MATEUS 13

Ɓǝ kikiŋ dǝɓ ma ruu fanne

(Mk 4:1-9; Lu 8:4-8)

1Com moo ta Yesu pǝ̃ǝ gin yaŋ kal ge kaa zahbii. 2Za taira ge wol ah pǝlli. So Yesu yee kaa pǝ dahe, za daŋ uura zahgeere. 3Faa ɓǝ nyi ra ne ɓǝ kikiŋ camcam pǝlli, faa:

Dǝɓ ma ruu fan kal ge cok ruu fanne. 4Ne cok mo tǝ ruuni, nah ah manyeeki myah ge kah fahlii, juu ge sǝ̃ǝra. 5Manyeeki ah myah ge tǝgǝǝ tǝsalle, cok ah sǝr ka gŋ pǝlli ya, ciŋ gwari, mor sǝr ka gŋ pǝyǝk ya. 6Amma ne cok com mo coo pǝlli o, so rẽeni, yakke, mor sǝ̃ǝ ah ge sǝŋ pǝɗǝk ya. 7Manyeeki ah myah ge cok mai waa mo gŋ. Waa ah giŋ cak zah ahe, byaŋ ya. 8Manyeeki ah myah ge tǝ sǝr masãhe, ciŋ giŋ pǝ'manne, bem pǝsãhe, nǝn ah maki ah temere, maki ah jemma jemma yea, maki ah jemma jemma sai. 9So Yesu faa nyi ra: We ne sok laa ɓǝ no ɓe, we laa.

Mor fẽe Yesu faa ɓǝ ne ɓǝ kikiŋ ne?

(Mk 4:10-12; Lu 8:9-10)

10Za syee mor Yesu gera wol ah fiira ko: Mor fẽe mo faa ɓǝ nyi ra ne ɓǝ kikiŋ ne? 11Yesu zyii faa nyi ra: Ma ɓii Masǝŋ nyi fahlii nyi we ka tan ɓǝ tǝsyeɓ Goŋ ahe, amma ma ɓǝǝ nyi nyi ra ya. 12Mor koo zune mo no ne fanne, a so ɗǝǝ ga gŋ faɗa, mor ka mo yea ne pǝlli. Amma dǝɓ mai mo ka ne fan ki ya, koo mai mo no jol ah biŋ laŋ a ga nyiŋra. 13Mor ah me tǝ faa ɓǝ nyi ra ne ɓǝ kikiŋ, mor a ẽera, amma ka kwanra ya, a syiira sokki, ka laara ya, ka tanra mor ɓǝ ah ya ta. 14Ɓǝ mai profeto Esaia mo faa joŋ wo ɓǝǝ ɓe:

Masǝŋ faa: We ga laa ɓǝ, amma we ka tǝ mor ah ya,

We ga ẽe ɓǝ ahe, amma we ka ga kwo ya.

15Mor zahzyil za mai wǝ ɓe,

Sok ɓǝǝ laŋ zyǝŋ ɓe.

Rãhra nahnǝn ɓǝǝ ɓo,

Mor ka nahnǝn ɓǝǝ mo kwo cok ka,

Ka sok ɓǝǝ mo laa ɓǝ ka,

Ka zahzyil ɓǝǝ laŋ mo foo ɓǝ ka mo pii soora ge me laɓ ra ya.

16Amma ma ɓii a pǝ'nyah wo ɓiiri, mor nahnǝn ɓii tǝ kwanne, sok ɓii laŋ a laa ɓǝ. 17Me tǝ faa nyi we goŋga, profetoen pǝlli tǝkine za Masǝŋ pǝlli kyeɓra ne swah ka kwan fan mai we tǝ kwan zǝzǝ̃ǝko, amma lwaara kwo ya, kyeɓra ka laa ɓǝ mai we tǝ laani, amma lwaara laa ya.

Yesu cuu mor ɓǝ kikiŋ dǝɓ ma ruu fanne

(Mk 4:13-20; Lu 8:11-15)

18We laa mor ɓǝ kikiŋ dǝɓ ma ruu fanne. 19Ne cok za mai mo tǝ laa ɓǝ Goŋ Masǝŋ, amma mo tǝra mor ɓǝ ah ya ɓe, ara tǝgbana kah fahlii mai nah fan mo myah ge gŋ. Satan a gin ɓaŋ ɓǝ mai mo ruu ɓo pǝ zahzyil ɓǝǝra. 20Za ki ara tǝgbana cok tǝsal mai nah fan mo myah ge gŋ, a laara ɓǝ ahe, a nyiŋra gwari, tǝkine laa pǝ'nyahre, 21amma ka yea ne sǝ̃ǝ pǝ zahzyil ɓǝǝr a, a nǝnra ne ɓǝ ah nje, amma ne cok ɓǝ gaɓ tǝkine bone mo ge lwaa ra mor ɓǝ Masǝŋ ɓe, a soɓra ɓǝ ah gwari sǝ. 22Mai mo myah ge pǝ cok mai waa mo gŋ, ara ye za mai mo laara ɓǝ ahe, amma foo ɓǝ fan sǝr ma tǝ'nahko tǝkine cwaa lakre, a cak ɓǝ faa Masǝŋ, ka lwaa byaŋ ya. 23Ma myah tǝ sǝr masãhe, ara ye za mai moo laara ɓǝ ahe, so moo nyiŋra, a byaŋni, nǝn ah maki ah temere, maki ah yea jemma yea, maki ah jemma sai.

Ɓǝ kikiŋ bǝǝlee

24Yesu faa ɓǝ kikiŋ maki ah nyi ra: Goŋ Masǝŋ a tǝgbana dǝɓ ma ruu nah fan masãh ah pǝ 'wah ahe. 25Amma ne cok za mo nwãhra nǝmmi, pa syiŋ ah ge lal ruu bǝǝlee kǝsyil sor ahe, so jin kalle. 26Amma ne cok sor ah mo ciŋ, giŋ byaŋ, bǝǝlee laŋ cem suu ta. 27Za yeɓ pah 'wah gera wol ahe, faara nyi ko: Dǝɓlii, mo ruu nah fan masãh ah pǝ 'wah ɓo, amma bǝǝlee gee kẽe ge ne? 28Zyii faa nyi ra: Pa syiŋ ɓe ye lal ge ruu ɓo. Za yeɓ so fiira ko: Mo 'yah ru ge cee bǝǝlee ah ge lal no ne? 29Amma zyii faa: A'a, mor we ge tǝ cee ɓe, we zyak cee sor masãh ah mor ahe. 30We soɓ ra yea zahki gwa daŋ ŋhaa gwahl cen sor mo ge. Ne cok ah me ga faa nyi za yeɓ ma cen sor we cee bǝǝlee kǝpelle, ka we bam ne sǝŋ ah camcam ka ɓaa wii nyi, amma ka we tai sor gee me cel ɓe.

Ɓǝ kikiŋ nah foore

(Mk 4:30-32; Lu 13:18-19)

31Yesu faa ɓǝ kikiŋ maki ah nyi ra faa: Goŋ Masǝŋ a tǝgbana nah foore, dǝɓ moo ɓaŋ ruuni. 32Nah ah a pǝnyee kal nah fan daŋ, amma mo ciŋ ɓe, a giŋ pǝ'man kal fan mai za moo ruu daŋ, a ciŋ kpuu malii ahe. Juu ma zoo sǝŋ a gin gbahra kol tǝ jol ah ra.

Ɓǝ kikiŋ fan mbǝ̃ǝre

(Lu 13:20-21)

33Yesu faa ɓǝ kikiŋ maki ah nyi ra: Goŋ Masǝŋ a tǝgbana fan mbǝ̃ǝ mai mawin mo ɓaŋ rǝk ge pǝ sum mai mo lii ɓo tahsah sai, sãa ne ko, ŋhaa ka sum ah daŋ mo urri.

Yesu faa ɓǝ ne ɓǝ kikiŋ

(Mk 4:33-34)

34Yesu faa ɓǝ daŋ ne ɓǝ kikiŋ nyi zana, ka faa ɓǝ nyi ra bai ɓǝ kikiŋ ya. 35A joŋ nai mor ka baa ɓǝ mai mo faa ɓo ne zah profeto Masǝŋ:

Me ga faa ɓǝ nyi ra ne ɓǝ kikiŋ,

Me ga cuu fan tǝsyeɓ mai mo yea muŋ ɓo daga tǝtǝŋ mor sǝrri.

Yesu cuu mor ɓǝ kikiŋ bǝǝlee

36So Yesu ur soɓ zana, kal ge yaŋ. Za syee mor ah gera wol ah faara nyi ko: Mo cuu mor ɓǝ kikiŋ bǝǝlee pǝ 'wah kŋ nyi ru ɗao. 37Yesu zyii faa nyi ra: Dǝɓ ma ruu nah masãhe, ako We Dǝfuu. 38'Wah ahe, ako ye sǝrri, nah masãh ah laŋ ako ye za Masǝŋ, bǝǝlee ah ra laŋ ako ye za Satan. 39Pa syiŋ ma lal gin ruu bǝǝlee ako ye Satan, gwahl ahe, zah'nan vǝr sǝr o, za ma cen sor ahe, angeloi yo. 40Tǝgbana moo ga ceera bǝǝlee ka ɓaa wii nyi, a ga joŋ ne zah'nan vǝr sǝr nai ta. 41We Dǝfuu ga pee angeloi ah ra, a ga syenra zah za ma joŋ faɓe' tǝkine za ma zyakra za pǝ Goŋ ah ga lalle, 42a ga rǝkra ra ga pǝ mabǝlaowii, a ga yera yee gŋ tǝkine soŋ syelle. 43Amma za matǝ njaŋ ah ga sǝǝra pǝ Goŋ Pa ɓǝǝ tǝgbana comme. We ne sok laa ɓǝ no ɓe, we laa.

Ɓǝ kikiŋ lak ma muŋ pǝ 'wahe

44So faɗa, Goŋ Masǝŋ a tǝgbana lak mai mo muŋ ɓo pǝ 'wah mor sǝrri. Dǝɓ ki ge lwaa, so zyeɓ muŋ ah pǝsãhe, laa pǝ'nyah pǝlli, so kal ge lea fan ne fan ah daŋ, pii soo ge lee 'wah ahe.

Ɓǝ kikiŋ fãi

45So faɗa, Goŋ Masǝŋ a tǝgbana dǝɓ ma kyãh lee fan mai mo tǝ kyeɓ fãi masãh ah ra. 46Ne cok mo ge lwaa fãi vaŋno mai lee ah mo pǝsyemme, kal ge lea fan ne fan ah daŋ, so ge lee fãi ahe.

Ɓǝ kikiŋ jinni

47So faɗa, Goŋ Masǝŋ a tǝgbana jin mai dǝɓ moo kǝr pǝ bii, a cak zahban syiŋ camcam daŋ. 48Ne cok jin ah mo cak syiŋ ɓe, za gban ah a kǝrra gin zahgeere, so a kaara syen syiŋ masãh ah rǝk ga pǝ woŋ a myahra maɓea ah ga lalle. 49A ga joŋ ne zah'nan vǝr sǝr nai ta, angeloi ga gera, a woŋra kǝsyil za maɓe' ne za masãhe. 50A ga rǝkra za maɓe' ga pǝ mabǝlaowii, a ga yera yee gŋ tǝkine soŋ syelle.

Joŋ mafuu ne matãa

51So Yesu fii ra: We laa mor ɓǝ mai daŋ ɓe ne? Zyiira faa: Oho. 52Yesu so faa nyi ra: Koo zune mo ye pa cuu ɓǝ lai daŋ mo so ciŋ dǝɓ syee mor Goŋ Masǝŋ ɓe, ka a tǝgbana pah yaŋ mai moo lwaa fan mafuu tǝkine fan matãa pǝzyil joŋ ah mo kan ɓo moo woo pǝ̃ǝ ne ko.

Za yaŋ Nazaret nyiŋra Yesu ya

(Mk 6:1-6; Lu 4:16-30)

53Ne cok Yesu mo vǝr faa ɓǝ kikiŋ ah ra, so ur gin gŋ kal ge yaŋ mai mo joŋ dǝɓlii gŋ. 54Ne cok mo ge dai gŋ, so tǝŋ cuu ɓǝ nyi ra ɓǝr yaŋ kee ɓǝ Masǝŋ ɓǝǝra. Za mai mo laara ɓǝ faa ah daŋ so kaara tǝ ɓǝ ah gǝriŋ faara: Dǝɓ mai lwaa fatan mai kẽne? A gak joŋ dǝǝbǝǝri marai ɗǝne? 55We pa zyeɓ kpuu ye ka ko ya ne? Ka ɗii mam ne Maria ya ne? Wee mah ah mawǝǝ ye ka Yakuɓ ne Yuseɓ, Simon ne Yudas ya ne? 56Wee mah ah maŋwǝǝ laŋ kaara ɓo ka kǝsyil man nyee ya ne? Gak lwaa fan mai daŋ ge kẽne? 57Ɓǝ mai joŋ ra zyii nyiŋra ko ya. So Yesu faa nyi ra: Ka syẽara profeto Masǝŋ pǝ cok maki ah ra ya, sai a syẽara ko yaŋ byaŋ ah tǝgǝǝ zum ahe. 58Joŋ dǝǝbǝǝri gŋ biŋ to, mor ka tǝ nyiŋra ko ya.

Currently Selected:

MATEUS 13: MUAR

Highlight

Copy