1 TESALONIK 3
3
1Hee mɔ'ɔ n’ɛ̀ɛ̀ nyɛm mɛ́ pɛm mɔ hegɔ na ga, ɛ́ɛ́ zɔka'e gana so ɛ̀ɛ̀ yá sɛn Atɛn hɛ̧ɛ̧ ɓɛɛ.#Tom 17.15 2Nɛ́ mɔ‘i s’ɛ́ɛ́ toma so Timotee wen ha̧ a̧ mɛ́ ha̧ nɔɔ-ŋgiɗi h’ɛ́nɛ́ in yora ɗoŋ‘nɛ́ tɛ kɔ̧ɔ̧ɗɔɔwen k’ɛ́nɛ́. A̧ nɛ́ nya-ɛɛ, nɛ̀ de tom ko Sɔ̧ in yɛɛ, tɔ̧ nɛ̀ De Mbe Wen ko Krist nɛnɛ. 3Ɛ́ɛ́ toma a̧ nɛnɛ wen ká o weamɔ tɛɛ gan ŋma bíí mgbara'nɛ́, wen ɛ́nɛ́ iŋa nɛ̀ de-a'e mɔɔ nɔ‘i tɛ́ hɔ kànà zu yɛ. 4Ŋgimbi n’ɛ̀ɛ̀ duka so nɛnɛ tɛ k’ɛ́nɛ́, ɛ́ɛ́ mbaŋa so tɛ‘nɛ́‘e, mɔ tɛ́ we kànà ɛ́nɛ́, ɓɛɛ nɛ́ mɔ‘i a̧ hɔɔ zu'nɛ́ nɛ̀ mbetɛ; ɛ́nɛ́ iŋa hegɔ. 5Mɛ̀ nɛ́ wen mɔ‘i, ɛ́ɛ́ zɔka'e ɛ́ɛ́ pɛma mɔ batɛ, ɓɛɛ s'am pi̧ tom mɛ́ ak mɔ zu nyɛrɛ kɔ̧ɔ̧ɗɔɔwen k’ɛ́nɛ́. Kíì dee yɛ wen ká wi-ɔr-wi tɛɛ ɔr'nɛ́, ɓɛɛ ká tom k’ɛ́ɛ́ tɛɛ kifi geemɔ.
6Timotee pia ɗoŋ tɛ yɛ nɛ̀ tɛ‘nɛ́ kinii. A̧ baa de nyɛrɛ kɔ̧ɔ̧ɗɔɔwen in kɔ̧ɔ̧mɔ k’ɛ́nɛ́ tɛnɛ h’ɛ́ɛ́. A̧‘e, tɛ‘nɛ́ bí ɗoŋ yɛ na, ɛ́nɛ́ kɔ̧ɔ̧ mɛ́ zɔk yɛ woyo hee mɔ'ɔ n’ɛɛ kɔ̧ɔ̧ mɛ́ zɔk nɛ̀ ɛ́nɛ́ mbɛt ga.#Tom 18.5 7Hegɔ, o nya-ɛɛ, ɛ́ɛ́ zɔka'e, ɛ́nɛ́ ha̧a̧ ŋgai h’ɛ́ɛ́ tɛ kɔ̧ɔ̧ɗɔɔwen k’ɛ́nɛ́ sɛn tɛ dita-see in weamɔ nɛ̀ kpaa yɛ. 8Kinii, ɛ́ɛ́ duk kpasa woyo wen ɛ́nɛ́ yor nɛ̀ nɔa-a sɛn tɛ Gasa Wan. 9Nɛ́ ge osoko ge ɛ̀ɛ̀ tɛ́ de ha̧ Sɔ̧ wen zu gasa desee n’ɛ̀ɛ̀ kpa zu'nɛ́ ti Gasa Wan Sɔ̧ k’ɛ́ɛ́ ge? 10Zɛ nɛ wese ɛ́ɛ́ kɔfi nɛ́ Sɔ̧ nɛ̀ ŋgaya-a h’ɛ́ɛ́ mɛ́ kpa yuwar wen zɔka'nɛ́ woyo wen h’ɛ́ɛ́ mɛ́ ha̧ oi mɔ nɛ̀ ɓan'nɛ́ tɛ kɔ̧ɔ̧ɗɔɔwen k’ɛ́nɛ́ h’ɛ́nɛ́.
11Sɔ̧ Dáà k’ɛ́ɛ́ nɛ̀ tɛ-wi in Gasa Wan k’ɛ́ɛ́ Jesu à̧ ɗáfí naŋanɔ k’ɛ́ɛ́ si tɛ‘nɛ́. 12Gasa Wan a̧ dé h’ɛ́nɛ́ mɛ́ kɔ̧ ŋmaa in o ŋmaa in o bíí lɛŋ siti gan kuti-a, hee mɔ'ɔ n’ɛ̀ɛ̀ kɔ̧ɔ̧ nɛ̀ ɛ́nɛ́ ga. 13A̧ a̧ dé h’ɛ́nɛ́ mɛ́ kpa nɔɔ-ŋgiɗi kɔ̧ see'nɛ́ h’ɛ́nɛ́ mɛ́ duk nɛ̀ sa̧a̧-a̧ nɛ̀ ŋma be wen beka bó zu'nɛ́ ti Sɔ̧ Dáà k’ɛ́ɛ́, ŋgimbi pia-ɗoŋ ko Gasa Wan k’ɛ́ɛ́ Jesu in o sa̧a̧-bíí kɔ‘i lɛŋ na.
Currently Selected:
1 TESALONIK 3: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.