2 ZA GOŊE 16

Akas kaa goŋ Yuda

(2 KeeƁ 28:1-27)

1Ne cok Peka we Remalia mo kaa goŋ syii jemma tǝtǝl rǝŋ, Akas we Yutam kaa goŋ Yuda ne ko. 2Ne cok Akas mo kaa goŋ, ka joŋ syii ɓo jemma gwa. Kaa goŋ yaŋ Jerusalem syii jemma tǝtǝl yea. Joŋ fan masãh ah pel Dǝɓlii Masǝŋ ah tǝgbana pamlii David mo joŋ ya. 3Amma ɓaŋ tǝɓal za goŋ Israel mapãa ah ra, ŋhaa joŋ syiŋ suŋwii nyi masǝŋ ki cam ne wel ahe, tǝgbana zahsyiŋ maɓe' ah mo kǝsyil za mai Dǝɓlii mo nĩi ra pel za Israel myah ge ɓo lalle.#CuuƁ 12:31 4Ŋgom fan joŋ syiŋ ne tǝkine tǝǝ ɓǝrdi pǝ cok ma tǝgee ah ne tǝwaa sǝŋ tǝkine mor kpuu mapǝ̃ǝ ah ra daŋ.

5Ne cok ah Rezin goŋ sǝr Siria ne Peka we Remalia goŋ Israel gera ka ru sal ne yaŋ Jerusalem. Ge ryaŋra zah goŋ Akas, amma gak kaara swah tǝl ah ya.#Esa 7:1 6Ne cok ah laŋ, goŋ sǝr Edom nyiŋ Elat ge pǝ sǝr Edom, nĩi Yahuduen gin Elat. So Edomien gera Elat, kaara ɓo gŋ ŋhaa tǝ'nahko.

7So Akas pee za kal ge wo Tigilot-Palasar goŋ Asiria faa: Ame ye dǝɓ yeɓ ɓo, me ye we ɓo. Oseni mo ge ǝ̃ǝ me jol goŋ Siria ne jol goŋ Israel mai mo pǝ̃ǝra sal ge ɓo zah ɓe sa. 8Akas woo vãm solai ne vãm kaŋnyeeri mai mo ɓǝr yaŋ Dǝɓlii ne ma pǝ yaŋ rǝk fan goŋ daŋ pee kal ge nyi goŋ Asiria tǝkolle. 9Goŋ Asiria laa pǝǝ ahe, so pǝ̃ǝ ge ka ruu sal ne yaŋ Damaskus, so re yaŋ ahe, woo zan ah kal ge joŋ byak yaŋ Kir ne ra, so i goŋ Rezin ge lalle.

10Goŋ Akas ur kal ge yaŋ Damaskus ka ga zyaŋ ne Tigilot-Palasar goŋ Asiria. Ne cok Akas mo ge kwo cok joŋ syiŋ ma yaŋ Damaskus, lii cok joŋ syiŋ ah ne foto yeɓ ah ra daŋ pee ge nyi pa joŋzahsyiŋ Urias. 11Pa joŋzahsyiŋ Urias vuu cok joŋ syiŋ ah tǝgbana mai Akas mo pee gin yaŋ Damaskus ge. 12Ne cok goŋ mo pii soo gin yaŋ Damaskus ge, ge ẽe cok joŋ syiŋrĩ, so ge joŋ syiŋ tǝl ahe. 13Joŋ syiŋ suŋwii ne syiŋ ma joŋ ne farelle, so syee syiŋ fazwan ah ge tǝl ahe, so mee syim fan ma zyeɓ ɓǝ jam ge tǝ cok joŋ syiŋrĩ. 14Amma ɓaŋ cok joŋ syiŋ ma vãm syẽ mai mo kan ɓo pel yaŋ Masǝŋ, so ɓaŋ gin cok ah mo yea gŋ kǝsyil cok joŋ syiŋ mafuu ne zahfah yaŋ Masǝŋ kan ge fah kǝsǝŋ yaŋ Masǝŋ.#Pǝ̃ǝ 27:1-2; 2 KeeƁ 4:1 15Goŋ Akas so faa nyi pa joŋzahsyiŋ Urias: Mo joŋ syiŋ suŋwii ma ne zah'nan tǝ cok joŋ syiŋ malii, tǝkine farel ma nyi mor lilli, ne syiŋ suŋwii mǝ goŋ ne farel ahe, ne syiŋ suŋwii mǝ za sǝr ah daŋ ne farel mai mo nyira tǝkine fazwan ɓǝǝra. Amma mo mee syim syiŋ suŋwii ta, tǝkine mǝ fan ma ŋgom joŋ syiŋ ne daŋ ge tǝl ahe. Amma ɓǝ mǝ cok joŋ syiŋ ma vãm syẽ sye, me ga soɓ cok ah mor ka fii ɓǝ zah Masǝŋ gŋ. 16Pa joŋzahsyiŋ Urias joŋ tǝgbana mai goŋ Akas mo faa nyi ko daŋ.

17Goŋ Akas wǝǝ fan mai mo ɓaŋ ge ɓo sǝŋ ge sǝŋ, so woo tahsah maluu mo tǝl ah ge lalle. Ɗǝr Mabii vãm syẽ mai mo tǝ dǝǝ ma vãm syẽ mai mo mor ah sǝŋ ge sǝŋ ta, so kan ge tǝ fan vuu mai mor ah mo kpii ɓo ne tǝsalle.#1 ZaG 7:23-39; 2 KeeƁ 4:2-6 18Fer fahlii mai mo zyeɓra ɓo mor ɓǝ com 'yakke, ne mai mo zyeɓra ge dai ɓo ɓǝr yaŋ Masǝŋ tǝkine mai goŋ moo syee gŋ ga lal daŋ, mor ɓǝ goŋ Asiria.

19Tǝcoŋ ɓǝ Akas ne yeɓ ah daŋ ŋwǝǝ ɓo pǝ ɗerewol Ɓǝ Za Goŋ Yuda. 20So Akas ge wuu, ciira ko kah pah ah ra pǝ yaŋ David. Wel ah Ezekias kaa goŋ pǝ cok ahe.#Esa 14:28

Currently Selected:

2 ZA GOŊE 16: MUAR

Highlight

Copy