TƏŊMORFANNE 29

Yakuɓ ge dai yaŋ Laban

1Yakuɓ ur kal ge pǝ sǝr ma kǝmorcomzah'nanne. 2Eẽ cokki. Kwo lak bii tǝnyiŋ 'wahe . Ŋgaɓ pǝsǝ̃ǝ camcam sai swahra ɓo kah ahe, mor a nyira bii pǝ lak ah nyi ŋgaɓ fanne. Amma tǝsal mai mo coora zah lak bii ah ne ko a pǝ'manne. 3Ne cok mo taira ŋgaɓ fan daŋ gŋ ɓe, a fiŋra tǝsal gin zah lak bii, a nyira nyi ŋgaɓ fan zwahni, fahfal ah a so coora tǝsal ga zah lak ahe. 4Yakuɓ fii wee kǝpii fan faa: Wee pa ɓe, we ur gin kẽne? Zyiira faa: Aru za Karan. 5So fii ra: We tǝ Laban we Nakor ɓe ne? Zyiira faa: Ru tǝ ko ɓe. 6So fii ra kpǝ: A no jam ne? Faara nyi ko: A jam. Mǝlaŋ ah Rakel ko tǝ gin ne pǝsǝ̃ǝ ŋhaano. 7Yakuɓ faa: Com coŋ ɓo, cok ga yaŋ ne gwii coŋ ɓo ba ta. We nyi bii nyi pǝsǝ̃ǝ ɗao ka we so ge pii ra. 8Faara nyi ko: Ru ka gak ya, sai ka ŋgaɓ fan tai ge daŋ ɓe. Mo fiŋra tǝsal zah lak bii ge lal ɓe, ru ga nyi nyi pǝsǝ̃ǝre.

9Ne cok ka Yakuɓ tǝ faa ɓǝ nyi wee kǝpii fan faa ba, kwo Rakel tǝ gin ne pǝsǝ̃ǝ pah ahe, mor ako yee piini. 10Ne cok Yakuɓ mo kwo Rakel mǝlaŋ nan ah Laban tǝkine pǝsǝ̃ǝ nan ah Laban, Yakuɓ ge fiŋ tǝsal zah lak bii ge lal so nyi bii nyi pǝsǝ̃ǝ nan ahe. 11Yakuɓ zwǝ Rakel ne zahe, so ɓyaŋ ɓǝ, yeyee. 12Yakuɓ faa nyi Rakel ako ye zum pamme, ako ye we Rebeka. Rakel so ɗuu ge faa ɓǝ ah nyi pamme.

13Ne cok Laban mo laa ɓǝ Yakuɓ we naa mah ah mawinni, ɗuu ge zyaŋ tǝl ahe, gbǝ ko ne jolle, so zwǝ ko ne zahe, so kal ge yaŋ ne ki. Fahfal ah Yakuɓ kee ɓǝ suu ah daŋ nyi Laban. 14Laban faa nyi ko: 'Manna amo ye suu ɓe. So Yakuɓ kaa wo Laban fĩi vaŋno.

Yakuɓ joŋ yeɓ nyi Laban mor Rakel ne Lea

15Fĩi vaŋno mo joŋ o, Laban so faa nyi Yakuɓ: Koo amo ye zum ɓe mgbaŋ laŋ, ka pǝsãh ka mo joŋ yeɓ nyi me tǝkol a. Mo cuu soo mai mee soo mo mor yeɓ ɓo nyi me. 16Laban no ne wee pǝŋwǝǝ gwa. A ɗii malii ne Lea, malaŋ ɗii ne Rakel. 17Cok nǝn Lea ka pǝsãh pǝlli ya, amma mǝ Rakel pǝsãh tǝkine kee suu ah daŋ. 18Yakuɓ 'yah Rakel, faa nyi Laban: Me ga joŋ yeɓ nyi mo mor Rakel mǝlaŋ ɓo malaŋ syii rǝŋ. 19Laban faa nyi ko: Pǝram nyi ko nyi mo gin tǝ mai mee nyi nyi dǝɓ ki. Mo kaa wo ɓe o. 20Yakuɓ joŋ yeɓ mor Rakel syii rǝŋ. Amma syii ah ra nǝn ah tǝgbana zah'nan biŋ, mor a 'yah ko pǝlli.

21So comki Yakuɓ faa nyi Laban: Mo nyi mawin ɓe me kan o, mor zah'nan ɓe baa ɓe. 22Laban tai za cok ah daŋ joŋ fĩi ne ra. 23Amma ne suŋ ah Laban ɓaŋ mǝlaŋ ah Lea ge nyi nyi Yakuɓ pǝ cok Rakel. 24Laban ɓaŋ mabyak ah ma ɗii ne Zilpa nyi mǝlaŋ ah Lea ka mo joŋko yeɓ nyi. 25So zah'nan mo cee Yakuɓ mo ẽe o, ka nyaa Lea yo. So ge faa nyi Laban: Mo joŋ makẽe ɓo wo ɓe ne? Me joŋ yeɓ nyi mo mor Rakel a ne? Mo joŋ vǝrvǝr ne me mor fẽene? 26Laban zyii faa: Za sǝr ɓuu ka nyi mǝlaŋ malaŋ nyi wor kǝpel soɓ mǝlaŋ malii ya. 27Amma mo vǝr zah'nan tǝ rǝŋ ne ki ɗao, so me ga nyi maki ah nyi mo. Mo ga joŋ yeɓ nyi me mor ah syii rǝŋ kpǝ.

28Yakuɓ zyii ɓǝ ahe, vǝr zah'nan matǝ rǝŋ ne ki, so Laban ɓaŋ mǝlaŋ ah Rakel nyi ko. 29Laban ɓaŋ mabyak ah Bila nyi mǝlaŋ ah Rakel ka mo joŋko yeɓ nyi. 30Yakuɓ kan Rakel, a 'yah ko kal Lea ɓe. So joŋ yeɓ nyi nan ah mor ah syii rǝŋ kpǝ.

Wee Yakuɓ

31Masǝŋ kwo kanra syee Lea ya, so nyi byaŋ nyi ko, amma Rakel masoor o. 32Lea gbǝ ɓilli, byaŋ we worre, ɗii ne Ruben, mor faa: Masǝŋ kwo syak tǝ ɓe ɓe. Zǝzǝ̃ǝko wor ɓe ga 'yah me o. 33Gbǝ ɓil faɗa, byaŋ we worre, so faa: Masǝŋ tǝ ɓe, kanra syee ɓe ya, mor ah so nyi we mai nyi me. Ɗii ko ne Simon. 34So gbǝ ɓil kpǝ, byaŋ pǝworre, faa: Zǝzǝ̃ǝko wor ɓe ga mgbãa ki ne me, mor me bem wee wǝǝ nyi ko sai. So ɗii ko ne Lewi. 35So gbǝ ɓil byaŋ pǝwor faɗa, faa: Zǝzǝ̃ǝko me ga yii Dǝɓlii. Mor ah ɗii ko ne Yuda. Fahfal ah so byaŋ yao.

Currently Selected:

TƏŊMORFANNE 29: MUAR

Highlight

Copy