TƏŊMORFANNE 21

Ɓǝ byaŋ Isak

1Dǝɓlii foo ɓǝ mai mo faako nyi Sara, so joŋ ɓǝ ah wo Sara tǝgbana mo faako. 2Sara gbǝ ɓilli, byaŋ we wor nyi Abraham ne syii tam ah ne cok mai Masǝŋ mo cuu nyi ko. 3Abraham ɗii wel ah mai Sara mo byaŋ nyi ko ne Isak. 4Abraham daakan nyi wel ah Isak ne zah'nan nama ah tǝgbana Masǝŋ mo faa nyi ko. 5Ne cok Abraham mo byaŋ wel ah Isak, ka joŋ syii ɓo temere. 6So Sara faa: Masǝŋ joŋ ɓǝ 'nyah wo ɓe ɓe, za mai mo ga laara daŋ a ga syera syak ne me. 7So faa faɗa: Azu ye faa nyi Abraham ŋ Sara ga nyi won nyi wee ne? So me byaŋ we nyi ko ne syii tam ahe.

8Wel ah joŋ dǝɓlii, soɓ wonni. Ne cok mai Isak mo soɓ wonni, Abraham joŋ fĩi malii.

Abraham nĩi Hagar ne Ismael myahe

9Comki Ismael we Hagar mǝlaŋ sǝr Egiɓ mai Abraham mo byaŋ ne ki tǝ joŋ kyẽm ne Isak we Sara. 10So Sara mo kwo tǝ joŋra kyẽm naiko, so faa nyi Abraham: Mo nĩi mabyak mai ne wel ah daŋ kalle, mor ka mo reko yaŋ tǝkine we ɓe Isak ka. 11Ɓǝ ah nǝǝ zahzyil Abraham pǝlli mor Ismael wel ah ye ta. 12Amma Masǝŋ faa nyi Abraham: Mo soɓ ɓǝ we ɓo ne mabyak ɓo nǝǝ zahzyil ɓo ka. Ɓǝ mai Sara mo faa nyi mo daŋ mo laa zah ahe, mor morsǝ̃ǝ ɓo matǝ goŋga a ga tǝŋ ne Isak. 13Amma mǝ na mabyak ɓo laŋ, me ga joŋ zan ah pǝ'manne, mor ako ye we ɓo ta.

14Abraham ur ne zah'nan pim, ɓaŋ farel tǝkine dah bii nyi nyi Hagar rao ge tǝbǝǝsahe, nyi we nyi ko ta, soɓ fahlii nyi kalle, ge zyak kǝsyicok Beerseba haihai. 15Ne cok bii pǝ dah ah mo vǝrri, soɓ wel ah ɓoo ge mor goo. 16So kal ge kaa pel ah jaŋjaŋ pǝɗǝk nje tǝgbana dǝɓ mo 'nǝǝ guu, mor faako: Me 'yah kwan wul we ɓe ya. Kaa pel ah jaŋjaŋ, so ɓyaŋ ɓǝ kal tǝ yee. 17Masǝŋ laa kyaŋ wel ahe. So pa pee ma coksǝŋ ɗii Hagar daga coksǝŋ, fii ko: A fẽe joŋ mo ne Hagar? Mo ɗuu gal ka, mor Masǝŋ laa kyaŋ we pǝ cok ah mo gŋ ɓe. 18Mo ur o, mo ɓaŋ welle, mo gbǝ jol ahe, mor me ga joŋ za mor ah pǝ'manne. 19Masǝŋ so gbǝr nahnǝn Hagar, kwo lak bii, ge bee baa dah bii, so nyi wel ah zwǝ. 20Masǝŋ no ne wel ahe, joŋ dǝɓlii kaa kǝsyicokki, ciŋ gao. 21Kaa kǝsyicok ma ɗii ne Paran, mah ah ɓaŋ mawin gin sǝr Egiɓ nyi ko kanne.

22Ne cok moo Abimelek ge ne Pikol dǝɓlii za sal ah faa nyi Abraham: Masǝŋ no ne mo pǝ fan daŋ moo joŋni. 23Zǝzǝ̃ǝko mo haa zah nyi me pǝ tǝɗii Masǝŋ mo ka kǝǝ me tǝkine wee ɓe ne morsǝ̃ǝ ɓe ra ya. Tǝgbana me joŋ gboŋgboŋ wo ɓo, mo laŋ mo joŋ wo ɓe nai tǝkine sǝr mai mo ge kaa ɓo gŋ daŋ ta. 24Abraham zyii faa: Me ga haa.

25Amma Abraham lai Abimelek mor ɓǝ lak bii mai za yeɓ Abimelek mo nyiŋ ne swahe. 26Abimelek faa nyi ko: Me tǝ dǝɓ ma joŋ fan mai ya, mo faa nyi me ya, ame laŋ me laa taa ya, sai tǝ'nahko. 27So Abraham woo gwii tǝkine dǝǝ nyi Abimelek. Ara gwa daŋ gbǝra zahe. 28Abraham woo wee pǝsǝ̃ǝ rǝŋ rǝk nǝkahe. 29So Abimelek fii Abraham: Mo ga joŋ fẽe ne wee pǝsǝ̃ǝ matǝ rǝŋ mo rǝk ɓo nǝkah ne? 30Zyii faa: Wee pǝsǝ̃ǝ matǝ rǝŋ mo ga nyiŋ jol ɓe, a ga yea na syedowal ɓe ma cuu: me ye cii lak bii ko. 31Mor mai ɗiira cok ah ne Beerseba mor gbǝra zah kǝsyil ki gŋ.

32Fahfal mo gbǝra zah kǝsyil ki Beerseba, Abimelek ur ne Pikol dǝɓlii za sal ahe, pii soora ge sǝr Filistien. 33Abraham pee kpuu baa Beerseba, juupel wo Dǝɓlii Masǝŋ ma ga lii gŋ. 34So kaa sǝr Filistien na mowoo syii pǝpãare.

Currently Selected:

TƏŊMORFANNE 21: MUAR

Highlight

Copy