2 KALATA NYƐRƐ 4
4
Mɔ nɛ̀ a̧a̧ kɔ̧ Tua ko Sɔ̧
(Zɔk 1 Wan 7.23-51)
1Salomɔŋ dee fara-ɗafi-sɔ̧ nɛ̀ ndɛrɛ, zi̧a̧-a̧ in pɛsa-a nɛ́ mɛtrɛ ɓu, kusa-a nɛ́ mɛtrɛ mɔɔrɔ.#Gboa-a 27.1-2 2A̧ nɔi̧a boi de nɛ̀ gba-kpáná-yì nɛ̀ duk nɛ̀ zika-a; pɛsa-a nɛ́ mɛtrɛ mɔɔrɔ, ɗuka-a nɛ́ mɛtrɛ yiitoo nɛ reeta; zika nú-a kpa ŋmaa nɛ́ mɛtrɛ ɓu-zua-mɔɔrɔ. 3A̧ dee dap ndai ká̧ zaŋ gba-kpánà‘i kpa nú ŋmaa, ndai ɓu tɛ reeta mɛtrɛ. A̧ nɔi̧a o ndai nɔ‘i katɛ ŋmaa yiitoo yiitoo kpɔk in gba-kpánà‘i. 4Gba-kpánà‘i duka zu ndai ɓu-zua-yiitoo: taar zɔk nɛ́ mɔ si ká̧-zan-mɛ́-ŋgɔn, taar si yee-wese, taar si ká̧-zan-mɛ́-ɗɔɔ, ɓɛɛ taar si daŋa-wese. Goto-ndai lɛŋ zɔk nɛ́ ŋmaa. 5Ndota gba-kpánà‘i hee bɔ̧i̧a̧ wii-see er-wi ga, ɓɛɛ a̧ ɗafi nú zer-aa hee yèé-nɔ-mɔ nɛ̀ hɔɔ ŋmaa in gba-dɛŋ ga. Kpánà‘i nyɛma mɛ ba litrɛ yì booro-gɔmŋmaa-nɛ-booro-ɓu-yiitoo. 6A̧ dee o gasa kpánà ɓu: mɔɔrɔ nɛ̀ war wiiko, mɔɔrɔ nɛ̀ war gale wen fɔra mɔ. Mɛ̀ nɛ́ sɛn hi̧i̧ a̧ wa fɔr o mɔɔ-dɔ-kpoo-sɔ̧ sɛnɛ, ɓɛɛ o wi-ɗafi-sɔ̧ fɔr kɔ‘i tɛ̀ ɗɔɔ gba-kpáná-ndɛrɛ.#Gboa-a 30.17-21
7A̧ dee o dek-e-wee ɓu nɛ̀ lɔr nɛ̀ yuwar-a, ɓɛɛ a̧ kai a kɔ̧ Tua ko Sɔ̧: mɔɔrɔ nɛ̀ war wiiko, mɔɔrɔ nɛ̀ war gale.#Gboa-a 25.31-40 8A̧ dee fara-a-brɛt ɓu kai a kɔ̧ Tua ko Sɔ̧; a̧ ee mɔɔrɔ nɛ̀ war wiiko, mɔɔrɔ nɛ̀ war gale. A̧ dee be ɗele-gaŋmɔ gɔmŋmaa nɛ̀ lɔr.#Gboa-a 25.23-30
9A̧ dee bee-gara ko o wi-ɗafi-sɔ̧ in gasa bee-gara nɛ̀ o kpar-nú-a a̧a̧ sɛnɛ, ɓɛɛ a̧ yɔk ɗoŋ-wa nɛ̀ ndɛrɛ. 10Ɓɛɛ nɛ̀ ko gba-kpánà, a̧ baa e mgbii Tua nɛ̀ war wiiko, nɛ̀ ká̧-zan-mɛ́-ɗɔɔ si daŋa-wese.
11Hiram dee o gasa kpánà, o mɔɔ-ɗu-mɔ in o yèé-gaŋmɔ. A̧ kaɗa tom n'aa tɛɛ mɛ de ha̧ wannu Salomɔŋ kɔ̧ Tua ko Sɔ̧: 12mbiŋ yiitoo, o kirkiti gan-ndui yiitoo nɛ̀ ya zu o mbiŋ, o fanamɔ yiitoo wen kpee zu o gan-ndui nɔ‘i nɛ̀ ya zu o mbiŋ; 13o waya kóɓò gɔmŋmaa-naar, nɛka-a yiitoo yiitoo wen fana-mɔ kpɔk kpɔk nɛ̀ kpee zu o gan-ndui nɛ̀ ya zu o mbiŋ. 14A̧ dee o mɔɔ-tui-kpánà in o gasa kpánà zu wa; 15gba-kpánà kpɔk nɛ̀ o ndai ɓu-zua-yiitoo ya ɗɔɔ-aa, 16o gasa kpánà, o mɔɔ-ɗu-mɔ, o mɔɔ-fo-kpoo in o nyɛk lɛŋ. Hiram-Abi dee mɔɔ nɔ‘i nɛ̀ yɔka ndɛrɛ ha̧ wannu Salomɔŋ, wen dea-a nɛ̀ tom kɔ̧ Tua ko GASA WAN.
17Mɛ̀ nɛ́ sɛn ká̧ Jurdɛn, mgbara Sukot in Sɛraedata a̧ wannu nɔi̧a o boi-de-tom nɔ‘i lɛŋ sɛnɛ ɗɔɔ gìì. 18Salomɔŋ dee o mɔɔ nɔ‘i lɛŋ nɛ̀ dɔka-a, wi nyɛm mɛ tɔr kilo ndɛrɛ nɛ̀ yaka na.
19Salomɔŋ dee mɔ lɛŋ nɛ̀ ya kɔ̧ Tua ko Sɔ̧: fara-ɗafi-sɔ̧ nɛ‘i dee nɛ̀ lɔr, o fara-a-brɛt nɛ̀‘i ha̧ ha̧ Sɔ̧, 20dek-e-wee in o lamba wen nyɛka-a ti gɔna bɛr-tua nɛ̀ ɔ sa̧a̧ nyɛmna nyɛm nɛ̀ ɗoŋ heembea; mɔɔ nɔ‘i lɛŋ a̧ dee nɛ̀ sa̧a̧ lɔr. 21O do-te, o lamba, o be boi-ɓam-mɔ, lɛŋ nɛ̀ sa̧a̧ lɔr; 22o paa, o yèé-gaŋmɔ, o be yèè, o be tasi-dɔ-fuu-nyama, a̧ dee wa lɛŋ nɛ̀ sa̧a̧ lɔr; o kpar-nú Tua, o wan mɛ bɛr sa̧a̧-fara nɛ̀ ɔ sa̧a̧ nyɛmna in mɛ gasa bɛr-aa mbɛt, lɛŋ kànà nɛ́ sa̧a̧ lɔr.
Currently Selected:
2 KALATA NYƐRƐ 4: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.
