MATEUS 25

Ɓǝ kikiŋ woi jemma

1Ne cok ah Goŋ Masǝŋ ga yea tǝgbana woi jemma mai mo woora pitǝrla ɓǝǝ mo pǝ̃ǝra ka ga zyaŋ tǝ wee wǝǝre. 2Dappe kǝsyil ɓǝǝ ara pǝ tǝgwĩi, dappe laŋ ara ne yella. 3Ma tǝgwĩi woora pitǝrla ɓǝǝ ɓe, amma gera ne nǝm ya. 4Ma ne yella woora pitǝrla ɓǝǝra, woora nǝm ne koloba mor ah daŋ. 5Wee wǝǝ nǝn ge gwari ya, nǝm tǝŋ waa woi, so nwãhra nǝm daŋ.

6Ka kǝsyisuŋ joŋ ɓe, laara kyaŋ cii faa: Wee wǝǝ nyeeno, we pǝ̃ǝ we ge zyaŋ tǝl ah o. 7So woi matǝ jemma kpiŋra daŋ, tǝŋ zyeɓra pitǝrla ɓǝǝra. 8Ma tǝgwĩi faara nyi ma ne yella: We nyi nǝm nyi ru biŋ biŋ ɗao, mor pitǝrla ɓuu tǝ rummi. 9Ma ne yella zyiira faa: A'a, mor ka kii ru tǝkine we daŋ ya, pǝram we ge kanti ka we lea gŋ. 10So woi ma tǝgwĩi kalra ge cok lea nǝmmi, amma ne cok ah sǝ, wee wǝǝ ge dai. Woi matǝ dappe mo zyeɓra suu ɓǝǝ kaa ɓo ne ko, danra ge ɓǝr yaŋ ne ki. So zahfah coo.

11Fahfal ah woi maki ah ra kŋ so ge daira, ɓyaŋra ɓǝ faara: Dǝɓlii, Dǝɓlii, mo gbǝr zahfah nyi ru ɗao. 12Amma wee wǝǝ zyii ge zah ɓǝǝ faa: Me faa nyi we goŋga, me tǝ we ya. 13So Yesu faa nyi ra: We byakke, mor we tǝ zah'nan gin ah ne cok com ah ya.

Ɓǝ kikiŋ za yeɓ matǝ sai

(Lu 19:11-27)

14Ɓǝ ah ga yea tǝgbana dǝɓ mai mo tǝ ga gwǝǝre, so ɗii za yeɓ ah wom fan ah nyi ra. 15Nyi nyi zune daŋ nǝn mai moo gakko joŋ ne ko, nyi solai nyi dǝɓ ki dah dappe, nyi dǝɓ ki dah gwa, nyi dǝɓ ki laŋ dah vaŋno. So zol kalle. 16Dǝɓ yeɓ mai mo ɗǝǝ solai dah dappe, kal ge joŋ fillu ne ko, so lwaa reba ge gŋ dah dappe ta. 17Dǝɓ mai mo ɗǝǝ solai dah gwa laŋ ge joŋ nai ta, so lwaa reba ge gŋ dah gwa ta. 18Amma dǝɓ mai mo ɗǝǝ solai dah vaŋno ɓaŋ kal ge cii ge mor sǝr muŋ lak pah yeɓ ah gŋ.

19Fahfal ah pǝɗǝk kǝraɓ pah yeɓ ɓǝǝ ge dai, so kaa ka tǝŋ kee fan ne ra. 20Dǝɓ yeɓ mai mo ɗǝǝ solai dah dappe ge dai, ge ne solai maki ah mor jol dah dappe, faa: Dǝɓlii, mo nyi solai nyi me dah dappe, me so lwaa reba ge ɓo gŋ ne nyẽe dah dappe ta. 21Pah yeɓ ah zyii zah ah faa: A pǝsãhe, amo ye dǝɓ yeɓ masãh matǝ goŋga ahe, mo joŋ pǝsãh ne fan matǝ biŋ, me ga soɓ fan malii ah gai mo jolle. Mo ge o, ka mo laa pǝ'nyah ne me.

22Dǝɓ yeɓ mai mo ɗǝǝ solai dah gwa laŋ ge ta, faa: Dǝɓlii, mo nyi solai nyi me dah gwa. Me so lwaa reba ge ɓo gŋ ne nyẽe dah gwa ta. 23Pah yeɓ ah zyii zah ah faa: A pǝsãhe, amo ye dǝɓ yeɓ masãh matǝ goŋga ahe. Mo joŋ pǝsãh ne fan matǝ biŋ, me ga soɓ fan malii ah gai mo jolle. Mo ge o, ka mo laa pǝ'nyah ne me.

24So dǝɓ yeɓ mai mo ɗǝǝ solai dah vaŋno ge o ta, faa: Dǝɓlii, me tǝ ɓe, amo ye dǝɓ magaɓ ahe, amo cen fan pǝ cok mai mo ruu fan gŋ ya, amo tai fagwahl pǝ cok mai mo ɓaŋ nah fan ge ruu gŋ ya. 25Me ɗuu galle, me ɓaŋ lak ɓo ge muŋ mor sǝrri. Fan ɓo ko nyẽe sye. 26Pah yeɓ ah zyii zah ah faa: Amo dǝɓ yeɓ maɓe' ahe, mo vǝǝkoi. Amo tǝ ɓe, me cen fan pǝ cok mai me ruu fan gŋ ya, me tai fagwahl pǝ cok mai me ɓaŋ nah fan ge ruu gŋ ya. 27Mor fẽe mo ge kan lak ɓe gee me pǝ baŋ ka me pii soo ɓe, me ge ɓaŋ mah lak ɓe ne reba gŋ daŋ ya ne? 28We nyiŋ dah mai mo jol ah we nyi ge nyi dǝɓ mai mo ne dah jemma. 29Mor koo zune mo ne fanne, a so nyira gai gŋ faɗa, ka mo yeako ne pǝlli, amma dǝɓ mai mo ka ne fan ki ya, koo mai mo jol ah biŋ laŋ a ga nyiŋra. 30We ɓaŋ dǝɓ yeɓ maɓe' mai ɓoo ge pǝ cokfuu lalle, ka mo yeko yee gŋ tǝkine soŋ syelle.

Kiita ma fahfal tǝ lii

31Ne cok We Dǝfuu mo ga ge ne goŋ ah tǝkine angeloi ah daŋ, a ga kaa tǝ fakal goŋ ahe. 32Za sǝr daŋ a ga taira pel ahe, a ga cea ra gin wo ki tǝgbana pakǝpii moo cea pǝsǝ̃ǝ ne sǝgwiiri. 33A ga rǝk pǝsǝ̃ǝ nǝjokǝsãh ahe, a ga rǝk sǝgwii nǝjokǝlǝɓai ahe. 34So Goŋ ga faa nyi za mai mo jokǝsãh ahe: Awe za mai Pa ɓe mo ẽe we ɓo, we ge, we re goŋ mai mo zyeɓ ɓo mor ɓii daga tǝtǝŋ sǝrri. 35Mor ne cok me yea ne koŋne, we nyi farel nyi me re, me yea ne koŋ bii, we nyi bii nyi me zwǝ, ne cok me yea na gwǝǝre, we nyiŋ me yaŋ ɓiiri. 36Me yea ne suu kolle, we saa fan gee me wo suu, ne cok me yea ne syemme, we gbǝ syem ɓe, me yea pǝ daŋgai, we ge ẽe me gŋ. 37So za matǝ njaŋ ga zyiira zah ah faa: Dǝɓlii, ru kwo mo ne koŋ nekẽe ka ru nyi farel mo re ne? Wala ru lwaa koŋ bii i mo ɓo kẽe ka ru nyi bii mo zwǝ ne? 38Ru kwo mo na gwǝǝ nekẽe ka ru nyiŋ mo yaŋ ɓuu ne? Wala ne suu kolle, ka saa fan gai mo wo suu ne? 39Ru kwo mo ne syem wala pǝ daŋgai nekẽe ka ru ge ẽe mo gŋ ne? 40Goŋ ga zyii zah ɓǝǝ faa: Me faa nyi we goŋga, fan mai daŋ we joŋ wo welaŋ vaŋno kǝsyil wee pa ɓe marai fan ah we joŋ ɓo wo ɓe.

41So Goŋ ga faa nyi za ma jokǝlǝɓai ahe: Awe za mai tǝkẽawãk Masǝŋ mo tǝ ɓiiri, we zol gin wo ɓe, we ge cok wii ma ga tǝ lii mai mo zyeɓ ɓo mor Satan ne angeloi ah ra. 42Mor me yea ne koŋne, we nyi farel nyi me ya. Koŋ bii i me, we nyi bii me zwǝ ya. 43Ne cok me ye gwǝǝre, we nyiŋ me yaŋ ɓii ya. Me yea ne suu kolle, we saa fan gee me wo suu ya. Me yea ne syemme ne pǝ daŋgai, we ge ẽe me gŋ ya. 44So a ga zyiira zah ah faa: Dǝɓlii, ru kwo mo ne koŋne, wala ne koŋ bii, wala na gwǝǝre, ne suu kolle, ne syemme, wala pǝ daŋgai nekẽe ko ru gbah jol ɓo ya ne? 45Goŋ ga zyii faa nyi ra: Me faa nyi we goŋga, fan mai daŋ we ka joŋ wo welaŋ vaŋno kǝsyil wee pa ɓe marai ya, we joŋ wo ɓe ya ko sǝǝ ko. 46A ga pee ra ga pǝ cok bone ma ga tǝ lii, amma za matǝ njaŋ a gara pǝ cok lwaa cee ma ga lii.

Currently Selected:

MATEUS 25: MUAR

Highlight

Copy