TƏŊMORFANNE 49

Ɓǝ faa Yakuɓ ma fahfal tǝ lii

1Yakuɓ ɗii wee ah faa: We tai ge wo ɓe, ka me faa ɓǝ mai mo ga lwaa we pǝ zah'nan ma pel nyi we. 2We tai we syii sokki, wee Yakuɓ, we laa ɓǝ faa pa ɓii Israel.

3Ruben, amo ye welii ɓe, amo yǝk ɓe ne swah ɓe ma kǝpelle, yǝk ma kal daŋ ne swah ma kal daŋ ah yo. 4Mo ka uu cok vaŋno ya tǝgbana bii, mor mo swǝ ne mabyak ɓe, mo ɓeɓ faswul ɓe ne yee tǝl ahe.

5Simon ne Lewi ara ye naa mǝǝ, kafahe ɓǝǝ fan yeɓ ma ɓeɓ fan o. 6Mazwãhsuu ɓe mo dan pǝ ɓǝ zyeɓ ɓǝǝ ka, zahzyil ɓe laŋ mo tai pǝ cok tai ɓǝǝ ka ta. Mor ira dǝɓ pǝ wul ne kpãh ɓǝǝra, ceera gah nyi wǝǝ dǝǝ ne ɓǝɓe' ɓǝǝra. 7Zahyee tǝ kpãh ɓǝǝra, mor a pǝɓe'. Zahyee tǝ zahzyil syen ɓǝǝ ta, mor ka kwanra syak ya. Me ga woŋ ra pǝ sǝr Israel, me ga myah ra kǝsyil za Israel haihai.

8Amo Yuda, wee pa ɓo ga yiira mo. Jol ɓo ga yea mor gom za ma syiŋ mo. Wee pa ɓo ga keara sǝŋ pel ɓo. 9Yuda tǝgbana we ɓolle, a giŋ dǝɓlii ne gban fanne. A hãm ɓal swan ga sǝŋ ne tǝgbana ɓolle, a joŋ tǝgbana ma ɓolle, azu ye ga 'yaŋ ko ne? 10Kǝndaŋ goŋ ka woŋ ki ne Yuda ya, kǝndaŋ lai za laŋ ka ga woŋ ki ne tǝgǝǝ ɓal ah ya ta ŋhaa Silo ga ge. Za ga laara zah ahe. 11A ga saa korro ah wo kpuu vin, a ga saa we korro ah wo kpuu vin masãh ahe, a ga vãh mbǝro ah ne bii lee kpuu vin, a ga vãh mbǝro sol ah ne bii lee kpuu vin masyẽ. 12Nahnǝn ah ga syiŋ pǝsyẽ ne bii lee kpuu vin, syel ah ga yea pǝfãi ne zwan wonni.

13Zebulon ga kaa kah mabii, a ga zyiira dah maluu kah ahe. Zahsyee sǝr ah wah ga dai fah kǝ Sidon.

14Isakar ye korro maswah ah mai moo swan tǝgǝǝ lao fah kǝ lalle. 15A laa cok 'yak mai mo swǝko ɓo gŋ pǝ'nyahre, a kwan sǝr ah laŋ pǝsãh ta. A ɗǝŋ tǝbǝǝsah ka ɓaŋ faswaare, ciŋ byak joŋ yeɓ sǝǝ gǝraama.

16Dan ga ŋgoŋ kiita tǝ zan ah tǝgbana ban Israel maki ahe. 17Dan ga yea tǝgbana soo tǝ fahlii, na sooyii mai moo loŋ morjimɓal pǝrri, so pa yee tǝl ah moo lee nǝfalle.

18Me tǝ byak ǝ̃ǝ ɓo Masǝŋ.

19Gad sye, za kaafuu ga gaɓra ko, amma ako laŋ a ga gaɓ ra ta, a ga nĩi ra.

20Asǝr sye, farel ah pǝsãhe, a ga nyi farel manjẽe ah nyi za goŋe.

21Naftali sye, a tǝgbana nǝǝmin mai dǝɓ mo wǝǝ sal tǝl ah soɓ ɓoo ma ne, a ga faa ɓǝ pǝsãhe.

22Yuseɓ ye jol kpuu ma lee syẽmme, ako ye jol kpuu ma kah bii ma lee syẽm masãh mai jol ah ra moo giŋ pǝ̃ǝ tǝkyaŋ kor ga sǝŋ. 23Za ma 'nǝǝra guu ɓaŋra kpãh ne ki, ruura sal ne ki, dǝra ko. 24Amma saŋ ah pǝswahe, sǝ̃ǝ jol ah ra swaa pǝswah mor jol Masǝŋ Yakuɓ ma ne swahe, mor Pakǝpii mai mo ye Pǝɗakka Israel. 25Masǝŋ pa ɓo a ga gbah jol ɓo, Masǝŋ ma ne swah daŋ a ga ẽe mo ne ẽe bamme. A ga ẽe mo ne bii mai mo ɓaara ɓo mor sǝrri, a ga ẽe mo ne dǝǝ tǝkine weere. 26Eẽ pa ɓo ra kal waa mawah ah ra matãa ɓe, ẽe ah ga ge tǝ Yuseɓ, tǝ dǝɓ mai mo nǝǝra ko ɓo kǝsyil wee pah ahe.

27Benyaamin sye, a tǝgbana goobam mai moo pahl fanne, ne zah'nan a ga ren fan mai moo gbanne, ne lil ɓe, a woŋ fan ma woo zah salle.

28Za mai daŋ ara ye morsǝ̃ǝ Israel matǝ jemma tǝtǝl gwa, pa ɓǝǝ faa ɓǝ nyi ra naiko, so ẽe ra ta. Israel ẽe ra vaŋno vaŋno daŋ tǝgbana ẽe dǝɓ ahe.

Ɓǝ wul Yakuɓ tǝkine cii ahe

29Yakuɓ so lai wee ah ra faa: Ne cok me wǝ ɓe, ka we cii me kah pa ɓe ra pǝ yii mai mo pǝ 'wah Efron Hetiyo, 30pǝ yii ma pǝ 'wah Makpela nǝfah morcomzah'nan Mamre. Ako ye yii mai Abraham mo lee ne 'wah ah daŋ jol Efron Hetiyo mor cii wulli. 31Mor ciira Abraham ne mawin ah Sara ɓo gŋ, ciira Isak ne mawin ah Rebeka ɓo gŋ. Ame laŋ me cii Lea ɓo gŋ ta. 32'Wah mai mo no gŋ ne yii ah leera jol wee Het. 33Ne cok Yakuɓ mo vǝr faa ɓǝ nyi wee ahe, tai ɓal ah ge wo ki tǝ faswulli, wuu.

Currently Selected:

TƏŊMORFANNE 49: MUAR

Highlight

Copy