LUKAS 5

Yesu ɗii za syee mor ah ma kǝpelle

(Mt 4:18-22; Mk 1:16-20)

1Comki Yesu ge uu zah mabii Genesaret, za taira ge wol ah pǝlli ka laa ɓǝ Masǝŋ zah ahe. 2Kwo dah zyii ɓo zahbii gwa, ka zan ah pǝ̃ǝ ge ɓo lal tǝ vãh jin ɓǝǝra. 3Yesu yee dah maki ahe, dah ah mǝ Simon o, so syea ko ka mo tǝɓ gin zahgee ge pǝ bii ne ki nje. So Yesu kaa ge sǝŋ pǝ dah kal tǝ cuu ɓǝ nyi zana.

4Ne cok Yesu mo i zah cuu ɓǝ, so faa nyi Simon: Mo ǝǝ dah ge pǝ bii malii ahe, ka we 'nǝǝ jinni. 5Simon zyii zah ah faa: Dǝɓlii, ru zok ɓo ne yeɓ ah ne suŋ mai wõi ru lwaa fan ki ya, amma mor mo ye faa ɓo nyi me, me ga 'nǝǝre. 6Mo 'nǝǝra jin o, cakra syiŋ pǝlli, ŋhaa jin ɓǝǝ tǝŋ ŋgǝ̃ǝre. 7So kpãara za ɓǝǝ ma pǝ dah maki ah ge ne jolle, ka mo ge gbahra jol ɓǝǝra. So gera, gbahra syiŋ baa dah gwa daŋ, ŋhaa dah ah tǝǝ bii tǝmbiɗ. 8Ne cok Simon Petar mo kwo ɓǝ ah naiko, kea ge sǝŋ pel Yesu faa: Mo soɓ me o Dǝɓlii, mor me ye dǝɓ ɓe'. 9Gal re Simon tǝkine za mai mo ne ki daŋ tǝ ɓǝ syiŋ mai mo gbǝra ɓo pǝlli. 10Gal re Yakuɓ ne Yohana wee Zebedeus ara mo ne Simon laŋ ta. Amma Yesu so faa nyi Simon: Mo ɗuu gal ka, daga zǝzǝ̃ǝ sǝ mo ye ga yea pa ma gban zana. 11Ge zyiira dah ɓǝǝ zahgeere, soɓra fan daŋ ge syeera mor Yesu.

Yesu laɓ tǝkpiŋrĩ

(Mt 8:1-4; Mk 1:40-45)

12Ne cok ka Yesu no yaŋ maki ahe, dǝɓ tǝkpiŋ no gŋ, ge kwo Yesu, kea ge sǝŋ pel ah pǝǝ ko faa: Dǝɓlii, mo 'yah no ɓe, mo laɓ me o. 13Yesu ɓaŋ jol juu ne ko faa: Me 'yah no, mo laɓ o. Ne pel sǝ syem tǝkpiŋ soɓ ko. 14Yesu lai ko faa: Mo faa ɓǝ ah kah dǝɓ ki ka, amma mo ge cuu suu ɓo nyi pa joŋzahsyiŋ ka mo ẽeko mo, ka mo joŋ syiŋ tǝgbana Mosus mo faa, ka cuu nyi za daŋ mo laɓ ɓe. 15Ne cok ah ɓǝ Yesu myah ge pel pǝki faɗa, za tai ge pǝlli ka laa ɓǝ faa Masǝŋ zah ah tǝkine laɓ syem suu ɓǝǝ ta. 16Yesu zol kal ge cok mai za mo ka gŋ ya, moo juupel gŋ.

Yesu laɓ dǝɓ syem kokurri

(Mt 9:1-8; Mk 2:1-12)

17Comki ka Yesu tǝ cuu ɓǝ, Farisien manyeeki ah ne za cuu ɓǝ lai urra gin tǝluɓ sǝr Galile ne Yudea tǝkine yaŋ Jerusalem ge kaara ɓo gŋ ta, swah Dǝɓlii no ne Yesu, laɓ za syem pǝlli. 18Za ki ɓaŋra dǝɓ syem mai mo kokur ɓo tǝ ɗee ge ne ko, 'yahra ka dan ga yaŋ ne ki ka ga kan pel Yesu. 19Amma lwaara fahlii ga wol ah ne ki ya, mor za gŋ pǝpãare. Yeera ge zahdǝǝ sǝŋ ne ki, mgbaira tǝtǝl yaŋ ge lal so ɗǝrra dǝɓ syem ne ɗee ah daŋ ge kǝsyil za mai mo taira ɓo gŋ pel Yesu. 20Yesu kwo iŋ ɓǝǝra, so faa nyi dǝɓ syemme: Bai ɓe, faɓe' ɓo daŋ rwah ge lal ɓe. 21So za cuu ɓǝ lai ne Farisien tǝŋ foora ɓǝ: Azu ye dǝɓ mai mo tǝ faa ɓǝ haihai ne? Tǝ tǝǝ Masǝŋ. Azu ye gak rwah faɓe' ga lal ne? Sai Masǝŋ vaŋno to. 22Yesu tǝ ɓǝ foo ɓǝǝra, so faa nyi ra: We foo ɓǝ nai pǝ zahzyil ɓii mor fẽene? 23A fẽe pǝgaɓ kal ki ne? Mai me faa faɓe' ɓo rwah ge lal ɓe ye ne? Wala mai me faa mo ur mo syee ye ne? 24Amma me 'yah ka we tǝ njaŋ: We Dǝfuu no ne swah tǝ sǝr ka rwah faɓe' dǝɓ ga lalle. So faa nyi dǝɓ mai mo kur ɓo: Me faa nyi mo, mo ur ɓaŋ faswul ɓo mo ge yaŋ ɓo ne ko. 25Dǝɓ ah ur sǝŋ ne pel gwari pel za daŋ, ɓaŋ ɗee ah mai mo yea swǝ ɓo tǝl ahe, kal fah yaŋ ah ne yii Masǝŋ. 26Za daŋ kaara tǝ ɓǝ ah gǝriŋ, ɗuura galle, yiira Masǝŋ so faara: Na kwo ɓǝ ma gaɓ zah dǝɓ tǝ'nah ɓe.

Yesu ɗii Lewi

(Mt 9:9-13; Mk 2:13-17)

27Fahfal ɓǝ mai Yesu pǝ̃ǝ ge lalle, kwo dǝɓ sǝǝ fan kaa ɓo yaŋ sǝǝ fanne, a ɗii dǝɓ ah ne Lewi. Yesu faa nyi ko: Mo ge syee mor ɓe. 28Lewi ur soɓ fan daŋ kal ge syee mor ahe.

29So Lewi joŋ farel malii yaŋ ah nyi Yesu, za sǝǝ fan pǝlli tǝkine za ki daŋ kaara ɓo tǝ ren farel ne ra. 30Farisien ne za cuu ɓǝ lai kyãhra ɓǝ nyee wo za syee mor Yesu faara: We ren farel ne zwan fan tǝkine za sǝǝ fan ne za maɓea mor fẽene? 31Yesu faa nyi ra: Za ma ne suu tǝhǝraŋ ye ka 'yahra syiŋr a, sai za ma ne syem yee 'yahni. 32Mor me ge ɓo ka tǝ ɗii za matǝ njaŋ ya, amma me ge ka ɗii za faɓe' ka mo toora bii.

Fii tǝ ɓǝ syẽe fanne

(Mt 9:14-17; Mk 2:18-22)

33Za ge faara nyi Yesu: Za syee mor Yohana a syẽera fan tǝkine juupelle, za syee mor Farisien laŋ a joŋra nai ta, amma za syee mor ɓo ka syẽera ma ɓǝǝ ya ɗǝne? 34Yesu zyii faa nyi ra: We foo we no ne swah ka joŋ za mai mo ɗiira ra ge ɓo cok ɓaŋ win fuu syẽe fan ne cok pa ɓaŋ win ah mo no ne ra ne? 35Amma zah'nan ma ɓaŋ wor win gin kǝsyil ɓǝǝ no ginni, a ga syẽera fanne.

36Yesu so faa ɓǝ kikiŋ mai nyi ra: Dǝɓ ka ŋgǝ̃ǝ zyim mbǝro mafuu ka dahɓ mbǝro matãa ne ya. Dǝɓ ah mo joŋ nai ɓe, a ŋgǝ̃ǝ mbǝro mafuu nyẽeko, so zah zyim ah mafuu mo ŋgǝ̃ǝ ɓo ka tai ki ne mbǝro matãa ya. 37So dǝɓ ka rǝk bii lee kpuu vin mafuu pǝ dah bii matãa ya. Mor mo rǝk gŋ ɓe, dah bii ah a ŋgǝ̃ǝre, bii lee kpuu vin ah zuu ga lalle, so dah ah a ɓeɓɓe. 38Amma a pǝsãh ka rǝk bii lee kpuu vin mafuu ah ga pǝ dah mafuu ta. 39So dǝɓ mo lwaa bii lee kpuu vin matãa ah zwǝ ɓe, ka 'yah zwan mafuu ah yao, dǝɓ ah faa: Matãa pǝ'nyah kal mafuu ɓe.

Currently Selected:

LUKAS 5: MUAR

Highlight

Copy