TƏŊMORFANNE 32

Yakuɓ zyeɓ suu ka zyaŋ ne Esau

1Yakuɓ ɓaŋ fahlii ahe, angeloi zyaŋra ne ki. 2Ne cok Yakuɓ mo kwo ra, so faa: Marai kul za Masǝŋ yo. Ɗii cok ah ne Makanayim.

3Yakuɓ pee za ge pel ah wo naa mah ah Esau pǝ sǝr Edom. 4Yakuɓ faa nyi ra: We ge faa nyi dǝɓlii ɓe Esau sye: Byak ɓo Yakuɓ faa: Me nǝn wo Laban ɓe, ŋhaa zǝzǝ̃ǝ laŋ me kaa ɓo gŋ ba. 5Me no ne dǝǝ, korro, gwii, za yeɓ mawǝǝ ne maŋwǝǝ daŋ. Me pee ɓǝ ah ge wo ɓo dǝɓlii ɓe ka mo tǝ, ka mo joŋ gboŋgboŋ wo ɓe.

6Zapee pii soora ge wo Yakuɓ faara: Ru ge wo naa ma ɓo Esau ɓe. A no tǝ gin zyaŋ tǝ ɓo ne za temere nai. 7Yakuɓ ɗuu gal pǝlli ŋhaa zahzyil nǝǝ ko. So woŋ za mai ara mo ne ki camcam tǝkine gwii, dǝǝ, ne njoŋnjoŋ daŋ, ɓǝl kul ɓǝǝ zahlǝŋ gwa. 8So Yakuɓ faa: Esau mo ge i kul maki ah ɓe, kul ah mai mo coŋ ɓo a ga ǝ̃ǝ.

9So Yakuɓ juupel faa: Masǝŋ pa ɓe lii Abraham, Masǝŋ pa ɓe Isak, mo laa pǝǝ ɓe me tǝ pǝǝ mo zǝzǝ̃ǝko. Dǝɓlii, amo ye faa nyi me: Mo pii soo ge sǝr ɓo wo zum ɓo, me ga joŋ mo pǝsãhe. 10Ame pǝlaŋ mor gboŋgboŋ ɓo tǝkine ɓǝ sãh mai mo joŋ wo ɓe dǝɓ yeɓ ɓo. Me ge yee el Yordan mai ne kǝndaŋ ɓe to, zǝzǝ̃ǝko me ne kul fan zahlǝŋ gwa. 11Oseni, mo ǝ̃ǝ me jol naa ma ɓe Esau, mor me ɗuu gal ah ka mo ge i me ne mah wee ra tǝkine wee daŋ ka. 12Mor mo faa: Me ga joŋ mo pǝsãhe. Me ga joŋ morsǝ̃ǝ ɓo pǝlli tǝgbana tǝkuu zahbii mai dǝɓ mo ka gak kee ya.

13Yakuɓ ɗǝr pǝ cok ahe, swǝ gŋ. So ŋgee fan mai mo ne jol ah daŋ ka ga haozah wo naa mah ah Esau ne ko: 14sǝgwii temere gwa, kǝdai jemma gwa, pǝsǝ̃ǝ temere gwa, kǝbǝr jemma gwa, 15njoŋnjoŋ ma ne won ah jemma sai, ara ne wee mor daŋ, dǝǝ matǝ̃ǝ jemma nai, wǝǝ dǝǝ jemma vaŋno, mǝǝ korro jemma gwa, wǝǝ ah jemma vaŋno. 16So nĩi nyi za yeɓ ah jolle, zune daŋ ne ŋgaɓ fanne. Faa nyi za yeɓ ahe: We kal ge pel ɓe, we cea kǝsyil ŋgaɓ fan camcam. 17So faa nyi dǝɓ ma kal pel lii: Ne cok naa ma ɓe Esau mo zyaŋ ne mo, mo fii mo, amo mǝ zune, mo ga kẽne, fan mai mo pel ɓo mǝ zu ye ne ɓe, 18ka mo zyii faa: Mǝ dǝɓ yeɓ ɓo Yakuɓ yo, pee fan ah ɓo ka haozah wo dǝɓlii ɓe Esau. A no tǝ gin ne suu ah fahfal ɓuuru. 19Faa nyi patǝ gwa ah ne patǝ sai ah tǝkine za mai mo tǝ syeera mor ŋgaɓ fan daŋ ka mo zyaŋra ne Esau ɓe, mo faara nyi nai ta. 20So faa nyi ra ka mo faara nyi Esau sye: Dǝɓ yeɓ ɓo Yakuɓ no tǝ gin ne suu ah fahfal ɓuuru. Mor Yakuɓ foo: Me ga wuu zahzyil ah ne fan mai me pee kal pel ɓe ka haozah wol ah ɗao, ka fahfal ah me ga zyaŋ zahpel ne ki ba, ɗah maki a nyiŋ me no ne? 21Fan haozah wol kal pel ahe, ako ne suu ah swǝ ne suŋ moo pǝ cok ɗǝr ɓǝǝra.

Yakuɓ ɗah tǝnyee ne dǝɓ ki

22Yakuɓ ur ne suŋ ah woo ŋwǝǝ ah gwa daŋ, ne mǝǝ byak matǝ gwa tǝkine wee ah jemma tǝtǝl vaŋno, yee pǝ cok yee bii el Jabok ne ra. 23Woo ra tǝkine fan ah daŋ kal ge yee bii Yordan ne ra kǝpelle. 24Amma Yakuɓ so kaa syak ahe.

Dǝɓ ki ge ɗah tǝnyee ne ki ŋhaa zah'nanne. 25Dǝɓ ah kwo ɓe, zye ka tǝ gak roŋ ko ya, so i kpal nyi ko, pẽe Yakuɓ rul ne cok mo tǝ ɗahra tǝnyeere. 26Dǝɓ ah faa nyi Yakuɓ: Mo soɓ me ɓoo, mor zah'nan tahn ɓe. Yakuɓ zyii faa: Me ka soɓ mo kal a sai mo ẽe me ɗǝ. 27Fii ko: A ɗii mo ɗǝne? Zyii faa: A ɗii me ne Yakuɓ. 28So faa nyi ko: Ka ɗiira mo ne Yakuɓ yao, amma a ga ɗiira mo ne Israel , mor mo ɗah tǝnyee ne Masǝŋ ne dǝfuu, mo so kaa swahe. 29Yakuɓ fii ko: Oseni mo cuu ɗii ɓo nyi me. Amma zyii faa: Mo fii ɗii ɓe mor fẽene? So dǝɓ ah ẽe ko cok ahe.

30Yakuɓ ɗii cok ah ne Penuel, mor faako: Me kwo Masǝŋ ne nahnǝn ɓe, so me ne cee kpǝ. 31Com zoo tǝl ah ka tǝ syee pǝ cok Penuel, a syee lem pẽe ahe. 32Mor ah wee Israel ka renra swǝ̃ǝ kpal a ŋhaa tǝ'nahko, mor Masǝŋ i swǝ̃ǝ kpal nyi Yakuɓ.

Currently Selected:

TƏŊMORFANNE 32: MUAR

Highlight

Copy