MARKUS 8

Yesu kǝ̃ǝ za ujenere nai ne farelle

(Mt 15:32-39)

1Ne cok ah za taira ɓo wo Yesu pǝlli faɗa. Ara bai farelle, so Yesu ɗii za syee mor ah faa nyi ra: 2Me tǝ kwan syak tǝ za maino, mor nǝnra ɓo ne me tǝgǝǝ zah'nan sai, amma zǝzǝ̃ǝko ara bai farelle. 3Me soɓ fahlii nyi ra kal ne koŋ ɓe, a ga gamra fahlii, mor za ki ur pǝɗǝk ge ɓo. 4Za syee mor ah faara nyi ko: Na ga lwaa farel kẽe ka kǝ̃ǝ za mai lal nyee ne? 5Yesu so fii ra: We ne zahtǝfah wol nyee kǝɗǝne? Zyiira faa: A rǝŋ.

6Faa nyi za daŋ mo haira ge sǝŋ, woo zahtǝfah matǝ rǝŋ kŋ joŋ osoko nyi Masǝŋ, so ɓǝl nyi za syee mor ah ka mo womra nyi zana. So joŋra na Yesu mo faa. 7Ara no ne wee syiŋ gŋ nje ta. Yesu joŋ osoko nyi Masǝŋ tǝl ahe, so faa nyi ra mo womra nyi za ta. 8Rera kǝ̃ǝ daŋ. Za syee mor ah woora tǝcoŋ ah baa col rǝŋ. 9Za ma renra farel ah tǝgbana ujenere nai. So Yesu nyi fahlii nyi ra. 10Yesu yee dah ne za syee mor ah sǝ, kalra ge sǝr Dalmanuta.

Farisien fiira dǝǝbǝǝri

(Mt 16:1-4)

11Farisien ge daira, tǝŋ kyeɓra ɓǝ zah Yesu, fiira ko ka mo joŋko dǝǝbǝǝri mai moo gak cuu swah ah ur gin wo Masǝŋ ge. 12Yesu 'mee tǝ ɓǝ ah so faa: Za ma zah'nan tǝ'nah mai fiira dǝǝbǝǝri mor fẽene? 'Manna me faa nyi we, dǝɓ ka joŋ dǝǝbǝǝri nyi za mai ya. 13So Yesu zol soɓ ra, jin ge yee dah kal ge nǝzakǝŋhaa.

Ɓǝ mbǝ̃ǝ Farisien ne Herodes

(Mt 16:5-12)

14Za syee mor Yesu yaŋra tǝtǝlli, ɓaŋra farel ge pǝ dah ne ya, sai zahtǝfah vaŋno to. 15Yesu lai ra faa: We joŋ yella, we byak suu ɓii wo ɓǝ mbǝ̃ǝ Farisien ne Herodes. 16Za syee mor ah tǝŋ faara ɓǝ tǝgǝǝ ki: Yesu faa ɓǝ nai mor na ka ne farel a. 17Yesu laa mo tǝ faara ɓǝ naiko, so fii ra: Mor fẽe we faa mor na ka ne farel a ne? We laa mor ɓǝ ah ya ba ne? We nyiŋ ɓǝ ah ya ne? Tǝtǝl ɓii kǝka ne? 18Awe no ne nahnǝnni, we ka kwan cok ya ne? We no ne sokki, we ka laa ɓǝ ya ne? 19We ka foo ɓǝ zahtǝfah dappe me wom nyi za ujenere dappe ya ne? We woo tǝcoŋ ah mo coŋ baa col kǝɗǝne? Zyiira faa: Baa col jemma tǝtǝl gwa. 20So faa: Com mai me wom zahtǝfah rǝŋ nyi za ujenere nai we woo tǝcoŋ ah baa col kǝɗǝne? Zyiira faa: Baa col rǝŋ. 21So Yesu faa nyi ra: We laa mor ɓǝ ah ya ba ne?

Yesu gbǝr nahnǝn nyi rǝ̃ǝ yaŋ Betsaida

22Gera yaŋ Betsaida, za ki zaŋra rǝ̃ǝ ge wo Yesu ne ko, syeara ko ka mo juu ko. 23Yesu gbǝ jol rǝ̃ǝ, zaŋ gin tǝgǝǝ yaŋ pǝ̃ǝ ge lal ne ko, so tǝɓ tǝsǝ̃ǝ gee nahnǝnni, kan jol tǝl ah fii ko: Mo kwan fan no ne? 24Rǝ̃ǝ so ɓaŋ nahnǝn ge sǝŋ faa: Me kwan za tǝ kyãhni, amma ara tǝgbana kpuu. 25So Yesu kan jol ah ge tǝ nahnǝn ahe, nahnǝn dǝɓ ah gbǝrri, so kal ne kwan cok pǝsãhe. 26Yesu nyi fahlii nyi ko ka ga yaŋ ahe, so faa nyi ko ka mo syeeko ge tǝgǝǝ yaŋ ka.

Petar faa Yesu ye Kristu

(Mt 16:13-20; Lu 9:18-21)

27Yesu ne za syee mor ah kalra ge yaŋ ma pǝ sǝr Kaiseria-Filipi. So Yesu tǝŋ fii za syee mor ah tǝ fahlii faa: Za faara, ame ye zune? 28Zyiira zah ah faa: Za ki faara amo ye Yohana ma joŋ baptisma, za ki faara amo Elias, za ki so faara amo ye dǝɓ maki ah kǝsyil profetoen. 29So jin fii ra: Ma ɓii we faa ame ye zune? Petar zyii faa: Amo ye Kristu. 30So Yesu faa nyi ra ka mo faara ɓǝ ah nyi za ki ka.

Yesu faa ɓǝ wul ah tǝkine ɓǝ ur ahe

(Mt 16:21-28; Lu 9:22-27)

31So Yesu tǝŋ cuu ɓǝ mai nyi za syee mor ah faa: We Dǝfuu ga laa bone pǝlli. Zaluuri, zaluu za joŋzahsyiŋrĩ, tǝkine za cuu ɓǝ lai, a ga ɓoora ko ga lalle, a ga ira ko pǝ wulli, fahfal zah'nan sai a ga ur gin pǝ wulli. 32Faa ɓǝ ah nyi ra caŋryaŋ. So Petar ɗii ko ge lal ne ko tǝŋ kyãh ɓǝ nyee wol ahe. 33Amma Yesu jin nahnǝn ẽe za syee mor ahe, so lai Petar faa: Mo zol gin fahfal ɓe Satan, mor mo ka foo ɓǝ tǝ ɓǝ Masǝŋ ya, amma mo foo ɓǝ mǝ dǝfuu.

34So Yesu ɗii za tǝkine za syee mor ah gera wol ah faa nyi ra: Koo zune mo 'yah syee mor ɓe ɓe, mo fooko ɓǝ suu ah ka, amma mo ɓaŋko kpuu ɓaa suu ahe, ka mo ge syeeko mor ɓe. 35Mor koo zune mo 'yah ka ǝ̃ǝ suu ah ɓe, a ga muŋ, amma dǝɓ mo wǝ mor ɓe tǝkine Ɓǝ'nyah Masǝŋ, a ga yea ne cee ma ga lii. 36Koo dǝɓ mo lwaa sǝr mai daŋ laŋ, amma mo muŋko cee ah ɓe, fan ah ga joŋ fẽe wol ah ne? 37Dǝɓ ah ga nyi fẽe zahwaa cee ah ne? 38Dǝɓ mo joŋ swãa tǝ ɓe tǝkine ɓǝ faa ɓe kǝsyil za maɓe' wo sǝr ma tǝ'nah mai moo joŋra faɓe', We Dǝfuu ga joŋ swãa tǝl ah ne cok moo ga ge ne yǝk Pah ah tǝkine angeloi matǝdaŋdaŋ ah ra ta.

Currently Selected:

MARKUS 8: MUAR

Highlight

Copy