MATEUS 23

Yesu lai za cuu ɓǝ lai ne Farisien

(Mk 12:38-39; Lu 11:43,46; 20:45-46)

1So Yesu faa ɓǝ nyi za tǝkine za syee mor ahe, 2faa: Za cuu ɓǝ lai ne Farisien a cuura ɓǝ lai Mosus. 3Ɓǝ mai mo tǝ cuura nyi we daŋ we laa ɓǝ ah tǝkine syee mor ɓǝ ahe, amma we kor fan joŋ ɓǝǝ ka, mor ka syeera mor ɓǝ mai moo cuura ya. 4A baŋra faswaa mayǝk ah kan ga tǝtǝl zana, amma ara ne suu ɓǝǝ ka zyii juura koo ne tǝwee jol laŋ ya. 5A joŋra fan daŋ mor ka za mo ẽere, a ŋwǝǝra cok ɗerewol rao zahpel tǝkine tǝsol jolle, a juura fan tǝ ɓal mbǝro ɓǝǝ pǝwahe. 6A 'yahra cok kal ma pel pǝ cok ren farel cok pãare, a kyeɓra cok kal matǝ nahnǝn za ɓǝr yaŋ kee ɓǝ Masǝŋ. 7A 'yahra za mo haozah wo ɓǝǝ pǝ cok tai zana, so ka za mo ɗii ra ne pa cuu fanne. 8Amma awe, we kyeɓ ka za mo ɗiira we ne pa cuu fan ka, mor awe daŋ we ye naa dǝǝ, awe ne Pa cuu fan ɓii vaŋno to. 9We ɗii dǝɓ vaŋno wo sǝr nyee ne pa ɓii ka, mor Pa ɓii a vaŋno to, ako ye Dǝɓ mai mo no coksǝŋ. 10We kyeɓ ka za mo ɗiira we ne dǝɓlii ka ta, mor awe ne Dǝɓlii vaŋno to, ako ye Kristu. 11Amma dǝɓ malii ah kǝsyil ɓii a ciŋ dǝɓ yeɓ ɓiiri. 12Dǝɓ mo yii suu ah ɓe, a ga yea pǝlaŋne. Dǝɓ mo joŋ suu ah pǝlaŋ ɓe, a ga yea pǝ'manne.

Yesu faa ɓǝ tǝ ɓǝ vǝrvǝr za cuu ɓǝ lai ne Farisien

(Mk 12:40; Lu 11:39-42,44,52; 20:47)

13Ɓǝ gaɓ tǝ ɓii za cuu ɓǝ lai ne Farisien, za tǝ vǝrvǝrri! Awe coo zahfah Goŋ Masǝŋ pel zana, awe ne suu ɓii we zyii dan gŋ ya, so za mai mo tǝ 'yahra ka danne, we cak ra.

[14Ɓǝ gaɓ tǝ ɓii za cuu ɓǝ lai ne Farisien, za tǝ vǝrvǝrri! Mor awe nyiŋ fan jol ŋwǝǝ wulli, so we juupel liilii ka za mo ẽere. Mor ahe, we ga lwaa kiita pǝ'manne.]

15Ɓǝ gaɓ tǝ ɓii za cuu ɓǝ lai ne Farisien, za tǝ vǝrvǝrri! Mor we kyãh pǝ sǝr camcam tǝkine syee tǝ bii daŋ mor ka kyeɓ dǝɓ vaŋno ka nyiŋ ɓǝ ɓiiri. We lwaa dǝɓ ah ɓe, we so joŋ ko ciŋ dǝɓ cok wii kal we zahlǝŋ gwa.

16Ɓǝ gaɓ tǝ ɓii za gban sǝguu rǝ̃ǝ! Awe cuu fan faa: Dǝɓ mo haa zah ne yaŋ Masǝŋ ɓe, ɓǝ ki ka tǝ dǝɓ ah ya, amma dǝɓ mo haa zah ne vãm kaŋnyeeri ma ɓǝr yaŋ Masǝŋ ɓe, sai mo joŋko fan mai mo haa zah ne ɓǝ ahe. 17Awe tǝgwĩi, we rǝ̃ǝ, a fẽe ye pǝyǝk kal ki ne? Vãm kaŋnyeeri ah ye ne? Wala yaŋ Masǝŋ ma joŋ vãm kaŋnyeeri ah daŋdaŋ ye ne? 18Awe so cuu fan we faa: Dǝɓ mo haa zah ne cok joŋ syiŋ ɓe, ɓǝ ki ka tǝ dǝɓ ah ya, amma mo haa zah ne fan joŋ syiŋ ah mo tǝ cok joŋ syiŋ ɓe, ka ɓǝ no tǝ dǝɓ ahe. 19Awe ye rǝ̃ǝ. A fẽe ye pǝyǝk kal ki ne? Fan joŋ syiŋ ah ye ne? Wala cok joŋ syiŋ ah ma joŋ fan joŋ syiŋ ah daŋdaŋ ye ne? 20Dǝɓ mo haa zah ne cok joŋ syiŋ ɓe, ka haa zah ɓo ne fan mai mo tǝ cok joŋ syiŋ ah daŋ. 21Dǝɓ mo haa zah ne yaŋ Masǝŋ ɓe, ka haa zah ɓo ne yaŋ Masǝŋ tǝkine Masǝŋ mo kaa ɓo gŋ daŋ. 22Dǝɓ mo haa zah ne coksǝŋ laŋ, ka haa zah ɓo ne fakal Masǝŋ tǝkine Masǝŋ mo kaa ɓo tǝl ah daŋ.

23Ɓǝ gaɓ tǝ ɓii za cuu ɓǝ lai ne Farisien, za tǝ vǝrvǝrri! Awe nyi patǝ jemma fan gbãh tǝgbana kulpǝrri, makulli, tǝkine ɓeekãh nyi Masǝŋ, amma awe soɓ ɓǝ mayǝk ah ra mo pǝ ɓǝ lai, tǝgbana njaŋ, kwan syakke, tǝkine iŋni. We joŋ fan ma ŋhaako, amma we soɓ joŋ maki ah ra nǝkah ka ta. 24Za gban sǝguu rǝ̃ǝ, awe zǝǝ vovok tǝ fazwan ɓii ga lalle, amma we sǝ̃ǝ njoŋnjoŋ.

25Ɓǝ gaɓ tǝ ɓii za cuu ɓǝ lai ne Farisien, za tǝ vǝrvǝrri! Mor we vãh fahfal tahsah ne ŋhǝǝre, amma kǝɓǝr ɓǝǝ ɓǝ kaafuu baa ɓo gŋ gǝɓ ne hǝram daŋ. 26Farisiyo, rǝ̃ǝ, mo vãh ɓǝr ŋhǝǝ zwan fan ɓo kǝpelle, ka kǝlal ah laŋ mo yea pǝsãhe.

27Ɓǝ gaɓ tǝ ɓii za cuu ɓǝ lai ne Farisien, za tǝ vǝrvǝrri! Mor awe tǝgbana pal ma rwãh ne pǝɗama, kǝlal ah a kwan pǝsãhe, amma kǝɓǝr ah woiŋ wul baa ɓo gŋ gǝɓ tǝkine fan ma ren njẽa dǝɓ daŋ. 28Awe laŋ we nai ta, wo suu ɓii lal we cuu suu ɓii nyi za na za matǝ njaŋ, amma pǝzyil ɓii vǝrvǝr baa ɓo gŋ gǝɓ ne ɓǝɓe' daŋ.

29Ɓǝ gaɓ tǝ ɓii za cuu ɓǝ lai ne Farisien, za tǝ vǝrvǝrri! Mor awe vuu pal profetoen, we zyeɓ pal za matǝ njaŋ ah ra pǝsãhe. 30We so faa: Kǝnah ru no wo sǝr ne cok zah'nan mǝ pa ɓuu lii ra ɓe, ru ka tai zah ne ra ka ik profetoen pǝ wul a. 31Ne ɓǝ faa ɓii mai we tǝ suu ɓii ɓe, awe ye wee za ma ik profetoen pǝ wulli. 32We ge joŋ tǝcoŋ yeɓ mai pa ɓii lii mo tǝŋra mor joŋ ah soɓ ɓo kahfah vǝr o. 33Awe soo, awe wee sooyii! we gak foo ɓǝ ka ɗuu ǝ̃ǝ kiita cok wii ɗǝne? 34Mor ahe, me ga pee profetoen ne za tan fanne, tǝkine za cuu fan ge wo ɓiiri. We ga ik za ki pǝ wulli, we ga ɓaa za ki ga wo kpuu, we ga loɓ za ki laŋ ne bǝrǝǝ ɓǝr yaŋ kee ɓǝ Masǝŋ ɓiiri, we ga kyãh foo mor ɓǝǝ yaŋ maki ah ga yaŋ ki, 35mor ka kiita syim za matǝ njaŋ mai mo ɗuu tǝ sǝr nyee daŋ mo ge tǝ ɓiiri, tǝŋ daga wul Abel dǝɓ matǝ njaŋ, ŋhaa dai Zakarias we Berekia mai we i ko pǝ wul kǝsyil yaŋ Masǝŋ ne cok joŋ syiŋrĩ. 36Me faa nyi we goŋga, kiita fan mai mo joŋra daŋ a ga ge tǝ za ma zah'nan tǝ'nahko.

Yesu swaa ɓǝ tǝ yaŋ Jerusalem

(Lu 13:34-35)

37Jerusalem, Jerusalem, amo ik profetoen pǝ wulli, mo ɓaa za mai Masǝŋ moo pee ra gin wo ɓo ne tǝsalle. Ɓal kǝɗǝne ɓe me kyeɓ ka tai za ɓo gin wo ɓe tǝgbana ma kãh moo tai wee ah ga mor yee ahe, amma we zyii ya. 38We ẽe, yaŋ ɓii ga ciŋ fǝl kolle. 39Mor me tǝ faa nyi we goŋga, daga zǝzǝ̃ǝko we ka fǝ̃ǝ kwo me yao, ŋhaa ga dai zah'nan mai we ga faa: Masǝŋ mo ẽe Dǝɓ mai mo tǝ gin pǝ tǝɗii Dǝɓlii.

Currently Selected:

MATEUS 23: MUAR

Highlight

Copy