TƏŊMORFANNE 16
16
Hagar ne Ismael
1Sarai mawin Abram bem wee ne ki ya. Amma a no ne mabyakke, mǝlaŋ sǝr Egiɓ yo, a ɗii ne Hagar. 2Sarai faa nyi Abram: Mo ẽe ɗǝ, Dǝɓlii cak me bai byaŋ we ɓe. Me pǝǝ mo, mo swǝ ne mabyak ɓe, ɗah maki me ga lwaa wee mor ah no ne? So Abram laa zah Sarai. 3Ne cok Sarai mawin Abram mo ɓaŋ mabyak ah Hagar mǝlaŋ sǝr Egiɓ nyi nyi wor ah Abram kanne, ka Abram joŋ syii ɓo Kanaan jemma. 4Abram kaa ne Hagar, so gbǝ ɓilli. Ne cok mo kwoko zye gbǝ ɓil ɓo, tǝŋ syẽa mah yaŋ ahe.
5So Sarai faa nyi Abram: Ɓǝɓe' mai mo ge tǝ ɓe a pii soo ga tǝ ɓo. Me soɓ mabyak ɓe ge jol ɓo, so kwo zye ne ɓil o ɓe, ka kwan me ga nahnǝn ah na fan ki yao. Dǝɓlii yee ŋgoŋ kiita ah kǝsyil ɓe ne mo. 6Abram faa nyi Sarai: Mabyak ɓo no jol ɓo, mo joŋ ne ki tǝgbana mo 'yahe. Sarai cuu syak nyi Hagar ŋhaa ɗuu ɓǝ ah kalle.
7Angelos zyaŋ ne ki gwari ne zah biikyaŋ kǝsyicokki, biikyaŋ mai mo tǝ fahlii ga Sur. 8Faa nyi ko: Hagar mabyak Sarai, mo gee kẽe ge ne? Mo ga kẽne? Zyii faa: Me ɗuu gal mah yaŋ ɓe Sarai ganne. 9So Angelos Dǝblii faa nyi ko: Mo pii soo ge wo mah yaŋ ɓo, mo wonsuu ɓo pel ahe. 10Angelos Dǝblii so faa nyi ko: Me ga joŋ morsǝ̃ǝ ɓo pǝpãa pǝlli ŋhaa dǝɓ ka gak kee ya. 11Mo tǝ ɓe, amo ne ɓilli, mo ga byaŋ we worre, mo ɗii ko ne Ismael mor Dǝɓlii kwo syak ɓo ɓe. 12Amma dǝɓ ah a ga yea wo za tǝgbana korro cokki, a ga syiŋ za daŋ, za daŋ ga syiŋra ko ta. A ga cee suu ah cam ne wee pamme.
13Hagar faa pǝ zahzyil ahe: Ayee, me kwo Masǝŋ ɓo ye nyẽe ne? So tǝtǝl ɓe sǝŋ laŋ ta. So ɗii Dǝɓlii mai mo faa ɓǝ nyi ko ne Masǝŋ Ma Kwan Cokki. 14Mor mai a ɗiira lak biikyaŋ ah ne Lahai-Roi.
15Hagar byaŋ we wor nyi Abram, so Abram ɗii wel ah ne Ismael. 16Ne cok Hagar mo byaŋ Ismael, ka Abram joŋ syii ɓo jemma nama tǝtǝl yea.
Currently Selected:
TƏŊMORFANNE 16: MUAR
Highlight
Share
Copy
Want to have your highlights saved across all your devices? Sign up or sign in
Bible Moundang © Alliance Biblique du Tchad, 1996.
