TƏŊMORFANNE 12
12
Masǝŋ ɗii Abram
1Dǝɓlii faa nyi Abram: Mo zol soɓ sǝr ɓo ne zum ɓo tǝkine yaŋ pa ɓo, mo ge sǝr mai me ga cuu nyi mo. 2Me ga joŋ za nyi mo pǝ'manne. Me ga ẽe mo, me ga joŋ ɗii ɓo pǝyǝkki, za ki ga lwaa ẽe mor ɓo. 3Me ga ẽe za mai mo ẽera mo, me ga joŋ tǝkẽawãk tǝ za mai mo ga joŋra tǝkẽawãk tǝ ɓo. Za sǝr daŋ ga lwaara ẽe mor ɓo.
4Abram ur kal tǝgbana Dǝɓlii mo faa nyi ko. Lot laŋ kal ne ki ta. Ne cok Abram mo pǝ̃ǝ gin sǝr Karan, ka joŋ syii ɓo jemma rǝŋ tǝtǝl dappe. 5Abram ɓaŋ mawin ah Sarai tǝkine we naa mah ah Lot ne joŋ ɓǝǝ mo taira ɓo tǝkine dǝfuu mai mo lwaara ɓo Karan, ur ɓaŋra fahlii ka ga sǝr Kanaan.
6Ne cok mo daira gŋ, Abram kyãh pǝ sǝr ah ŋhaa ge dai yaŋ Sikem pǝ cok ma ɗii ne More, kpuu malii no gŋ. Ne cok ah Kanaanien kaara ɓo sǝr ahe. 7Dǝɓlii ge wo Abram faa: Me ga nyi sǝr mai nyi morsǝ̃ǝ ɓo. So Abram vuu cok joŋ syiŋ wo Dǝɓlii pǝ cok ahe. 8Fahfal ah so ur gin gŋ kal ge kah waa tǝkǝsǝŋ Betel, gbah jul ah gŋ, soɓ Betel nǝfah kǝmorcomlilli, Ai nǝfah kǝmorcomzah'nanne, vuu cok joŋ syiŋ wo Dǝɓlii pǝ cok ahe, juupel wo Dǝɓlii gŋ. 9Fahfal ah Abram so kal tǝ syel faɗa ŋhaa kal ge fah morkǝsǝŋ pǝ sǝr Kanaan.
Abram pǝ sǝr Egiɓ
10Ne cok maki ahe, koŋ wǝ wo sǝrri, Abram kal fah sǝr Egiɓ ka kaa gŋ, mor koŋ wǝ ɓo wo sǝr ah pǝlli. 11Ne cok mo ge gwari ka dan sǝr Egiɓ, faa nyi mawin ah Sarai: Me tǝ ɓe, amo ye mawin ma ne kee suu sãhe. 12Ne cok Egiɓien mo ge kwora mo ɓe, a ga faara: Mawin ah yo. A ga ira me, a soɓra mo syak ɓo. 13Me pǝǝ mo ka mo faa mo ye naa ma ɓe mor ka me kaa jam mor ɓo, ka mo ira me ge lal mor ɓo ka.
14Ne cok Abram mo ge dai Egiɓ, Egiɓien kwora mawin ah pǝsãh pǝlli. 15Zaluu goŋ Farao kwora ko, ge sãara ɓǝ ah kah Farao. So ɓaŋra ko ge yaŋ Farao ne ko. 16Farao joŋ fan wo Abram pǝsãh mor ɓǝ Sarai, ɗǝǝ pǝsǝ̃ǝre, dǝǝ, korro, byakke tǝkine njoŋnjoŋ daŋ tǝ ɓǝ ahe.
17Amma Dǝɓlii pee syem malii ge tǝ Farao tǝkine yaŋ ah daŋ mor ɓǝ Sarai mawin Abram. 18So Farao ɗii Abram, faa nyi ko: Mo joŋ ɓǝ fẽe ɓo wo ɓe mai ne? Mo faa nyi me mawin ɓo yo ya mor fẽene? 19Mor fẽe mo faa naa ma ɓe yo ŋhaa ka me so ɓaŋ ciŋ mawin ɓe ne ne? Zǝzǝ̃ǝko mawin ɓo nyeeno, mo ɓaŋ o, mo gyo. 20Farao faa nyi zan ah ka mo swǝra fahlii Abram ne mawin ah tǝkine fan ah daŋ kan ge zahsyee sǝr ki.
Currently Selected:
TƏŊMORFANNE 12: MUAR
Highlight
Share
Copy
Want to have your highlights saved across all your devices? Sign up or sign in
Bible Moundang © Alliance Biblique du Tchad, 1996.
