔɔ-zu nɛ́ mɔ'ɔ: Nɛ́ o vala gbadua nɛ̀ tɛ-wa ɔ zɛrɛŋ-zɛrɛŋ, o wan nɛ̀ tɛ-wa ɔ lop-lop in o wan nɛ̀ tɛ-wa ɔ laɓo-laɓo a̧ daŋ nana-a. 11Tɛ ɔɔ-zu'i, betom ko Sɔ̧ saa'm: ‹Jakob!› Ɓɛɛ mi kɔ̧ sara: ‹Mi nɛ mɔ'ɔ!› 12Ɓɛɛ a̧ tɔ̧: ‹Mɛ̀ bá yí-mɛ nɛ̀ ŋgɔn a̧ mɛ zɔk o gbadua lɛŋ nɛ daŋ nana-a; tɛ-wa a̧a̧ nɛ gɔna dap zɛrɛŋ-zɛrɛŋ, lop-lop in laɓo-laɓo, wen mi zɔka mɔ lɛŋ nɛ Labaŋ dee in mɛɛ. 13Mi nɛ Sɔ̧ nɛ mɛ baa ta e ŋgɔn ká mɛ́ tɛn nɔ̧́ a zu-a kan nɛ mɔ ha̧‘m sɛn Bɛtɛl. Kinii, mɛ̀ kúr mɛ̀ yák fara’ɛ, ɓɛɛ mɛ̀ sí ɗoŋ tɛ nù ko o nam kɔ-mɛ.› »#Ku̧u̧ 28.18-22

14Rachɛl in Lea kifa nú ha̧ a̧: «Ŋma mɔɔ-oi n’ɛɛ tɛ ba er dáà k’ɛɛ so sɛnɛ? 15Bó nɛ́ a̧ zɔka ɛɛ hee o gɛnɛ ga, wen n'aa ɗɔra ɛɛ nyɔŋ nɛ mbɔi-ɗoŋ yɛ kaɗi na nde? 16Mbɔi lɛŋ nɛ Sɔ̧ kaia yinɛ er dáà k’ɛɛ, nɛ́ k’ɛɛ in o bem k’ɛɛ. Kinii, mɛ̀ dé kɔ-mɛ mɔ lɛŋ nɛ Sɔ̧ tɔ̧ɔ̧ ha̧ mɛ.»

17Jakob kura, ɓɛɛ kai o bem in o kóò kɔ‘i a zu o ŋgeloba. 18A̧ kaia o mɔ-dai kɔ̧-a̧ gu nɛ o mɔ lɛŋ n'aa kpaa so ŋgimbi n'aa duka nɛnɛ sɛn bɔkɔ-nú Aram, ɓɛɛ a̧ pii ɗoŋ pii tɛ ko dáà kɔ̧-a̧ Izak, nú Kanaŋ. 19Labaŋ yaka so mɛ́ nɛ̀ɛ́ gɔn buma-tɛ o sami kɔ‘i, ɓɛɛ Rachɛl zu̧ o be mboo sɔ̧ ko dáà kɔ‘i. 20Jakob ɔra Labaŋ, be Aram, wen n'aa kura yak, a̧ mbaŋ tɛ Labaŋ na. 21Jakob yuu mɔ yak nɛ oi mɔ kɔ‘i lɛŋ; a̧ kuu nana-yì Efrat, ɓɛɛ a̧ nɛ si war ká̧ naŋ o kaya Galad.

Labaŋ ndaka ɗoŋ Jakob

22Jakob yuu mɔ yak ɔ zɛ taar, ɓɛɛ wa ba wen-aa tɔ̧ ha̧ Labaŋ, 23ɓɛɛ Labaŋ kai o nya-wi ndak nɛ pata Jakob tɛ zɛ mɔɔrɔ-ɗoŋ-yiitoo, ɓɛɛ wa nɛ́ɛ̀ kpa a̧ sɛn mgbara kaya Galad. 24Sɛn tɛ ɔɔ-zu, Sɔ̧ tɔ̧ɔ̧ ha̧ Labaŋ, be Aram mɛ zɛ‘e: «Ká mɛ́ tɔ̧ ŋma wen a zu Jakob na; kóó nɛ de-a, kóó nɛ ɗaŋ-a mbɛt, ká mɛ́ tɔ̧ na.» 25Labaŋ nɛɛ kpa Jakob nɛ ɗafa tua-laa kɔ‘i e sɛn mgbara kaya, ɓɛɛ Labaŋ in o nya-wi ɗafi tua-laa kɔ‘i e mgbara kaya Galad mbɛt.

26Labaŋ tɔ̧ɔ̧ ha̧ Jakob: «Nɛ́ ge a̧ mɛ dee in am nɛ mɛ ɔra'm’ɛ ge? Mɛ kaia o bem kɔ‘m hee bara-biro ga wen ge? 27Wen ge mɛ yaka nɛ̀ hu̧sa̧-a̧, ɓɛɛ mɛ mbaŋ tɛ‘m na, ɔr nɛ‘m mbɛt ge? Mi tɛ̀ɛ́ war so mɛ nɛ̀ desee, nɛ̀ gima, nɛ̀ kuŋge in nɛ̀ koloŋ mbɛt. 28Mɛ́ é ha̧‘m mɛ dui nú o be-koo-am in o bem kɔ‘m na mbɛt! Mɛ dee mɔ in am hee bíí nɛ̀ bó nɛ̀ zu ga na! 29Mi a̧a̧ nɛ ŋgai nyɛmna wen dee ɗaŋmɔ in mɛɛ, ɓɛɛ mɛ zɛ'ɛ, Sɔ̧ ko o dáà kɔ-mɛ hɔɔ zu ha̧‘m ɓɛɛ tɔ̧: ‹Ká mɛ́ tɔ̧ ŋma wen a zu Jakob na, kóó nɛ de-a, kóó nɛ ɗaŋ-a mbɛt.› 30Kinii mɛ kura yak kaɗi, wen mɛ duka so ai nɛ nú-mɛ wen fara oi dáà kɔ-mɛ; wen ge sa mɛ zu̧u̧ bɔɔ o sɔ̧ kɔ‘m ge?»

31Jakob kifa nú ha̧ Labaŋ, ɓɛɛ tɔ̧: «Mi dee nɛ kíì wen mi taa so, ŋmafara ɛ́nɛ́ tɛ̀ɛ́ kai o boko-bem k’ɛ́nɛ́ yinɛ sɛn er-am; 32ɓɛɛ wi n’ɛnɛ tɛ́ kpa o sɔ̧ k’ɛ́nɛ́ er-a nyɛma mɛ fe! Ɛ̀nɛ̀ kíí mɔ nɛ duk nɛ mɔ k’ɛ́nɛ́ sɛn yí o nya k’ɛɛ hɛ̧ɛ̧ ŋgaɓo. Ɛ́nɛ́ nɛ́ kpaa ŋma mɔ k’ɛ́nɛ́ mgbara mɔ kɔ‘m, ɛ̀nɛ̀ bá yinɛ.» Ɓɛɛ Jakob iŋ kɔ‘i'e, Rachɛl zu̧u̧ so o mɔɔ nɔ‘i na.

33Labaŋ gɔma ye kɔ̧ tua-laa ko Jakob wen kia mɔɔ nɔ‘i hɔ tɛ ko Lea, gu nɛ kɔ̧ tua-laa ko o kó-de-tom yiitoo mbɛt, ɓɛɛ a̧ kpa mɔ na. A̧ gboo kɔ̧ tua-laa ko Lea, ɓɛɛ a̧ ye kɔ̧ tua-laa ko Rachɛl. 34Rachɛl kaia so mɔɔ nɔ‘i hu̧si sɛn ɗɔɔ kirki-ŋgeloba, ɓɛɛ duk sɛn zu wa. Labaŋ kia mɔ sɛn kɔ̧ tua takaɗi, a̧ kpa mɔ na. 35Ɓɛɛ Rachɛl tɔ̧ ha̧ dáà kɔ‘i: «Mi nyɛm mɛ kur na, ɓɛɛ ká nyaa kpa ɗaŋsee zu'm na mbɛt, wen mi zɔk nɛ zɛ.» Ɓɛɛ a̧ kpa o sɔ̧ kɔ̧-a̧‘i na.

36Jakob kpaa ɗaŋsee nyɛmna, a̧ kpɛra in Labaŋ, ɓɛɛ a̧ tɔ̧: «Nɛ́ ge ɗaŋmɔ ge n'am dea ge? Yɔɔ-kaya kɔ‘m nɛ́ ge s’ɛnɛ ndaka pata'm tɛnɛ nɛ ɗaŋsee ge? 37Ɛ́nɛ́ kia mɔ mgbara tui kɔ‘m lɛŋ, ɛ́nɛ́ kpaa ŋma mɔ k’ɛ́nɛ́? Ɛ́nɛ́ nɛ́ kpaa n’ɛ̀nɛ̀ bá pí̧ zan ti o nya'm, in o nya'nɛ́ ha̧ wa gɔn kita mgbara yɛ ŋgaɓo! 38Dee nɛ pɛ ɓu-yiitoo n'am duka in'nɛ̀ɛ́; o zaŋ sami in o zaŋ gbadua mbɛt hɔ na. Mi nyɔŋ ŋma vala sami k’ɛ́nɛ́ kpɔk na. 39Ŋma wese n'am baa wɔr saɗi nɛ boko-nam gbɛɛ tɛnɛ h’ɛ́nɛ́ bo na. Nɛ́ mi a̧‘m duka so yoɓi mɔɔ nɔ‘i lɛŋ. Mɔ nɛ wa zu̧u̧ so er-am mɛ wese in mɛ zɛ mbɛt, ɛ́nɛ́ aka so ha̧‘m mɛ yoɓi. 40Gbɛ̧ŋmɔ tɛ̀ɛ́ gbɛ so'm mɛ́ wese, gɛ̧ɛ̧ tɛ̀ɛ́ gbɛ so'm mɛ́ zɛ, ɓɛɛ ya hɔ so yí‘m na. 41Dee nɛ pɛ ɓu-yiitoo n'am duk nɛnɛ kɔ̧ tua k’ɛ́nɛ́, mi dee kɔfɛ pɛ ɓu-zua-naar wen o bem k’ɛ́nɛ́ yiitoo in pɛ mɔɔrɔ-ɗoŋ-kpɔk wen o mɔ-dai k’ɛ́nɛ́. Ɛ́nɛ́ kaia o mɔɔ nɔ‘i nɛ duk nɛ mɔɔ-oi-tom kɔ‘m war ɓu. 42Kà bó so nɛ́ Sɔ̧ ko dáà kɔ‘m, Sɔ̧ ko Abraham in wi nɛ Izak yu à̧ dúk so in am na, ɛ́nɛ́ tɛ̀ɛ́ e so ha̧‘m mɛ yak nɛ gee er-am; ɓɛɛ Sɔ̧ zɔka fɛŋa'm n’ɛnɛ fɛŋa in dɔka tom n'am dea, ɓɛɛ mɛ zɛ'ɛ, a̧ yee ɗoŋ-am.»

Nɔɔ-tɔk ko Jakob in Labaŋ

43Labaŋ kifa nú ha̧ Jakob, a̧ tɔ̧a̧: «O boko-bem nɔ'ɔ nɛ́ o bem kɔ‘m, o bem nɔ'ɔ nɛ́ o be-koo-am, o mɔ-dai nɔ'ɔ nɛ́ o mɔ-dai kɔ‘m, mɔɔ nɔ'ɔ nɛ̀ mɛ zɔk’ɛ lɛŋ nɛ́ mɔ kɔ‘m. Nɛ́ ge a̧‘m tɛ de ha̧ o bem kɔ‘m ge? Nɛ́ ge a̧‘m tɛ de ha̧ wa sɔsɔɔ in ha̧ o bem nɛ wa koo ge? 44Mɛ̀ kúr, ɛ̀ɛ̀ nɔ́ tɔk in mɛɛ, ɓɛɛ ɛ̀ɛ̀ dé mɔɔ-sedaako e mgbara yɛ.»

45Nɛ́ mɔ'ɔ nɛ̀ Jakob baa ŋma gasa ta e ŋgɔn. 46A̧ tɔ̧ɔ̧ ha̧ o nya-a̧: «Ɛ̀ɛ̀ mɔ́í̧ o ta!» Ɓɛɛ wa mɔi̧ o ta a zu ŋmaa, ɓɛɛ wa nyɔŋ mɔ sɛn zu-a. 47Labaŋ aa nin fara'i Yegar-Sahaduta, ɓɛɛ Jakob a kɔ‘i'e Galɛd.#31.47 Yegar-Sahaduta in Galɛd: nɛ́ wen nɛ̀ tɔ̧́: mɔi̧a-ta-sedaako. 48Labaŋ tɔ̧a̧: «Mɔi̧a-ta’ɛ a̧ duk nɛ́ mɔɔ-sedaako mgbara'm in mɛɛ ku̧u̧naŋ-a sɔsɔɔ'ɛ.» Nɛ́ hegɔ wa saa nin fara'i Galɛd. 49Wa saa nin fara'i mbɛt'e Mispa, wen nɛ tɔ̧ «Fara-pɛm-mɔ», wen Labaŋ tɔ̧a̧‘e nde: «GASA WAN a̧ pɛm mɛ in am ŋgimbi n’ɛɛ beka zɔk yí ŋmaa ɓɔna. 50Kà mɛ a̧ usa bɔnɛ ha̧ o bem kɔ‘m, kà mɛ a̧ baa o mbe okoo, kóó ŋma bíí bo oi-aa na mbɛt, Sɔ̧ kpɔk nɛ́ wi-sedaako mgbara mɛ in am.» 51Ɓɛɛ Labaŋ tɔ̧ ha̧ Jakob woyo: «Zɔk o ta nɔ'ɔ n'am kaia a hɛ̧ɛ̧ nɛ́ mɔɔ-sedaako mgbara'm in mɛɛ, in ta n’ɛɛ baa e ŋgɔn’ɛ. 52O ta nɔ'ɔ nɛ́ mɔɔ-sedaako, ta nɛ̀ yor ŋgɔn’ɛ nɛ́ mɔɔ-sedaako mbɛt. Mi kana mɔ‘e mi beka yak zu o ta nɔ'ɔ mɛ nɛ sitɛ mɛ na; mɛ̀ kán mɔ mbɛt'e, wi beka yak zu o ta nɔ'ɔ mɛ tɛ pii tɛ‘m in zu ta nɛ yor ŋgɔn’ɛ na, wen ká fom ba yɛ. 53Sɔ̧ ko Abraham in Sɔ̧ ko Nahɔr a̧ gɔn kita mgbara yɛ!» Ɓɛɛ Jakob kan mɔ nɛ nin wi nɛ Izak dáà kɔ̧-a̧ yu. 54Jakob ɗafa Sɔ̧ sɛn mgbara kaya, ɓɛɛ a̧ sa o nya-a̧ mɛ tɛɛ nyɔŋ mɔ. Wa nyɔŋa mɔ, ɓɛɛ wa ɔ hi̧i̧.

Currently Selected:

KU̧U̧NAŊMƆ 31: GB11DC

Highlight

Copy