MATEUS 20

Ɓǝ kikiŋ za yeɓɓe

1Mor Goŋ Masǝŋ a tǝgbana pah yaŋ mai mo pǝ̃ǝ ne zah'nan pim ka ga kyeɓ za ka ga joŋ yeɓ pǝ 'wah ahe. 2Gbǝ zah ne ra ka soo ra zah'nan daŋ solai vaŋno vaŋno, so pee ra kal ge pǝ 'wah ahe. 3So pǝ̃ǝ ne cok com doraŋ ma ne zah'nanne, kwo za ki haira ɓo pǝ cok luma tǝkol bai yeɓɓe. 4Faa nyi ra: Awe laŋ we ge joŋ yeɓ pǝ 'wah ɓe ta, me ga soo we ne fahlii ah pǝsãhe. 5So zol kalra ge gŋ. Pah 'wah so pǝ̃ǝ ne cok com jemma tǝ gwa faɗa, so pǝ̃ǝ ne cok com sai ma ne lilli, faa nyi zan ah nai ta. 6Fahfal ah so pǝ̃ǝ ne cok com dappe ma ne lilli, ge lwaa za ki haira ɓo pǝ cok luma kpǝ. Fii ra faa: We gin hai nyee zah'nan daŋ tǝkol bai joŋ yeɓ mor fẽene? 7Zyiira faa nyi ko: Mor za ki fii ru ne yeɓ ɗǝ ya. So faa nyi ra: We ge joŋ yeɓ pǝ 'wah ɓe ta.

8Ne cok lil mo joŋ o, pah 'wah faa nyi swah yeɓ ahe: Mo ɗii za yeɓ ge ka mo soo lak ɓǝǝ o, mo tǝŋ soo ah gin tǝ za ma gin fahfalle, ŋhaa ka mo ge dai za ma kǝpel ne ko. 9Za mai mo gera tǝ yeɓ ne cok com dappe ma ne lilli ɗǝǝra solai vaŋno vaŋno daŋ. 10Ne cok za ma kǝpel mo gera, lǝŋra ru ga ɗǝǝ kal tǝ maiko, amma soora ra solai vaŋno vaŋno ta. 11Ne cok mo ɗǝǝra ge jol naiko, so tǝŋ kyãhra ɓǝ nyee wo pah 'wahe, 12faara: Za mai mo gera fahfal joŋra yeɓ cok com vaŋno to, so mo soo ra zahki ne ru za mai ru joŋ yeɓ zok com wõi, ru gaɓ ŋhaa com i ru ta. 13Amma pah 'wah zyii zah dǝɓ ki kǝsyil ɓǝǝ faa: Bai ɓe, me re mo ya, amo gbǝ zah ne me tǝ ɓǝ solai vaŋno ya ne? 14Mo ɓaŋ fan ɓo mo gyo. Amma me 'yah ka nyi nyi dǝɓ ma gin tǝ yeɓ fahfal lii tǝgbana ma ɓo ta. 15Me ka ne fahlii ka joŋ fan ne lak ɓe tǝbgana me 'yah ya ne? Wala zahzyil sye mo ɓo tǝ ɓǝ fan mai me nyi ɓo nyi za ki ko ne? 16So Yesu faa: Za mai ara mo ye za ma fahfalle a ga ciŋra za ma pelle, za mai ara mo ye za pelle a ga ciŋra za fahfalle.

Yesu faa ɓǝ wul ah ne ɓǝ ur ah ɓal sai ahe

(Mk 10:32-34; Lu 18:31-34)

17Ne cok ka Yesu tǝ ga yaŋ Jerusalem, woo za syee mor ah matǝ jemma tǝ gwa ne ki to, faa ɓǝ nyi ra tǝ fahlii ne ganne: 18We ẽe, na tǝ ga yaŋ Jerusalem, a ga soɓra We Dǝfuu ga jol zaluu za joŋzahsyiŋrĩ, tǝkine jol za cuu ɓǝ lai. A ga ŋgoŋra kiita wul tǝl ahe. 19So a ga soɓra ko ga jol za mai mo ye ka Yahuduen a, a ga syakra ko, a ga loɓra ko ne bǝrǝǝ, a ga ɓaara ko ga wo kpuu. Amma ne zah'nan sai ah a ga ur gin pǝ wulli.

Mah Yakuɓ ne Yohana fii Yesu

(Mk 10:34-45)

20So mah wee Zebedeus woo wee ah ge wo Yesu ne ko, kea ge sǝŋ pel ah ka fii fanne. 21Yesu fii ko: Mo 'yah fẽene? Mawin zyii faa: Me 'yah ka mo kaa goŋ ɓe, mo nyi fahlii nyi wee ɓe matǝ gwa rai ka dǝɓ vaŋno mo kaa jokǝsãh ɓo, dǝɓ maki ah mo kaa jokǝlǝɓai ɓo. 22Yesu zyii faa: Awe tǝ fan mai we tǝ fii ya. We gak ka zwan bone mai me tǝ ga zwǝ ne? Zyiira faa: Ru gakke. 23So Yesu faa nyi ra: Pǝsãhe, we ga zwǝ bone sye no, amma ɓǝ kaa jokǝsãh ɓe tǝkine kaa jokǝlǝɓai ɓe ɓǝ ah ɓǝ ɓe ye ka, cok ah a mor za mai Pa ɓe mo zyeɓ ɓo mor ɓǝǝra.

24Ne cok za syee mor ah matǝ jemma mo laara ɓǝ ahe, ɓaŋra kpãh ne wee mawin matǝ gwa ko. 25So Yesu ɗii ra ge wol ah daŋ faa nyi ra: We tǝ ɓe, za goŋ sǝr a kaara tǝ za ɓǝǝ ne swahe, zaluu ɓǝǝ a yeara tǝtǝl ɓǝǝ pǝyǝkki. 26Amma ɓǝ ah ka yea kǝsyil ɓii nai ya. Jeertǝ dǝɓ ki kǝsyil ɓii mo 'yah ka yea dǝɓlii ɓe, mo ciŋko dǝɓ yeɓ ɓiiri. 27Dǝɓ mo 'yah ka yeako dǝɓ ma pel kǝsyil ɓii ɓe, mo ciŋko byak ɓiiri. 28Nai ta, We Dǝfuu ge ka za mo joŋra yeɓ mor ah ya, amma ge ka joŋ mor zana, tǝkine nyi cee ah mor ka wǝǝ za pǝlli.

Yesu gbǝr nahnǝn nyi rǝ̃ǝ gwa

(Mk 10:46-52; Lu 18:35-43)

29Ne cok mo tǝ pǝ̃ǝra gin yaŋ Jeriko, za pǝlli syeera mor Yesu. 30Rǝ̃ǝ gwa haira ɓo kah fahlii, laara Yesu tǝ pǝ̃ǝni, so ɓyaŋra ɓǝ faa: Dǝɓlii We David, mo kwo syak tǝ ɓuuru. 31Za cakra ra ka mo faara ɓǝ ka, amma so ɓyaŋra ɓǝ ne swah kal ma kǝpel faara: Dǝɓlii We David, mo kwo syak tǝ ɓuuru. 32Yesu uuni, so ɗii ra, fii: We 'yah me joŋ fẽe nyi we ne? 33Zyiira faa nyi ko: Dǝɓlii, ru 'yah ru kwo cokki. 34Yesu kwo syak tǝ ɓǝǝ juu nahnǝn ɓǝǝra. Ne pel sǝ kalra ne kwan cokki, so syeera kal ne Yesu.

Currently Selected:

MATEUS 20: MUAR

Highlight

Copy