2 KALATA NYƐRƐ 21
21
1Josafat fea si ɗoŋ o dáà kɔ‘i, ɓɛɛ wa gun a̧ in wa sɛn ye ko David. Bem kɔ̧-a̧ Yoram ɔɔ wan oi-aa.
Yoram wannu Juda
(Zɔk 2 Wan 8.16-24)
2O nya Yoram nɛ̀ yaa so nɛ́ o bem ko Josafat wannu Israɛl so mɔɔrɔ-ɗoŋ-kpɔk; nin-wa nɛ́ Azaria, Yehiɛl, Zakarii, Azaria, Mikaɛl in Sɛfatia. 3Dáà kɔ-wa Josafat ha̧a̧ so mɔ ha̧ wa nɛ̀ dɔka-a: bu-mbɔi, lɔr in o demɔ nɛtɛ nɛtɛ in o ŋma ye-ŋgárá sɛn nù Juda; ɓɛɛ war ko Yoram, a̧ ha̧a̧ wan ha̧ a̧, wen a̧ duka nɛ́ kaya-bem.
4Yoram ɔɔ wan oi dáà kɔ‘i, ɓɛɛ kpa ŋgai siti; hegɔ a̧ gbɛɛ o nya-a̧ lɛŋ gú nɛ̀ o ŋma wan sɛn Israɛl nɛ̀ gba-paa.
5Yoram a̧a̧ so nɛ̀ pɛ ɓu-taar-zua-yiitoo ŋgimbi n'aa ɔɔ nɛ̀ wan; ɓɛɛ a̧ ɔ wan sɛn Jerusalɛm pɛ mɔɔrɔ-ɗoŋ-taar. 6A̧ ndaka ɗoŋ mɔ ko o wannu Israɛl hee mɔ'ɔ nɛ̀ o bíí nutua ko Akab dee so ga, wen kóò kɔ̧-a̧ duka nɛ́ boko-bem ko Akab; hegɔ a̧ dee mɔ ɗaŋ yí GASA WAN. 7Ɓɛɛ GASA WAN kɔ̧ so mɛ ɗaŋ nutua ko David na, wen zu nɔɔ-tɔk n'aa baa nɔ so in David, in wen n'aa baa tɔ̧ so ndé, wi tɛ ha̧ lamba#21.7 lamba: lamba’ɛ usi nɛ́ nutua in nu-gara (zɔk 1 Wan 11.36).#1 Wan 11.36 ha̧ David in o bem kɔ̧-a̧ wese ɓɔnsɛnɛ.
8Ŋgimbi wan ko Yoram, o be Edɔm dee ŋgazu in wannu Juda, ɓɛɛ hok ŋma wannu e see zu.#Ku̧u̧ 27.40 9Yoram kura in o gasa wi-biro kɔ‘i in o keekee-biro lɛŋ. Hee mɔ'ɔ n'aa kura nɛ̀ zaŋzɛ ga, a̧ gbina biro ti o be Edɔm nɛ̀ zika so a̧ in o gasa wi-biro kɔ̧-a̧ e see-a. 10Ku̧u̧naŋ-a nɛ̀ ŋgimbi'i a̧ o be Edɔm dee nɛ́ ŋgazu in wannu Juda hɔ sɔsɔɔ. Ŋgimbi'i mbɛt, Libna dee ŋgazu in Yoram wannu Juda, wen n'aa ee GASA WAN Sɔ̧ ko dáà kɔ̧-a̧ duk. 11Yoram mboo o fara-ɗafi géé-sɔ̧ mɛ kusa-fara zu kaya Juda, fo nɛ̀ o bíí Jerusalɛm in Juda pi̧ tɛ ɗafa géé-sɔ̧, nɛ̀ duk nɛ́ ɗaŋ yuwar deemɔ.
12 Wi-tɔ̧-wen oi nú Sɔ̧ Elii yɔra kalata ɓɛɛ tom ha̧ Yoram hee mɔ'ɔ ga: «Wen nɛ̀ GASA WAN Sɔ̧ ko dáà kɔ-mɛ David tɔ̧ nɛ́ mɔ'ɔ: Hee mɔ'ɔ nɛ̀ mɛ de mɔ hee dáà kɔ-mɛ Josafat in Asa wannu Juda ga na, 13ɓɛɛ mɛ zɔk nɛ ɗoŋ mɔ ko o wannu Israɛl fo nɛ̀ o bíí Jerusalɛm in Juda a tɛ gasa géé-sɔ̧ ga, in mɛ dee mɔ hee ko nutua ko Akab ga, gbɛ nɛ̀ o nya-mɛ nɛ̀ yaa so nɛ́ o kpasa-bíí gan mɛ; 14kinii, GASA WAN tɛ fo ŋgamɔ pi̧ zu dukbíí kɔ-mɛ, zu o bem kɔ-mɛ, zu o kóò kɔ-mɛ gú nɛ̀ o mɔɔ-er-mɛ. 15Ɓɛɛ nɛ̀ kɔ-mɛ, mɛ tɛ ɔ zɛɛ nɛtɛ nɛtɛ hegɔ sɔ̧ nɛ̀ o nyak zaŋ-mɛ a zan; zɛɛ‘i tɛ ŋgai ŋgai siti.»
16GASA WAN aa wen ha̧ o be Filistii in o be Arab nɛ̀ a̧a̧ sɛn Kus mɛ bi biro in Yoram. 17Wa daŋa ba zu dúk nɛ̀ Juda, wa yee ye, ɓɛɛ wa kai o mɔ nɛ̀ a̧a̧ so kɔ̧ tua ko wannu gú nɛ̀ o bem kɔ̧-a̧ in o kóò kɔ̧-a̧ lɛŋ; bem nɛ̀ ɓɔna ha̧ a̧ nɛ́ sɔŋkur-aa Ahazia.
18Ɗoŋ mɔ‘i, GASA WAN pi̧i̧ zɛɛ-nyima-zaŋ nɛ̀ kaɗi na tɛ Yoram. 19Zɛ dɔka, ɓɛɛ sitɛ kaɗa yiitoo pɛ, nyak zaŋ-aa gboo a zan; a̧ fea zu gasa nyimmɔ. O bíí nutua kɔ̧-a̧ dɔ fuu nyama zu a̧ hee mɔ'ɔ nɛ̀ wa duka so de nɛti zu o dáà kɔ-wa ga na.
20Yoram a̧a̧ so nɛ̀ pɛ ɓu-taar-zua-yiitoo ŋgimbi n'aa ɔɔ nɛ̀ wan, ɓɛɛ a̧ ɔ wan sɛn Jerusalɛm pɛ mɔɔrɔ-ɗoŋ-taar. A̧ fea, ɓɛɛ bíí ai nú wen-aa na. Wa guna a̧ sɛn ye ko David, ɓɛɛ bó nɛ́ fara nɛ̀ wa gun o wan sɛnɛ‘i na.
Currently Selected:
2 KALATA NYƐRƐ 21: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.
