2 KALATA NYƐRƐ 33
33
Manase wannu Juda
(Zɔk 2 Wan 21.1-18)
1Manase a̧a̧ so nɛ̀ pɛ ɓu-zua-yiitoo ŋgimbi n'aa ɔɔ nɛ̀ wan, ɓɛɛ a̧ ɔ wan sɛn Jerusalɛm pɛ ɓu-mɔɔrɔ-zua-mɔɔrɔ. 2A̧ dee mɔ nɛ̀ ɗaŋ-a sɛn yí GASA WAN tɛ ndaka ɗoŋ ndiŋ ɗaŋmɔ ko o ŋma zuduk bíí nɛ̀ GASA WAN ndaka so yinɛ ti o be Israɛl.#Jer 15.4 3A̧ ɗafa o kusa-fara nɛ dáà kɔ̧-a̧ Ezɛkias ɗaŋa so yinɛ. A̧ mboo o fara-ɗafi-sɔ̧ ha̧ o sɔ̧ Bal, a̧ sɛka o te nɛ̀‘i gasi gasi, ɓɛɛ a̧ gasi o sɔra mbɛt. 4A̧ mboo o fara-ɗafi géé-sɔ̧ sɛn kɔ̧ Tua ko GASA WAN nɛ̀ baa tɔ̧ so'e: «Mɛ̀ nɛ́ sɛn Jerusalɛm hɛ̧ɛ̧ a̧ nin-am tɛ duk sɛnɛ kpoo nɛ kpoo» wó'ɛ.#2 Kal Ny 6.6 5A̧ mboo o fara-gasi o sɔra sɛn nú zala Tua ko GASA WAN yiitoo lɛŋ. 6A̧ dɔɔ o bem kɔ̧-a̧ ɗafi nɛ̀ sɔ̧ sɛn kɔ̧ ɗɔŋgɔ Bɛn-Hinɔm; a̧ dee mɔɔ-gbánà, o mɔɔ-kifi in o mɔɔ-dua; a̧ nɛɛ tɛ o wi-sa-sɔ̧-fio in o wi-a-ŋgala; a̧ tu̧u̧ see GASA WAN tɛ dee ɗaŋmɔ siti sɛn yí-a. 7A̧ baa ŋma géé-sɔ̧ n'aa duia e sɛn kɔ̧ Tua ko Sɔ̧; zu-a'i, GASA WAN tɔ̧ɔ̧ so ha̧ David in bem kɔ‘i Salomɔŋ‘e: «Mɛ̀ nɛ́ sɛn kɔ̧ Tua’ɛ sɛn Jerusalɛm mgbara o dɔka ye sɛn Israɛl in mgbara oi zuduk bíí lɛŋ a̧‘m hoka wen ha̧ nin-am mɛ duk sɛnɛ kpoo nɛ kpoo.#1 Wan 9.3-5; 2 Kal Ny 7.12-18 8Hegɔ, kà o be Israɛl mbo zu tɛ o heembea, tɛ o geŋa in yuwar duka-a kɔ‘m n'am baa tɔ̧ so ha̧ Moisɛ mɛ yɔr e ha̧ wa, mi beka de ha̧ wa mɛ yu tɛ nù n'am baa ha̧ so ha̧ dáà kɔ-wa na.»
9Tɛ mɔ‘i, Manase dee ha̧ o be Juda in o be Jerusalɛm mɛ de ɗaŋmɔ gan ko o ŋma zuduk bíí nɛ̀ GASA WAN kuma yinɛ ti o be Israɛl, wen ha̧ wa mɛ ba nù kɔ-wa.
Kpaa mbe ta ko Manase
10GASA WAN tɔ̧ɔ̧ wen ha̧ Manase in ha̧ dukbíí nù kɔ̧-a̧, ɓɛɛ wa zii wen kɔ̧-a̧ na. 11GASA WAN foo o gasa wi-biro ko wannu Asirii pi̧ zu wa, ɓɛɛ wa pi̧ káná nú Manase; wa gbama nyak-ndɛrɛ hɛr nɛ̀ a̧, ɓɛɛ wa ba a̧ si Babilɔŋ. 12Ŋgimbi nɛ̀ bɔnɛ gana zu a̧ kaɗi, a̧ aia nú sitɛ GASA WAN Sɔ̧ kɔ̧-a̧, gu nɛ̀ nù ti Sɔ̧ ko o dáà kɔ̧-a̧. 13A̧ kɔfa GASA WAN, ɓɛɛ see GASA WAN ga̧. GASA WAN zia kɔfamɔ kɔ̧-a̧, ɓɛɛ fo a̧ sinɛ ɗoŋ sɛn Jerusalɛm mɛ ɔ wan woyo. Hegɔ Manase iŋa'e, GASA WAN nɛ́ Sɔ̧ nɛ̀ mbetɛ.
14Hɔ-ɗoŋ mɔ‘i, Manase mboo gasa kusa garo zik nɛ̀ ye ko David nɛ̀ war yee-wese ha̧ zu-zer Gihɔŋ si kɔ̧ ɗɔŋgɔ Sɛdrɔŋ, hɔ sɛn nú tua ko o Zoro, ɓɛɛ ɓir si Ofɛl; a̧ dee nɛ̀ kusa-a. A̧ aa o gasa wi-biro dam o ye-ŋgárá Juda lɛŋ. 15A̧ kaia o gɔni sɔ̧, o géé-sɔ̧ gbonɛ kɔ̧ Tua ko GASA WAN, ɓɛɛ a̧ gbin o fara-ɗafi-wa nɛ wa dee so zu kaya, fara nɛ̀ Tua ko GASA WAN a̧a̧ sɛnɛ‘i in o wan mɛ saaye Jerusalɛm lɛŋ kai a taŋ. 16A̧ mboo fara-ɗafi-sɔ̧ ko GASA WAN woyo; a̧ ha̧a̧ mɔ-gaŋmɔ in o wan mɛ zɔnamɔ ha̧ Sɔ̧, ɓɛɛ a̧ ha̧ nú wen ha̧ o be Juda mɛ gasi nɛ́ GASA WAN Sɔ̧ ko Israɛl. 17Zu-a'i, o giiwi duka kànà tɛ ɗafa sɔ̧ sɛn zu o kusa-fara, ɓɛɛ ɗafa sɔ̧‘i duka nɛ wen GASA WAN Sɔ̧ kɔ-wa kpɔk ɓɛɛ.
Kaɗa wan ko Manase
18Oi nyɛrɛ tom ko Manase, kɔfa-sɔ̧ kɔ̧-a̧ in o wen ko o wi-tɔ̧-wen oi nú Sɔ̧ nɛ̀ duka tɔ̧ ha̧ a̧ a̧a̧ sɛn zaŋ Kalata ko o wannu Israɛl. 19Nyɛrɛ kɔfa-sɔ̧ kɔ̧-a̧ in ee ɗaŋmɔ nɛ Sɔ̧ ee ha̧ a̧, o nyɛrɛ zu dee ɗaŋmɔ in o ŋgazu kɔ̧-a̧, o kusa-fara n'aa ɗafa, o te nɛ‘i gasi gasi in o mboo-mɔ yɔra sɛn zaŋ Kalata ko Hozai. 20Manase fea si ɗoŋ o dáà kɔ‘i, ɓɛɛ wa gun a̧ sɛn kɔ̧ tua kɔ̧-a̧; hegɔ bem kɔ̧-a̧ Amɔŋ ɔɔ wan oi-aa.
Amɔŋ wannu Juda
(Zɔk 2 Wan 21.19-26)
21Amɔŋ a̧a̧ so nɛ̀ pɛ ɓu-yiitoo-zua-yiitoo ŋgimbi n'aa ɔɔ nɛ̀ wan, ɓɛɛ a̧ ɔ wan sɛn Jerusalɛm pɛ yiitoo. 22A̧ dee ɗaŋmɔ sɛn yí GASA WAN hee dáà kɔ̧-a̧ Manase ga. Amɔŋ ɗafa o géé-sɔ̧ nɛ̀ dáà kɔ̧-a̧ Manase mboo so ɓɛɛ a̧ gasi wa. 23Mɔ kpɔk, a̧ gbar ɗaŋmɔ ti GASA WAN hee mɔ'ɔ nɛ dáà kɔ̧-a̧ dee so ga na. Ɗaŋmɔ ko Amɔŋ gana zu ko dáà kɔ‘i.
24O wi-de-tom kɔ̧-a̧ baa ɗaŋ keta zu a̧, ɓɛɛ wa gbɛ a̧ sɛn kɔ̧ tua kɔ̧-a̧. 25Mɛ ɗoŋ, o be Juda gbɛɛ o wi nɛ̀ baa ɗaŋ keta zu Amɔŋ, ɓɛɛ wa de wan ha̧ bem kɔ̧-a̧ Josias.
Currently Selected:
2 KALATA NYƐRƐ 33: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.
