TƏŊMORFANNE 34

Sikem ɓeɓ mǝlaŋ Yakuɓ ma ɗii ne Dina

1Comki Dina mǝlaŋ mai Lea mo byaŋ ne Yakuɓ pǝ̃ǝ ka ẽe wee ŋwǝǝ sǝr ahe. 2Ne cok ah Sikem we Hamor Hetiyo goŋ sǝr ah kwo ko, ɓaŋ ko, swǝ ne ki, ɓeɓ ko. 3Zahzyil ah ge tǝ Dina mǝlaŋ Yakuɓ, a 'yah mǝlaŋ ahe, a faa ɓǝ 'nyah nyi ko. 4Sikem faa nyi pah ah Hamor: Mo 'yah mǝlaŋ mai nyi me kanne.

5Yakuɓ laa Sikem ɓeɓ mǝlaŋ ah Dina ɓo. Wee ah laŋ ara wo ŋgaɓ fan ah lalle. Yakuɓ kaa ne ɓǝ ah 'wa ŋhaa pii soora ge yaŋ. 6Hamor pah Sikem ge wo Yakuɓ ka faa ɓǝ ne ki. 7Ne cok wee Yakuɓ mo pii soora gin lal ge yaŋ, laara ɓǝ fan mai mo joŋ ɓo. Ɓǝ ah sye zahzyil ɓǝǝra, ɓaŋra kpãh pǝlli, mor Sikem joŋ fan maɓe' ɓo kǝsyil Israel ne cok mo swǝko ne mǝlaŋ Yakuɓ, joŋ fan mai mo ka nǝn joŋ ya ɓo.

8Hamor faa nyi ra: Zahzyil we ɓe Sikem ge ɓo tǝ mǝlaŋ ɓiiri. Oseni we nyi ko kan o. 9We joŋ bǝǝ ne ru, we nyi wee ɓii ru kanne, we woo ma ɓuu laŋ kan ta. 10We kaa ne ru. Sǝr no pel ɓiiri. We kaa gŋ. We lea fanne, ka we yea ne joŋne. 11Sikem faa nyi pah mǝlaŋ ne wee mah ahe: We kwo me na dǝɓɓi, me ga nyi fan mai we ga cuu daŋ nyi we. 12We cuu lak 'yah ŋwǝǝ nyi me pǝ'man tǝkine fan saa ŋwǝǝ daŋ, me ga nyi we tǝgbana we cuu nyi me, amma we nyi mǝlaŋ me kanne.

13Wee Yakuɓ zyiira zah Sikem ne pah ah Hamor ne yella, mor ɓeɓ naa ma ɓǝǝ Dina ɓo. 14Faara nyi ra: Ru ka gak ɓaŋ naa ma ɓuu ka nyi gãhnyah kan a, mor a pǝswãa wo ɓuuru. 15We joŋ na ɓǝ faa mai ru tǝ ga faa nyi we ɓe, ru ga zyii ɓǝ ɓiiri, sai za wǝǝ ɓii daŋ mo daara kanne. 16Fahfal ah ru ga nyi wee ɓuu nyi we kanne, aru laŋ ru ga woo ma ɓii kan ta. Ru ga kaa ne we, na ga ciŋ za vaŋno. 17Amma we zyii laa ɓǝ faa ɓuu ka daakan a ɓe, ka ru ga zol kal ne mǝlaŋ ɓuuru.

18Ɓǝ faa ɓǝǝ 'nyah suu Hamor ne Sikem wel ahe. 19We tǝbanna nǝn ne joŋ fan ah ya, mor a 'yah mǝlaŋ Yakuɓ pǝlli. Sikem laŋ a pǝyǝk kǝsyil za yaŋ pah ah daŋ.

20Hamor ne wel ah Sikem gera zahfah yaŋ ɓǝǝ faara nyi za ɓǝǝra: 21Za mai ara pǝsãhe, na soɓ ra kaa sǝr mana, mo leara fan gŋ. We ẽe sǝr a pǝ'manne, a kii mor ɓǝǝra. Na ga woo wee ɓǝǝ kanne, na ga nyi wee man nyi ra kan ta. 22Amma ka zyii joŋra 'yah man ka kaara ne na ka ciŋ za vaŋno ya, sai ka za wǝǝ daŋ na daakan tǝgbana mo daara ɓo ɓe ta. 23Mo nai ɓe, ŋgaɓ fan ɓǝǝ ne joŋ ɓǝǝ tǝkine faɓal daŋ ka ciŋ ma man a ne? Amma na zyii ɓǝ ɓǝǝra ka mo kaara ne na. 24Za yaŋ ɓǝǝ daŋ laara ɓǝ faa Hamor ne wel ah Sikem, za wǝǝ ɓǝǝ daara kan daŋ.

25Amma tǝ zah'nan sai ah ka nwãh ɓǝǝ mbǝ̃ǝ ɓe, wee Yakuɓ gwa, Simon ne Lewi wee mah Dina woora kafahe, danra ge tǝgǝǝ yaŋ 'yaŋ, ikra za wǝǝ ah daŋ. 26Ge ceera Hamor ne wel ah Sikem ne kafahe ta. So ɓaŋra naa ma ɓǝǝ Dina yaŋ Sikem kalra ne ko. 27So wee Yakuɓ gera tǝ za mai mo ikra ra ɓo, rera yaŋ ahe, mor ɓeɓra naa ma ɓǝǝ ɓo. 28Nĩira gwii ɓǝǝ ne dǝǝ ne korro tǝkine fan mai mo no yaŋ ah ne ma lal daŋ. 29Woora joŋ ɓǝǝ ne wee ne ŋwǝǝ tǝkine fan mai mo ɓǝr yaŋ ɓǝǝ daŋ kal ne ko.

30So Yakuɓ faa nyi Simon ne Lewi: We zyak me ɓe, we joŋ ka Kanaanien ne Perisien ma kaara sǝr mai mo syiŋra me. Ame laŋ me ne za biŋ, a ga taira tǝ ɓe ka in me pǝ wul ne za yaŋ ɓe daŋ. 31Zyiira faa: Dǝɓ ga joŋ naa ma ɓuu tǝgbana matǝkoi nai mor ah ɗǝne?

Currently Selected:

TƏŊMORFANNE 34: MUAR

Highlight

Copy