KU̧U̧NAŊMƆ 17

Gɔna mbii nɛ̀ mɔɔ-sedaako nɔɔ-tɔk

1Ŋgimbi nɛ Abram kpaa nɛ pɛ 99, GASA WAN usa tɛ ha̧ a̧, ɓɛɛ tɔ̧: «Mi nɛ Sɔ̧ nɛ a̧a̧ nɛ ŋgayamɔ lɛŋ; mɛ̀ nɛ́ nɔ̀, dé nɛ̀ mɔ nɛ yuwar-a ti'm. 2Mi tɛ nɔ tɔk in mɛɛ, mi tɛ de ha̧ bezaŋ-mɛ mɛ dɔk.» 3Abram tika nù ba yí gu nù, ɓɛɛ Sɔ̧ tɔ̧ wen in a̧: 4«Nɔɔ-tɔk kɔ‘m in mɛɛ nɛ́ mɔ'ɔ kinii; mɛ tɛ duk nɛ dáà ko o dɔka dukbíí. 5Hegɔ, wa beka sa mɛ Abram ɓɔna, wa tɛ sa mɛ‘e, ‹Abraham›, wen mɛ nɛ dáà ko dɔka dukbíí.#Rɔm 4.17 6Mi tɛ de ha̧ o bezaŋ-mɛ mɛ dɔk. Mi tɛ de ha̧ mɛ mɛ ko o dɔka dukbíí, ɓɛɛ o wannu tɛ gbo nɛ̀ tɛ-mɛ.

7«Mi tɛ nɔ tɔk in mɛɛ in o bezaŋ-mɛ nɛ tɛ́ tɛ nɛ ɗoŋ. Nɔɔ-tɔk‘i tɛ duk kpoo nɛ kpoo, ɓɛɛ mi tɛ duk nɛ́ Sɔ̧ kɔ-mɛ in Sɔ̧ ko o bezaŋ-mɛ nɛ tɛ́ tɛ nɛ ɗoŋ.#Lk 1.55 8Mi tɛ ha̧ nù nɛ mɛ duk sɛnɛ hee gɛnɛ ga ha̧ mɛ in o bezaŋ-mɛ nɛ tɛ́ tɛ nɛ ɗoŋ; nú Kanaŋ lɛŋ tɛ duk nɛ kɔ-wa, ɓɛɛ mi tɛ duk nɛ Sɔ̧ kɔ-wa.»#Tom 7.5 9Sɔ̧ tɔ̧ɔ̧ ha̧ Abraham: «Mɛ tɛ kasi nɔɔ-tɔk kɔ‘m, mɛ in o bezaŋ-mɛ nɛ tɛ́ tɛ nɛ ɗoŋ. 10Ɛ̧ɛ̧ hɛ̧ɛ̧ nɛ nɔɔ-tɔk kɔ‘m in'nɛ̀ɛ́ n’ɛnɛ tɛ kasi in o bezaŋ‘nɛ́ mɛ ɗoŋ: ɛnɛ tɛ gɔn bɔr o be-wiwii k’ɛ́nɛ́ lɛŋ.#Tom 7.8; Rɔm 4.11 11Ɛ́nɛ́ tɛ́ gɔn bɔr'nɛ́ ha̧ mɔ‘i mɛ duk nɛ mɔɔ-sedaako mgbara'm in'nɛ̀ɛ́. 12O be-wiwii k’ɛ́nɛ́ nɛ kpaa zɛ mɔɔrɔ-ɗoŋ-taar tɛ gɔn bɔr nyɛm nɛ ɗoŋ bezaŋ‘nɛ́ in o bara nɛ‘i koo kɔ̧ tua k’ɛ́nɛ́, kóó nɛ‘i hi̧fa nɛ ŋma gɔni nù, nɛ wa bo nɛ́ bezaŋ‘nɛ́ na. 13Wa tɛ gɔn bɔr o bara nɛ wa koo sɛn nutua k’ɛ́nɛ́, kóó wan nɛ‘i hi̧fa hi̧fi nɛ sede mbɛt. Nɔɔ-tɔk kɔ‘m nɛ beka kaɗi na tɛ duk tɛ‘nɛ́ kpoo nɛ kpoo. 14Wi tɛ fo wi-mbii yinɛ mgbara o nam kɔ̧-a̧ wen n'aa gbina nɔɔ-tɔk kɔ‘m.»

15Sɔ̧ tɔ̧ɔ̧ ha̧ Abraham: «Ká mɛ́ sa nin kóò kɔ-mɛ, Sarai ɓɔna; nin-a tɛ duk nɛ Sara. 16Mi tɛ tok de yoŋgo zu a̧, mi tɛ ha̧ be-wiwii ha̧ mɛ nɛ̀ ɗoŋ-aa. Mi tɛ tok de yoŋgo zu a̧, ɓɛɛ a̧ koo o dukbíí nɛ dɔka-a. O wannu ko o dukbíí tɛ gbo nɛ̀ tɛ-a.»

17Abraham tika nù, ba yi gu nù; a̧ mama mami, ɓɛɛ a̧ tɔ̧ nɛ kɔ̧ see-aa'e: «Bíí nɛ̀ a̧a̧ nɛ pɛ gɔmŋmaa tɛ ko bem nde? In Sara nɛ̀ a̧a̧ nɛ pɛ ɓu-mɔɔrɔ-ɗoŋ-naar nyɛma mɛ ko nde?» 18Abraham tɔ̧ɔ̧ ha̧ Sɔ̧: «Ho! Ismaɛl a̧ kpa de sɔnti sɛn ti'nɛ́ na nde?»

19Sɔ̧ tɔ̧a̧: «Weyaa! Kóò kɔ-mɛ Sara tɛ ko be-wiwii ha̧ mɛ, ɓɛɛ mɛ tɛ sa nin-a Izak. Mi tɛ nɔ tɔk nɛ tɛ duk kpoo nɛ kpoo in a̧ in o bezaŋ-aa nɛ tɛ́ tɛ nɛ ɗoŋ. 20Ko Ismaɛl, mi zia kɔfamɔ kɔ-mɛ; mi tɛ tok de yoŋgo zu a̧. Mi tɛ de ha̧ a̧ mɛ ko in ha̧ a̧ mɛ dɔk. A̧ tɛ ko o be-wan ɓu-zua-yiitoo, mi tɛ de ha̧ gasa dukbíí mɛ gbo nɛ tɛ-a, 21ɓɛɛ mi tɛ nɔ tɔk in Izak nɛ Sara tɛ ko tɛ ŋgimbi hee mɔ'ɔ ga tɛ mbe pɛ.» 22Ɗoŋ nɛ Sɔ̧ kaɗa tɔ̧ɔ̧ wen in Abraham kaɗi, a̧ ee a̧ duk.

23Abraham mgbɔɔ Ismaɛl bem kɔ‘i, o bara lɛŋ nɛ wa koo kɔ̧ tua kɔ̧-a̧ in o wan nɛ wa hi̧fa hi̧fi, o wiwii lɛŋ sɛn kɔ̧ tua kɔ̧-a̧; a̧ gɔna bɔr-wa kpɔk kale wese nɛ Sɔ̧ tɔ̧ɔ̧ nɛ wen in a̧. 24-25Abraham a̧a̧ so nɛ pɛ ɓu-mɔɔrɔ-ɗoŋ-naar-zua-mɔɔrɔ-ɗoŋ-naar, in bem kɔ̧-a̧ Ismaɛl pɛ ɓu-zua-taar ŋgimbi nɛ wa gɔna so nɛ bɔr-wa. 26Kpɔk wese'i, wa gɔna bɔr Abraham in ko bem kɔ̧-a̧ Ismaɛl. 27O bíí kɔ̧ tua kɔ̧-a̧ lɛŋ, o bara nɛ wa koo kɔ̧ tua kɔ̧-a̧ in o wan nɛ wa hi̧fa hi̧fi nɛ sede sɛn gɔni fara gɔna bɔr in a̧ mbɛt.

Currently Selected:

KU̧U̧NAŊMƆ 17: GB11DC

Highlight

Copy