TƏŊMORFANNE 9

Masǝŋ gbǝ zah ne Noa

1Masǝŋ ẽe Noa ne wee ah daŋ, faa nyi ra: We bemme, we ɓoo ge pelle, ka we baa sǝrri. 2Faɓal wo sǝr tǝkine juu daŋ gal ɓii ga re ra a coora coo. Fan mai mo no wo sǝr tǝkine syiŋ ma pǝ bii daŋ me soɓ jol ɓiiri. 3Me nyi fan ma ne cee moo gai suu tǝ sǝr daŋ nyi we ka farel ɓii ye mo yea tǝgbana me nyi goo nyi we ta. 4Amma we re nǝǝ mai syim ah mo ɗuu ge lal a ka, mor cee a pǝzyil syimmi. 5We tǝ, dǝɓ mo i suu ah ge lal ɓe, me ga fii syim ah zah dǝɓ ahe, dǝɓ mo i dǝɓ ki ge lal ɓe, me ga ŋgoŋ kiita tǝ dǝɓ ahe, faɓal mo i dǝfuu ge lal ɓe, a ga wǝko ta. 6Dǝɓ mo i dǝɓ ki pǝ wul ɓe, a ga ira dǝɓ ah ga lal pǝ wul ta, mor Masǝŋ joŋ dǝfuu jur ko ɓo.

7We bemme, we ɓoo ge pelle, we myah wo sǝr ne lii ah daŋ.

8Masǝŋ faa nyi Noa ne wee ahe: 9We ẽe ɗǝ, me ga gbǝ zah ne we ne wee ɓǝr ɓii fahfal ɓiiri, 10tǝkine fan ma ne cee mo no ne we: juu, nǝǝ yaŋ, ne fan ma ker tǝ sǝrri, nǝǝ cokki, tǝkine fan mai mo pǝ̃ǝra gin pǝ dah daŋ. 11Me ga gbǝ zah ne we ka fan ma ne cee mo vǝr ne bii kao, ka bii mo ge ɓeɓ sǝr laŋ kao ta. 12So faa: Fan ma cuu ɓǝ gbanzah mai mo kǝsyil ɓe ne we ne fan ma ne cee tǝkine wee ɓǝr ɓii ga lii a naiko: 13Me ga kan tǝcee ɓe tǝ swãh sǝŋ ka mo yeako fan ma swaa ɓǝ gbanzah kǝsyil ɓe ne sǝrri. 14-15Ne cok mee ga tai swãh sǝŋ tǝcee moo ga pǝ̃ǝ pǝzyil ah me ga foo ɓǝ gbanzah ɓe kǝsyil ɓe ne we tǝkine fan ma ne cee daŋ. Bii ka ga ge tǝ sǝr ka vǝr fan ma ne cee faɗa yao. 16Ne cok me kwo tǝcee mo uu pǝzyil swãh ɓe, me ga foo ɓǝ gbanzah ma ga lii mo kǝsyil ɓe ne we ne nǝǝ wo sǝr tǝkine fan ma ne cee mai mo tǝ sǝr daŋ.

17Masǝŋ faa nyi Noa: Fan ma swaa ɓǝ gbanzah kǝsyil ɓe ne fan ma ne cee wo sǝr daŋ, a koiko.

Noa tǝkine wee ahe

18Wee Noa mai mo pǝ̃ǝra gin pǝ dah ara naiko: Sem, Kam, ne Yafet. Kam ako ye pah dǝɓ ma ɗii ne Kanaan. 19Ara ye wee Noa sai daŋ. Za ma kaara wo sǝr daŋ pǝ̃ǝra gin morsǝ̃ǝ ɓǝǝra.

20Noa dǝɓ pǝpǝǝ yo, tǝŋ pea kpuu vin. 21So comki zwǝ bii lee kpuu vin ah ŋhaa tǝǝ ne ko, wǝǝ fan wo suu ah daŋ ge lal ɓǝr yaŋ ahe. 22Kam pah Kanaan kwo suu kol pah ahe, so ge faa ɓǝ ah nyi wee pam lalle. 23So Sem ne Yafet ɓaŋra gwado jǝŋra ge tǝbǝǝsah ɓǝǝra, syeera ne ko nǝfalle nǝfalle, jinra nahnǝn ɓǝǝ ge pǝ cok mai mo urra gin gŋ, ge riira suu kol pa ɓǝǝ ne ko, kwora suu kol ah ya. 24Bii lee kpuu vin mo cee gin tǝ Noa, so laa ɓǝ fan mai wel ah malaŋ mo joŋ wol ahe. 25So faa: Tǝkẽawãk yea tǝ Kanaan. Ako ye ga yea byak wee pah ah ra. 26Osoko wo Masǝŋ Sem, Kanaan ga yea byak ahe. 27Masǝŋ mo joŋ Yafet mo geko pelle, morsǝ̃ǝ ah ga kaa pǝ jul Sem, Kanaan ga ciŋ byak ahe.

28Noa kyaŋ fahfal bii mo vǝr sǝr syii temere sai ne jemma dappe. 29Syii Noa mo kyaŋ wo sǝr daŋ a temere doraŋ ne jemma dappe.

Currently Selected:

TƏŊMORFANNE 9: MUAR

Highlight

Copy