LUKAS 7

Yesu laɓ dǝɓ yeɓ swah sooje Romanen

(Mt 8:5-13)

1Ne cok Yesu mo faa ɓǝ mai daŋ nyi za vǝr o, so kal ge Kapernaum. 2Swah sooje Romanen no gŋ a no ne dǝɓ yeɓ mai moo 'yah ko pǝlli, dǝɓ ah ne syemme, tǝ yah wun gwari. 3Ne cok swah sooje mo laa ɓǝ Yesu, so pee za ki kǝsyil zaluu Yahuduen wol ah ka mo ge laɓko dǝɓ yeɓ ahe. 4Zaluu Yahuduen gera wo Yesu, pǝǝra ko faa: Dǝɓ ah kii nǝn pǝkoŋ ka mo gbah jol ah ɓe. 5Mor dǝɓ ah a 'yah za ɓuu no cam, vuu yaŋ kee ɓǝ Masǝŋ nyi ru ta. 6So Yesu ur kal ge ne ra. Ge gwari ne yaŋ dǝɓ ahe, so dǝɓ ah pee bai ah ra ge wo Yesu faa: Dǝɓlii, mo gaɓ suu ɓo ge kao. Mor me kii nǝ pǝ koŋ mai ka mo dan ge yaŋ ɓe ya. 7Mor maiko me kwo suu ɓe ɓo ka nǝn pǝkoŋ gin wo ɓo ya. Amma mo faa ɓǝ vaŋno to laŋ, dǝɓ yeɓ ɓe a laɓɓe. 8Ame ne suu ɓe me mor jol za ki, ame ko laŋ sooje no mor jol ɓe ta. Me faa nyi maki mo gyo, a ganne, me so faa nyi maki ah mo ge ɗǝ, a ge ta, me faa nyi dǝɓ yeɓ ɓe mo joŋ fan maino, a joŋ fan ah laŋ ta. 9Ne cok Yesu mo laa ɓǝ faa ah naiko, kaa tǝ ɓǝ ah gǝriŋ, so cii fahfal faa ɓǝ nyi za mai mo tǝ syeera mor ahe: Me faa nyi we wat, me lwaa iŋ maswah ma morãi koo kǝsyil za Israel laŋ taa ya ba. 10Ne cok zapee swah sooje mo jinra ge yaŋ, ge lwaara dǝɓ yeɓ ah laɓ ɓe.

Yesu syem na mawin wul yaŋ Nain

11Fahfal ah Yesu kal ge yaŋ ma ɗii ne Nain, za syee mor ah tǝkine za ki pǝpãa kalra ge gŋ ne ki. 12Ne cok Yesu mo ge dai gwari ne zah yaŋ ah lwaa za tǝ ɓaŋ wul gin zah pal ne ko, we wor o, a jol mah ah vaŋno, mah ah laŋ mawin wul o. 13Ne cok Dǝɓlii mo kwo mawin nyẽe naiko, so kwo syak tǝl ahe, faa nyi ko: Mo yeyee ka. 14So kal ge juu fan ɓaŋ wulli, za ɓaŋ ah laŋ so uura. Yesu faa: We tǝbanna, me tǝ faa nyi mo, mo ur o. 15Wul ur kaa sǝŋ tǝŋ faa ɓǝ, Yesu soɓ nyi mah ahe. 16Gal re za daŋ, so kal tǝ yiira Masǝŋ, faara: Profeto malii ge ɓo tǝgǝǝ mana, Masǝŋ ge ɓo tǝ gbah jol zan ahe. 17Za sǝr Yudea tǝkine yaŋ ma lal daŋ laara ɓǝ yeɓ mai Yesu mo joŋ daŋ.

Zapee Yohana ma joŋ baptisma

(Mt 11:2-19)

18Za syee mor Yohana keera ɓǝ mai mo laara daŋ nyi ko, so Yohana ɗii za kǝsyil za syee mor ah gwa, 19pee ra ge wo Yesu ka fii ko: Amo ye dǝɓ mai ru tǝ byak gin ah ne? Wala ru tǝ byak dǝɓ ki ne? 20Ne cok mo ge daira wo Yesu, faara nyi ko: Yohana ma joŋ baptisma pee ru ge ka fii mo, amo ye dǝɓ mai ru tǝ byak gin ah ne? Wala ru tǝ byak dǝɓ ki ne? 21Ne cok moo laŋ, Yesu laɓ za ma ne syem camcam pǝlli, syem suu tǝjokri ne syem coksyiŋrĩ, gbǝr nahnǝn rǝ̃ǝ pǝlli ta. 22Yesu zyii zah zapee Yohana faa: We ge kee ɓǝ mai we kwo tǝkine mai we laa daŋ nyi Yohana: Rǝ̃ǝ kwanra cokki, lem syeera, tǝkpiŋ laɓra, lǝr laara sokki, wul syemra, a cuura Ɓǝ'nyah nyi za syakke. 23A pǝ'nyah wo dǝɓ mai me ka yea na fan joŋ ko ɓee tǝ ɓal a.

24Ne cok zapee Yohana mo zolra kalle, Yesu kal tǝ faa ɓǝ Yohana nyi zana, a faa: We kal ga ẽe fẽe cok ne? Wala we ga ẽe var zyak moo laŋ ne? 25We ga ẽe fẽe gŋ sye ne? Wala we ga ẽe dǝɓ ma ɓoo mbǝro mayǝk ah gŋ ne? Amma za ma ɓaara mbǝro mayǝk ah a yeara yaŋ goŋ ne ko. 26Amma we ga ẽe fẽe sye ne? We ga mor ẽe profeto Masǝŋ ne? Oho, me tǝ faa nyi we, ako kal tǝ profeto ɓe. 27Mor Yohana ako ye dǝɓ mai Ɗerewol mo faa ɓǝ ahe: Masǝŋ faa: We ẽe ɗǝ, me tǝ pee papee ɓe ga pel ɓe, mor ka zyeɓ fahlii nyi mo. 28Yesu so faa nyi ra faɗa: Me faa nyi we goŋga, kǝsyil dǝfuu mai ŋwǝǝ mo bem daŋ dǝɓ ma kal Yohana ma joŋ baptisma ne yǝk kǝka, amma dǝɓ mai mo pǝlaŋ pǝ Goŋ Masǝŋ pǝyǝk kal ko ɓe.

29Ne cok ah za daŋ mo laara ɓǝ ah tǝkine za sǝǝ fan daŋ, tǝra ɓe, Masǝŋ a njaŋ, so nyiŋra baptisma mǝ Yohana. 30Amma Farisien tǝkine za cuu ɓǝ lai 'yahra ɓǝ mai Masǝŋ mo zyeɓ ɓo mor ɓǝǝr a, zyii nyiŋra baptisma Yohana ya.

31Yesu so faa ɓǝ maki ah nyi ra faɗa, a faa: Me ga lii za ma zah'nan tǝ'nah mai ne fẽene? 32Ara tǝgbana wee nyee mai moo kaara pǝ luma moo ɓyaŋra ɓǝ wo ki faa: Aru ul jak nyi we, we zyii ka dǝdaa ya, ru ɗǝǝ lǝŋ wul nyi we, so we zyii yeyee ya. 33Mor Yohana ma joŋ baptisma ge, ka ren fan a, ka zwan bii lee kpuu vin a ta, awe faa kal ah ŋ ɓe a ne coksyiŋ tǝtǝlli. 34So We Dǝfuu ge ɓe, a ren fanne, a zwan fanne, so we faa tǝl ah sye: Dǝɓ mai a foo ɓǝ farel tǝkine fazwan to, bai ah ra ye za sǝǝ fan ne za faɓe'. 35Amma fatan Masǝŋ goŋga ah a cuu gin lal ne za mai mo nyiŋra ɓǝ ah ɓo.

Yesu yaŋ Simon Farisiyo

36Farisiyo maki ah ɗii Yesu ka gin ren farel yaŋ ahe. Yesu kal ge yaŋ dǝɓ ah ge kaa zah taabǝl. 37Ma faɓe' no pǝ yaŋ ŋhoo ta. Ne cok mo laa Yesu ge kaa ɓo zah taabǝl yaŋ Farisiyo, ɓaŋ gbel ɓǝrdi ma fuŋ 'nyah ge ne ko. 38Ge uu mor ɓal Yesu nǝfah kǝfal ah ne yee, pǝ̃ǝ ɓal ah ne mĩi yee ah so tah ne rĩi tǝtǝl ahe, zwǝ ɓal ah ne zahe, so sõm ne ɓǝrdi. 39Ne cok Farisiyo mai mo ɗii Yesu ge yaŋ ah mo kwo naiko, tǝŋ foo ɓǝ pǝ zahzyil ah faa: Dǝɓ mai mo ye profeto Masǝŋ 'manna ɓe, a tǝ mawin mai mo tǝ juu ko nyẽe ma faɓe' yo.

40Amma Yesu ɗii Farisiyo faa: Simon, me no ne ɓǝ ka faa nyi mo. Simon zyii faa: Mo faa o Dǝɓlii.

41Yesu faa: Za gwa woora val jol dǝɓ ki, dǝɓ maki ah ɓaŋ solai temere dappe, so dǝɓ maki ah ɓaŋ mǝ ah solai jemma dappe. 42So ara ka ne fan ki ka soo dǝɓ ah ne yao, dǝɓ ah rwah val ah tǝ ɓǝǝ ge lal gwa daŋ. Kǝsyil za gwa mai azu ga 'yah pa rwah val ɓǝ nyẽe kal ki ne? 43Simon zyii faa: Me lǝŋ, dǝɓ mai mo yea ne val tǝtǝl ah pǝ'man mo so rwahra ge ɓo lal yo. Yesu so faa nyi ko: Mo zyii ɓǝ ah ɓo njaŋ.

44So fer nahnǝn kan ge fah wo mawin so faa nyi Simon: Mo kwo mawin nyẽe ɓe ne? Ne cok me ge yaŋ ɓo mo nyi bii vãh ɓal nyi me ya, amma ako vãh ɓal ɓe ne mĩi yee ahe, so tah ne rĩi tǝtǝl ahe. 45Mo nyiŋ me ne zwan me ne zah ya, amma ne cok me ge yaŋ ɓo mǝ ah soɓ zwan ɓal ɓe ne zah ya. 46Mo sõm tǝtǝl nyi me ne nǝm ya, amma ako sõm ɓal nyi me ne ɓǝrdi ma fuŋ 'nyahre. 47Mor maiko me tǝ faa nyi mo, 'yah lii ah mo ne ko cuu: Faɓe' ah daŋ rwah ge lal ɓe. Amma dǝɓ mai faɓe' ah mo rwah ge ɓo lal biŋ, 'yah ah a cuu gin lal biŋ ta.

48Yesu so faa nyi mawinni: Faɓe' ɓo ra rwah ge lal ɓe. 49Amma za mai mo hai ɓo cok ren farel ne ki tǝŋra foo ɓǝ pǝ zahzyil ɓǝǝra: Azu ye dǝɓ sye mai ko a rwah faɓe' ga lal ne? 50Amma Yesu faa nyi mawinni: Iŋ ɓo ǝ̃ǝ mo ɓe, mo ge jam o la.

Currently Selected:

LUKAS 7: MUAR

Highlight

Copy