MARKUS 7

Ɓǝ lai za matãa

(Mt 15:1-9)

1Farisien ne za ki kǝsyil za ma cuu ɓǝ lai urra gin yaŋ Jerusalem, taira ge wo Yesu. 2Kwora za ki kǝsyil za syee mor Yesu rera farel ne jol 'nahm bai vãh jolle, tǝgba faa: vãhra jol tǝgbana ɓǝ lai Farisien mo cuu fahlii ah ɓo ya.

3Mor Farisien ne Yahuduen daŋ ka renra farel bai vãh jol na ɓǝ ah mo faa ɓo ya, sai a vãhra jol pǝsãh ɗǝ, a syeera mor ɓǝ za matãa. 4Mo pii soora gin luma ɓe, ka renra fan a, sai a erra bii kǝpel ɗǝ, gbǝra ɓǝ manyeeki ah ɓo camcam pǝlli, tǝgbana ɓǝ vãh ŋhǝǝ zwan bii, cii wolle, tǝkine tahsah vãm syẽ.

5Farisien ne za cuu ɓǝ lai fiira ko: Za syee mor ɓo ka syeera mor ɓǝ za matãa ya, amma a renra farel ne jol 'nahm mor fẽene? 6Yesu zyii zah ɓǝǝ faa: Awe za tǝ vǝrvǝrri, profeto Esaia faa goŋga tǝ ɓiiri, tǝgbana mo ŋwǝǝ ɓo pǝ Ɗerewol:

Za mai yiira me ne tǝkpuuzahe,

Amma zahzyil ɓǝǝ pǝɗǝk ne me.

7A yiira me ne zah kolle,

A cuura ɓǝ faa dǝfuu.

8So Yesu faa: We soɓ ɓǝ lai Masǝŋ, we gbǝ ɓǝ dǝfuu.

9So faa nyi ra faɗa: Kaiya, we soɓ ɓǝ lai Masǝŋ ɓoo we so kal tǝ syee mor ɓǝ faa ɓiiri. 10Mor Mosus faa: Mo kee pa ɓo ne ma ɓo daŋ, dǝɓ mo tǝǝko pah ah koo mah ahe, kiita ah ye wulli. 11Amma awe, we faa: Dǝɓ mo faa wo pah ah koo mah ahe: Fan makẽne mo jol ɓe ka me wol mo ne ko a Korban , tǝgba faa: me nyi nyi Masǝŋ ɓe, 12we cak dǝɓ ah bai joŋ fan sãh wo pam ne mamme. 13Ne mai we ɓeɓ ɓǝ faa Masǝŋ ne ɓǝ faa ɓii we kan ɓo. We tǝ joŋ fan ma morãi pǝlli.

Fan mai moo ɓeɓ dǝɓɓi

(Mt 15:10-20)

14Yesu so ɗii za daŋ gera wol ah faa nyi ra: We daŋ we laa ɓǝ faa ɓe, ka we tǝ mor ah ta. 15Fan makẽne mo gee lal ge dan ɓǝr dǝfuu daŋ ka gak ɓeɓ ko ya, amma fan mai moo pǝ̃ǝ gin pǝzyil dǝɓ a ɓeɓ dǝɓ ahe. [16We ne sok laa ɓǝ no ɓe, we laa.]

17Ne cok mo woŋko ki ne zana, so kal ge ɓǝr yaŋ. Za syee mor ah ge fiira mor ɓǝ kikiŋ ah zah ahe. 18Yesu faa nyi ra: Awe laŋ we tǝ mor ɓǝ ah ya ta ne? We tǝ ya ne? Fan makẽne mo gee lal ge ɓǝr dǝɓ daŋ ka gak ɓeɓ dǝɓ ah ya. 19Mor fan ah ka dan zahzyil dǝɓ ah ya, amma a ga pǝ cii ɓǝrri, a so pǝ̃ǝ gin lal ne fahlii ahe. (Yesu faa ɓǝ mai mor ka cuu farel daŋ a pǝsãhe.) 20So faa faɗa: Fan makẽne mo pǝ̃ǝ gin pǝ zahzyil dǝɓɓi, fan ah yee ɓeɓ dǝɓ ahe. 21Mor daga pǝzyilli, pǝ zahzyil dǝfuu foo ɓǝɓe' pǝ̃ǝ gin lalle: ɓǝ tǝ haihai, kiŋ nyinni, in wulli, joŋ ɓǝǝre, 22cwaa fanne, vǝrvǝrri, gwah berre, bai joŋ fan ne fahlii, tǝwonni, faa ɓǝɓe' tǝ za ki, yii suu, tǝkine ɓǝ tǝgwĩi. 23Ɓǝɓe' marai daŋ pǝ̃ǝ gin pǝ zahzyil dǝɓɓi, a ɓeɓ dǝɓ ahe.

Mawin Kanaaneyo nyiŋ Yesu

(Mt 15:21-28)

24Yesu ur gin cok ah kal ge sǝr Tirus. Ge kaa ɓǝr yaŋ ki gŋ, 'yah za ki mo tǝ ɓǝ ah ya, amma gak muŋ suu ah ya. 25Ne cok ah mawin ki no, mǝlaŋ ah ne coksyiŋrĩ, laa ɓǝ Yesu, ge kea ge sǝŋ mor ɓal ahe. 26Mawin ah a laa zah Grek, amma ako ye ban Siro-Fǝnikia. Ge pǝǝ ko ka mo ge nĩiko coksyiŋ tǝ mǝlaŋ ahe. 27Amma Yesu faa nyi ko: Mo soɓ wee rera kǝ̃ǝ ɗao, mor ka pǝsãh ka ɓaŋ farel wee nyi wee goo ya. 28Mawin ah zyii faa nyi ko: Goŋga yo Dǝɓlii, amma wee goo laŋ a gak rera fan mai mo myah ɓo jol wee ge tǝ sǝrri. 29Yesu faa nyi ko: Mor ɓǝ ɓo mo faa naiko, mo gyo, coksyiŋ pǝ̃ǝ gin tǝ mǝlaŋ ɓo ɓe. 30Mawin ah kal ge yaŋ ah ge lwaa mǝlaŋ ah swǝ ɓo tǝ faswulli, coksyiŋ pǝ̃ǝ gin tǝl ah ɓe.

Yesu laɓ dǝɓ lǝr ma bai gak faa ɓǝ

31Yesu soɓ sǝr Tirus, pǝ̃ǝ ge sǝr Sidon ge dai zah mabii Galile, ge pǝ̃ǝ tǝgǝǝ sǝr ma ɗii ne Yaŋmaluujemma. 32Za zaŋra dǝɓ lǝr ma faa ɓǝ pǝgaɓ ge wo Yesu ne ko, so syeara ko ka mo kanko jol tǝl ahe. 33So Yesu zaŋ dǝɓ lǝr wo za kal ge lal ne ko, so maa tǝwee jol ah ge fah sok ahe, tǝɓ tǝsǝ̃ǝre, juu tǝrĩi ah ne ko. 34So Yesu ɓaŋ nahnǝn ge sǝŋ fee tǝ'yakke, so faa nyi dǝɓ ahe: Effata, tǝgba faa: Mo gbǝr o. 35Ne pel sǝ sok dǝɓ ah gbǝrri, tǝrĩi ah wǝǝ ta, so kal ne faa ɓǝ pǝsãhe. 36Yesu lai ra ka mo faara ɓǝ ah nyi za ki ka, amma koo mo lai ra nai laŋ so myahra ɓǝ ah kpǝ. 37Za kaara tǝ ɓǝ ah gǝriŋ pǝlli. So faara: A joŋ fan daŋ pǝsãhe ŋhaa joŋ lǝr so laara ɓǝ, za mai tǝrĩi ɓǝǝ mo mgbãa ɓo laŋ so faara ɓǝ.

Currently Selected:

MARKUS 7: MUAR

Highlight

Copy