2 ZA GOŊE 3

Jehoram kaa goŋ Israel

1Ne cok Yusafat mo kaa goŋ Yuda syii jemma tǝtǝl nama, Jehoram we Akaɓ kaa goŋ Israel ne ko, kaa goŋ yaŋ Samaria syii jemma tǝtǝl gwa. 2-3Joŋ faɓe' wo Dǝɓlii, syee tǝbǝlam faɓe' mai Jeroboam we Nebat mo kǝǝ za Israel joŋni, cak gin pǝ faɓe' ah ge lal a. Ne daŋ laŋ, faɓe' ah dai mǝ pam ne mam mo joŋra ya, mor dah waddǝǝ Ba'al mai pah ah mo vuu ɓo ge lalle.

Ɓǝ profeto Elisa mo faa tǝ ɓǝ kaa swah tǝ Moab

4Goŋ Moab ma ɗii ne Mesa a no ne ŋgaɓ pǝsǝ̃ǝre, syii daŋ a sǝǝ wee pǝsǝ̃ǝ nyi goŋ Israel 100.000 ne nyi syiŋ kǝbǝr nyi ko 100.000 ta. 5Amma ne cok goŋ Akaɓ mo wuu, goŋ Moab ŋwookyaŋ ne goŋ Israel. 6Ne cok ah goŋ Jehoram pǝ̃ǝ gin yaŋ Samaria ka ga ẽe tai za Israel daŋ. 7Fahfal ah so pepee ge wo Yusafat goŋ Yuda faa: Goŋ Moab ŋwookyaŋ ne me ɓe. Amo ga ne me no ka ga ruu sal ne Moab ne? Zyii ge zah ah faa: Me ganne, ame tǝgbana mo ta, za ɓe ga yeara na za ma ɓo ta, pǝr ɓe ga yea tǝgbana pǝr ɓo. 8So fifii ge zah ah faa: Na ga ɓaŋ fahlii makẽne? So zyii ge zah ah faa: Na ɓaŋ fahlii ma kǝsyicok Edom.

9Goŋ Israel ne goŋ Yuda tǝkine goŋ Edom kalra, ɓaŋra fahlii ma kikiŋ ah zah'nan rǝŋ. Bii ka za sal mo zwah tǝkine faɓal mai mo ne daŋ kǝka. 10Goŋ Israel faa: Kaiya, Dǝɓlii tai za goŋ matǝ sai rai ka soɓ ra ga nyi za Moab jolle.

11Amma Yusafat goŋ Yuda fifii faa: Profeto Dǝɓlii kǝka nyee ka na fii Dǝɓlii ne zah ah ya ne? Dǝɓ vaŋno kǝsyil za yeɓ goŋ Israel zyii faa: Elisa we Safat mai mo yea tǝ joŋ yeɓ ne Elias a no nyeeko. 12Goŋ Yuda so faa: Dǝɓ ah sye, ɓǝ faa Dǝɓlii no wol ahe. So goŋ Israel ne goŋ Yuda tǝkine goŋ Edom kalra ge wol ahe.

13Amma Elisa faa nyi goŋ Israel: Ɓǝ ɓo saaŋ me ɗǝne? Mo ge wo profetoen masǝŋ pa ɓo ne profetoen masǝŋ ma ɓo! Goŋ Israel faa nyi ko: Ka nai ya, mor Dǝɓlii tai za goŋ matǝ sai rai ɓo ka soɓ ra ga mor jol za Moab. 14Elisa faa: Me haa zah pǝ tǝɗii Dǝɓlii mai me tǝ joŋ yeɓ ahe, mo ka kǝnah mor Yusafat goŋ Yuda ya ɓe, koo ka foo ɓǝ ɓo makol laŋ me ka foo ya, soko ka so kwan mo ga nahnǝn ɓe ya. 15We ge ɗii pa woŋ tǝnjuŋ gee me ne zǝzǝ̃ǝko. Ne cok pa woŋ tǝnjuŋ mo ge mo tǝ ɗǝǝ lǝŋni, Dǝɓlii faa ɓǝ nyi Elisa.

16So faa: Dǝɓlii faa sye: Mo cir lak pǝ el mai pǝpãare. 17Mor Dǝɓlii faa: We ka kwo zyak ya, we ka kwo bam ya ta, amma ne daŋ laŋ bii ga baa el mai ka we zwah ne za ɓii tǝkine faɓal ɓii daŋ. 18Ɓǝ bii sye, ɓǝ malii ye ka wo Dǝɓlii ya, amma a ga soɓ za Moab gai we mor jolle. 19Awe ga re yaŋ maluu maswah ah ra tǝkine yaŋ mai mo syen ɓo syen daŋ. We ga cee kpuu masãh ah ra, we ga njǝk lak bii daŋ, we ga ɓeɓ 'wah masãh ah ra daŋ ne tǝsalle.

20Ne zah'nan ne cok joŋ syiŋ ma ne farelle, bii gee tǝ fahlii Edom ge nyiŋ sǝr ah daŋ.

21Ne cok Moabien mo laara za goŋ rai kŋ gera ɓo ka ruu sal ne ra, taira za ka woo bal sal zaluu tǝkine wee nyee daŋ. Ge uura zahsyee sǝrri. 22Ne cok mo pǝ̃ǝra ne zah'nan pim ge, ka com laŋ tǝ sãh tǝ bii o, Moabien mo kwora bii ma pel ɓǝǝ mo pǝsyẽ na syimmi, 23faara: Mai syim yo, za goŋ rai ikra ki ɓe ya? Yawah! Moabien, na ge woo joŋ zah sal o!

24Amma ne cok mo danra ge pǝ jul sal za Israel, za Israel urra ne ra, ikra Moabien ŋhaa ɗuura pel ɓǝǝra. So danra sǝr Moab ikra ra ge haihai. 25Dahra yaŋ maluu ge sǝŋ, zune kǝsyil ɓǝǝ daŋ a 'nǝǝ tǝsal ga pǝ 'wah masãh ahe, ŋhaa tǝsal a baa pǝ 'wah ah kǝrkǝr. Njǝkra lak bii daŋ, ceera kpuu masãh ah ge lal daŋ ta. Sai soɓra tǝsal ma yaŋ Ker-Heres to, ne daŋ laŋ, za ma 'nǝǝra tǝsal ne garviŋ ryaŋra yaŋ ah 'nǝǝra tǝsal ge gŋ ta. 26Ne cok goŋ Moab mo kwo sal kal swah ah ɓe, woo za ma ne kafahe jemma rǝŋ gera wol ahe, mor ka mo ŋgǝ̃ǝra fahlii ŋhaa ka ga dai wo goŋ Edom. Amma gakra ya. 27So ɓaŋ welii ah mai moo ga kaa kǝnah goŋ pǝ cok ahe, joŋ syiŋ suŋwii ne tǝ ɓaale. Za Israel ɓaŋra kpãh pǝlli, soɓra ko, piira soo kal fah sǝr ɓǝǝra.

Currently Selected:

2 ZA GOŊE 3: MUAR

Highlight

Copy