PƏ̃Ə ZA ISRAEL 10

Tǝzyee ge tǝ sǝr Egiɓ

1Dǝɓlii faa nyi Mosus: Mo ge wo Farao, mor me yer zahzyil ah tǝkine zahzyil za yeɓ ah ɓe, ka me joŋ dǝǝbǝǝri ɓe ra kǝsyil ɓǝǝra, 2mor ka mo faa ɓǝ fan mai me joŋ wo Egiɓien ne dǝǝbǝǝri makẽne me joŋ kǝsyil ɓǝǝ nyi wee ɓo ne wee na ɓo, ka we tǝ, ame ye Dǝɓlii.

3Mosus ne Aron gera wo Farao faara nyi ko: Dǝɓlii Masǝŋ Yahuduen faa sye: Mo ga zyii wonsuu ɓo pel ɓe nekẽne? Mo soɓ za ɓe kal ka mo ge juura pel wo ɓe. 4Mo zyii ka soɓ za ɓe kal a ɓe, tǝ'nan me ga pee tǝzyee gin tǝ sǝr ɓo. 5A ga koora sǝr kǝrikki, dǝɓ ka gak kwo sǝr a, a ga vǝr tǝcoŋ fan mai syaŋ mo ɓeɓ ya, a ga ɓeɓra kpuu ma tǝnyiŋ 'wah ɓii daŋ. 6A ga baara yaŋ ɓo ra, yaŋ za yeɓ ɓo ra tǝkine yaŋ za sǝr Egiɓ daŋ. Fan mai pa ɓo ra tǝkine pa ɓo lii ra mo kwora taa ya, daga mo kaara ge ŋhaa tǝ'nahko. So Mosus pǝ̃ǝ gin wo Farao.

7Za yeɓ Farao faara nyi ko: Dǝɓ mai ga soɓ yea na mǝmmǝǝ wo man nekẽne? Mo soɓ za nyẽe kal ka ga juupel wo Dǝɓlii Masǝŋ ɓǝǝra. Mo tǝ sõone Egiɓ tǝ ɓeɓ ya ne? 8Jinra ne Mosus ne Aron ge wo Farao, so Farao faa nyi ra: We gyo, we ge juupel wo Dǝɓlii Masǝŋ ɓiiri, amma ko za ma gan ah ye za makẽne? 9Mosus faa: Ru ga ne wee nyee ɓuu mawǝǝ ne maŋwǝǝ ne za tam ɓuu ne ŋgaɓ gwii tǝkine dǝǝ ɓuu daŋ. Mor ru ga joŋ fĩi ka yii Dǝɓlii ɓuuru. 10Farao faa nyi ra: Me haa zah ɓo ne tǝɗii Dǝɓlii, me ka soɓ we kal ne ŋwǝǝ ɓii tǝkine wee ɓii daŋ ya syaŋsyaŋ! Me tǝ ɓe, we tǝ kyeɓ ka ur ɓǝ ne me. 11We 'yah no ɓe, sai awe za wǝǝ we ge syak ɓii ka juupel wo Dǝɓlii ɓiiri. So nĩira ra gin pel Farao myahe.

12Dǝɓlii faa nyi Mosus: Mo ɓoo jol ɓo tǝ sǝr Egiɓ ka tǝzyee mo ge, ka mo ɓeɓra fan ma ciŋ tǝ sǝr mai syaŋ mo soɓ ɓo daŋ. 13Mosus ɓoo kǝndaŋ ah tǝ sǝr Egiɓ. So Dǝɓlii kuu zyak sǝŋ ge tǝ sǝr ah com moo ne suŋ ah daŋ. Zah'nan ceeni, zyak sǝŋ ge ne tǝzyeere. 14Tǝzyee zoo ge tǝ sǝr Egiɓ, cwǝǝ ge tǝ sǝr ah daŋ. Ge pǝlli no cam, tǝzyee ma na mai ge taa ya, ka fǝ̃ǝ ge nai taa yao ta. 15Ge koora sǝr daŋ kǝrik ŋhaa cok joŋ pǝfuu, ɓeɓra fan ma ciŋ tǝ sǝr ne lee kpuu daŋ mai syaŋ mo soɓ ɓe, coŋ fan mapǝ̃ǝ, koo kpuu tǝkine fãa tǝnyiŋ 'wah koo vaŋno tǝ sǝr Egiɓ ya.

16Farao hǝǝ ɗii Mosus ne Aron, faa nyi ra: Me joŋ faɓe' wo Dǝɓlii Masǝŋ ɓii ɓe, me joŋ wo ɓii ta. 17Oseni we rõm faɓe' ma nyẽeko to ɗao, we pǝǝ Dǝɓlii Masǝŋ ɓii mor ɓe ka mo ǝ̃ǝ me gin zah wul maino. 18Mosus pǝ̃ǝ gin wo Farao, pǝǝ Dǝɓlii. 19So Dǝɓlii kuu zyak mabii pǝswah pǝlli, kal ne tǝzyee pǝ mabii Syẽ, coŋ tǝzyee koo vaŋno tǝ sǝr Egiɓ ya. 20Amma Dǝɓlii yer zahzyil Farao, soɓ za Israel kal a.

Cokfuu ge tǝ sǝr Egiɓ

21Dǝɓlii faa nyi Mosus: Mo ɓaŋ jol ɓo ge sǝŋ ka cokfuu mo ge tǝ sǝr Egiɓ daŋ, cokfuu ah foo piɓɓa piɓɓa. 22Mosus ɓaŋ jol ah ge sǝŋ, cokfuu ma foo tǝ piɓɓa piɓɓa ge foo tǝ sǝr Egiɓ tǝgǝǝ zah'nan sai. 23Ka gak kwanra ki ya, dǝɓ ma ur gin pǝ cok ah ka ga cok ki kǝka ŋhaa zah'nan sai, amma za Israel kaara ma ɓǝǝ pǝ cokfãi pǝ cok kal ɓǝǝra. 24Farao ɗii Mosus faa nyi ko: We gyo, awe ne wee ɓii daŋ we ge juupel wo Dǝɓlii ɓiiri. Amma we soɓ ŋgaɓ gwii ne dǝǝ nyeeko. 25Amma Mosus faa: Ɓǝ ah mo ga joŋ kǝnah nai ɓe, ka amo ye ga nyi fan joŋ syiŋ ne fan ma joŋ syiŋ suŋwii nyi ru mor jolle, ka ru ge joŋ syiŋ wo Dǝɓlii Masǝŋ ɓuu ne ko. 26Ko ɓǝ ah ka joŋ nai laŋ ya ta, ru ga kal ne ŋgaɓ fan ɓuu daŋ, ka coŋ vaŋno ya. Mor aru ye ga syen faɓal mai ru ga joŋ syiŋ ne wo Dǝɓlii Masǝŋ ɓuu ne suu ɓuuru. Ru ɓah tan faɓal mai ru ga joŋ syiŋ ne ya ba, sai ka ru ge dai cok ah ɓe. 27Amma Dǝɓlii yer zahzyil Farao, soɓ ra kal a. 28Farao faa nyi Mosus: Mo pǝ̃ǝ gin wo ɓe, mo joŋ yella ka mo ge pel ɓe faɗa kao. Me kwo zahpel ɓo faɗa ɓe, mo ga wǝ com moo ta. 29Mosus faa: Mo faa ɓo pǝsãhe, mo ka kwo zahpel ɓe yao.

Currently Selected:

PƏ̃Ə ZA ISRAEL 10: MUAR

Highlight

Copy