MARKUS 13

Yesu faa ɓǝ tǝ ɓǝ ɓeɓ yaŋ Masǝŋ

(Mt 24:1-2; Lu 21:5-6)

1Ne cok Yesu mo tǝ pǝ̃ǝ gin pǝ yaŋ Masǝŋ, dǝɓ vaŋno kǝsyil za syee mor ah faa nyi ko: Mo ẽe yaŋ mai mo vuura ɓo pǝ'man ɗao, tǝsal ah pǝsãh ɗii ne! 2Yesu zyii zah ah faa: Mo kwo yaŋ malii mai mo vuura ɓii ɓe ne? Koo tǝsal ah vaŋno ka ga coŋ sǝŋ nyee ya, a ga hah ga sǝŋ tǝɗe'.

Bone mai moo ga ge kǝpel vǝr sǝrri

(Mt 24:3-14; Lu 21:7-19)

3Ne cok Yesu mo kaa ɓo tǝ waa Ma Ne Tǝbaakãmme, jiŋ nahnǝn ɓoo ge ɓo fah kǝ yaŋ Masǝŋ. Petar, Yakuɓ, Yohana tǝkine Andreas kaara ɓo ne ki, fiira ko faa: 4Mo faa nyi ru, fan mai ga joŋ nekẽne? Fan ma cuu cok mai fan ah moo ga joŋ ko fẽene?

5So Yesu tǝŋ faa nyi ra: We joŋ yella ka dǝɓ mo zyak we ka. 6Mor za pǝlli ga gera pǝ tǝɗii ɓe, a ga faara azye ye Kristu, a ga zyakra za pǝlli. 7Ne cok we laa ɓǝ sal ɓo kah ɓii gwari, wala we laa ɓǝ ah ge ɓo pǝɗǝkki, ka we ɗuu gal ɓǝ ah ka. Fan ah ga joŋ, amma ka vǝr sǝr ye ka ba. 8Za ki ga ruura sal ne za ki, goŋ ki ga ruu sal ne goŋ maki ahe, sǝr ga coo pǝ sǝr camcam, koŋ ga wǝ ta, marai bone ah ma kǝpel moo ga ge yo.

9Amma awe, we joŋ yella, mor a gara pǝ kiita pel zaluu ne we, a ga loɓra we ne bǝrǝǝ yaŋ kee ɓǝ Masǝŋ, a gara pel zaluu govener tǝkine za goŋ ne we mor tǝɗii ɓe. Nai ɓe, ka we lwaa fahlii ɓo ka joŋ syedowal tǝ ɓe. 10Kǝpel ah a ga cuura Ɓǝ'nyah Masǝŋ wo za daŋ. 11Ne cok moo ga gbahra we ka ga kiita ne we, ka we foo ɓǝ mai wee ga faa kǝpel ka, amma ɓǝ mai Masǝŋ moo ga nyi we ne cok ah ka we faa mooko, mor we ye ka tǝ ga faa ya, Tǝ'yak Matǝdaŋdaŋ ye tǝ ga faa. 12Za ga soɓ wee pa ɓǝǝ ga jol za ki ka mo ikra ra pǝ wulli. Pah wee ga soɓra wee ɓǝǝ ga jol za ki ka mo ikra ra pǝ wul ta, wee ga ur tǝ za ɓǝǝra a ga soɓra za ikra ra pǝ wulli. 13Za daŋ a ga syiŋra we mor ɓǝ ɓe. Amma dǝɓ mo uu ne ɓǝ ah ŋhaa wul ahe, a ga ǝ̃ǝ.

Ɓeɓ maɓe'

(Mt 24:15-28; Lu 21:20-24)

14We ga kwo ɓeɓ maɓe' ga uu pǝ cok mai mo kii nǝn ah ya. Dǝɓ mo kee ɓǝ ah ɓe, mo laako mor ahe. Za mai mo sǝr Yudea mo ɗuura yee ge tǝ waare. 15Dǝɓ mo zahdǝǝ sǝŋ ne cok ah ɓe, mo ɗǝrko ge ɓǝr yaŋ ah ka woo fan gŋ ka. 16Dǝɓ mo 'wahe, mo pii sooko ge yaŋ ka ɓaŋ mbǝro ah ka. 17Ne zah'nan ah bone ga yea wo ŋwǝǝ ma ne ɓil tǝkine ŋwǝǝ ma ne wee jolle. 18We pǝǝ Masǝŋ mor ka fan marai mo ge joŋ ne cok zal ka. 19Mor ne zah'nan ah bone malii ga ge, daga Masǝŋ mo joŋ fan daŋ ŋhaa tǝ'nahko, bone ma na mai ge taa ya, bone ah ka ge laŋ yao ŋhaa ga lii. 20Dǝɓlii mo tǝr zah'nan ah ra ge fal a ɓe, koo dǝɓ vaŋno ka yea ne cee ya, amma Dǝɓlii tǝr zah'nan ah mor zan ah mai mo syen ɓo.

21So dǝɓ ki mo ge faa nyi we: We ẽe Kristu no nyeeno, wala a ŋhaano, we nyiŋ ɓǝ ah ka. 22Mor Kristu maber tǝkine profetoen maber a ga pǝ̃ǝra a ga joŋra fan matǝ gǝriŋ ah tǝkine dǝǝbǝǝri mor ka zyak za mai Masǝŋ mo syen ra ɓo, moo gakra ɓe ko. 23Amma me faa nyi we kǝpel ahe, ka we joŋ yella.

Gin We Dǝfuu

(Mt 24:29-31; Lu 21:25-28)

24Amma ne zah'nan fahfal bone ahe, com ga joŋ pǝfuu, fĩi ka sǝǝ ya. 25Ŋwǝǝmǝŋgai sǝŋ ga leara gin sǝŋ, swah mai mo coksǝŋ daŋ ga laŋ. 26So a ga kwora We Dǝfuu ge ne swãh bam tǝkine swah ne yǝk pǝ'manne. 27A ga pea angeloi ah ka tai zan ah ma syen ah daga laa sǝr nai daŋ.

Ɓǝ cuu ma lii ne kpuu wuuri

(Mt 24:32-35; Lu 21:29-33)

28We fee ɓǝ kikiŋ ah gin wo kpuu wuuri. Ne cok we kwo jol ah ra tǝ zyee goo ɓe, we tanne, zah bam ge gwari ɓe. 29Nai ta, ne cok we kwo fan marai daŋ tǝ joŋ ɓe, ka we tǝ, We Dǝfuu a no zahfah gwari. 30Me faa nyi we goŋga, za mai ka wukra vǝr daŋ ya sai fan mai daŋ gin joŋ ɗǝ. 31Sǝŋ ne sǝr ga vǝrri, amma ɓǝ faa ɓe ka ga vǝr a syaŋsyaŋ.

Masǝŋ ye tǝ zah'nan vǝr sǝr ɓo to

(Mt 24:36-44)

32Amma koo dǝɓ vaŋno tǝ zah'nan ah ne cok com gin ah ya. Angeloi tǝra ya, koo Wel ah laŋ tǝ ya ta, sai Pam to. 33We joŋ yella, we byakke, mor we tǝ com ah moo ga ge ya. 34Ɓǝ ah ga yea tǝgbana dǝɓ mo tǝ ga gwǝǝ ɓe, moo soɓ yaŋ ah jol za yeɓ ahe, nyi yeɓ nyi ra vaŋno vaŋno daŋ, so faa nyi pa byak zahfahe: Mo byak pǝsãhe. 35Mor maiko, we kaa we byakke, mor we tǝ com mai pah yaŋ moo pii soo ge ne ya. Ɗah maki a ge ne lil ne? A ge ne kǝsyisuŋ ne? A ge ne zahmor'nan ne? Wala a ge ne zah'nan ne? 36Ka ne cok ah mo ge dai gwari ɓe, ka mo ge lwaa we nwãh nǝm ɓo ka. 37Ɓǝ mai me faa ɓo nyi we, me faa ɓo nyi za daŋ: We byakke.

Currently Selected:

MARKUS 13: MUAR

Highlight

Copy