TƏŊMORFANNE 46

Yakuɓ ge sǝr Egiɓ ne yaŋ ah daŋ

1Yakuɓ ur ne fan ah daŋ. Ge dai yaŋ Beerseba, joŋ syiŋ wo Masǝŋ pah ah Isak gŋ. 2Masǝŋ faa ɓǝ nyi ko ne lom ne suŋni, faa: Yakuɓ, Yakuɓ. So zyii: Awai. 3Masǝŋ faa nyi ko: Ame Masǝŋ, me Masǝŋ pa ɓo. Mo ɗuu gal ga sǝr Egiɓ ka, mor me ga joŋ za ɓo gŋ pǝ'manne. 4Me ga sǝr Egiɓ ne mo, me so pii soo ne mo ta. Yuseɓ ga coo nahnǝn ɓo ga tǝki. 5So Yakuɓ ur gin yaŋ Beerseba. Wee Israel woora pa ɓǝǝ ne wee ne ŋwǝǝ yee muŋta dǝǝ mai Farao mo pee ge ka woo ko. 6Nĩira ŋgaɓ fan ɓǝǝ tǝkine fan mai mo lwaara sǝr Kanaan daŋ, kalra ge sǝr Egiɓ ne ko. Yakuɓ ge ne wee ɓǝr ah daŋ. 7Wee ah mawǝǝ tǝkine wee ɓǝǝra, ne wee ah maŋwǝǝ ne wee ɓǝǝ tǝkine wee ɓǝr ɓǝǝ daŋ kal ge sǝr Egiɓ ne ko.

8Ɗii wee Israel mai mo gera sǝr Egiɓ a naiko: Yakuɓ ne wee ahe. Ruben we Yakuɓ malii. 9Wee Ruben a naiko: Hanok, Paloo, Hesron, ne Karmi. 10Simon tǝkine wee ahe: Jemuel, Jamin, Ohad, Jakin, Zohar, ne Saul we mawin Kanaaniyo. 11Lewi ne wee ahe: Gerson, Kehat ne Merari. 12Yuda ne wee ahe: Er, Onan, Sela, Peres, ne Zera, amma Er ne Onan wukra sǝr Kanaan. Wee Peres: Hesron ne Hamul. 13Isakar ne wee ahe: Tola, Puwa, Jasuɓ, ne Simron. 14Zebulon ne wee ahe: Sered, Elon ne Jaleel. 15Ara ye wee mai Lea mo bem ne Yakuɓ daga Mesopotamia tǝkine Dina mǝlaŋ ah mawinni. Wee ah mawǝǝ tǝkine maŋwǝǝ daŋ ara jemma sai tǝtǝl sai.

16Gad ne wee ahe: Zifyon, Haggi, Suni, Esbon, Eri, Arodi, ne Areeli. 17Asǝr ne wee ahe: Jimna, Jiswah, Jiswi, Beria, ne Serak naa ma ɓǝǝ mawinni. Wee Beria: Eber ne Malkiel. 18Ara ye wee Zilpa mai Laban mo nyi nyi mǝlaŋ ah Lea, Zilpa bem ra ne Yakuɓ, ara jemma tǝtǝl yea.

19Wee Rakel mawin Yakuɓ ye Yuseɓ ne Benyaamin. 20Yuseɓ byaŋ Manasse ne Efraim sǝr Egiɓ. Asnat mǝlaŋ Potifera pa joŋzahsyiŋ yaŋ Heliopolis ye bem ra ne ki. 21Wee Benyaamin: Bela, Beker, Asbel, Gera, Nooman, Ehi, Ros, Muppim, Huppim, ne Arda. 22Wee mǝ Rakel mo bem ne Yakuɓ ara jemma tǝtǝl nai.

23Dan ne wel ah Husim. 24Naftali ne wee ahe: Jazael, Guni, Jezar, ne Sillem. 25Ara ye wee Bila mai Laban mo nyi nyi mǝlaŋ ah Rakel. Bila bem ra ne Yakuɓ, ara rǝŋ.

26Za yaŋ Yakuɓ mai mo pǝ̃ǝra gin morsǝ̃ǝ ah mo gera sǝr Egiɓ ne ki daŋ, bai kee ŋwǝǝ wee ah gŋ, ara jemma yea tǝtǝl yea. 27Wee Yuseɓ mai mo bemra sǝr Egiɓ ara gwa. Za yaŋ Yakuɓ mai mo gera sǝr Egiɓ ne ki daŋ ara jemma rǝŋ .

Yakuɓ ne wee ah sǝr Egiɓ

28Yakuɓ pee Yuda kal ge pel ah wo Yuseɓ, mor ka mo cuuko fahlii ga Gosen nyi ko. So ge daira sǝr Gosen. 29Yuseɓ zyeɓ muŋta sal ah yee ka ga zyaŋ tǝ pah ah sǝr Gosen. Ne cok mo ge dai pel ahe, lee ge wol ahe, kim sol ah ne jolle, yeyee ne liilii, tǝkine zwan ko ne zahe. 30Yakuɓ faa nyi Yuseɓ: Koo mai zǝzǝ̃ǝ me wǝ o laŋ, a pǝsãhe, mor me kwo nahnǝn ɓo ɓe mo wǝ ya.

31Yuseɓ faa nyi wee pam tǝkine za yaŋ pah ahe: Me ga wo Farao, me ga faa nyi ko: Wee pa ɓe tǝkine za yaŋ pa ɓe mai mo yeara sǝr Kanaan gera ɓe. 32Zan ah kǝpii fan ye ra, daga ɓaa laŋ yeɓ ɓǝǝ ye pii fanne, gera ɓo ne ŋgaɓ pǝsǝ̃ǝ ɓǝǝ ne dǝǝ ɓǝǝ tǝkine fan ɓǝǝ daŋ. 33Ne cok Farao mo ɗii we fii, yeɓ ɓii ye fẽene ɓe, 34ka we faa nyi ko: Byak ɓo ra za pii fan ye ra daga ɓaa ɓǝǝ ŋhaa tǝ'nahko. Nai ɓe we ga lwaa kaa sǝr Gosen. Yuseɓ faa naiko, mor Egiɓien daŋ a kwanra za kǝpii fan pǝrenjẽare.

Currently Selected:

TƏŊMORFANNE 46: MUAR

Highlight

Copy