MATEUS 11

Zapee Yohana ma joŋ baptisma

(Lu 7:18-35)

1Ne cok Yesu mo vǝr ɓǝ mai mo tǝ faa nyi za syee mor ah matǝ jemma tǝ gwa, so ur gin gŋ kal ge cuu fan tǝkine cuu Ɓǝ'nyah yaŋ maluu pǝ sǝr ahe. 2Amma Yohana ma joŋ baptisma mo pǝ daŋgai laa ɓǝ yeɓ Yesu mo tǝ joŋni. So pee za ki kǝsyil za syee mor ah ge wo Yesu, 3mor ka fii ko: Amo ye dǝɓ mai ru tǝ byak gin ah ne? Wala ru tǝ byak dǝɓ ki ne? 4Yesu zyii faa nyi ra: We gyo, we ge kee ɓǝ fan mai we laa ne mai we kwo nyi Yohana. 5Rǝ̃ǝ kwanra cokki, lem syeera, tǝkpiŋ laɓra, lǝr laara sokki, wul syemra, a cuura Ɓǝ'nyah nyi za syakke. 6A pǝ'nyah wo dǝɓ mai me ka yea na fan joŋ ko ɓee tǝ ɓal a.

7Ne cok za syee mor Yohana mo tǝ gara o, Yesu tǝŋ faa ɓǝ Yohana nyi zana: We kal ga ẽe fẽe cok ne? Wala we ga ẽe var zyak moo laŋ ne? 8We ga ẽe fẽe gŋ sye kpak ne? We ga ẽe dǝɓ ma ɓoo mbǝro mayǝk ah gŋ ne? Amma za ma ɓaara mbǝro mayǝk ah a yeara yaŋ goŋ ne ko. 9Amma we ga ẽe fẽe sye ne? We ga mor ẽe profeto Masǝŋ ne? Oho, me tǝ faa nyi we, ako kal tǝ profeto Masǝŋ ɓe. 10Mor Yohana, ako ye dǝɓ mai Ɗerewol mo faa ɓǝ ahe: Masǝŋ faa, we ẽe ɗǝ, me tǝ pee papee ɓe ga pel ɓo mor ka zyeɓ fahlii nyi mo. 11Me faa nyi we goŋga, kǝsyil dǝfuu mai ŋwǝǝ mo bem daŋ dǝɓ ma kal Yohana ma joŋ baptisma ne yǝk kǝka, amma dǝɓ mai mo pǝlaŋ pǝ Goŋ Masǝŋ pǝyǝk kal ko ɓe. 12Daga zah'nan Yohana ma joŋ baptisma mo tǝ cuu ɓǝ, ŋhaa ge dai zǝzǝ̃ǝko Goŋ Masǝŋ a na ma dandanna, za ma dan ah a nyiŋra ne swahe. 13Mor profetoen tǝkine ɓǝ lai Mosus daŋ faara ɓǝ Goŋ Masǝŋ ŋhaa ge dai zah'nan Yohana. 14We 'yah nyiŋ ɓǝ ah no ɓe, Yohana, ako ye Elias mai mo tǝ ginni. 15We ne sok no ɓe, we laa ɓǝ ah pǝsãhe.

16Me ga lii za ma zah'nan tǝ'nah mai ne fẽene? Ara tǝgbana wee nyee mai moo kaara pǝ luma moo ɓyaŋra ɓǝ wo ki faa: 17Aru ul jak nyi we, we zyii ka dǝdaa ya, ru ɗǝǝ lǝŋ wul nyi we, so we zyii yeyee ya. 18Mor Yohana ge, ka ren fan a, ka zwan bii lee kpuu vin a ta, faara: Coksyiŋ tǝl ahe. 19So We Dǝfuu ge ɓe, a ren fanne, a zwan fanne, so a faara: We ẽe dǝɓ mai a foo ɓǝ farel tǝkine fazwan to, bai ah ra ye za sǝǝ fan ne za faɓe'. Amma fatan Masǝŋ cuu goŋga ah ge ɓo lal ne yeɓ ah ra.

Yaŋ mai mo zyii nyiŋra ɓǝ faa Yesu ya

(Lu 10:13-15)

20So Yesu faa ɓǝ tǝ yaŋ mai mo joŋ dǝǝbǝǝri gŋ pǝlli, mor za yaŋ ah zyii toora bii ya, faa: 21Ɓǝ gaɓ tǝtǝl ɓo yaŋ Korazin, ɓǝ gaɓ tǝtǝl ɓo yaŋ Betsaida. Mor dǝǝbǝǝri mai mo joŋra ɓo yaŋ ɓii mo joŋ kǝnah ɓo yaŋ Tirus ne Sidon ɓe, ka zan ah toora bii ne ɓaa mbǝro dahsuu tǝkine woo sãh rǝk ga tǝtǝl ɓe. 22Amma me faa nyi we, ne zah'nan kiita ɓe, Masǝŋ ga ŋgoŋ kiita tǝ ɓii pǝgaɓ kal Tirus ne Sidon. 23Amo yaŋ Kapernaum, mo lǝŋ mo yea pǝyǝk nai ŋhaa ga dai coksǝŋ ne? Mo ga lee ga sǝŋ ŋhaa mo ga pǝ cok mai za wul mo gŋ. Mor dǝǝbǝǝri mai mo joŋra wo ɓo, mo joŋ kǝnah ɓo wo Sodoma ɓe, yaŋ ah a yea ma ŋhaa tǝ'nahko. 24Amma me faa nyi we, ne zah'nan kiita ɓe, Masǝŋ ga ŋgoŋ kiita tǝ ɓo pǝgaɓ kal yaŋ Sodoma.

We ge wo ɓe ka we 'yakke

(Lu 10:21-22)

25Ne cok ah Yesu faa: Daddǝ, Dǝɓlii sǝŋ tǝkine sǝrri, me joŋ osoko nyi mo, mor mo cuu fan mai mo muŋ ɓǝ ah ɓo wo za fatan ne za ma ne tǝtǝl daŋ nyi za mai mo feera fan ki ya. 26Oho Daddǝ, fan ah joŋ nai mor mo ye 'yah ɓo.

27Pa ɓe nyi fan daŋ ɓo nyi me. Dǝɓ ma tan Wel kǝka sai Pam to, dǝɓ ma tan Pam kǝka sai Wel to, tǝkine dǝɓ mai Wel mo 'yah cuu nyi ko.

28Awe za mai we ɓaŋ faswaa mayǝk gaɓ ɓo ne daŋ, we ge wo ɓe, me ga nyi 'yak nyi we. 29We ɓaŋ kpuu zahsol ma ɓe kan ge tǝ ɓiiri, we ge fee fan wo ɓe, mor ame pǝ'nyahre, zahzyil ɓe a 'wa, we ga lwaa cok 'yak pǝ zahzyil ɓiiri. 30Mor kpuu zahsol mai me tǝ ga nyi we ka ɓaŋni, ka pǝgaɓ ya, faswaa ɓe ka pǝyǝk ya.

Currently Selected:

MATEUS 11: MUAR

Highlight

Copy