ƐSDRAS 1

Sirus ee yuwar ha̧ o be Juif mɛ pii ɗoŋ

1Sirus ɔɔ so nɛ wan Pɛrsɛ, ɓɛɛ nɛ mɔ'ɔ nɛ Sɔ̧ ha̧a̧ taamɔ ha̧ a̧ mɛ yɔr wen’ɛ tɛ kuti pɛ ɔɔ-wan kɔ̧-a̧‘i ha̧ o bíí nù lɛŋ mɛ tɔr, ha̧ wen nɛ GASA WAN tɔ̧ɔ̧ so nɛ nú wi-tɔ̧-wen oi nú Sɔ̧ Jeremii mɛ hɔ gba̧a̧.#Jer 25.11; 29.10 2Wen ko Sirus wannu Pɛrsɛ nɛ mɔ'ɔ: «GASA WAN Sɔ̧ nɛ a̧a̧ yiwese ha̧a̧ mɔɔ-wan zu nù lɛŋ ha̧‘m. A̧ tɔ̧ɔ̧ a̧‘m mbó Tua ha'i sɛn Jerusalɛm, nù Juda.#Es 44.28 3GASA WAN a̧ dúk in'nɛ̀ɛ́ lɛŋ nɛ ya nɛ́ dukbíí kɔ̧-a̧. Ɛ̀nɛ̀ dáŋ si Jerusalɛm nù Juda, ɓɛɛ ɛ̀nɛ̀ mbó Tua ko GASA WAN Sɔ̧ ko Israɛl, Sɔ̧ nɛ duk sɛn Jerusalɛm. 4Fara nɛ oi dukbíí ko GASA WAN a̧a̧ sɛnɛ lɛŋ, o bíí fara nɔ‘i a̧ há̧ kànà bu-mbɔi, lɔr, o de mɔ, o mɔ-dai, in ha̧a̧mɔ nɛ ta-tɛ wen Tua ko Sɔ̧ nɛ a̧a̧ Jerusalɛm.»

5O gasawi nutua ko Juda in o gasawi nù ko Bɛnjamin gú nɛ̀ o wi-ɗafi-sɔ̧ ká bá nɛ̀ o be Levii, ge bíí ge ndé nɛ Sɔ̧ ha̧a̧ taamɔ ha̧ a̧ kura yak mɛ nɛ̀ɛ́ mbo Tua ko GASA WAN nɛ duk sɛn Jerusalɛm. 6O bíí nɛ a̧a̧ katɛ wa lɛŋ gbaka wa nɛ o mɔ nɛ‘i dee nɛ bu-mbɔi, lɔr, o demɔ, o mɔ-dai, ká bá nɛ̀ o mɔ nɛ gɛnɛ-a ɔ ŋgaya; wi tɔr o mɔ nɛ wa ha̧a̧ ha̧ wa nɛ ta-tɛ e zu-a na.

7Wannu Sirus kaia o nyɛk Tua ko GASA WAN nɛ Nabukɔdɔnɔsɔr kaia so yaknɛ Jerusalɛm a kɔ̧ tua ko o sɔ̧ kɔ‘i gbonɛ. 8Sirus wannu Pɛrsɛ ha̧a̧ nú ha̧ Mitredat wi-zɔk-mbɔi mɛ kai wa, ɓɛɛ Mitredat tɔ̧ ha̧ Sɛsbasar be-wan Juda mɛ tɔr tɔra-a. 9Mɔ nɛ wa tɔra nɛ mɔ'ɔ: nyɛk nɛ‘i dee nɛ lɔr ɓu-taar; nyɛk nɛ‘i dee nɛ bu-mbɔi booro; paa ɓu-yiitoo-zua-mɔɔrɔ-ɗoŋ-naar; 10mɔɔ-nɔ-mɔ nɛ‘i dee nɛ lɔr ɓu-taar; mɔɔ-nɔ-mɔ nɛ‘i dee nɛ bu-mbɔi gɔmŋmaa-naar-nɛ-ɓu; in o ŋma géé nyɛk booro.

11O mɔ nɛ‘i dee nɛ lɔr in bu-mbɔi nɔ‘i lɛŋ nɛ́ booro-mɔɔrɔ-nɛ-gɔmŋmaa-naar. Sɛsbasar kaia o nyɛk nɔ‘i lɛŋ sinɛ ŋgimbi nɛ o bara-biro daŋa nɛnɛ nɛ Babilɔŋ si Jerusalɛm.

Currently Selected:

ƐSDRAS 1: GB11DC

Highlight

Copy