Maku 3

Aosemahmirihmahpyry kurãkatopõpyry ropa poko

(Mateu 12.9-14; Ruka 6.6-11)

1Morotoino juteu tõ atamorepatoh taka Jezu toytose ropa. Moroto aosemahmirihmahpyry kynexine. 2Morarame parixeu tõ Jezu enẽko toh kynexine aehxirotohme repe.

— Otarãme kurãkara kurãkãko ropa mana oserematoh ae, tykase toto. 3Mame Jezu tõturuse aosemahmirihmahpyry a, ynara tykase:

— Aimo, osehko irãnaka, tykase eya.

4Mame tonenanomo a ynara tykase ynororo:

— Oty kurehxo oya xine oserematoh ae nae? Kure ehtopo? Popyra ehtopo? Oty oya xine kurehxo oserematoh ae nae? Kurãkara kurãkatoh ropa? Imepỹ etapatopo? Oty pake tyripose oserematoh ae Moeze a Ritonõpo omi poe? tykase Jezu, tõturupose eya xine.

Yrome onezuhpyra toh kynexine. 5Mame tãkye pyra Jezu tõsenuhmase. Tomyẽkõ tonese eya. Tohne toehse kynexine toemynyhmaryme otato pyra toto exiryke. Mame kurãkara a ynara tykase ynororo:

— Oemary anỹko, tykase. Mame tãtaporamase ynororo. Emary osepune toehse ropa. 6Morarame parixeu tõ tutũtase ropa moro tae. Morarame tõximõse toto, Erote epe tõ maro, Jezu poko tõturutohkõme, Jezu etapary se toexirykõke.

Imoihmãkõ poko ikuhpo ehpio

7Morotoino toytose ropa Jezu typoetory tõ maro ikuhpo pona, Karirea pona. Mame tokahmase ynororo imoihmãkomo a Karirea põkomo a, Jutea põkomo a, 8Jerusarẽ põkomo a, Itumea põkomo a, Joatão moinõkomo a, Tiro põkomo a, Xitõ põkomo a, enara. Tokahmase ynororo imoihmãkomo a. Inukurãkatary enery se toexirykõke toytose toto, tuhke kurãkõkara tukurãkase eya exiryke. 9-10Morara exiryke epuepurohmãko toh kynexine kurãkõkara Jezu apotohme tyya xine. Mame kanawa tohpikẽ tonehpose typoetory tomo a tõtyritohme, tuputupurohmaryino imoihmãkomo a. 11Morarame jorokohpã kõ Jezu eneryhtao, toepukase toto ẽpataka:

— Ritonõpo mũkuru nymyry mase, tykase toto. Kui tykase roropa toto.

12Mame turuse toto Jezu a.

— Jekaropyra ehtoko, tykase ynororo eya xine.

Orutua kõ menekatopõpyry Jezu a 12me tymaro toto ytotohme

(Mateu 10.1-4; Ruka 6.12-16)

13Morarame toytose ynororo ypy pona. Tỹpenery tõ rokẽ tarose eya. 14Moroto tymenekase toto eya 12me tymaro toto ytotohme.

— Amarokõ tymenekase ya ymaro oytotohkõme, tykase ynororo eya xine. — Ynenyokyryme roropa matose exĩko Ritonõpo omiry ekarotohme imehnomo a. 15Yjamitunuru ekarõko ase oya xine joroko tõ tũtanohpotohme oya xine imehnõ ae, tykase ynororo eya xine.

16Ynara toh kynexine, Ximão. Mokyro tosehpase ropa Peturume Jezu a. 17Zepeteu poenõ kynexine. Tiaku, João, enara toh kynexine. Konomerume tosehpase roropa toto Jezu a. 18Imehnõ roropa moroto kynexine, Ãtare, Piripe, Patoromeu, Mateu, Tome, Tiaku. Aupeu mũkuru kynexine ynororo, Tateu maro, imepỹ Ximão roropa. Juteu tõ esary pynoto exikety kynexine ynororo. 19Juta Ixikariote roropa tymenekase eya. Tosẽ ewokahpõ ynororo kynexine. Enara tymenekase toh kynexine Jezu a typoetoryme.

Peuzepu poko

(Mateu 12.22-32; Ruka 11.14-23; 12.10)

20Morarame Jezu toytose ropa ahtao tytapyĩ taka tuhke ahno moroto kynexine tõximõse. Morara exiryke otuhpyra kynexine ynororo. 21Mame morara aexiry totase jekyry tomo a. Morara exiryke tooehse toto morotona Jezu poko.

— Otarãme rowotãko mana, tykase toto ipoko repe.

22Morarame Moeze omihpyry warõkõ, Jerusarẽ poe aehtyã ynara tykase toto ipoko:

— Jorokohpe mana, Peuzepu hpe, tykase toto Jezu poko. (Peuzepu joroko tamuru esety akorony.)

— Joroko tamuru poe joroko tõ tũtanohpõko mana ahno ae, tykase imehnõ roropa ipoko.

23Morarame Jezu a imoihmãkõ tykohmase tyya, toto amorepatohme. Ynara tykase ynororo eya xine:

— Otãtohxo joroko tõ na etũtanohpõko ropa nah oxime? Imepỹ joroko onutũtanohposaromepyra imepỹ joroko mana ynarohnõme toexirykõke. 24Morararo pata tamuru põkõ oseosetaparyhtao, osenahkãko rokẽ mã toto. 25Tapyi taõkõ roropa osetaparyhtao, osenahkãko rokẽ toto. 26Morararo joroko tamuru joroko tõ maro osetaparyhtao okynã pyra osenahkãko mã toto oxime toexirykõke.

27— Etatoko pahne, jamitu tapyĩ taka omõsaromepyra imepỹ mana ematonase, esẽ jamihme exiryke. Yrome tapyi esẽ tymyhse ahtao rokẽ, imõkomory ematonanohnõko mana esẽ tymyhse exiryke sã rokene. (Morararo joroko tamuru tymyhse ahtao rokẽ joroko tõ tũtãko ropa sã mana.)

28— Ynara kary se ase oya xine, emero oorypyrykõ korokãko Ritonõpo mana. 29Tykerekerematopõpyry korokãko roropa mana. Toiro rokẽ onykorokara ekurehnõko mana. Tuzenu kerekerematopõpyry onykorokara mana jũme. Ehxirokehpyra Zuzenu kerekeremahpõkõ mana. Etuarimakehpyra roropa toh mana jũme.

30Morara tykase Jezu typoko: “Jorokohpe mana,” tykase mokaro exiryke.

Jezu eny, zakorõ tomo, enara

(Mateu 12.46-50; Ruka 8.19-21)

31Morarame Jezu ẽ tooehse zakorõ tõ maro. Jezu maro tõtururu se toh kynexine repe. Yrome omõpyra toh kynexine tapyi taka. Jarãnao rokẽ toh kynexine. 32Jezu zomye ahno typorohse kynexine imoihme. Ynara tykase toto eya:

— Asa oya kynako. Moky reh oeraximãko jarãnao, ãkorõ tõ maro, tykase toto eya.

33Yrome ynara tykase Jezu eya xine:

— Onoky aja mokyro? Onokã jakorõ tõ mokaro? tykase. 34Tomyẽkõ eneryme ynara tykase ynororo:

— Tarõkõ ajame toh mana, jakorõ tõme roropa mã toto. 35Ynara exiryke, Ritonõpo omipona exiketõ wekyryme mã toto, jakorõme, woryxiryme, ajame, enara, tykase ynororo eya xine.

Currently Selected:

Maku 3: apy

Highlight

Copy