2 ZA GOŊE 10

Jehu vǝr za yaŋ Akaɓ ge lal tǝɗe'

1Ne cok ah ka wee Akaɓ mawǝǝ no yaŋ Samaria jemma rǝŋ. Jehu ŋwǝǝ leetǝr ge nyi zaluu yaŋ Samaria ne zaluu pel zana, tǝkine wo za ma wol wee Akaɓ, faa gŋ: 2Leetǝr mai mo ge dai we ɓe, ka we foo ɓǝ wee dǝɓlii ɓii mai mo no wo ɓiiri, ne muŋta sal ah ra ne pǝr ah ra daŋ. Awe no ne yaŋ maswah ah ne fan salle. 3Sai we nǝǝ dǝɓ masãh ah ne ma ne tǝtǝl kǝsyil wee dǝɓlii ɓiiri, ka we kan goŋ ne ki pǝ cok pah ahe. So ka we ruu gur sal mor za yaŋ dǝɓlii ɓii o. 4Amma gal re ra pǝlli, faara: Za goŋ matǝ gwa rai gak uura pel ah ya, so a joŋ ɗii ka ma man na gak uu pel ah ne? 5So dǝɓlii faadal ne dǝɓlii sǝr ah ne zaluu tǝkine za ma wol wee Akaɓ peera pee ge wo Jehu faara nyi ko: Aru ciŋ za yeɓ ɓo ɓe, ru ga joŋ fan mai daŋ moo ga faa nyi ru. Ru ka ɓaŋ dǝɓ ki kan goŋ ne ya. Mo joŋ na mai zahzyil ɓo mo 'yahe.

6So Jehu ŋwǝǝ leetǝr patǝ gwa ah wo ɓǝǝ faa: We no ne me ɓe, wee ga laa ɓǝ faa ɓe ɓe, we ŋgom tǝtǝl wee dǝɓlii ɓii ge lalle, ka we ge lwaa me ne yaŋ Jezereel tǝ'nan ne cok naiko. Amma ka wee goŋ mawǝǝ ah jemma rǝŋ no wo zaluu yaŋ ah ne wo za ma wol ɓǝǝra. 7Ne cok leetǝr ah mo ge dai ra, woora wee goŋ mawǝǝ jemma rǝŋ daŋ ŋgomra tǝtǝl ɓǝǝra, so rǝkra ge pǝ keere, peera kal ge nyi Jehu yaŋ Jezereel. 8Dǝɓ pee vaŋno ge faa nyi Jehu: Gera ne tǝtǝl wee goŋ kŋ ɓe. Jehu faa: We rǝk ne ɓal ah camcam gwa zahfah yaŋ lal ka zah'nan mo cee ɗao. 9Ne cok zah'nan mo ceeni, Jehu pǝ̃ǝ ge lal ge uu faa nyi zana: Awe ka ne ɓǝ ki tǝtǝl a. Ame ur ɓǝ ne dǝɓlii ɓe Akaɓ, me i ko pǝ wulli. Amma azu ye ik wee marai daŋ ne? 10Me 'yah we tǝ, ɓǝ mai Dǝɓlii mo faa ɓo tǝ yaŋ Akaɓ, ɓǝ ah ka lee ga sǝŋ tǝkol bai joŋ ya, Dǝɓlii joŋ fan mai mo faako ɓǝ ah nyi dǝɓ yeɓ ah Elias. 11So Jehu ik tǝcoŋ za yaŋ Akaɓ mai mo yaŋ Jezereel daŋ ge lalle, zaluu ah ra, ne bai ah ra tǝkine za joŋzahsyiŋ ah ra daŋ, coŋ zan ah ra koo vaŋno laŋ ya.#Hos 1:4

12Fahfal ah Jehu ur kal ge yaŋ Samaria. Ne cok mo ge dai yaŋ Bet-Eket mǝ za kǝpii fanne, 13Jehu zyaŋ ne wee pah Akazia goŋ Yuda. Fii ra faa: Awe ye za kẽne? Zyiira zah ah faa: Aru ye wee pah Akazia. Aru tǝ ga haozah wo wee goŋ mawǝǝ ne wee mawin goŋe. 14Jehu faa: We gbah ra ne nahnǝnni. Gbahra ra ne nahnǝnni, so ŋgomra ra ge lal zah lak bii Bet-Eket mai bii mo ka gŋ ya, pãa zan ah jemma nai tǝtǝl gwa. Soɓ dǝɓ kǝsyil ɓǝǝ koo vaŋno laŋ ya.

15Ne cok mo ur gin cok ahe, ge zyaŋ ne Yunadaɓ we Rekaɓ tǝ gin wol ahe. Jehu haozah wol ahe, so fii ko faa: Zahzyil ɓo ne me ne? Zahzyil ɓo wo ɓe ne goŋga tǝgbana ma ɓe mo ne mo ne? Yunadaɓ zyii faa: Oho, a naiko. Jehu faa: Mo nai ɓe, mo nyi jol gee me. Yunadaɓ nyi jol ge nyi ko. Jehu ɓaŋ ko kan ge kah ah tǝ muŋta pǝr ahe. 16Faa: Mo ge ne me, ka mo ẽe tǝwon ɓe me ne mor Dǝɓlii ko o. Ɓaŋ ko tǝ muŋta ah kal ne ko. 17Ne cok mo ge dai yaŋ Samaria, ik tǝcoŋ za Akaɓ mai mo no yaŋ Samaria ge lal daŋ belbelle. Vǝr ra tǝɗe', tǝgbana ɓǝ mai Dǝɓlii mo faa nyi Elias.

Jehu vǝr za ma syee mor Ba'al

18So Jehu tai za daŋ faa nyi ra: Akaɓ syee mor Ba'al ɓo biŋ, amma Jehu ga syee mor ah pǝlli. 19Zǝzǝ̃ǝ mai we ɗii profetoen Ba'al ne za yeɓ ah ra tǝkine za joŋzahsyiŋ ah ra daŋ gee me. Koo dǝɓ vaŋno kǝsyil ɓǝǝ mo coŋ bai gin ka. Mor me ga joŋ syiŋ malii ah wo Ba'al. Dǝɓ mo ge ya ɓe, tǝtǝl dǝɓ ah ka yea sǝŋ ya. Amma Jehu joŋ ɓǝ ah ne yella, mor ka vǝr za ma syee mor Ba'al tǝɗe'.

20Jehu so faa: We lai ɓǝ joŋ fĩi ma yii Ba'al ne ko. So laira ɓǝ ahe. 21Jehu pepee ge pǝ sǝr Israel daŋ. Za ma syeera mor Ba'al daŋ gera, dǝɓ mai mo ge ya kǝka. Danra ge yaŋ juupel Ba'al, yaŋ ah baa ne lii ah daŋ kǝrkǝrri. 22Jehu faa nyi dǝɓ mai ako ye moo byak mbǝro juupelle: Mo woo mbǝro ge nyi za ma syee mor Ba'al ne ko. Dǝɓ ah woo mbǝro pǝ̃ǝ ge nyi ra ne ko. 23So Jehu ne Yunadaɓ we Rekaɓ danra ge ɓǝr yaŋ Ba'al. Jehu faa nyi za ma syee mor Ba'al: We foo za vaŋno vaŋno daŋ, mor ka koo dǝɓ vaŋno kǝsyil za ma syee mor Dǝɓlii mo yea kǝsyil ɓii ka. Sai za ma syee mor Ba'al ye mo yea ciicii to.

24So danra ge ɓǝr yaŋ ka joŋ syiŋrĩ, tǝkine joŋ syiŋ suŋwii nyi Ba'al. Amma ka Jehu woo za rǝk ɓo lal jemma nama, faa nyi ra: Dǝɓ mai mo kal soɓ dǝɓ vaŋno kǝsyil za mai me soɓra ɓo jol ɓii ǝ̃ǝ kal ɓe, ka pah ah a ga wǝ pǝ cok dǝɓ ahe. 25Ne cok Jehu mo vǝr joŋ syiŋ suŋwii, faa nyi sooje ma byak cok tǝkine zaluu sooje: We dan ge ɓǝr yaŋ, we ik ra pǝ wulli, we soɓ dǝɓ vaŋno pǝ̃ǝ ka.

Sooje ne zaluu sooje ikra ra ne kafahe, so woora wul ɓǝǝ myah ge lalle. 26So jinra kal ge ɓǝr yaŋ Ba'al ɓaŋra kpuusǝŋ masǝŋ ki cam ma ɓǝr yaŋ Ba'al pǝ̃ǝ ge lal ne ko, ɓoora wii tǝl ahe, 27so dahra yaŋ Ba'al ge sǝŋ. Joŋra cok ah ɓo tǝgbana lak mǝr ŋhaa tǝ'nahko.

28Jehu vǝr ɓǝ Ba'al kǝsyil za Israel naiko. 29Amma soɓ faɓe' Jeroboam we Nebat mo kǝǝ za Israel joŋ ɓaa kŋ ya, woo wee dǝǝ ma vãm kaŋnyeeri mai mo Betel ne Dan myah ge lal a.#1 ZaG 12:28-30 30Dǝɓlii faa nyi Jehu: Amo joŋ fan mai me tǝ 'yahe, amo joŋ za yaŋ Akaɓ tǝgbana zahzyil ɓe mo 'yahni, mor ahe, wee ɓo ga kaa tǝ fakal goŋ Israel ŋhaa a dai zahŋhǝǝtǝ̃ǝ patǝ nai ahe. 31Amma Jehu ɓaŋ syiŋ ka syee mor ɓǝ lai Dǝɓlii Masǝŋ Israel ne zahzyil ah daŋ pǝsãh ya, soɓ faɓe' mai Jeroboam mo kǝǝ za Israel joŋ ɓaa kŋ ya.

32Ne zah'nan ah Dǝɓlii tǝŋ tǝr sǝr za Israel ga falle. Hazayel ɗaŋ yaŋ za Israel pǝ sǝr ɓǝǝ cok camcam daŋ, 33tǝŋ daga Yordan nǝfah kǝmorcomzah'nanne, ne sǝr Giliat ne lii ah daŋ, Gadien ne Rubenien tǝkine za Manasse, so daga Aroyer mai mo tǝkee el Arnon, ne Giliat ne Basan gwa daŋ.

34Tǝcoŋ ɓǝ Jehu, tǝkine yeɓ swah ah mo joŋ daŋ ŋwǝǝ ɓo pǝ ɗerewol Ɓǝ Za Goŋ Israel. 35Jehu wuu, ciira ko yaŋ Samaria, wel ah Joakas kaa goŋ pǝ cok ahe. 36Jehu kaa goŋ tǝ za Israel yaŋ Samaria syii jemma gwa tǝtǝl nama.

Currently Selected:

2 ZA GOŊE 10: MUAR

Highlight

Copy